T’ufeg​—e Aram Reb e Fel’ngin Nrib Ga’ Fan

NNI thagthagnag nga laniyan’ apostal Paul ni nge yoloy murung’agen mereb i fel’ngin ni ma sunmiy gelngin Got nib thothup ko ngongol rodad. (Gal. 5:22, 23, NW) I yog ni pi fel’ngin ney e aram “wom’engin gelngin Got nib thothup.”a Re wom’engin ney e ku aram bang ko ‘bin nib beech i gadad ni ka don’ed nga dakendad.’ (Kol. 3:10) Faanra un rannag reb e woldug nib fel’ rogon, ma aram e rayog ni nge yib wom’engin. Ere, ku arrogon ni faanra be maruwel gelngin Got nib thothup u lan e yafos rok be’ ma aram e rayog ni nge m’ug e pi fel’ngin ney ko ngongol rok.​—Ps. 1:1-3.

Bin som’on u wom’engin gelngin Got nib thothup ni weliy Paul murung’agen e aram e t’ufeg. Uw feni ga’ fan e t’ufeg? I yog Paul ni faanra dariy e t’ufeg rok, ma ‘dariy rogon’ nga bang. (1 Kor. 13:2) Machane, mang e t’ufeg, ma uw rogon ni ngad maruweliyed e re fel’ngin ney mi i m’ug ko ngongol rodad u gubin e rran?

ROGON NI MA M’UG E T’UFEG

Yugu aram rogon ndabiyog ni ngar da weliyed gubin ban’en u rarogon e re fel’ngin ney, machane be weliy e Bible rogon ni ma lem nge rogon ni ma ngongol be’ ni bay e t’ufeg rok. