Dab Mu Pag e T’ufeg Rom ni Nge War

1, 2. (a) Som’on ni yog Jesus fapi thin u Matthew 24:12, ma mini’ e piin ni yog ni fan ngorad? (b) Uw rogon ni ke m’ug ko fare babyor ni Acts ni yooren e Kristiano ko bin som’on e chibog e ur daged e t’ufeg ni gubin ngiyal’? (Mu guy e sasing ni bay u tabolngin e re article ney.)

BANG ko fare pow ni yog Jesus u murung’agen e “ngiyal’ ni ke chugur nga tomuren e re m’ag ney” e aram e yog ni “rogon nib t’uf be’ rok be’ e bayi meewar.” (Matt. 24:3, NW, 12) Nap’an e bin som’on e chibog, ma pi Jew ni u rogned ni yad girdien Got e ra paged e t’ufeg rorad ngak ni nge meewar.

² Machane, yooren e Kristiano e ngiyal’ nem e ur tedan’rad i “machibnag ngak e girdi’ fare Thin Nib Fel’ ni murung’agen Jesus, ni ir fare Messiah,” ma yad be dag nib t’uf Got rorad, nge pi walagrad ni Kristiano, nge piin ndawor nanged e tin riyul’. (Acts 2:44-47; 5:42) Machane, yugu aram rogon ma immoy boch e Kristiano ko bin som’on e chibog nra paged e t’ufeg rorad ni nge war.

3. Mang boch ban’en ni sana ir e k’aring e t’ufeg rok boch e Kristiano ni nge war?

³ Tomuren nni faseg Jesus ko yam’, me yog ngak e pi Kristiano ni yad ma par u Efesus ko bin som’on e chibog ni gaar: “Baaray e n’en ndabug [romed]: da kug t’uf [romed] e chiney ni bod fanag t’uf [romed] ko som’on.” (Rev. 2:4) Mang reb i fan ni buch e re n’ey? Pi gachalpen Kristus nem e sana rayog ni ke af e lem ko girdi’ nu fayleng ngorad e ngiyal’ nem. (Efe. 2:2, 3) Re mach nu Efesus nem ko bin som’on e chibog e taareb rogon nga boor e mach e ngiyal’ ney ni kari sug ko ngongol nib kireb. Re mach nem e ba mach nrib fel’ rogon, ma girdi’ riy e yigoo chugum nib tolang puluwon e yad ma guy rogon ni nge yag ngorad, ma yigoo toffan nge pi n’en ni yad baadag e yad ma rin’, ma yad ma guy rogon ni nge fel’ e par rorad. Kar pared ni yigoo pi n’en ni yad baadag e yad be rin’ ko bin ni ngar daged nib t’uf Got nge girdi’ rorad. Maku reb e, boor e girdi’ u rom ni yad ma un ko ngongol ndarngal ma darur ted fan e motochiyel rok Got.

4. (a) Mang boch e kanawo’ ni ke war e t’ufeg ko girdi’ riy e ngiyal’ ney? (b) Mang dalip e kanawo’ nrayog ni ngan skengnag e t’ufeg rodad riy?

⁴ Fare yiiy rok Jesus u murung’agen e t’ufeg nra war e ku bay rogon ko ngiyal’ ney ni gad bay riy. Girdi’ e ngiyal’ ney e kari war e t’ufeg rorad ngak Got. Bokum milyon e girdi’ ni yad ma sap ko pi ulung ni ke sunmiy e girdi’ ni nge pithig e magawon rorad ko bin ni ngar sapgad ngak Got ni nge ayuwegrad. Ere, aram fan ni piin ndarur pigpiggad ngak Jehovah e be war e t’ufeg rorad i yan. Mus ko tin riyul’ e Kristiano e ngiyal’ ney nrayog ni ngar paged e t’ufeg rorad ni nge war ni bod e n’en ni buch ko ulung u Efesus ko bin som’on e chibog. Ere, chiney e ngad weliyed dalip e kanawo’ nrayog ni ngan skengnag e t’ufeg rodad riy: (1) T’ufeg rodad ngak Jehovah, (2) t’ufeg rodad ko tin riyul’ u lan e Bible, (3) nge t’ufeg rodad ngak pi walagdad.

T’UFEG RODAD NGAK JEHOVAH

5. Mang fan nthingari t’uf Got rodad?

⁵ Rofen nem ni weliy Jesus murung’agen e t’ufeg nra war, e ki tamilangnag u m’on riy murung’agen e bin th’abi ga’ fan e t’ufeg. I yog ni gaar: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel.” (Matt. 22:37, 38) Arrogon, faanra rib t’uf Jehovah rodad, ma aram e ra ayuwegdad ni ngad folgad ko pi motochiyel rok, mu ud athamgilgad, ma gad be fanenikay e kireb. (Mu beeg e Psalm 97:10.a) Machane, ma gay Satan nge re fayleng rok ney rogon ni nge k’aringdad ni nge war e t’ufeg rodad ngak Got.

6. Mang e ma buch u nap’an nra war e t’ufeg rok be’ ngak Got?

⁶ Girdi’ nu fayleng e de puluw rogon ni yad ma lemnag murung’agen e t’ufeg. Boor e girdi’ e yigoo “yad e yad be lemnagrad” ko bin ni nge t’uf Got rorad. (2 Tim. 3:2) Re fayleng ney ni be gagiyegnag Satan e ba ga’ ni ma k’aring e girdi’ ni nge m’on u wan’rad e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay.” (1 John 2:16) I ginang apostal Paul e piin Kristiano u murung’agen e n’en nra buch ni faanra ur pared ni yad be rin’ e pi n’en ni be ar’arnag e dowef rorad ni gaar: “Ra par lanin’med ni tin ni ba adag e dowef romed e ir e be gagiyegnag, ma wenegan nra yib e yam’ . . . [ni bochan e] be’ e ra mang toogor rok Got ni faanra par laniyan’ ni tin nib kireb ni be yim’ ni bochan e ir e be gagiyegnag.” (Rom. 8:6, 7) Arrogon, piin ni kar pared ni yigoo chugum e ir e ba m’on u wan’rad ara kar pared ni yigoo pi n’en ni be ar’arnag e dowef rorad e ir e yad be rin’ e rib gel e kireban’ ni ma yib ngorad.​—1 Kor. 6:18; 1 Tim. 6:9, 10.

7. Mang boch ban’en ni bay e riya’ riy ni ma mada’nag e piin Kristiano e ngiyal’ ney?

⁷ Boor e piin nde mich Got u wan’rad, nge piin ni be maruwar Got u wan’rad, nge piin nib mich u wan’rad ni ke sum e girdi’ ko gamanman e yad ma gay rogon ni ngar k’aringed boch e girdi’ ni nge dabki t’uf Got rorad ara nge dabki mich u wan’rad ni bay Got. Kar k’aringed boor e girdi’ ni nge mich u wan’rad ni kemus ni be’ nib balyang ara dariy ban’en ni manang e ba mich u wan’ ni bay Be’ ni Ke Sunmiy urngin ban’en. Maku reb e, boor e girdi’ ni yad ma tayfan e piin llowan’ nib pag rogon, ma re n’ey e ma k’aring e girdi’ ni nge dab kur ted fan e En ni Ke Sunmiy urngin ban’en. (Rom. 1:25) Faan gad ra motoyil ko pi machib ney, ma rayog ni ngad paloggad rok Jehovah, me war e t’ufeg rodad.​—Heb. 3:12.

8. (a) Mang boch e magawon ni ma mada’nag boor e tapigpig rok Jehovah nrayog ni nge muleg lanin’rad? (b) Mang e be yog e Psalm 136 nrayog ni nge pagan’dad ngay?

⁸ Faanra da paged gadad ni nge mulan’dad maku rayog ni nge war e michan’ nge t’ufeg rodad ngak Got. Gad gubin ni gad ma mada’nag boch ban’en u lan e re fayleng ney ni be gagiyegnag Satan nrayog ni nge k’aringdad ni nge mulan’dad. (1 John 5:19) Sana rayog ni gad be mada’nag boch e magawon e chiney ni bochan e kad pilibthirgad, ara gad ba m’ar, ara gad be mada’nag e magawon ko salpiy. Fa reb e rayog ni be kireban’dad ni bochan e de yag ni ngad rin’ed boch ban’en nib fel’ rogon ni bod rogon ni gad baadag, ara de yan i aw boch ban’en nga rogon nda lemnaged ko som’on. Yugu aram rogon, ma susun e dab da paged e pi magawon ney ara lem ni aray rogon ni nge k’aringdad ni ngad lemnaged ni ke pagdad Jehovah. Ya susun e ngad fal’eged i lemnag boch e thin nrayog ni nge pagan’dad ngay ni be weliy murung’agen e t’ufeg rok Jehovah ngodad. Rayog ni ngad pirieged boch e pi thin ney ko Psalm 136:23 (BT) ni be gaar: “De pagtildad ko ngiyal’ nda meewargad; t’ufeg rok e ba manemus.” Arrogon, gubin ngiyal’ ni ma dag Jehovah e t’ufeg nib yul’yul’ ngak e pi tapigpig rok. Ere, rayog ni nge pagan’dad nra rung’ag e ‘meybil rodad’ ni gad be man ayuw me fulweg taban.​—Ps. 116:1; 136:24-26.

