LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w14 6/1 pp. 12-16
  • “Thingari T’uf Rom e En ni Ir e Mmigid Ngom ni Gowe Gur”

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • “Thingari T’uf Rom e En ni Ir e Mmigid Ngom ni Gowe Gur”
  • Fare Wulyang ko Damit Ni Be Weliy Morngaagen Gil’ilungun Jehovah—2014
  • Pi Subheading
  • Boch Ban'en ni Ku Taareb Rogon Ngay
  • MINI’ E EN NI IR E MMIGID NGODAD?
  • ROGON NI NGAD T’UFEGED E EN NIB MIGID NGODAD
  • BIN TH’ABI FEL’ E KANAWO’ U ROGON NI NGAD T’UFEGED E EN NIB MIGID NGODAD
  • ROGON NI KAN TAMILANGNAG RAROGON E T’UFEG U BIBLE
  • UM T’UFEG E EN NIB MIGID NGOM NI GOWE GUR
  • Fan Ni Nge T’uf Rodad E En Nib Migid Ngodad
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2007
  • Ba “T’uf Rom e En ni Ir e Mmigid Ngom ni Gowe Gur,” Fa?
    Fare Wulyang ko Damit Ni Be Weliy Morngaagen Gil’ilungun Jehovah—2015
  • Uw Feni Gel E T’ufeg Rom?
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2001
  • Mu T’ufeg Fare Got Ni Gab T’uf Rok
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2007
Fare Wulyang ko Damit Ni Be Weliy Morngaagen Gil’ilungun Jehovah—2014
w14 6/1 pp. 12-16

“Thingari T’uf Rom e En ni Ir e Mmigid Ngom ni Gowe Gur”

“Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’”​—MATT. 22:39.

UW ROGON NI GA RA FULWEG?

  • Mini’ e en ni ir e mmigid ngodad?

  • Ga be lemnag, ma mang fan nrayog ni ngad t’ufeged e en nib migid ngodad? Mang fan ni susun e ngad rin’ed e re n’ey?

  • Mang boch i rarogon e t’ufeg ni kan tamilangnag ko 1 Korinth 13:4-8?

1, 2. (a) Bin ngan e motochiyel e yog Jesus ni aram e bin th’abi ga’ nge bin th’abi ga’ fan e motochiyel? (b) Mang deer e ngad weliyed e fulweg riy?

IMMOY bayay ni guy reb e Farise rogon ni nge skengnag Jesus, ma aram me fith ngak ni gaar: “Tamachib, bin ngan e motochiyel e ir e th’abi ga’ u fithik’ e Motochiyel?” Kad weliyed ko fa binem e article ni yog Jesus ngak ni “bin th’abi ga’ nge bin th’abi ga’ fan e motochiyel” e aram e: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um [“yafas rom,” NW], ngu polo’ i lem rom.” Ki ulul Jesus ngay ni gaar: “Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’”​—Matt. 22:34-39.

2 I yog Jesus ni thingari t’uf rodad e en ni ir e mmigid ngodad ni gowa gadad. Ere, thingar da fithed ko: Mini’ e en ni ir e mmigid ngodad? Ma uw rogon ni ngad t’ufeged e en nib migid ngodad?

MINI’ E EN NI IR E MMIGID NGODAD?

3, 4. (a) Mang fanathin e weliy Jesus ni nge pi’ e fulweg ko fare deer ni fith be’ ngak ni gaar: “Mini’ e en ni ir e mmigid ngog”? (b) Uw rogon ni ayuweg facha’ nu Samaria fare pumoon ni kan pirdiiy, ngemu’ min iring e chugum rok, min pag ni ke chugur ni nge yim’? (Mu guy e sasing ni bay u tabolngin e re article ney.)

3 Gad ra lemnag e en nib migid ngodad ma sana ra yib ngan’dad be’ ni ma par nib chugur ngodad ara reb e fager rodad. (Prov. 27:10) Machane, am lemnag e n’en ni yog Jesus ngak be’ ni baadag ni nge yan i par ni ir be’ nib mat’aw. I fith e cha’nem ni gaar: “Mini’ e en ni ir e mmigid ngog?” Rogon e fulweg ni pi’ Jesus ngak e aram e weliy ba fanathin u murung’agen be’ nu Samaria. (Mu beeg e Luke 10:29-37.) Sana gad ra lemnag ni fare prist nu Israel nge fare Levite e aram e gali cha’ ni yow ra ayuweg fare pumoon ni kan pirdiiy, ngemu’ min iring e chugum rok, min pag ni ke chugur ni nge yim’. Machane bin riyul’ riy e ra bow nga ranow u tooben ndariy ban’en nrin’ew ngak. Be’ nu Samaria ni ir bagayad fapi girdi’ ni yad ma tayfan fare Motochiyel rok Moses, machane dabun e pi Jew dakenrad e ir e ayuweg fare pumoon.​—John 4:9.

