Uw Feni Gel E T’ufeg Rom?

“Gin’en ni ga bay riy e thingari t’uf rom e en ni migid ngom ni gowa gur.”​—MATTHEW 22:39.

1. Faanra ba t’uf Jehovah rodad, ma mang fan ni ku be dag e re n’ey ni nge t’uf rodad e piin ni gadad buguli yoror?

NAP’AN ni kan fith ku Jesus ko bin ngan e motochiyel e ir e tha’bi ga’, ma aram me fulweg ni gaar: “Thingari t’uf rom Somol ni ir e Got rom u polo’ i gum’ercha’em, ngu polo’ i lanin’um, ngu polo’ i lem rom.” Miki weliy e bin l’agruw e motochiyel ni taab rogon ko fa bin som’on ni be gaar: “Gin’en ni ga bay riy e thingari t’uf rom e en ni ir e mmigid ngom ni gowa gur.” (Matthew 22:37, 39) Arrogon, ngam t’ufeg e en ni buguli yoror rom e aram e pow ko Kristiano. Riyul’, nfaanra ba t’uf Jehovah rodad ma thingarda t’ufeged e en ni buguli yoror rodad. Mang fan? Faan gad ra ra fol ko thin rok Got ma aram e be dag nib t’uf Got rodad, ya ke tay chilen ngodad ni ngad t’ufeged e en buguli yoror rodad. Arfan, ni faanra de t’uf e pi walagdad ni pumoon nge ppin rodad ma gathi riyul’ ni ba t’uf Got rodad.​—Roma 13:8; 1 John 2:5; 4:20, 21.

2. Mit i mang t’ufeg ni thingarda daged ngak e piin buguli yoror rodad?

² Nap’an ni ke yog Jesus ni thingarda t’ufeged en buguli yoror rodad, ma gathi kemus ni baadag ni ngar manged e fager rodad. Ma ke weliy murung’agen e t’ufeg nib thil ko t’ufeg u lan e tabinaw ara t’ufeg u thilin e pumoon nge ppin. I weliy murung’agen e t’ufeg ni taab rogon ko t’ufeg ni dag Jehovah ko pi tapigpig rok ni kar ognaged yad ngak ma ereram rogon ni ngad daged e t’ufeg ni fan ngak Jehovah. (John 17:26; 1 John 4:11, 19) Reb e scribe ni Jew​—ni ke guy Jesus, ni cha’ nem e ke non u fithik’ e gonop—​e ba puluw u wan’ e n’en ni ke yog Jesus nib t’uf ni ngan t’ufeg Got “u polo’ i gum’ercha’en be’ ngu polo’ i laniyan’ ngu polo’ i lem rok ngu polo’ gelngin.” (Mark 12:28-34) Ba sorok e cha’ nem. Fare t’ufeg ni be athamgil e Kristiano ni ngar daged ngak Got nge en ni buguli yoror rorad e ba l’ag ngay e thamtham nge gelngin e lem rodad. Fare gum’ercha’ e rayog ni nge thamiy e re n’ey ma fare lem e ir e ra pow’iyey.

3. (a) Uw rogon ni ke fil Jesus ngak “fare pumoon nib cheg ko Motochiyel” ma aram e nge nang ko mini’ e buguli yoror rok? (b) Uw rogon ni fare fanathin rok Jesus e ba m’ag ko piin Kristiano e chiney?

³ Rogon ni weliy Luke ni, nap’an ni yog Jesus ni thingarda t’ufeged e en ni buguli yoror rodad, ma “fare tamachib ko Motochiyel” e ke fith ni gaar: “Mini’ e en ni ir e mmigid ngog?” Me fulweg Jesus ngak u daken reb e fanathin. Kan li’ reb e pumoon, min iring boch ban’en rok, ma kan pag u tooben e kanawo’ ni ke chuchugur ni nge yim’. Ma som’on me yib reb e prist ma migid reb e Levite ni be yan u but’. Ma yow l’agruw e dar ayuwegew e cha’ nem. Tomur riy, ma aram ke yib reb e Samaritan, ma ke guy e cha’ nem ni ke maadad, ma kari dag e ngongol nib gol ngak. Ere fa dalip e girdi’ ni ke weliy Jesus murung’agrad ma mini’ arorad e ke dag ni ir e en ni buguli yoror rok e cha’ nem ni ke maadad? Rib tamilang e fulweg riy. (Luke 10:25-37) Sana ke gin e cha’ nem ni tamachib nib cheg ko Motochiyel ni rung’ag ni yog Jesus ni fare Samaritan e ir e buguli yoror ni kab fel’ ko fare prist nge fare Levite. Ba tamilang, ni ke ayuweg Jesus e re pumoon nem ni nge nang ko uw rogon ni ngari dag e t’ufeg rok ngak e en ni buguli yoror rok. Maku piin Kristiano e susun ni ngar daged e t’ufeg rorad ngak e girdi’ ni aray rogon. Mu lemnag e piin ni kara daged e t’ufeg rorad ngorad.

T’ufeg u Lan e Tabinaw

4. Som’on, e susun mini’ e ra dag e en Kristiano e t’ufeg rok ngak?

⁴ Piin Kristiano e ba t’uf girdien e tabinaw rorad rorad​—ni bod e piin leengiy e nge t’uf figirngirad rorad, ma pi figirngiy e nge t’uf e piin leengirad rorad, nge pi gallabthir e nge t’uf e pi bitir rorad rorad. (Ecclesiastes 9:9; Efesus 5:33; Titus 2:4) Riyul’, ni tabinaw e thingari bay e t’ufeg u fithik’rad. Machane, kan rung’ag u murung’agen e pi mabgol ni ke wagey, nge figirngiy ara leengiy ni kan magawonnag, nge pi bitir ni kan pagrad ara kan magawonnagrad e be dag ni ba gafgow e tabinaw e chiney, ma ke wer e t’ufeg u fithik’rad ni dakuriy gelngin ni nge dabkuura wageygad. (2 Timothy 3:1-3) Ra nge yib angin ko tabinaw rorad, ma aram e ba t’uf ni nge yog ko piin Kristiano e t’ufeg ntaabrogon ko t’ufeg ni bay rok Jehovah nge Jesus.​—Efesus 5:21-27.

5. Piin ni gallabthir e ra ning e ayuw ngak mini’ ni ngara ayuweged e pi bitir rorad, ma boor i yad e mang angin e ke yib ngorad?

⁵ Pi gallabthir ni Kristiano e yad manang ni ke pag Jehovah fan e pi bitir rorad ngorad, ma yad be sap ngak ni nge pow’iyrad u rogon ni ngara ayuweged e bitir. (Psalm 127:3-5; Proverbs 22:6) Ma arfan ni yad be maruweliy ni nge yog ngorad e t’ufeg ni Kristiano, ya re n’ey e ra ayuwegrad ni ngara ayuweged e pi bitir rorad ni dabra awgad ko kireb ni aram e n’en ni ma buch ko piin ni fel’ yangaren. Ma angin ni ke yib riy, e aram boor e gallabthir ni Kristiano ni ke yib e falfalan’ ngorad ni taab rogon ko fare matin faram u Netherlands. Tomren ni ke guy e bitir rok ni kan taufenag​—ya bochan ir bagayad ko 575 e girdi’ ni ke un ko taufe u Netherlands fa binem e duw—​ma aram ke yoloy ni be gaar: “Chi ngiyal’ n’ey, ma fare siyobay ni kug ta’ u lan 20 e duw e kan pi’ puluwon ngog. Urngin e tayim nge gelngig ni kug ta’​—maku arrogon e amith, maruwel, nge kireban’uy—​e aram e pi n’en ni kan pagtalin.” Kari falfalan’ e cha’ nem ni bitir rok e ke dugliy ni nge pigpig ku Jehovah ni lem rok. Ke taw ko 31,089 e pi tamachib ni kar pied e report rorad ko fa binem e duw u Netherlands ni boor i yad ni pi gallabthir rorad e ke skulnagrad u rogon ni nge t’uf Jehovah rorad.

6. Uw rogon ni t’ufeg ko Kristiano e ra gelnag e mabgol?

⁶ Ke pining Paul fare t’ufeg ni ir “e ma chugumiy urngin ban’en nga taabang nge par ke fel’ rogon,” ma bay gelngin ni nge ayuweg e mabgol ni nge dabi wagey nyugu aram rogon ni ke yib e tayim nib mo’maw’ ngorad. (Kolose 3:14, 18, 19; 1 Peter 3:1-7) Reb e pumoon u Rurutu, ni aram e donguch nib achichig ni sogonapan 450 miles palogen u Tahiti, e ke tabab ni nge un ko fol Bible ko Pi Mich rok Jehovah, ma ppin rok e kari togopuluw ngak. Munmun, ma ke fek fre ppin e pi bitir rok, ma kar paged fre pumoon, karanod nga Tahiti mi yad par u rom. Machane, ka be dag fre pumoon e t’ufeg rok ngorad ya ma pi’ e salpiy ngorad u gubin ngiyal’ ku ma non ngorad u telephone ni fan ni nge fith ko ka bay boch ban’en nib t’uf rok nge pi bitir rorow. Ere ke athamgil ni nge fol u kanawoen e Kristiano. (1 Timothy 5:8) Ma meybil ni gubin ngiyal’ ni nge sul e tabinaw rok ngak ma rayog ni ngar pared u taabang biyay, ma tomur riy ma aram ke sul e ppin rok ngak. Ma aram ke dag fre pumoon e “t’ufeg, k’adan’, nge sumunguy” ngak. (1 Timothy 6:11) Duw 1998, e ke un ko taufe ma munmun e kari falfalan’ ya ppin rok e ke adag ni nge un ko fol Bible. Ma re fol Bible nem e taareb ko fa 1,351 e girdi’ ni ma fil e Bible ko re territory nem fa binem e duw ni be par u tan fare tochuch u Tahiti.

7. Rogon ni yog reb e pumoon u Germany, ma mang e ke ayuweg e mabgol rok?

⁷ U Germany ma immoy reb pumoon ni ke togopuluw ngak leengin ni ke adag e thin riyul’ u lan e Bible ma be lemnag ni goo baadag e Pi Mich rok Jehovah ni ngar banniged leengin. Machane, munmun, me yol ngak fa en ni ir e som’on ni ke non ngak leengin ni ke gaar: “Kam magar ya kam ayuweg e ppin rog ni nge nang e Pi Mich rok Jehovah. Som’on, ma ke magafan’ug ya kug rung’ag boor ban’en nib kireb u murung’agrad. Machane chiney, u tomren ni gamow e ppin rog e kug unew ko pi muulung rorad, ma aram ke tamilang u wan’ug ni kaygi gel e oloboch ni kug rin’. Gu manang ni n’en ni kug rung’ag e ir e thin riyul’, ma ke gelnag e re n’ey e mabgol romow.” Pi Mich rok Jehovah u Germany ni 162,932 urngin​—nge fa 1,773 ni yad bay ko pi donguch ni tochuch u Tahiti e be ayuwegrad—​ni boor e tabinaw riy ni ke yib e gapas ngorad nbochan e t’ufeg ni yib rok Got.

Ngam T’ufeg e Pi Walagdad

8, 9. (a) Mini’ e ke fil ngodad ni ngada t’ufeged e pi walagdad, ma t’ufeg e ra k’aringdad ni ngada rin’ed e mang? (b) Ngam dag ko uw rogon ni t’ufeg e ra ayuweg e pi walag ni bagayad nge bagayad.

⁸ I yog Paul ngak e pi Kristiano u Thessalonika ni gaar: “Ya ke fil Got rogon ngomed ni nguum pired nib t’uf bigimed rok bigimed.” (1 Thessalonika 4:9) Arrogon, piin ni “ke skulnagrad Jehovah” e ur pared nib t’uf bagayad rok bagayad. (Isaiah 54:13) Yad ma dag e t’ufeg ngorad nrogon e ngongol rorad, me dag Paul e re n’ey ko ngiyal’ ni gaar: “Machane rogon nib t’uf romed Kristus nge girdi’ e ir e nge gagiyegnagmed nge bigimed mi i pigpig ngak bigimed.” (Galatia 5:13; 1 John 3:18) Yad ma dag e re n’ey ko ngiyal’ ni ngar ranod ngar guyed e pi walagrad ni pumoon nge ppin nib m’ar, ngar pied e athamgil ngak e piin ke kireban’rad, ma ngar ayuweged e en nib war. (1 Thessalonika 5:14) T’ufeg rodad nib riyul’ ngak e pi walagdad e ra ayuweg ni nge par e paradis nib spiritual rodad nge ga’ iyan.

⁹ U Ancón Congregation​—ni aram reb ko fa 544 e ulung u Ecuador—​e kar daged e t’ufeg rorad nrogon e ngongol rorad. Ke yib e magawon ko salpiy u rom ma aram ke par ndakuriy e maruwel rorad ni ngeb boch e salpiy riy ngorad, ere ke dugliy e pi publisher ni ngar pied e ggan ni chuway ngak e piin ni ma un ko fita ko ngiyal’ ni ngar sulod nga naun rorad ko nep’ ni nge yog boch e salpiy ngorad. Ma kar ayuweged yad, ni mus ko piin ni bitir ni kara uned ngay. Thingara tababgad ko 1:00 ni kakadbul i lith e ggan ma aram rogon u nap’an ni taw ko 4:00 ni kakadbul ni ereram e tayim ni ma sul e piin ni kar uned ko fita’ ma kar mu’gad ko maruwel rorad. Ma fare salpiy ni ke yog ngorad riy e kan wereg ngorad ni be yan rogon e n’en nib t’uf rorad. Re ayuw nem e be dag ni bay e t’ufeg nib riyul’ u fithik’rad.

10, 11. Uw rogon ni ngada daged e t’ufeg rodad ku pi walag dawori nanged e tin riyul’?

¹⁰ Machane, ngada daged e t’ufeg rodad ni gathi kemus ni fan ko pi Kristiano ni ri gad manangrad. Ke yog Peter ni apostal ni gaar: “Ngam dag e t’ufeg ngak urngin e girdi’ ni walagdad.” (1 Peter 2:17, New World Translation) Ba t’uf rodad e pi walagdad ni pumoon nge ppin ya gad gubin e gad ma pigpig ku Jehovah ni Got rodad. Nap’an ni yib e gafgow ma sana kan bing e kanawo’ ni ngan dag e re t’ufeg ney. Bod e n’en ni buch ni baaray, ni nap’an e duw ni 2000, me yib boor e ran nib gel nge kirebnag fare nam ni Mozambique, ma bochan e mahl ni be ulul iyan u Angola ma boor e girdi’ ni kari gafgowgad. Ke taw ko 31,725 e pi walag u Mozambique nge 41,222 u Angola ni ke yib e magawon ngorad nbochan. Arfan, ni Pi Mich u South Africa e kara pied e chugum ni boor ngak e pi walag nem ni ngan lichnag e kireban’ rorad u rom. Bochan ni yad baadag ni ngar pied e chugum rorad ni “boor” ara ke pag oren ko tin nib t’uf rorad ngak e pi walagrad ere yad be dag e t’ufeg rorad ngorad.​—2 Korinth 8:8, 13-15, 24.

¹¹ Maku, rayog ni ngan guy e t’ufeg rorad, u nap’an ni ngar pied boch ban’en ngak e pi walagrad ni fan ni ngan toy e pi Kingdom Hall nge Assembly Hall ko pi binaw nib gafgow. Ni bod rogon fare nam ni Solomon Islands. Yugu aram rogon ni ke gel e wagey u Solomon Islands machane ke yoor e publisher ara piin tamachib u rom ni 6-percent e ke mun ko fa binem e duw, ni yad urngin e ke taw ko 1,697. Ere ba t’uf e Assembly Hall rorad. Yugu aram rogon ni boor e girdi’ nu rom ni kar chuwgad ko re nam nem, ma boch e walag nu Australia e kar bad ni ngar pied e ayuw nga reb e naun ni yibe toy. Tomur riy, ma ba t’uf ni nge chuw e pi walag nem u rom, machane ngiyal’ nem kara filed ngak e pi walag nu rom rogon ni ngar mu’naged e def riy. Ma boch e wasey ni ka nog prefabricated steel structure ni fan ko re naun nem e ke yib u Australia, ma ke m’ay e re naun ney ni fan ko liyor​—ko ngiyal’ ni boor e binaw ni yira toy e naun riy ni ke m’ay—​ma ayuweg ni ngan nang fithingan Jehovah nge rogon e t’ufeg ko pi walag.

Ngada Boded Got, nib T’uf e Girdi’ nu Fayleng Rok

12. Uw rogon ni ngada folwokgad rok Jehovah uw rogon ni gad be lemnag e piin ni der ma pigpig ngak?

¹² T’ufeg rodad e kemus ni fan ko girdien e tabinaw nge pi walagdad, fa? Danga’, gathi aray rogon nfaanra gad be “folwok rok Got.” I yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dabkur m’ad, ya ke yog e yafas ndariy n’umngin nap’an ngorad.” (Efesus 5:1; John 3:16) Bod rogon Got ni Jehovah, ngad ngongolgad u fithik’ e t’ufeg ngak urngin e girdi’​—mab muun ngay e piin nib thil e liyor rorad ko tirodad. (Luke 6:35, 36; Galatia 6:10) Ma n’en ni baga’ fan u roy, e aram ngad machibnaged fare thin nib fel’ ko Gil’ilungun Got ma ngad weliyed ngak yugu boch e girdi’ ni ri yad ba t’uf rok Got. Ma piin nra motoyil ko re n’ey ma ngar thapgad ngak Got.​—Mark 13:10; 1 Timothy 4:16.

13, 14. Mang boch ban’en ni ke buch ko pi walag ni kara daged e t’ufeg rorad ngak e piin ni gathi Pi Mich, nyugu aram rogon ni mo’maw ni ngan rin’ e re nem?

¹³ Mu lemnag fa aningeg e special pioneer u Nepal. Kan l’ograd nga reb e mach ni bay ko yimuch ni ngal ni ngar machibnaged e thin rok Got ko re nam nem, ma u lan lal e duw ni ke yan, e kara daged e t’ufeg rorad ya kar wereged e machib u lan e re mach nem nge boch e binaw nib palog. Rogon ni yad ma maruwel ko territory rorad, e yad ma yan u daken e rat rorad u lan boor e awa ma ke pag e 100 degrees Fahrenheit gawelngin. T’ufeg rorad nge “gum’an’ ko maruwel nib fel’” e ir e ke yibnag angin ma aram kan tababnag e ulung ni ma fol babyor u reb e binaw. (Roma 2:7, NW) Pul ni March ko duw ni 2000, ma 32 e girdi’ ni kar bad ni ngar motoyilgad ko welthin ni fan ko yoor ni ra weliy fre circuit overseer rorad. Nepal e immoy e publisher rorad ni 430 fa binem e duw​—ma aram ke mun ko 9 percent. Ba tamilang ni be taw’athnag Jehovah e pi walag ko re binaw nem ni be maruwel u fithik’ e pasig.

¹⁴ Piin ni ka nog temporary special pioneers ngorad e ka ranod nga Colombia ni ngar machibnaged e girdi’ ni ka nog Wayuu Indians ngorad. Ba t’uf ni ngar filed e thin nib biech ma aram rogon rayog ni ngara rin’ed e re maruwel ney, machane kan taw’athnag e t’ufeg ni kar daged ngorad ya yugu aram rogon ni ke aw e n’uw nib gel ma 27 e girdi’ ni kar uned ko welthin ni fan ko yoor. Ngongol ni t’ufeg nge pasig ni ke dag e pi pioneer nem e ir e ke ayuwegrad ma aram ke yoor ko 5-percent e pi publisher u Colombia ni yad urngin e ke taw ko 107,613. U Denmark ma reb e walag ni ppin ni ke pillibthir e ke adag ni nge wereg e thin nib fel’ ngak yugu boch e girdi’, machane cha’ nem e ba m’ar ma dariy gelngin. De rus, ma aram ke yoloy boch e babyor ni fan ni nge ayuweg e girdi’ ni baadag e machib. Chiney, bay 42 e girdi’ ni ma pi’ e cha’ nem e babyor ngorad ma bay 11 riy ni ma fil e Bible ngorad. Ma ir bagayad ko 14,885 e publisher ni kar pied e report rorad fa binem e duw u Denmark.

Ngam T’ufeged e Pi Toogor Romed

15, 16. (a) Susun uw feni gel e t’ufeg rodad rogon ni yog Jesus? (b) Mang e ke rin’ e pi walag ni kar ilalgad ko tirok Got ko fa en ni ke yoloy boch e thin nib togopuluw ko Pi Mich rok Jehovah?

¹⁵ Ke yog Jesus ngak fare pumoon ni tamachib nib cheg ko fare Motochiyel ni fa cha’ nu Samaritan e rayog ni nge mang en buguli yoror rok. Nap’an e Welthin rok Jesus u daken fare Burey, me weliy boch e thin nib gel boch me gaar: “Kam rung’aged ni ka nog ni ke lunguy, ‘nge t’uf rom e pi tafager rom, ma ga fanenikay e pi toogor rom.’ Machane nggog ngomed ni nge lungug, Nge t’uf romed e pi toogor romed, mpied e meybil rok e piin ni yad be ngongliy e kireb ngomed, ya nge yog ni manged pi fak e Chitamangimed ni bay u tharmiy.” (Matthew 5:43-45) Yugu aram rogon ni bay be’ ni be togopuluw ngodad ma ngada guyed rogon ni ngad ngongliyed “e ngongol nib fel’ ngan gel ngak e kireb.” (Roma 12:19-21) Faanra rayog, ngada pied ngak e flaab rodad nth’abi tolang puluwon, ni ereram fare thin riyul’.

¹⁶ U Ukraine ma reb e article ko fare newspaper ni Kremenchuk Herald e ke weliy ni Pi Mich rok Jehovah e aram reb e ulung ni nra kirebnagey. Ma gathi aram e n’en ndariy fan ya boch e girdi’ nu Europe e ka rogned boch e thin ni aray rogon nib togopuluw ko Pi Mich rok Jehovah ni fan ni ngan k’aring e girdi’ ni ngan taleg min magawonnag e maruwel rorad. Arfan, ni kan yan nga nog ngak fa en ni editor ni nge ngongliy reb e babyor nra yal’uweg fare article. Ke yog ni rayog, machane u lan fare babyor ni ke ngongliy, me uneg boch e thin ni be weliy ni fare article ni som’on e bay e mich riy ni be dag ni riyul’ e re n’em. Ere boch e walag ni kar ilalgad ko tirok Got e ka ranod ni ngar weliyed boch ngak e cha’ nem. Tomur riy, e aram e ke tamilang u wan’ fare editor ni fare article nsom’on e kan ngongliy nib oloboch, me ngongliy yugu reb e article ni be weliy ni de riyul’ e fa bin som’on e article. Kan pithig e re magawon nem u fithik’ e t’ufeg ya kan weliy ban’en ngak fa cha’ nib tamilang ngu fithik’ e gol, ma aram ke yib angin ngorad.

