Mu T’ufeg Fare Got Ni Gab T’uf Rok

“Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.”​—MATTHEW 22:37.

1, 2. Mang e ke k’aring fare deer u murung’agen e bin th’abi ga’ e motochiyel?

FARE deer ni kan fith e ke k’aring e tugthin u fithik’ e pi Farise u nap’an Jesus. Fapi motochiyel nib pag e 600 ni ka nog e Motochiyel rok Moses ngay, bin ngan e th’abi ga’ fan? Fa binem e motochiyel ni fan ko maligach fa? Riyul’, ni fapi maligach e kan fal’eg ni fan e nge n’ag fan e denen ma ngan pining e magar ngak Got. Ara bin ni ba ga’ fan e motochiyel e fa bin fan ko maad’ad ko pumoon? Maku ba ga’ fan, ya maad’ad e aram e pow ko m’ag ni ke fal’eg Jehovah u thilrow Abraham.​—Genesis 17:9-13.

² Maku reb, e girdi’ ni ma fol u urngin e yalen ko motochiyel ni ke pi’ Got ngorad e ba ga’ fan​—ni yugu aram rogon ni boch e gowa de ga’ fan—​machane ba kireb ni ngan tolangnag reb e motochiyel nga boch. Ke lemnag e pi Farise ni ngan fith Jesus ko fare deer ni ngan ning e kanawo’ ngak. Sana ra yog ban’en nra kirebnag e pagan’ ngak. Me yib bagayad i fith ngak Jesus ni gaar: “Bin ngan e motochiyel e ir e th’abi ga’ u fithik’ e Motochiyel?”​—Matthew 22:34-36.

3. Mang e yog Jesus ni bin th’abi ga’ e motochiyel?

³ Fulweg ni pi’ Jesus e rib ga’ fan ngodad ko ngiyal’ ney. I yog ni, n’en ni immoy kakrom e ka aram e n’en ni bayi par nib ga’ fan ko bin riyul’ e liyor. I yog Jesus ni sul u daken e thin ko Deuteronomy 6:5 ni gaar: “‘Ngari t’uf romed Somol ni Got romed u polo’ i gum’irchamed ngu polo’ i lanin’med, ngu polo’ i gelngimed.’ Aram e bin th’abi ga’ nge bin som’on e motochiyel.” Yugu aram rogon ni fith fare Farise taareb e motochiyel, me ki pi’ Jesus reb ngak. Ni sul u daken e Levetikus 19:18, ni gaar: “Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’” I tamilangnag Jesus ni gali motochiyel ney e th’abi ga’ fan ko bin riyul’ e liyor. Rogon ni nge tal ni dab ki yog feni ga’ fan reb nge reb fapi motochiyel, me yog ni gaar: “Urngin e Motochiyel rok Moses nge tin i fil e pi profet ko girdi’ e be tor ko gali motochiyel ney.” (Matthew 22:37-40) U lan e re article ney, e gad ra nang riy feni ga’ fan e gali motochiyel ney. Mang fan ni thingari t’uf Got rodad? Uw rogon ni ngad daged ni gad be rin’ ni aram rogon? Uw rogon ni ngad maruweliyed e re t’ufeg nem? Ba ga’ fan ni ngan nang e fulweg ko pi deer ney, ya faanra ngan felan’nag Jehovah, ma thingari t’uf rodad u polo’ i gum’irchadad, ngu polo’ i lanin’dad, ngu polo’ i lem rodad.

Feni Rib Ga’ Fan e T’ufeg

4, 5. (a) Mang ni de gin fare Farise ko n’en ni ke yog Jesus? (b) Mang e tin ni ka ba ga’ fan u wan’ Got ko maligach?

⁴ Fare Farise ni ke fith e deer ngak Jesus e gowa de gin nga rogon ni ke pi’ Jesus e fulweg ngak. Ya manang ni t’ufeg ngak Got e ba ga’ fan ko bin riyul’ e liyor, ni boor e girdi’ ni de yog rorad ni ngar daged. U lan tafen e muulung, e yalen ni yima rin’ riy e Shema, ara ni meybil, nib muun ngay fare thin ni bay ko Deuteronomy 6:4-9, ni sul Jesus u daken. Taareb rogon ko fare thin ni bay ko Mark, ni yog fare Farise ngak Jesus ni gaar: “Er rogon, tamachib! Mmat’aw e tin ni ka mog, ni ke mus nri taareb e Somol, ni aram Got, ndakuriy reb e Got nga bayang, ya ke mus nri taareb ni ir. Ere girdi’ e thingari t’uf Got rok u polo’ i gum’irchaen, ngu polo’ i laniyan’, ngu polo’ i gelngin; ma thingari t’uf rok e en nib migid ngak ko gin’en ni ba’ riy ni gowe ir. Kab fel’ ni ngan fol ko gali motochiyel ney ko bin ni ngan fek e gamanman i yib ni maligach ngan urfiy u daken e altar mu kun pi’ yugu boch e maligach.”​—Mark 12:32, 33.

⁵ Riyul’, yugu aram rogon ni ba t’uf ko Motochiyel e maligach ni kan urfiy nge boch e maligach, ma bin ni th’abi ga’ fan u wan’ Got e rarogon e gum’ircha’ nge t’ufeg ko pi tapigpig rok. Mus nga reb e sparrow ni ngan pi’ ni maligach ngak Got u fithik’ e t’ufeg nge yul’yul’ e ka ba fel’ ko ngan pi’ reb e biyu’ e saf ngak u fithik’ e lem nib kireb. (Mikah 6:6-8) Am lemnag fare pin ni ke yim’ figirngin ni guy Jesus u lan e tempel u Jerusalem. Ke yin’ l’agruw chi kobre nrow nib achig nga lan tafen e salpiy dabiyog ni ngan chuw’iy taareb e sparrow ngay. Machane, chi ayuw nem ni ke pi’ ngak Jehovah e ke yib u gum’irchaen u fithik’ e t’ufeg, e be dag ni rib ga’ ko tin ni ke pi’ e piin pire’ salpiy rorad. (Mark 12:41-44) Ra gel lanin’dad ni gad ra nang ni Jehovah e rib ga’ fan u wan’ ni ngada daged e tin nrayog rodad ni yugu demtrug rarogodad​—aram e t’ufeg rodad ngak!

6. Mang e ke yoloy Paul u murung’agen feni ga’ fan e t’ufeg?

⁶ I yoloy apostal Paul ni be tamilangnag ko uw feni ga’ fan e t’ufeg ko bin riyul’ e liyor ni gaar: “Faan mang e rayog ni gu non nthin ko girdi’ nge thin ko pi engel, machane faanra de t’uf Got rog nge girdi’, ma thin ni gu be weliy e ke mus ni bod lingan bangi wasey ni kan tining nga lang yibe pirdiiy ara bel ni yibe chubeg. Ra ke pi’ Got gelngig ni gub salap i machibnag e thin rok ngak e girdi’, ma urngin ban’en ni gu manang fan, ma gu manang fan urngin e tin nde nang e girdi’, ma gelngin nib michan’ug ngak Kristus e rayog ni chuweg e burey u tagil’, machane faanra de t’uf Got rog nge girdi’, ma dariy rogog. Ra gu pi’ urngin e tin ni ba’ rog, ni mus nga downgig mu gu pi’ nga ni urfiy machane faanra de t’uf Got rog nge girdi’ ma dabi fel’ rogog riy.” (1 Korinth 13:1-3) Ba tamilang, ni ba ga’ fan e t’ufeg nfaanra nge fel’ e liyor rodad u wan’ Got. Machane, uw rogon ni ngad daged e t’ufeg rodad ngak Jehovah?

Rogon ni Ngad Daged e T’ufeg Rodad ngak Jehovah

7, 8. Uw rogon ma rayog ni ngad daged e t’ufeg rodad ngak Jehovah?