4 I puog facha’ nu Samaria e gapgep nge wain ko yungi n’en ni ke maad’ad u downgin fare pumoon ya nge papey ni nge fas. Fa gal salpiy ni silber ni pi’ ngak e en nib mil suwon fare naun ntafen e milekag ngak ni nge fanay ni nge ayuweg fare pumoon ni ke maad’ad, e aram puluwon e maruwel ni ke tay be’ u lan l’agruw e rran. (Matt. 20:2) Ere ba mom ni ngad nanged ko mini’ e en ni ir e mmigid ko fare pumoon ni ke maad’ad. Fare fanathin ni weliy Jesus e be fil ngodad ni ngaud runguyed ma gad t’ufeg e piin nib migid ngodad.

5. Uw rogon ni ke t’ufeg e pi tapigpig rok Jehovah e piin nib migid ngorad u nap’an reb e yoko’ ni ka fini aw nga reb e mach ndawori n’uw nap’an?

5 Ke mo’maw’ ni ngan pirieg e girdi’ e ngiyal’ ney ni ma runguy e girdi’ ni bod rogon facha’ nu Samaria. Ngiyal’ ney e gad be par ko “tin tomren e rran,” ndaki gol e girdi’, ma yad ba damumuw, ma kar dabuyed e tin nib fel’. (2 Tim. 3:1-3) Bod ni, rayog ni nge sum boch e magawon u nap’an ni ke yib e yoko’ ara durru’ ara ku boch ban’en ni ma yib ni yima gafgow riy. Am lemnag e n’en ni buch u nap’an ni aw fare yoko’ ni ka nog e Hurricane Sandy ngay nga New York City u tungun e October ko duw ni 2012. Immoy bang ko re mach nem nrib gel e magothgoth ni tay, miki par ndariy e gamig riy, nge boch e masin ni ma ayuweg e naun ni nge par nib gowel, nge ku boch ban’en. Maku ba gel e gafgow ni tay e girdi’ riy ni bochan e chel e moro’ro’ ngaur iringed e chugum ko girdi’. Pi Mich Rok Jehovah ni yad ma par u rom e ra fal’eged boch e program ni nge ayuweg e pi walag ni ma par u rom nge ku boch e girdi’. Ma rin’ e piin Kristiano boch ban’en ni aray rogon ni bochan e ba t’uf rorad e piin nib migid ngorad. Ku mang boch e kanawo’ nrayog ni ngad t’ufeged e piin nib migid ngodad riy?

ROGON NI NGAD T’UFEGED E EN NIB MIGID NGODAD

6. Uw rogon nib l’ag fare maruwel ni machib ni gad ma tay ko ayuw ni gad ma pi’ ko en nib migid ngodad?

6 Mu ayuweg e girdi’ ni ngar nanged e thin rok Got. Rogon ni gad ma rin’ e re n’ey e aram e gad ma ayuwegrad ni nge yag ngorad e “athamgil laniyan’ ni be pi’ e thin ko babyor nib thothup.” (Rom. 15:4) Dariy e maruwar riy ni faan gad ra fil e tin riyul’ nu Bible ko girdi’ u daken e machib ni gad ma tay ma aram e gad be ayuweg e en nib migid ngodad. (Matt. 24:14) Ri gad ba tow’ath ni ngad uned i weliy ko girdi’ fare thin nib fel’ ni ke yib rok fare “Got ni ir e ma pi’ e l’agan’”!​—Rom. 15:13.

7. Mang fare Motochiyel ni pi’ Jesus ni murung’agen rogon ni ngaud ngongolgad ko girdi’? Faan gad ra fol ko re motochiyel ney ma mang tow’ath e ra yag ngodad?

7 Mu fol ko fare Motochiyel ni pi’ Jesus ni murung’agen rogon ni ngaud ngongolgad ko girdi’. I pi’ Jesus e re motochiyel ney u nap’an fare Welthin rok u Daken e Burey. I yog ni gaar: “Mu rin’ed ngak e girdi’ e tin ni gimed ba adag ni ngar rin’ed ngomed; ereray fan fapi Motochiyel rok Moses nge tin i fil e pi profet ngak e girdi’.” (Matt. 7:12) Faan gad ra ngongol ko girdi’ ni bod rogon ni yog Jesus ma aram e gad be ngongol nrogon nib puluw ko fare “Motochiyel” (ni aram e Genesis nge mada’ ko Deuteronomy) nge “tin i fil e pi profet” (ni aram e pi babyor ni yoloy e pi profet ni bay ko Pi Babyor ko Bible nni Yoloy Nsom’on ni Thin ni Hebrew). Be dag e pi thin ney ni ma tow’athnag Got e piin ni yad ma t’ufeg e girdi’. Bod ni yog fare psalmist ni gaar: “Nge felan’ e piin yad be fol ko tin ke yog, piin gubin ngiyal’ ma yad ma rin’ e tin nib fel’.” (Ps. 106:3, BT ) Gad ba tow’ath ni bochan e gad ma t’ufeg e piin nib migid ngodad ma gad ma rin’ e tin nib fel’ ngorad.

8. Mang fan nsusun e ngaud t’ufeged e pi toogor rodad, ma mang e rayog ni nge buch ni faan gad ra fol ko re n’ey?

8 Ngam t’ufeg e pi toogor rom. I yog Jesus ni gaar: “Kam rung’aged ni ka nog ni ke lunguy, ‘Nge t’uf rom e pi tafager rom, ma ga fanenikay e pi toogor rom.’ Machane chiney e nggog ngomed ni nge lungug, Nge t’uf romed e pi toogor romed, mpied e meybil rok e piin ni yad be ngongliy e kireb ngomed, ya nge yog ni mmanged pi fak e Chitamangimed ni bay u tharmiy.” (Matt. 5:43-45) Ku ireray e n’en ni yog apostal Paul u nap’an ni yoloy ni gaar: “Faanra yim’ e toogor rom ko bilig, ma ga pi’ e ggan ngak; ma faanra yim’ ko belel, ma ga pi’ e garbod ngak.” (Rom. 12:20; Prov. 25:21) Rogon ni bay ko fare Motochiyel rok Moses e faanra ke guy be’ e gamanman ko toogor rok ni ke aw nga but’ u tan gilban nib tomal, ma thingari ayuweg. (Ex. 23:5) Re n’ey e rayog ni nge ayuweg l’agruw e toogor ni ngki fel’ thilrow bayay. Bochan ni ma dag e piin Kristiano e t’ufeg, ma aram fan ni boor e toogor rorad ni ke yag ni nge munguy lanin’rad. Ere, faanra ud t’ufeged e pi toogor rodad, ni ki mada’ ko piin ni yad ma gafgownagdad, ma gad ra felfelan’ u nap’an nra mang boch i yad e Kristiano!

9. Mang e yog Jesus u murung’agen rogon ni nge aw e gapas u thildad reb i walagdad?

9 “Mu guyed rogon nguum pired nib aw e gapas u thilmed urngin e girdi’.” (Heb. 12:14) Ba muun pi walagdad ko re n’ey, ya yog Jesus ni gaar: “Faanra mman ni ngam pi’ e n’en ni ngam pi’ ngak Got u mit e altar me yib ngan’um ni bay ban’en nib togopuluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got.” (Matt. 5:23, 24) Faan gad ra t’ufeg pi walagdad ma gad guy rogon ni nge aw e gapas u thildad, ma ra tow’athnagdad Got.

10. Mang fan nsusun e dab ud turguyed e kireb nga daken boch e girdi’?

10 Dab um turguy e kireb nga daken be’. I yog Jesus ni gaar: “Dab mu turguyed e kireb [“mu talgad i turguy e kireb,” NW] nga daken e girdi’, nge dabi turguy Got e kireb nga dakenmed yi Got e ra turguy e kireb nga dakenmed nrogon ni kam turguyed e kireb nga daken e girdi’, nrogon nga gelngin ni mrin’ed ngorad. Ere mang fan ni ga be sap nga ba tabyu’ ni bay u lan mit walagem, ma damur tiyan’um nga baley i gek’iy ni bay u lan owchem? Ere ra diin me lungum ngak walagem, ‘Mu son, nggu chuweg e re tabyu’ ni beer u lan owchem,’ ma ba’ ba ley i gek’iy u lan owchem? Gur e cha’ ni ga be dake modingnigem! Som’on e ngam chuweg fare ley i gek’iy u lan owchem, nge mu’ ma aram me yog ni mu guy ban’en ngam chuweg fare tabyu’ u lan mit walagem.” (Matt. 7:1-5) Ere, gad be fil u roy ndab ud gathibthibnaged boch e girdi’ ni bochan nochi oloboch nib achig ni kar rin’ed ma gad digey e tirodad e kireb!