Uwrogon ni Ngada Maruwelgad nge Gel e T’ufeg Rodad

17. Mang e be dag ni gathi gubin ngiyal’ nib mom ni ngan dag e t’ufeg ngak yugu boch e girdi’?

¹⁷ Ngiyal’ ni kan gargelnag e bitir, ma nge t’uf e re tir nem rok e gallabthir rok e chi ngiyal’ nem. Ngan t’ufeg e piin ni ke ilal boch ma gathi ban’en ni ri yima rin’. Sana arfan ni fare Bible e be yog ngodad ni boor yay ni ngada t’ufeged gadad​—ni aram e n’en ni thingarda maruwelgad ngay. (1 Peter 1:22; 4:8; 1 John 3:11) Manang Jesus ni bayni skengnag e t’ufeg rodad ma arfan ni ke yog ni thingarda n’iged fan u wan’dad e kireb rok walagdad ni “medlip yay e medlip i ragag.” (Matthew 18:21, 22) I fonownagdad Paul ni ngada “n’iged fan u wun’dad e tin nib kireb ni ke rin’ bagadad ngak bagadad” nge “bagadad mi i ayuweg bagadad ko meewar rok u fithik’ e runguy.” (Efesus 4:32; Kolose 3:12, 13) Arfan ni ka nog ngodad ni gaar: “Ere mu guyed rogon nge t’uf Got romed nge girdi’”! (1 Korinth 14:1) Uw rogon ni ngada rin’ed e n’en ni aray rogon?

18. Mang e ra ayuwegdad ni nge gel e t’ufeg rodad ngak yugu boch e girdi’?

¹⁸ Som’on, e rayog ni ngada lemnaged fare t’ufeg rodad ni fan ko Jehovah Got e gubin ngiyal’. Re t’ufeg ney e ra k’aringdad ni ngad t’ufeged fa en ni buguli yoror rodad. Mang fan? Ya nap’an ni ngad ngongolgad u fithik’ e t’ufeg, ma re n’ey e ra dag ko uw rogon e ngongol rok e Chitamangidad u tharmiy ma yira rirnag min nog e sorok ngak. (John 15:8-10; Filippi 1:9-11) Bin l’gruw, e aram e rayog ni ngada boded Jehovah ko uw rogon ni be guy Jehovah boch ban’en. Gubin ngiyal’ ni kad rin’ed e tin kireb, ma aram kada denengad nib togopuluw ku Jehovah; machane, ma n’ag fan uwan’ e kireb rodad ni biyay nge biyay ma ma par ni gad ba t’uf rok. (Psalm 86:5; 103:2, 3; 1 John 1:9; 4:18) Faan gad ra athamgil ni nge yog ngodad e lem rok Jehovah, ma ra nge yog ni ngada t’ufeged yugu boch e girdi’ ma ngada n’iged fan u wan’dad e kireb ni ke rin’ boch e girdi’ nib togopuluw ngodad. (Matthew 6:12) Ma bin dalip, e rayog ni ngad rin’ed ngak e girdi’ e tin ni gad baadag ni ngara rin’ed ngodad. (Matthew 7:12) Bochan ni daworda flontgad, ma aram e gubin ngiyal’ ma ba t’uf ni nge n’ag Got fan u wan’ e kireb rodad. Ni bod e re n’en ni baaray, ni ka dogned boch ban’en ni ke amithnag laniyan’ boch e girdi’, ma gad be athapeg ni ngar ngongolgad u fithik’ e runguy ma ur lemnaged ni gubin e girdi’ e yu ngiyal’ e yad ma oloboch ko thin rorad. (James 3:2) Faanra gad baadag ni boch e girdi’ e nge rin’ boch ban’en ngodad u fithik’ e t’ufeg, ma thingarda rin’ed boch ban’en ngorad u fithik’ e t’ufeg.