9. Mang e pi’ gelngin Paul nge yag ni par nib t’uf Got rok?

⁹ Bochan ni i fal’eg Paul i lemnag rogon e ayuw ni i pi’ Jehovah ngak, ma aram e n’en ni ayuweg ni nge par nib gel e michan’ rok ni bod rogon fare psalmist. I yoloy ni gaar: “I Somol e ir e be ayuwegeg, ere dab gu tamdag! Mang e rayog ni nge rin’ e girdi’ ngog?” (Heb. 13:6) Pagan’ rok Paul ngak Jehovah e aram e n’en ni ayuweg ni nge athamgil u fithik’ boch e magawon ni i mada’nag. De pag e pi magawon nem ni nge k’aring ni nge mulan’. Bin riyul’ riy e, nap’an ni immoy u kalbus, me yoloy boch e babyor nge yan nga boch e ulung ni nge pi’ e athamgil nga lanin’rad. (Efe. 4:1; Fil. 1:7; Filem. 1) Arrogon, demtrug gelngin e magawon ni i mada’nag Paul, ma gubin ngiyal’ ni i guy rogon ni nge par nib t’uf Got rok. Mang e ayuweg ni nge rin’ e re n’ey? I par ni be taga’ ngak fare “Got ni urngin mit e ayuw me ir e be yib rok ngodad! Ma [ir e ma] ayuwegdad u urngin e gafgow nge kireban’ ni ma yib ngodad.” (2 Kor. 1:3, 4) Uw rogon nrayog ni ngad folwokgad rok Paul me par nib t’uf Jehovah rodad?

10. Uw rogon nrayog ni nge par e t’ufeg rodad ngak Jehovah nib gel?

¹⁰ Reb e kanawo’ ni nge par nib gel e t’ufeg rodad riy ngak Jehovah e ba puluw ko n’en ni weliy Paul. I yol ngak e piin taareb e michan’ rorad ni gaar: “Um meybilgad ni gubin ngiyal’.” Boch nga tomuren miki yoloy bayay ni gaar: “Um meybilgad ni gubin ngiyal’.” (1 Thess. 5:17; Rom. 12:12) Numon ni gad ma tay ngak Got u daken e meybil e aram e n’en nra ayuwegdad ni nge par nib chugur e tha’ u thildad Got. (Ps. 86:3) Ere, faanra ud ted e tayim ni ngad weliyed ngak Jehovah urngin e pi n’en ni bay u lanin’dad, ma rayog ni nge ayuwegdad ni ngad chugurgad ngak ni ir e Chitamangidad ni bay u tharmiy ni ir e En ni ma “fulweg taban e meybil.” (Ps. 65:2) Maku reb e, nap’an ni gad ra nang ni ke fulweg Jehovah taban e meybil rodad, ma aram e ra gel e t’ufeg rodad ngak. Re n’ey e ra ayuwegdad ni ngad nanged nib “chugur ngak urngin e piin ni yad ma non ngak.” (Ps. 145:18) Faanra ba pagan’dad ko t’ufeg nge ayuw rok Jehovah ma ra ayuwegdad ni ngad athamgilgad u fithik’ boch ban’en nrayog ni ngad mada’naged boch nga m’on nra skengnag rogon e yul’yul’ rodad.

T’UFEG RODAD KO TIN RIYUL’ U LAN E BIBLE

11, 12. Uw rogon ni ngari ga’ fan u wan’dad e tin riyul’ ni kad filed u lan e Bible?

¹¹ Gad e piin Kristiano e rib ga’ fan e tin riyul’ u wan’dad. Thin rok Got e aram e gin ni bay e tin riyul’ riy. Nap’an ni be meybil Jesus ko Chitamangin, me yog ni gaar: “Mu fil ngorad e tin nib riyul’, ni er e thin rom.” (John 17:17) Ere, ra nge ga’ fan e tin riyul’ u wan’dad, ma som’on e thingari yag e bin nib puluw e tamilangan’ ngodad ni bay u lan e Thin rok Got. (Kol. 1:10) Machane, de gaman ni kemus ni nge yag e tamilangan’ ngodad, ya ku bay boch ban’en nib t’uf ni ngad rin’ed. Mu tay fanam i yan u rogon ni ke ayuwegdad e en ni yoloy e Psalm 119 ni ngad nanged e n’en nri be yip’ fan ni nge ga’ fan u wan’dad e tin riyul’ u lan e Bible. (Mu beeg e Psalm 119:97-100.) Ba polo’ reb e rran ni gad ma fal’eg i lemnag e n’en ni kad beeged u lan e Bible, fa? Faan gad ra fal’eg i lemnag rogon nra yib angin ngodad ni faan gad ra fol ko pi n’en ni kad filed u lan e Bible, ma aram e ra gel feni ga’ fan e tin riyul’ u lan e Bible u wan’dad.

¹² I ulul fare psalmist ngay ni gaar: “Rib athib lamen e thin rom ni ku gu ri’; kab athib ko honey!” (Ps. 119:103, BT) Pi babyor ni ke ngongliy e ulung rok Got nib puluw e thin riy ko Bible e rayog ni ngan taareb rogonnag ko ggan nrib fel’ lamen. Nap’an ni gad ra kay ba mit e ggan ni kan ngongliy nrib fel’ lamen ma ri gad ma fek e tayim rodad ni bochan e gad baadag ni ngar da nanged lamen e n’en ni gad be kay. Ku arrogon e thin rok Got nib t’uf ni ngad ted e tayim ni ngad filed. Faan gad ra rin’ ni aray rogon ma aram e rayog ni nge yib angin ngodad e “thin nib sumunguy [“thin nib fel’,” NW]” mab riyul’ ni kad filed, me mo’maw’ ni ngad paged talin me yag ni ngad fanayed ni ngad ayuweged yugu boch e girdi’ ngay.​—Ekl. 12:10, BT.

13. Mang e ayuweg Jeremiah ni ngari ga’ fan e Thin rok Got u wan’, ma mang angin ni yib ngak?

¹³ Ba ga’ fan u wan’ Jeremiah ni profet e tin riyul’ ni ke fil u lan e Thin rok Got. Mu tay fanam i yan u rogon ni ke yib angin e Thin rok Got ngak. I yog ni gaar: “Mu non ngog, mu gu rung’ag urngin bug e thin ni mog. Somol ni Got ni Gubin ma Rayog Rom, i gur e mmil suwog ngom, ere thin rom e be fal’eg lanin’ug ma be pi’ e felfelan’ ngog.” (Jer. 15:16) I par Jeremiah nga i fal’eg i lemnag e thin rok Got, ma aram e n’en ni k’aring ni ngari ga’ fan u wan’. Aram e n’en ni ayuweg ni ngari ga’ fan u wan’ e tow’ath ni pi’ Jehovah ngak ni aram e nge fek fithingan i yan ko girdi’ ma be weliy e thin rok ngorad. Ere, uw rogodad? Ma k’aringdad e t’ufeg rodad ko tin riyul’ u Bible ni ngad nanged feni ga’ fan e re tow’ath ney ni bay rodad, ni aram e ngad feked fithingan Got i yan ko girdi’, ma gad weliy murung’agen Gil’ilungun ngorad e ngiyal’ ney ko tin tomuren e rran, fa?

14. Uw rogon nrayog ni ngari ga’ fan e tin riyul’ u Bible u wan’dad?

¹⁴ Gad manang nib t’uf ni ngaud beeged e Bible nge pi babyor rodad ni yima ngongliy nib puluw e thin riy ko Bible. Machane, ku mang boch ban’en nra ayuwegdad ni ngari ga’ fan u wan’dad e tin riyul’ u lan e Bible? Ba t’uf ni ngad uned ko pi muulung ni gad ma tay ni gubin ngiyal’. Pi thin nu Bible ni gad ma fil u lan Fare Wulyang ko Damit u gubin e wik e aram reb e kanawo’ nib ga’ fan ni ma skulnagdad Jehovah riy. Ere, faanra nge yib angin ngodad e pi n’en ni gad ma fil u nap’an e Fol Wulyang ko Damit, ma aram e ba t’uf ni ngad fal’eged i fil e babyor rodad u m’on riy. Reb e kanawo’ nrayog ni ngad rin’ed e re n’ey riy e aram e ngad beeged gubin e thin nu Bible ni bay ko article ni yira fil. Chiney e rayog ni ngan downloadnag Fare Wulyang ko Damit ko fare website rodad ni jw.org/yap ara ni beeg ko fare JW Library app ni kan pilyeg nga boor mit e thin. Re ke babyor ney e bay boch e format ni kan tay ngay nnap’an ni gad ra beeg ko cell phone ara tablet rodad mab mom ni ngkud beeged e thin nu Bible riy. Machane, demtrug rogon ni kad dugliyed ni ngad filed reb nge reb e pi article ni yima fil, machane faan gad ra fal’eg i beeg e pi thin nu Bible ni bay riy ma gad fal’eg i lemnag, ma aram e rra ga’ fan u wan’dad e tin riyul’ ni bay u lan e Bible.​—Mu beeg e Psalm 1:2.

T’UFEG RODAD NGAK PI WALAGDAD

15, 16. (a) Mang e ba milfan ngodad nrogon ni bay ko John 13:34, 35? (b) Uw rogon nib peth e t’ufeg rodad ngak pi walagdad ko t’ufeg rodad ngak Got nge tin riyul’ u lan e Bible?

¹⁵ Nap’an e bin tomur e nep’ ni immoy Jesus u fayleng, ma aram me gaar ngak pi gachalpen: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:34, 35.

¹⁶ T’ufeg rodad ngak pi walagdad e ba peth ko t’ufeg rodad ngak Jehovah. Bin riyul’ riy e, dabiyog ni nge t’uf pi walagdad rodad ni faanra de t’uf Jehovah rodad, maku dabiyog ni nge t’uf Jehovah rodad ni faanra de t’uf pi walagdad rodad. I yoloy apostal John ni gaar: “Dabiyog ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 4:20) Maku reb e, t’ufeg rodad ngak Jehovah nge pi walagdad e ba peth ko t’ufeg rodad ko tin riyul’ u lan e Bible. Mang fan? Ya faanra ba t’uf rodad e tin riyul’ ni bay u lan e Bible, ma aram e n’en nra k’aringdad ni ngad folgad ko pi motochiyel ni bay u lan e Bible ni be yog ni nge t’uf Got nge pi walagdad rodad.​—1 Pet. 1:22; 1 John 4:21.

17. Mang boch e kanawo’ nrayog ni ngad daged e t’ufeg riy?

¹⁷ Mu beeg e 1 Thessalonika 4:9, 10. Mang boch e kanawo’ nrayog ni ngad daged e t’ufeg riy u lan e ulung rodad? Sana rayog nib t’uf ni ngan ayuweg reb e walag ni pumoon ara ppin ni ke pilibthir ni nge thap ko muulung. Maku reb e, sana rayog ni bay reb e walag nib pin ni ke yim’ figirngin nib t’uf ni ngan ayuweg ngan ngongliy yu yang ni ke kireb ko naun rok. (Jas. 1:27) Ba t’uf ni ngad ayuweged, ma gad fal’eg laniyan’ e pi walag ni ke mulan’rad ara ke kireban’rad ara yad be mada’nag boch e skeng, ma gad pi’ e athamgil nga lanin’rad ndemtrug ko ka yad bbitir ara kar pilibthirgad. (Prov. 12:25; Kol. 4:11) Rayog ni ngad micheged nriyul’ nib t’uf pi walagdad rodad ni faan gad ra dag ko thin nge ngongol rodad ni gad be lemnag e “piin ni kad manged girdien e tabinaw rok Got u fithik’ e mich u wun’uy ngak Kristus.”​—Gal. 6:10.

18. Mang e ra ayuwegdad ni ngad pithiged nochi magawon nde ga’ ni ma sum u thildad pi walagdad?

¹⁸ Ke yiiynag e Bible u m’on riy nnap’an nra taw ko “tin tomren e rran” ko re m’ag nib kireb ney, ma boor e girdi’ nra ur pared ni kemus ni yigoo yad e yad be lemnaged yad ma ke gel e chogow rorad. (2 Tim. 3:1, 2) Ere, gad e piin Kristiano e thingar da athamgilgad nib gel ni ngari t’uf Got rodad, nge tin riyul’ u lan e Bible, miki bagadad me t’uf rok bagadad. Riyul’ ni bay yu ngiyal’ nrayog ni nge sum nochi magawon nde ga’ u thildad pi walagdad. Machane, bochan e t’ufeg ni bay u thildad pi walagdad u lan e ulung, ma aram e n’en ni ma k’aringdad ni ngad pithiged e pi magawon ni ma sum u rogon payngin nrayog rodad mu kud rin’ed u fithik’ e sumunguy. (Efe. 4:32; Kol. 3:14) Ere, manga yugu dab da paged e t’ufeg rodad ni nge meewar! Ya n’en ni ngad rin’ed e ngad ululgad i guy rogon ni ngari gel feni t’uf Jehovah rodad, nge Thin rok, miki t’uf pi walagdad rodad.