BIN TH’ABI FEL’ E KANAWO’ U ROGON NI NGAD T’UFEGED E EN NIB MIGID NGODAD

11, 12. Mang reb e kanawo’ ni gad ma t’ufeg e en nib migid ngodad riy?

11 Boor e kanawo’ nrayog ni ngad t’ufeged e en nib migid ngodad riy. Machane, ke fil Jesus ni bin th’abi fel’ e kanawo’ nrayog ni ngad rin’ed e re n’ey riy e aram e ngad machibnaged fare thin nib fel’ u murung’agen Gil’ilungun Got ko girdi’. (Luke 8:1) I tay Jesus chilen ngak pi gachalpen ni nga ‘ranod ngak girdien e pi nam u gubin yang ngar pingeged yad ngar manged pi gachalpen.’ (Matt. 28:19, 20) Gad ra rin’ e re maruwel ney ni kan tay chilen ngodad, ma aram e gad be ayuweg e en nib migid ngodad ni nge chuw u daken fare pa’ i kanawo’ nib ga’ ni be sor i yan ko magothgoth me yib nga daken fa pa’ nem nib wen’in ni be sor i yan ko yafas. (Matt. 7:13, 14) Dariy e maruwar riy nra tow’athnagdad Jehovah ko athamgil ni gad ma tay.

12 Gad ma ayuweg e girdi’ ni ngar nanged nib t’uf Got rorad ni bod ni i rin’ Jesus. (Matt. 5:3) Nap’an ni gad ra weliy fare “Thin Nib Fel’ ni yib rok Got” ko girdi’ ma aram e gad be folwok rok Jesus. (Rom. 1:1) Piin ni yad ra fol ko fare thin nib fel’ ni murung’agen Gil’ilungun Got e yad ra mang tafager rok Got u daken Jesus Kristus. (2 Kor. 5:18, 19) Ere, gad ra machibnag fare thin nib fel’ ko girdi’ ma aram e bin th’abi ga’ fan e kanawo’ ni gad be t’ufeg e en nib migid ngodad riy.

13. Uw rogon u wan’um e biney e maruwel ni ga be un ngay ni ga be machibnag fare thin nib fel’ ko girdi’?

13 Faanra ud fal’eged rogodad ni ngad sulod ko girdi’ ni kad mada’naged u nap’an e machib nge piin ni gad be fil e Bible ngorad, ma aram e gad be ayuweg e girdi’ ni ngar folgad ko pi motochiyel rok Got nib mat’aw. Re n’ey e rayog ni nge ayuweg faen ni be fil e Bible ni nge thilyeg e ngongol rok. (1 Kor. 6:9-11) Ri gad ma felfelan’ ni ngad guyed rogon ni ke ayuweg Got e piin ni ke mel’egrad ni “nge yog e yafos ndariy n’umngin nap’an ngorad” ni ngar thilyeged e ngongol rorad me fel’ e tha’ u thilrad. (Acts 13:48) Boor e girdi’ ni ur moyed ndakuriy ban’en ni be l’agan’rad ngay e ke yag ni ngar felfelan’gad bayay, ma boch e girdi’ ni ma magafan’rad nib gel e ke yag ni nge pagan’rad ko Chitamangidad ni bay u tharmiy ni bochan e kar filed e Bible. Rib manigil ni ngan guy be’ ni be mon’og ko tirok Got ban’en! Ma ri gad ba tow’ath ni ngad t’ufeged e en nib migid ngodad u daken e biney e maruwel ni yugu ba thil.

ROGON NI KAN TAMILANGNAG RAROGON E T’UFEG U BIBLE

14. Mu weliy boch i rarogon e t’ufeg nrogon ni kan tamilangnag ko 1 Korinth 13:4-8.

14 Faan gad ra t’ufeg e en nib migid ngodad ni bod rogon ni tamilangnag Paul, ma rayog ni nge buchuuw e magawon rorad, ma gad par ni gad ba felfelan’, me tow’athnagdad Got. (Mu beeg e 1 Korinth 13:4-8a.) Ngad sulod nga daken e n’en ni yog Paul u murung’agen e t’ufeg nge rogon nrayog ni ngad folgad ko n’en ni yog u rogon e ngongol rodad ko en nib migid ngodad.

15. (a) Mang fan ni susun e ngaud gum’an’niged gadad mu ud golgad ko girdi’? (b) Mang fan ni ngad siyeged e awan’ nge ufanthin?

15 “En nib t’uf Got rok nge girdi’ e ba gum’an’ ma ba gol.” Yugu aram rogon ndawor da flontgad ma ma gum’an’ Got u puluwdad ma ma gol ngodad, ere ku er rogodad nib t’uf ni ngad gum’an’niged gadad ma gad gol ko girdi’ u nap’an ni kar olobochgad ara ka rogned e thin nib kireb ngodad. Be yog e Bible ni “en nib t’uf Got rok nge girdi’ e der ma awan’.” Ere, faanra riyul’ nib t’uf Got nge girdi’ rodad ma dabi awan’dad ngak be’ ni bochan ban’en ni bay rok ara bochan ni kan pi’ boch e maruwel ngak u lan e ulung. Maku reb e faanra ba t’uf Got nge girdi’ rodad, ma dab ud ufanthingad ara i tolangan’dad. Bin riyul’ riy e, “girdi’ nib kireb e be gagiyegnagrad e ufanthin nge tolangan’, ni ireray e denen.”​—Prov. 21:4, BT.

16, 17. Uw rogon ni nge puluw e ngongol rodad ko fare thin ni bay ko 1 Korinth 13:5, 6?

16 Faanra ba t’uf Got nge girdi’ rodad ma aram e ra ud rin’ed e ngongol nib fel’ ko en nib migid ngodad. Maku reb e, faanra ba t’uf Got nge girdi’ rodad ma aram e dab ud bannaged facha’, ara da iringed ban’en rok, ara da rin’ed ban’en nib togopuluw ko pi motochiyel nge pi kenggin e motochiyel rok Jehovah. Re n’ey e ku ra k’aringdad ni ngaud lemnaged boch e girdi’ ma gathi goo gadad.​—Fil. 2:4.

17 Faanra riyul’ nib t’uf Got nge girdi’ rodad ma de papey e damumuw ngodad, ma ‘der ma aw nga lanin’dad e n’en nib kireb ni kan rin’ ngodad,’ ara da ted u lanin’dad urngin ban’en nib kireb ni kan rin’ ngodad. (1 Thess. 5:15) Faanra ud ted u lanin’dad e pi n’en nib kireb ni kan rin’ ngodad, ma dabiyog ni ngad fel’gad u wan’ Got, ya gowa gad be ngongliy reb e nifiy nrayog ni nge ga’ e daramram riy ma gad maad’ad ngay ara maad’ad boch e girdi’ ngay. (Lev. 19:18) Faanra ba t’uf Got nge girdi’ rodad ma gad ra felfelan’ ko tin riyul’, ma dabi ‘fel’ u wan’dad’ e gafgow ni be tay be’ ndabun dakendad.​—Mu beeg e Proverbs 24:17, 18.

18. Mang e kad filed u murung’agen e t’ufeg ko fare thin ni bay ko 1 Korinth 13:7, 8?

18 Ki yog Paul ni en nib t’uf Got rok nge girdi’ e “dabiyog ni nge pag ir ndab ki k’adan’.” Faanra ke rin’ be’ ban’en nib kireb ngodad me yog ni ngad n’aged fan rok, ma faanra ba t’uf Got nge girdi’ rodad ma gad ra n’ag fan. Faanra ba t’uf Got nge girdi’ rok be’ ma “dabiyog ni nge pag ir ndab . . . ki michan’.” Ba mich u wan’dad e pi n’en ni gad ma beeg ko Thin rok Got ma gad ma pining e magar ko pi n’en ni ma pi’ Got ngodad nra ayuwegdad ko tirok ban’en. Faanra ba t’uf Got nge girdi’ rok be’ ma “dabiyog ni nge pag ir ndab . . . ki l’agan’.” Bay ban’en ni be l’agan’dad ngay ni bochan e be pagan’dad ko pi n’en ni kan micheg u Bible, ma re n’ey e ma k’aringdad ni ngad weliyed ko girdi’ murung’agen e pi n’en ni be l’agan’dad ngay. (1 Pet. 3:15) Maku, nap’an ni gad ra mada’nag boch e magawon nib mo’maw’ ma gad ma meybil ma gad athapeg ni nge buch boch ban’en nib fel’ nga tomuren. Faanra ba t’uf Got nge girdi’ rok be’ ma “dabiyog ni nge pag ir ndab . . . ki gum’an’.” Mus ni faanra kan rin’ boch ban’en nib togopuluw ngodad, ara yibe gafgownagdad, ara kad mada’naged boch e skeng ma t’ufeg rodad ngak Got nge girdi’ e ra ayuwegdad ni ngad gum’an’niged gadad u fithik’ e pi n’ey. Maku reb e “rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.” Piin ni yad ba yul’yul’ e ra i m’ug e re fel’ngin ney ko ngongol rorad ndariy n’umngin nap’an.