19. Uw rogon ni ngada gayed e ayuw ko kan ni thothup ni ngada gelnaged e t’ufeg?

¹⁹ Bin aningeg, e rayog ni ngada ninged e ayuw ko kan ni thothup ya t’ufeg e ir bang ko pi woomngin e kan thothup. (Galatia 5:22, 23) Fager, nge t’ufeg u tabinaw, nge t’ufeg u thilin e pumoon nge ppin e baga’ ni ma yib ni dan ayuweg. Machane ba t’uf rodad e ayuw ku gelngin Jehovah ma aram rogon rayog ni nge yog ngodad e t’ufeg ni bay rok Jehovah, ni aram e t’ufeg nrayog ni nge taareban’nag e girdi’. Gad ra gay e ayuw ko kan ni thothup u daken e bieg Bible ni aram e babyor ni kan thagthagnag. Ni bod ni, faanra ngada filed ban’en u murung’agen Jesus, ma aram rayog ni ngada guyed ko uw rogon ni ke ayuweg e girdi’, ma rayog ni ngada nanged ko uw rogon ni ngada folwokgad rok. (John 13:34, 35; 15:12) Maku, gad ra ning e ayuw ko kan ni thothup rok Jehovah, ma ri baga’ fan e re n’ey ko ngiyal’ nib mo’maw ngodad ni ngad ngongolgad u fithik’ e t’ufeg. (Luke 11:13) Tomur riy, ma aram e rayog ni ngada pared nib chuchugur ko ulung ni Kristiano. Ngan chag ko pi walag ni pumoon nge ppin ma ra ayuwegdad ni nge gel e t’ufeg rodad.​—Proverbs 13:20.

20, 21. Uw rogon ni kari dag e Pi Mich rok Jehovah e t’ufeg rorad u nap’an e duw ni 2000?

²⁰ Fa binem e duw, ma bay 6,035,564 e publisher ara tamachib ko fare thin nib fel’ u ga’ngin yang e fayleng. Pi Mich rok Jehovah e kara thognaged e 1,171,270,425 e awa ni fan e ngara gayed e girdi’ ni ngar machibnaged e thin nib fel’ ngorad. Fare t’ufeg e ir e ke ayuwegrad ni nge par nib mudugil lanin’rad ko ngiyal’ nib gel e gawel, nge fare n’uw, nge garbeb ko ngiyal’ ni kara uned ko re maruwel n’ey. T’ufeg e ir e ke ayuwegrad ni ngar nongad ko piin yad nga skul nge piin ni yad ma maruwel u taabang ara ngar nongad ko piin kar mada’gad u kanawo’ ni dar nanged yad nge yuguyu yang. Boor e piin ni ke mada’nag e Pi Mich rok Jehovah nga tabinaw rorad ni dariy fan e thin rok Got u wan’rad, ma boch e ma togopuluw. Machane boch i yad e baadag e machib, arfan ni ke taw ko 433,454,049 e girdi’ ni kar sulod ni ngar guyed yad, ma 4,766,631 e girdi’ ni kar filed e Bible ngorad.a

²¹ Pi ne’n ney ni urngin e kari dag nib t’uf rok e Pi Mich rok Jehovah e Got rorad nge piin ni yad buguli yoror! Re t’ufeg nem e dabi war. Ke mudugil u wan’dad ni nap’an e duw ni 2001 ma ka boor e girdi’ ni yira wereg e thin rok Got ngorad. Yibe athapeg ni ra par ni be taw’athnag Jehovah e piin ni yad ba yul’yul’ ngak ma yad be pigpig ngak u fithik’ e pasig mi yad pag ni ngar ‘ngongliyed urngin e maruwel rorad u fithik’ rogon nib t’uf e girdi’ romed’!​—1 Korinth 16:14.

[Footnote]

Rayog ni Ngam Weliy?

• Ra ngada t’ufeged e en ni buguli yoror rodad ma gad be folwok rok mini’?

• Susun uw feni gel ni ngada daged e t’ufeg rodad ngak yugu boch e girdi’?

• Mang boch ban’en ni ke buch ni be dag rogon e t’ufeg ko Kristiano?

• Uw rogon ni ngada gelnaged e t’ufeg ko Kristiano?

[Chart on page 14-17]

2000 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Pictures on page 11]

T’ufeg ko Kristiano e ra ayuweg ni nge par girdien e tabinaw u taabang

[Pictures on page 13]

Fare t’ufeg e ra k’aringdad ni ngada weliyed e athap rodad ngak yugu boch e girdi’