⁷ Boor e girdi’ e yad be lemnag ni t’ufeg e aram e lem nib gel ndabiyog ni ngan gagiyegnag; ma girdi’ e ma weliy murung’agen e t’ufeg ni ma sum u thilin e pumoon nge ppin. Machane, t’ufeg nib riyul’ e gathi kemus ni ban’en ni gad be thamiy. Yima dag e t’ufeg ko ngongol, ma gathi kemus ni yibe lemnag ara thin. Bible e be weliy murung’agen e t’ufeg ni ban’en nrib “th’abi fel’” ma ban’en ni ‘ngan athamgiliy nge yog.’ (1 Korinth 12:31; 14:1) Piin Kristiano e kan fonownagrad ni ngar daged e t’ufeg ko “ngongol” rorad.​—1 John 3:18.

⁸ T’ufeg ku Got e ra k’aringdad ni ngad rin’ed e n’en nra felfelan’nag ma gad ra ayuweg e gagiyeg rok nth’abi tolang u daken e thin nge ngongol rodad. Ma ra k’aringdad ni dab da t’ufeged e fayleng nge kanawoen nib kireb. (1 John 2:15, 16) Piin nib t’uf Got rorad e yad ma fanenikay e tin nib kireb. (Psalm 97:10) T’ufeg ku Got e kub muun ngay ni ngan t’ufeg e en buguli yoror, ni aram e n’en ni gad ra weliy ko bin migid e article. Maku, t’ufeg ku Got e ba t’uf riy ni nguud folgad rok. Be gaar e Bible: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.”​—1 John 5:3.

9. Uw rogon ni dag Jesus e t’ufeg rok ngak Got?

⁹ I dag Jesus nib fel’ rogon ko mang e be yip’ fan e ngan t’ufeg Got. Bochan e t’ufeg me pag tafen u tharmiy me yib nge yib i par nga fayleng nib girdi’. Ma t’ufeg e ke k’aring ni nge pining e sorok ngak e Chitamangin ko pi n’en ni ke rin’ nge pi n’en ni ke lemnag. Ma t’ufeg e ke k’aring ni nge “fol rok Got nge yan i mada’ ko ngiyal’ ni yim’ riy.” (Filippi 2:8) Re t’ufeg nem​—ni i dag ko n’en ni ke rin’—​e ke bing e kanawo’ ni fan ko piin nib yul’yul’ ni ngar mat’awgad u p’eowchen Got. Yoloy Paul ni gaar: “Ma rogon ni boor e girdi’ ni yan i par ni yad e tadenen ni bochan e taareb e girdi’ [Adam] nde fol, e ku aram rogon ni boor e girdi’ ni bayi mat’awnagrad Got ngak ni bochan taabe’ ni ke fol.”​—Roma 5:19.

10. Mang fan ni t’ufeg ku Got e ba muun ngay ni ngan fol ko thin rok?

¹⁰ Bod rogon Jesus, gad be dag e t’ufeg rodad ngak Got ni gad be fol rok. Yoloy apostal John nib t’uf rok Jesus ni gaar, “Fan e re bugithin ney ni gu be yog ni nge t’uf be’ rok be’ e aram e thingar da pired ni gadad be fol ko tin ni ke yog Got ngodad ni ngad rin’ed.” (2 John 6) Piin ni rib t’uf Jehovah rorad e rib t’uf e thin rok rorad. Yad manang ndabiyog ni ngar pow’iyed yad nib fel’ rogon, ma pagan’rad ko gonop rok Got ma yad ma pag ni nge pow’iyrad u fithik’ e t’ufeg. (Jeremiah 10:23) Yad bod piyu Beroea kakrom nde manan’rad ya ke fel’ e thin rok Got u wan’rad ma “kar uthumed telrad ngay,” ma ri yad baadag ni ngar rin’ed e tin nib m’agan’ Got ngay. (Acts 17:11) Kar yaliyed e thin nu Bible nib fel’ rogon ni fan ni ngari tamilang u wan’rad e tin nib m’agan’ ngay, nra ayuwegrad ngar daged e t’ufeg rorad ni ngar folgad ko thin rok.

11. Mang e be yip’ fan ni ngad t’ufeged Got u polo’ i gum’irchadad, nge lanin’dad, nge yafas rodad, nge gelngidad?

¹¹ Rogon ni yog Jesus, e t’ufeg ku Got e ba muun ngay gum’irchaey, lanin’uy, yafas, nge gelngiy. (Mark 12:30) Re t’ufeg ney e ma yib u gum’irchaey, nib muun ngay lanin’dad, nge tin gad be yim’ nbochan, ma ri gad baadag ni ngad felfelan’naged Jehovah. Maku gad ma t’ufegey u lanin’dad. Gathi gad be pigpig ku Got ndariy tapgin; ya kad nanged Jehovah​—nge pi fel’ngin, nge motochiyel rok, nge tin nib m’agan’ ngay. Gad ma fanay e yafas rodad ni polo’ ni ngad pigpiggad ngak ma ngad pininged e sorok ngak. Maku gad ma fanay gelngidad ni ngad rin’ed ban’en ni aram rogon.

Mang Fan ni Thingar Da T’ufeged Jehovah

12. Mang fan ni ke ning chilen Got ngodad ni ngad t’ufeged?

¹² Reb i fan ni thingar da t’ufeged Jehovah e aram ke ning chilen ngodad ni ngad daged pi fel’ngin ko ngongol rodad. Got e tabolngin e t’ufeg maku ir e th’abi fel’ rogon ni ma dag e t’ufeg. “Got e t’ufeg,” rogon ni yoloy apostal John. (1 John 4:8) Kan sunumiy e girdi’ ni bod yaan Got; ere kan sunumiydad ni ngad daged e t’ufeg. Tin riyul’ riy, e ma gagiyegnigey Jehovah u fithik’ e t’ufeg. Ba adag ni girdi’ ni nge pigpig ngak e bochan ni yad baadag e gagiyeg rok nib mat’aw. Riyul’ ni baga’ fan e t’ufeg ni fan ni nge aw e gapas nge taareban’ ko urngin e tin ke sunumiy.

13. (a) Mang fan ni ka nog ngak piyu Israel ni: ‘Ngar t’ufeged Jehovah ni Got rorad’? (b) Mang fan nib puluw ni nge lemnag Jehovah ni ngad t’ufeged?

¹³ Maku reb i fan ni ngad t’ufeged Jehovah e bochan ni ba ga’ fan u wan’dad e pi n’en ni ke rin’ ngodad. Dab mu pagtalin ni ke yog Jesus ngak piyu Jew ni gaar: “Thingar mu t’ufeged Jehovah ni Got romed.” Dan lemnag ni ngar t’ufeged ba got nib palog rorad ma dan nang. Ur daged e t’ufeg ngak e Got ni ma t’ufegrad. Jehovah e Got rorad. Me ir fare Got ni i chuwegrad u Egypt me fekrad nga lan fare Binaw ni Kan Micheg, ma ir e ke yororiyrad, me ayuwegrad, me t’ufegrad, ma ke llowan’nagrad u fithik’ e t’ufeg. Ma chiney, me Jehovah e Got rodad, ni ke pi’ Fak ni maligach ni fan ni nge yog ngodad e yafas ni manemus. Rib puluw ni nge lemnag Jehovah ni ngad daged e t’ufeg rodad ngak! Gad ma dag e t’ufeg ya ir e ke t’ufegdad ko som’on; min ning chilen ngodad ni ngad t’ufeged ya gadad ba t’uf rok. T’ufeg rodad ni fan ku Got e ir e “som’on ni at’ufegdad.”​—1 John 4:19.

14. Uw rogon ma t’ufeg rok Jehovah e ba taareb rogon ko gallabthir ni ma t’ufegey?

¹⁴ T’ufeg rok Jehovah ni fan ko girdi’ e bod e t’ufeg rok e gallabthir ngak e pi bitir rok. Yugu aram rogon ndawora flontgad, ma piin gallabthir e kar maruwelgad nib gel ni boor e duw ni fan ni ngar ayuweged e bitir rorad, ni boor e salpiy ni kar fanayed ngay nge ku boch ban’en. Piin gallabthir e yad ma fil ban’en ngak pi fakrad, ma yad ma pi’ e athamgil nga lanin’rad, ma yad ma ayuwegrad, ma yad ma llowan’nagrad ya bochan ni yad baadag ni ngar felan’gad me fel’ rogorad. Ma mang e baadag e gallabthir ni nge rin’ e bitir rorad? Yad baadag ni bitir rorad e ngaur t’ufeged yad mi yad tay nga gum’ircharad e pi n’en ni kar filed ngorad me fel’ rogorad riy. Gathi ri bay fan ni Chitamangidad u tharmiy nib flont e ra lemnag ni ngad pininged e magar ngak ko urngin ban’en ni ke rin’ ngodad?

Ngan Maruweliy nge Gel e T’ufeg ni Fan ku Got

15. Mang e som’on ni ngan rin’ me gel e t’ufeg ngak Got?

¹⁵ Daworda guyed Got maku daworda rung’aged laman. (John 1:18) Machane, ke piningdad ni ngad maruweliyed nge fel’ thildad. (James 4:8) Uw rogon ni ngad rin’ed ni aram rogon? Bin som’on e ra nge t’uf be’ rok be’ ma ba t’uf ni nge tamilangan’ u murung’agen faanem; ya mo’maw’ ni nge t’uf rodad e girdi’ ndaworda nanged. Ke pi’ Jehovah e Thin rok, ni fare Bible, ni fan ni ngad nanged murung’agen. Arfan ni ma pi’ Jehovah e athamgil nga lanin’dad u daken e ulung rok ni nga uda beeged e Bible u gubin ngiyal’. Bible e ma fil ngodad murung’agen Got, nge pi fel’ngin, nge wok rok, nge tin ni ke rin’ ngak e girdi’ u lan bokum biyu’ e duw. Gad ra fal’eg i lemnag e pi chep ney, ma ra yoor e tamilangan’ rodad u murung’agen me gelnag e t’ufeg rodad ngak.​—Roma 15:4.

16. Uw rogon ni yira fal’eg i lemnag e maruwel ni i tay Jesus ma ra gel e t’ufeg rodad ngak Got?

¹⁶ Bin nib ga’ fan e kanawo’ nrayog ni nge gel e t’ufeg rodad ngak Jehovah e ngan fal’eg i lemnag rogon e yafas rok Jesus nge machib ni i tay. Riyul’, ni Jesus e i m’ug rarogon e Chitamangin nib flont rok arfan ni gaar: “Cha’ ni ke guyeg e ke guy e en ni Chitamangiy.” (John 14:9) Gathi kam thamiy rogon ni ke dag Jesus e kireban’ rok u nap’an ni ke faseg fare pagel ni kari maagirag ni fak fare pin ni ke yim’ figirngin? (Luke 7:11-15) Gathi ba fel’ ni ngan nang ni ir faanem​—ni Fak Got ni fare moon ni th’abi ga’ ni immoy—​ma rib sobut’an’ ni maluknag rifrifen ay pi gachalpen? (John 13:3-5) Gathi ra k’aringem ngam nang ni yugu aram feni ga’ nge feni gonop ngak urngin e girdi’, ma ke fal’eg rogon nrayog ni nge chuchugur e girdi’ ngak ni mus ko bitir? (Mark 10:13, 14) Nap’an ni gad ra fal’eg i lemnag e pi n’ey u fithik’ e felfelan’, ma gad ra bod e pi Kristiano ni yoloy Peter murung’agrad ni gaar: “Yugu aram rogon ndamur guyed [Jesus], ma mmich u wan’med.” (1 Peter 1:8) Ra i ga’ e t’ufeg rodad ngak Jesus, maku aram rogon e t’ufeg rodad ngak Jehovah.

17, 18. Mang e ran fal’eg i lemnag ni ke pi’ Jehovah u fithik’ e t’ufeg ma ra k’aringdad nge gel e t’ufeg rodad ngak?

¹⁷ Reb e kanawo’ nrayog ni nge ga’nag e t’ufeg rodad ngak Got e ngan fal’eg i lemnag feni yoor ban’en ni ke pi’ u fithik’ e t’ufeg ni nge felfelan’nagdad ni bod​—feni gamog e pi n’en ke sunumiy, nge fene yoor mit e fel’ lamen ni dabi m’ay ni ngan kay, nge pi fager nib fel’, nge boch ban’en ndabiyog i theeg ni ke pi’ ngodad ni ngada felfelan’gad ngay. (Acts 14:17) Ra yoor ban’en ni gad ra fil u murung’agen Got, ma ra yoor fan ni ngada pininged e magar ko tin nib fel’ nge feni gol ngodad. Am lemnag urngin ban’en ni ke rin’ Jehovah ni fan ngom. Gathi ra fel’ u wan’um ni bay rogon ni ngam t’ufeg Got?

¹⁸ Boch ko pi tow’ath ni yib rok Got e aram e gad ra chuchugur ngak u fithik’ e meybil ni yugu demtrug e ngiyal’, ya gad manang ni “Ma fulweg taban e meybil” ere ra motoyil ngodad. (Psalm 65:2) Jehovah e ke pi’ mat’awun Fak ni rib t’uf rok ni nga i gagiyeg ma nge pufthin. Machane, de pi’ mat’awen boch e girdi’, ni mus ngak Fak, ni ngar rung’aged e meybil. Ya ir e ma rung’ag e meybil rodad. Runguy ni i dag Jehovah e be dag nrayog ni ngada chugurgad ngak.

19. Mang e pi n’en ke micheg Jehovah ni ke chugurnagdad ngak?

¹⁹ Ku gad ra chugur ngak Jehovah u nap’an ni gad ra lemnag e pi n’en ni ke tay ni fan ko girdi’. Ke micheg nra chuweg e m’ar, nge kireban’ nge yam’. (Revelation 21:3, 4) Nap’an ni yira flontnag e girdi’, ma dakuriy be’ nra gafgow ara mulan’, ara yib e riya’ ngak. Gafgow ko ggan, nge gafgow, nge mahl e ra m’ay. (Psalm 46:9; 72:16) Fayleng e ra mang paradis. (Luke 23:43) Jehovah e ra fek i yib e pi flaab ney ni gathi bochan e thingari rin’, ya bochan e gad ba t’uf rok.

20. Mang e yog Moses u murung’agen angin ni ngan t’ufeg Jehovah?

²⁰ Bay tapgin ni ngad t’ufeged e Got rodad me gel e re t’ufeg nem. Ga ra ul’ul i gelnag e t’ufeg rom ngak Got ma ga pag ni nge mang ir e i pow’iyem fa? Gur e ga ra mel’eg. Ma nang Moses angin ni ngan maruweliy e t’ufeg ngak Jehovah. I yog Moses ngak piyu Israel kakrom, ni gaar: “Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak, ni fan e gimed nge piin ni owchemed e nge yog ni mpired nib n’uw nap’med.”​—Deuteronomy 30:19, 20.

Ka Ga Manang?

• Mang fan nib ga’ fan ni nge t’uf Jehovah rodad?

• Uw rogon ni ngad daged e t’ufeg ni fan ngak Got?

• Mang tapgin ni nge t’uf Jehovah rodad?

• Uw rogon ni ngad maruweliyed e t’ufeg rodad ngak Got?

[Picture on page 18]

Riyul’ nib ga’ fan u wan’ Jehovah e n’en nrayog ni ngad daged ni gad gubin​—ni aram e t’ufeg rodad ngak

[Pictures on page 21]

“Cha’ ni ke guyeg e ke guy e en ni Chitamangiy.”​—John 14:9