UM T’UFEG E EN NIB MIGID NGOM NI GOWE GUR

19, 20. Mang fonow u Bible e ra k’aringdad ni ngaud t’ufeged e en nib migid ngodad?

19 Ga ra fol ko fonow nu Bible, ma rayog ni ngaum t’ufeg e en nib migid ngom. Thingari t’uf gubin mit e girdi’ rodad, ma gathi kemus ni goo piin ni gad nga taab nam. Ku thingar dab da paged talin e n’en ni yog Jesus ni gaar: “Thingari t’uf rom e en ni ir e mmigid ngom ni gowe gur.” (Matt. 22:39) Baadag Got nge Kristus ni ngad t’ufeged e en nib migid ngodad. Faanra ba mo’maw’ ngodad ni ngad t’ufeged e en nib migid ngodad ma ngad meybilgad ngak Jehovah ni nge pow’iydad u daken gelngin nib thothup. Faan gad ra rin’ ni aray rogon ma ra tow’athnagdad me ayuwegdad ni ngaud ngongolgad u fithik’ e t’ufeg.​—Rom. 8:26, 27.

20 Fare motochiyel ni be yog ni ngaud t’ufeged e en nib migid ngodad ni gowe gadad e ku yima pining fare “motochiyel rok fare gagiyeg nu tharmiy” ngay. (Jas. 2:8) Tomuren ni weliy Paul murung’agen reb e motochiyel ni bay ko fare Motochiyel rok Moses, me yog ni gaar: “Urngin e tiney nge tin ni ka bay e kan ulunguy nga fithik’ taareb e motochiyel ni be gaar, ‘Demtrug e gin’en ni ga bay riy ma nge t’uf rom e en nib migid ngom ni gowe gur.’ En nib t’uf rok e en nib migid ngak e ri dabiyog ni nge rin’ ban’en nib kireb ngak. Ra t’uf e girdi’ rodad, ma aram e kad folgad ko fare Motochiyel ni polo’.” (Rom. 13:8-10) Ere, ba t’uf ni ngaud t’ufeged e en nib migid ngodad ni gowe gadad.

21, 22. Mang fan ni susun e ngad t’ufeged Got nge en nib migid ngodad?

21 Nap’an ni gad be fal’eg i lemnag fan ni susun e ngaud t’ufeged e en nib migid ngodad, mab fel’ ni ngad lemnaged fapi thin rok Jesus ni faani yog ni Chitamangin e “be mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matt. 5:43-45) Thingar ud t’ufeged e en nib migid ngodad ndemtrug ko ir be’ nib mat’aw e n’en ni ma rin’ fa danga’. Kad weliyed faram ni bin th’abi fel’ e kanawo’ nrayog ni ngad daged e re t’ufeg ney riy e aram e ngad weliyed fare thin nib fel’ ngak ni murung’agen Gil’ilungun Got. Ri boor e tow’ath nra yag ngak ni faanra motoyil ko fare thin nib fel’ me fol riy!

22 Boor fan ni nge t’uf Jehovah rodad. Ku boor e kanawo’ nrayog ni ngad t’ufeged e en nib migid ngodad riy. Faanra ud t’ufeged Got nge en nib migid ngodad, ma aram e gad be fol ko thin rok Jesus. Bin th’abi ga’ fan riy e gad be rin’ e tin nib m’agan’ Jehovah ngay ni ir e Chitamangidad ni bay u tharmiy.

[Boch e thin nra tamilangnag murung’agen]

a 1 Korinth 13:7, (NW): “Dabiyog ni nge pag ir ndab ki k’adan’, ma dab ki michan’, ma dab ki l’agan’, ma dab ki gum’an’.”

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag