Mu Pag Ni T’ufeg E Ra Gelnagem
“Thingari t’uf rom Somol ni ir e Got rom u polo’ i gum’ercha’em, ngu polo’ i lanin’um, nge polo’ e lem rom.”—MATTHEW 22:37.
1. (a) Mang boch ban’en ni ma maruweliy reb e Kristiano? (b) Mang e bin tha’bi ga’ fan ko ngongol ko Kristiano, ma mang fan?
REB e Kristiano e ra maruweliy boor ban’en ni nge mang tamachib nib salap. Fare babyor ni Proverbs e be weliy felngin e tamilangan’, nge ngan nang boch ban’en, nge gonop. (Proverbs 2:1-10) I weliy Paul ni apostal ni kub t’uf e michan’ nib gel nge athap nib mudugil. (Roma 1:16, 17; Kolose 1:5; Hebrews 10:39) K’adan’ nge t’ar laniyan’ e ku baga’ fan. (Acts 24:25; Hebrews 10:36) Machane, bay taa ban’en, nfaanra aram e n’en ni dariy, ma ra aw ni dariy felngin yugu boch ban’en. Re n’en n’ey e t’ufeg.—1 Korinth 13:1-3, 13.
2. Uw rogon ni ke dag Jesus feni ga’ fan e t’ufeg, ma mang boch e deer ni ke m’ug nbochan?
2 I dag Jesus feni ga’ fan e t’ufeg ko ngiyal’ ni ke yog ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Bochan ni t’ufeg e aram e pow ni ngan nang e tin riyul’ e Kristiano, ma aram fan ni ba t’uf ni ngada fithed boch e deer ni, Mang e t’ufeg? Ma mang fan ni ri baga’ fan e n’en ni ke yog Jesus ni, yira nang e pi gachalpen nbochan? Ma uw rogon ni ngada ga’naged e t’ufeg rodad? Mini’ e susun ni ngada daged e t’ufeg rodad ngak? Ngada weliyed e pi deer ney.
Be Mang e T’ufeg?
3. Uw rogon ni ngan weliy e t’ufeg, ma mang fan nib l’ag fare lem nge gum’ercha’ ngay?
3 Kan weliy ni t’ufeg e aram fare n’en ni ‘l’agruw ni’ ni rib fel’ thilrow ma nge bagayow ma ngi i runguy bagayow, ma nge bagayow ma ngi i adag daken bagayow.’ Ireray e ngongol ni ma k’aring e girdi’ ni ngara rin’ed e tin nib fel’ ni fan ko yugu boch e girdi’, yu ngiyal’ e ngari pagfan be’ ir nbochan. Rogon ni weliy e Bible ni t’ufeg e ba l’ag e lem nge gum’ercha’ ngay. Fare lem, ara gelngin be’ ni nge lemnag ban’en, e bay fan, ya be’ ni be dag e t’ufeg ngak yugu be’ e be rin’ e re n’ey u fithik’ e gonop, ya manang ni ir nge fa en nib t’uf rok, e bay ban’en ni yow ba war riy ma ku bay boch e ngongol rorow nib fel’. Fare gelngin be’ ni nge lemnag ban’en e bay fan ya susun bay reb e Kristiano ni ma t’ufeg boch e Kristiano—ma gathi ri baadag dakenrad—machane ke fil u Bible ni baadag Got ni nge rin’ e n’en ni aray rogon. (Matthew 5:44; 1 Korinth 16:14) Machane, t’ufeg e baga’ ni ma yib u gum’ercha’ey. T’ufeg nib riyul’ nrogon ni yog e Bible e gathi kemus ni ereray gelngin be’ ni nge lemnag ban’en. Bat’uf e lem nib yul’yul’ riy nge gum’ercha’en ni ri ma fol.—1 Peter 1:22.
4. Uw rogon ni t’ufeg e bod ba gaf ni ba gel?
4 Girdi’ nib siin e mo’maw’ ni nge t’uf boch e girdi’ rok ya fa en ni bay e t’ufeg rok e baadag ni nge yog boch ban’en nib fel’ ngak yugu boch e girdi’ me ta’ ni yad ba m’on rok. (Filippi 2:2-4) Fapi thin rok Jesus e “bagel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom” e ri ba riyul’ nfaanra ngan pi’ ban’en u fithik’ e t’ufeg. (Acts 20:35) T’ufeg e bod e gaf nib gel. (Kolose 3:14) Ma baga ni piin ni bay e t’ufeg u fithik’rad e yad e fager, machane fare t’ufeg ni bod e gaf e kab gel gelngin ni ma taareban’nag e piin ni yad fager. Maku kan weliy ni rogon e par ko pumoon nge ppin ni kar mabgolgow e aram e adag; machane, fare t’ufeg ni fare Bible e be pi’ athamgil nga lanin’dad ni ngad ga’naged u lanin’dad e kab gel ko bin ni baaray ni kan adag ya bochan e n’en ni kan guy nib fel’ yaan. Fare wu’ i mabgol ni riyul’ ni yow ba t’uf rorow, e ra par nib fel’ thilrow ni yugu aram rogon ni dabkiyog ni ngar parew ni bochan e kar pillibthirgow ara ke yib e m’ar ngak bagayow nib gel.
T’ufeg—Reb e Fel’ngin nib Ga’
5. Mang fan ni t’ufeg e aram e ngongol ni baga’ fan ku reb e Kristiano?
5 Mang fan ni t’ufeg e aram reb i fel’ngin e Kristiano nib ga’? Som’on, ya bochan ni ke ning Jesus chilen ngak pi gachalpen ni ngar t’ufeged yad. Me yog ni gaar: “Ma gimed e pi tafager rog, ni faan gimed ra rin’ e tin ni kug ning chilen ngomed. Ere baaray e n’en ni ir e nggu ning chilen ngomed ni be lungug: nge bigimed me t’uf bigimed rok.” (John 15:14, 17) Bin l’agruw, ya bochan ni Jehovah e ir e ma dag rogon e t’ufeg ngodad, ma thingarda folwokgad rok ya gadad e pi tapigpig rok. (Efesus 5:1; 1 John 4:16) Be weliy e Bible ni ngan fil ban’en u murung’agen Jehovah nge Jesus ma ra yog e yafas ni manemus ngak e girdi’ riy. Uw rogon ni nga dogned ni gad manang Got ni faanra daworda guyed rogon ni ngad boded ir? I weliy John fan ni gaar: “En nde t’uf Got rok nge girdi’ e be’ nde nang Got ni bochan e Got e ba t’uf e girdi’ rok.”—1 John 4:8.
6. Uw rogon ni t’ufeg e rayog ni nge thabthabelnag boch ban’en nib thilthil ko yafas rodad?
6 Baaray e bin dalip i fan ni baga’ fan e t’ufeg: Re n’ey e ra ayuwegdad u rogon ni ngad thabthabelnaged urngin ban’en ko par rodad ma ra k’aringdad ni ngada rin’ed e maruwel rodad u fithik’ e falfalan’. Ni bod ni, ba t’uf rok e Kristiano ni nge fil e thin rok Got u gubin ngiyal’. Re tamilangan’ ney, e bod e ggan ngak reb e Kristiano. Ra ayuweg ni nge ilal ko tirok Got ban’en ma rayog ni nge rin’ e tin nib puluw ko tin nib m’agan’ Got ngay. (Psalm 119:105; Matthew 4:4; 2 Timothy 3:15, 16) Machane ke ginangey Paul ni gaar: “Machane mit i tamilangan’ nem e ma gelnag e ufanthin ko girdi’; machane rogon ni nge be’ me t’uf be’ rok e ra yib wenegan nib fel’.” (1 Korinth 8:1) Danga’, dariy ban’en nib kireb ko tamilangan’ nib puluw. Ya gadad e bay magawon rodad—ya gad ma oloboch. (Genesis 8:21) Faanra dariy e t’ufeg rodad ni nge ayuwegdad ni nge par nib thabthabel lanin’dad, ma tamilangan’ e ra k’aring be’ ni nge uf, ma ra lemnag ni kab fel’ ko yugu boch e girdi’. Ma dabi buch ban’en ni aray rogon nfaanra bay e t’ufeg rok ni be gagiyegnag laniyan’. “En nib t’uf Got rok nge girdi’ . . . e de uf, ma de tolangan’.” (1 Korinth 13:4) Reb e Kristiano ni bay e t’ufeg ni be gagiyegnag laniyan’ e dabi uf ni yugu aram rogon ni ke yoor e tamilangan’ rok. T’ufeg e ra ayuweg ni nge par nib sobut’ laniyan’ ma ra taleg ni nge dabi gilbuguwannag fithingan ni nge yog boch e girdi’ e sorok ngak.—Psalm 138:6; James 4:6.
7, 8. Uw rogon ni t’ufeg e ra ayuwegdad ni ngad tiyan’dad ko tin ni ri baga’ fan?
7 I yol Paul ngak piyu filippi ni gaar: “Ere baaray e meybil rog ngak Got ni fan ngomed: gu be yibil ngak Got ni ngi i gel feni T’uf Got nge girdi’ romed iyan, mi gimed nang e bin riyul’ i fan e thin rok Got nge yog ni ngam nanged e tin nib mat’aw ko tin nde mat’aw, nge yog ni ngam mel’eged e tin ni ir e ba tha’bi fel’.” (Filippi 1:9, 10) T’ufeg e ra ayuwegdad ni ngad folgad ko pi thin ney ni be pi’ e athamgil nga lanin’dad ni ngad rin’ed e tin ni ba tha’bi fel’. Ngam yaliy e pi thin ni ke yog Paul ngak Timothy nra dag e re n’en ney ni gaar: “Faanra baadag be’ ni ngari mang reb e girdi’ ni ngi i tay murung’agen girdien e galesiya ma aram e ke nameg reb e maruwel ni ir e ba tha’bi fel’.” (1 Timothy 3:1) Nap’an e duw ni 2000, ma ke taw ko 1,502, e ulung nib biech u ga’ngin yang e fayleng ma aram e ke taw ko 91,487 u gubin. Arfan, ni ba t’uf rodad e piin ni piilal ni boor, ma piin ni ma athamgil ni ngara uned ko re maruwel ney e kara magargad.
8 Machane, piin ni ma athamgil ni ngar uned ko maruwel ni ngan ayuweg e ulung e thingara pared nib thabthabel ni fan e nge par nib tamilang u wan’rad ko mang fan e re maruwel ney. Faanra ke mus ni kan pi’ ku be’ ni nge gilbuguwan e gathi aram e n’en ni baga’ fan. Piin ni piilal ni yad ba fel’ u wan’ Jehovah ni bochan e aram t’ufeg rorad ngak nge pi walagrad ko ulung e ke k’aringrad ni ngara rin’ed e maruwel rorad. Der ma lemnag ni ngara manged e piin nib gilbuguwrad ara nge yib gelngirad ngorad. Tomren ni ke fonownag Peter ni apostal e piin piilal u lan e ulung ni ngar daged e ngongol nib fel’ u gubin ngiyal’, ma aram e i weliy nib t’uf ni ngan par “nib sobut’ lanin’uy.” Me fonownag urngin e girdi’ u lan e ulung ni gaar: “Ere mu sobut’niged lanin’med u tan pa’ Got nib gel gelngin.” (1 Peter 5:1-6) Urngin e girdi’ ni ma athamgil ni ngar uned ko re maruwel’ ney e ba fel’ ni ngar lemnaged e n’en ni ke rin’ e piin ni piilal u gubin yang u fayleng ni yad e piin ni ta maruwel, mab sobut’ lanin’rad, ma aram e yad e taw’ath ko ulung rorad.—Hebrews 13:7.
