Babyor ni Ke Yib ko Fare Ulung ni Ma Pow’iyey

Ngak e piin nib t’uf Jehovah Got rorad nge Thin rok, ni aram e Bible:

I gaar Jesus: “Bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” (John 8:32) Am lemnag rogon e lem rom u nap’an nim pirieg e tin riyul’ u Bible ko yay nsom’on! Kam felfelan’ ni kam nang nrayog ni ngad nanged e tin riyul’ ni yugu aram rogon ni gad be par u lan ba fayleng nib sug ko ban.​—2 Timothy 3:1.

Baadag Jehovah Got ni ngad nanged e tin riyul’. Ma bochan nib t’uf e girdi’ rodad, ma aram fan ni gad baadag ni ngkud weliyed e tin riyul’ ngorad. Machane ka boor ban’en nib muun ko liyor rodad ngak Got. Thingar da rin’ed e tin rayog rodad ni ngad ngongolgad ni bod rogon e piin Kristiano ni bochan e ri gad be tayfan e pi kenggin e motochiyel rok Jehovah. I weliy Jesus murung’agen reb e kanawo’ nib ga’ fan nrayog ni ngad micheged riy ngak Got nib t’uf rodad. I gaar: “Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.”​—John 15:10.

Jesus e rib t’uf e Chitamangin rok, ma ma rin’ urngin ban’en ni ma yog e Chitamangin ngak ni nge rin’. Faan gad ra folwok rok Jesus u rogon e ngongol rodad, ma aram e gad ra t’uf rok Jehovah ma gad pirieg e felfelan’. I yog Jesus ni faan ga ra maruwel ko tin kam nang e chiney ma ‘ra um par ni gab felfelan’!’​—John 13:17.

Gamad be athapeg nra ayuwegem e re ke babyor ney ni ngam fil rogon ni ngaum ngongol nib puluw ko tin riyul’ u lan e Bible me yag nim mang fager rok Got. Gamad be yibilay ni nge gel e t’ufeg rom ngak Got, mu ‘um par ni gab t’uf rok . . . me pi’ e yafos ndariy n’umngin nap’an ngom.’​—Jude 21.