Lem nib Fel’ e Ra Ayuwegdad ni Ngad G’uman’gad
9. Mang fan ni ri ma lemnag e pi Kristiano e pi’ taw’ath ni ke micheg Jehovah?
9 Rayog ni ngan guy feni ga’ fan ni t’ufeg e ra gagiyegnag laniyan’uy ko yugu reb e kanawo’. Piin ni kar pared nib yul’yul’ ko pigpig ku Got u fithik’ e t’ufeg, ma fare Bible e ke micheg ni nge yib e taw’ath ngorad e chiney ni boor nge pi taw’ath nrib fel’ nga m’on. (1 Timothy 4:8) Reb e Kristiano ni kari mich u wan’ e pi n’ey ni kan micheg ma kari pagan’ ni “ba’ Got ma ra taw’athnag e piin ni yad be gayiy Got” e kan ayuweg ni nge par nib mudugil e michan’ rok. (Hebrews 11:6) Baga ni gadad be sonnag ni nge lebug e tin ni ke micheg Got ma ra sul nga laniyan’dad e thin ni ke yog John ni apostal ni gaar: “Arrogon, Somol Jesus.” (Revelation 22:20) Arrogon, ngan fal’eg i lemnag e pi taw’ath ni kan chaariy—min pi’ ngodad nfaan gad ra par nib yul’yul’ ma ra gelnagdad ni ngad k’adedan’dad, ni bod Jesus nde pagtalin “e falfalan’ ni be sonnag” ma aram e n’en ni ke ayuweg nge par nib k’adan’.—Hebrews 12:1, 2.
10, 11. Uw rogon ni faanra ke gelnagdad e t’ufeg ma aram ra ayuwegdad e re ney ni ngad k’adedan’dad?
10 Ere, mang e ra buch nfaanra gad be pigpig ku Jehovah ni faanra kemus nbochan e gad baadag ni ngada pared ko fare fayleng nib biech? Ere ra mom ni nge war e gum’an’ rodad ara ra kireban’dad nfaanra ke mo’maw’ e par rodad ara de yib e n’en ni gad be sonnag ko tayim ni gad be sananag. Ri bay e riya’ riy ngodad ni ngada sorgad nga bang. (Hebrews 2:1; 3:12) I weliy Paul murung’agen Demas ni en ni ke un ngak ko milekag, ma munmun me digey. Mang fan? Ya bochan e “ke t’uf rok e ngongol nu roy u fayleng.” (2 Timothy 4:10) Ma urngin e piin be pigpig ku Got ni bay e lem rok nib siin e bay e riya’ riy ni nge fol ko re ngongol ney. Mom ni ngara adaged e tin ni be dag e fayleng rogon ni nge yoor e chugum rorad nib papay mar dabuyed ni ngara paged farad ngar sonnaged e pi taw’ath ni ba yib.
11 Riyul’ ndariy e kireb riy ni ngad athapeged ni nge yog boch e taw’ath ngodad nge ngad athapeged ni nge ma’ e gafgow rodad, machane t’ufeg e ir e ra gelnag e falfalan’ rodad ko tin ni ri baga’ fan ko yafas rodad. Tin nib m’agan’ Jehovah ngay, e aram e n’en ni baga’ fan, ma gathi tirodad. (Luke 22:41, 42) Arrogon, t’ufeg e ra gelnagdad. Ra ayuwegdad ni ngad sonnaged Got u fithik’ e gum’an’, ma gad par nib falfalan’ ko pi taw’ath ni ke pi’ ngodad me pagan’dad ni ra taw ko ngiyal’ e tayim ni ke dugliy ni nge pi’ ngodad urngin ban’en ni ke micheg—nge ku boch ban’en. (Psalm 145:16; 2 Korinth 12:8, 9) Ngiyal’ ney, ma t’ufeg e ra ayuwegdad ni ngad ululgad ko pigpig ku Got ndariy e lem nib siin riy ya bochan be’ ni bay e t’ufeg rok e gathi “kemus ni ir e ma lemnag ir.”—1 Korinth 13:4, 5.
Piin Kristiano e Thingara T’ufeged Mini’?
12. Rogon ni yog Jesus, ma mini’ e thingarda t’ufeged?
12 I pi’ Jesus e motochiyel ni be dag ko mini’ e susun ni ngada t’ufeged u nap’an ni ke bieg e pi thin ko fare Motochiyel rok Moses. Ke yog ni gaar: “Thingari t’uf rom Somol ni ir e Got rom u polo’ i gum’ercha’em, ngu polo’ i lanin’um, ngu polo’ i lem rom.” Me ulul ngay ni, “thingari t’uf rom e en ni ir e mmigid ngom ni gowa gur.”—Matthew 22:37-39.
13. Uw rogon ni ngada t’ufeged Jehovah, nyugu aram rogon ni dabiyog ni ngad guyed?
13 Rogon ni yog Jesus, e ba tamilang ni som’on ma thingarda t’ufeged Jehovah. Machane, dan gargelnagdad ni bay e t’ufeg rodad ku Jehovah u polo’ i lanin’dad. Aram e n’en ni ngad maruweliyed. Nap’an ni kad rung’aged u murung’agen ko yay ni som’on, ma ke fel’ Got uwan’dad nbochan. Buchuw nge buchuw, ma aram e kada nanged ko uw rogon ni ke fal’eg rogon e fayleng ni fan ko girdi’. (Genesis 2:5-23) Kada filed ko uw rogon ni ra ayuweg e girdi’, ma de digeydad u nap’an ni ke denen fa bin som’on e tabinaw, machane ke rin’ boch ban’en ni nge biyuliydad. (Genesis 3:1-5, 15) Ke dag e ngongol nib gol ko piin ni ba yul’yul’, ma munmun ma ke pi’ Fak ni kari maagirag rok ni ngan n’ag fan e denen rodad u daken. (John 3:16, 36) Re tamilangan’ ney ni be yoor i yan e ke ga’nag ni ngari fel’ Jehovah u wan’dad. (Isaiah 25:1) I yog David ni Pilung ni ba t’uf Jehovah rok ya bochan ni ma ayuweg. (Psalm 116:1-9) Chiney, e ma ayuwegdad Jehovah, ma pow’iydad, ma gelnagdad, nge ma pi’ e athamgil nga lanin’dad. Ra nge yoor e tamilangan’ rodad u murung’agen, me gel e t’ufeg rodad ngak.—Psalm 31:23; Zefaniah 3:17; Roma 8:28.
Uwrogon ni Ngada Daged e T’ufeg Rodad?
14. Mang e kanawo’ ni ngada daged ni t’ufeg rodad riy ku Got ni ba riyul’?
14 Riyul’, ni boor e girdi’ nu fayleng e kar rogned nib t’uf Got rorad, machane ngongol rorad e be dag ni danga’. Uw rogon ni ngada nanged ni riyul’ ni ba t’uf Jehovah rodad? Rayog ni ngad nongad ngak u daken e meybil u murung’agen e n’en ni gad be thamiy. Ma ngada daged ko ngongol ni be micheg ni ir e ba t’uf rodad. John ni apostal e ke yog ni gaar: “Machane en nra fol ko thin rok [Got] e aram e cha’ nrogon nib t’uf Got rok e ke yan i aw nrib fel’ rogon. Ereray rogon me mudugil u wan’dad ni gadad be par u fithik’ Got.” (1 John 2:5; 5:3) Bang ko Thin rok Got e be yog ngodad ni ngad chaggad ngak e pi walagdad ma ngad pared nib klin e gafarig rodad. Ngada paloggad ko tin nde riyul’, ma nga dogned e thin nib riyul’, ma ngad ayuweged nge par nib klin e lem rodad. (2 Korinth 7:1; Efesus 4:15; 1 Timothy 1:5; Hebrews 10:23-25) Ngada daged e t’ufeg ma aram ngad pied boch e chugum ngak e piin nib gafgow. (1 John 3:17, 18) Ma dabda talgad i weliy ngak yugu boch e girdi’ murung’agen Jehovah. Ma ba muun ngay fare maruwel ni ngan wereg e thin nib fel’ ko Gil’ilungun u ga’ngin yang e fayleng. (Matthew 24:14; Roma 10:10) Ngan fol ko Thin rok Got ko pi n’en nem ni be micheg nriyul’ ni ba t’uf Jehovah rodad.
15, 16. Uw rogon ni t’ufeg ku Jehovah e aram e n’en ni ke ayuweg e yafas ku boor e girdi’ fa binem e duw?
15 T’ufeg ku Jehovah e ke ayuweg e girdi’ ni ngara dugliyed ban’en. Fa binem e duw, ma re t’ufeg ney e ke k’aring 288,907 e girdi’ ni ngara ognaged yad ngak ma aram kara uned ko taufe nbochan. (Matthew 28:19, 20) Ognagey e bay fan ko yafas rorad. Ke thil e yafas rorad nbochan. Ni bod rogon Gazmend, ni ir reb ko piin nib salap ko basketball u Albania. U lan in e duw, ma ir nge ppin rok e kara unew ko fol Bible ma yugu aram rogon ni bay boch ban’en ni ke magawonnagrow ma yow be mo’nog iyan ma munmun ma kar mangew tamachib ko ulung ara publisher. Fa binem e duw, ma kan taufenag Gazmend, ma ir bagayad ko 366 e girdi’ ni kar uned ko taufe u Albania ko duw ni 2000. Reb e article ko newspaper e ke weliy murung’agen ni gaar: “Yafas rok e bay fan, ma aram ir nge tabinaw rok e kari yib e falfalan’ ngorad nbochan. N’en ni be lemnag e dakuriy fan ni nge yog boor e chugum ngak, ya, feni yoor e tayim ni nge fanay ni fan ni nge ayuweg yugu boch e girdi’ e aram e n’en ni baga’ fan ngak.”
16 Taab rogon ngak, reb e walag ni ppin ni kefin ni taufenag ni ma maruwel ku reb e oil company u Guam ma aram kanognag ngak nrayog ni nge un nga yugu reb e maruwel nib fel’. Tomren ni ke yan boch e tayim me mon’og ko re maruwel rok ney, min nog ngak nrayog ni nge mang fa bin som’on e ppin ni nge mang vice president ko fare company. Yugu aram rogon, ma ke ognag ir ku Jehovah. Ere tomren ni kara weliyew e pumoon rok murung’agen, ma aram ke yog fare walag nib biech ni dabi un ko re maruwel nem ma ke yarmiy ban’en ya aram nrogon rayog ni nge un ko maruwel ni kemus ni buchuw e tayim riy ma aram rogon e rayog ni nge mon’og iyan nge mang reb e pioneer. T’ufeg ku Jehovah e ke k’aring ni nge pigpig ngak ni reb e pioneer ma ke dabuy ni nge kunuy boor e chugum nu fayleng. Riyul’, ni re t’ufeg ney e ke k’aring 805,205 e girdi’ ni ngar uned ko re maruwel ni pioneer ney nib thilthil kanawoen u nap’an e duw ni 2000. Kari dag e pi pioneer nem e t’ufeg nge michan’ rorad!
Kan K’aring ni Ngan T’ufeg Jesus
17. Mang e n’en nib fel’ u murung’agen e t’ufeg ni kada guyed ku Jesus?
17 Jesus e ir e en ni kari dag ni t’ufeg e ke k’aring ni nge rin’ boch ban’en. U nap’an ni dawori yib nga fayleng nib girdi’, ma ba t’uf e Chitamangin rok ma kub t’uf e girdi’ rok. Jesus ni ir be’ ni ma dag e t’ufeg ya gaar: “Ug moy u tooben [Jehovah] ni bod be’ nib salap i maruweliy ban’en, i par ni gubin e rran ni be falfalan’ ngog, ma gubin ngiyal’ ni gu be par rok ni gub falfalan’, ni gub falfalan’ ko fayleng ma ba fel’ u wun’ug e girdi’ ni ba’ riy.” (Proverbs 8:30, 31) T’ufeg e aram e n’en ni ke k’aring Jesus ni nge pag e par rok u tharmiy’ min gargelnag nge mang reb e bitir ni madway. I ayuweg e girdi’ nib sobut’ lanin’rad u fithik’ e gum’an’ nge gol ma pi toogor rok Jehovah e kar gafgownaged. Tomur riy, ma kan tining nga baley e gek’iy me yim’ ni fan ko urngin e girdi’. (John 3:35; 14:30, 31; 15:12, 13; Filippi 2:5-11) Kari dag rogon e lem nib mat’aw!
18. (a) Uw rogon ni ngada ga’naged e t’ufeg rodad ku Jesus? (b) Uw rogon ni ngada daged ni ba t’uf Jesus rodad?
18 Nap’an nra bieg e piin nib mat’aw gum’ercha’rad e pi thin u murung’agen e yafas rok Jesus ni bay ko fapi Gospel ma ra fal’eg i lemnag feni yoor e taw’ath ni ke yib ngorad nbochan, ma ra k’aring e re n’ey ni nge gel e t’ufeg rorad ngak. Gadad e chiney e taabrogon ko girdi’ ni ke non Peter ngorad ni ke gaar: “Yugu ara’ rogon ndamur guyed [Jesus], me mmich u wan’med.” (1 Peter 1:8) Rayog ni ngan guy e t’ufeg rodad ngak Jesus nfaanra ke mich u wan’dad ma ngada folwokgad rok ni ma pagfan e yafas rok. (1 Korinth 11:1; 1 Thessalonika 1:6; 1 Peter 2:21-25) Nap’an e April 19, 2000, ma 14,872,086 e girdi’ e kan puguran ngorad ni bay fan ni nge t’uf Jesus rorad u nap’an ni kar uned ko fare madenom ni Puguran ko yam’ ni tay Jesus. Riyul’ ni boor e girdi’ ni kar uned ngay! Ban’en nra gelnagdad ni ngad nanged ni boor e girdi’ ni baadag ni ngar thapgad ngak Got u daken e maligach rok Jesus! Riyul’, ni ke gelnagdad e t’ufeg rok Jehovah nge Jesus ngodad nge t’ufeg rodad ngorow.
19. Mang boch e deer u murung’agen e t’ufeg ni gad ra weliy ko bin migid e article?
19 Ke yog Jesus ni thingarda t’ufeged Jehovah u polo’ i gum’ercha’dad, ngu polo’ i lanin’dad, ngu polo’ i lem rodad, ngu polo’ i gelngidad. Machane ku ke yog ni gin’en ni gad bay riy e thingari t’uf rodad e en ni ir e migid ngodad ni gowa gadad. (Mark 12:29-31) Mini’ e ba muun ngay? Ma uw rogon ni t’ufeg rodad ngak e en buguli yoror rodad e ra ayuwegdad nra par ni rib thabthabel lanin’dad? Gali deer ney e yira weliy ko bin migid e article.
Ka Ga Manang?
• Mang fan ni t’ufeg e aram e ngongol ni baga’ fan?
• Mang e kanawo’ ni ngad nanged rogon ni ngada t’ufeged Jehovah?
• Uw rogon ma ngongol rodad e ra micheg ni nib t’uf Jehovah rodad?
• Uw rogon ni ngada daged e t’ufeg rodad ku Jesus?
[Picture on page 6]
Love helps us to wait patiently for relief
[Picture on page 8]
Jesus’ great sacrifice moves us to love him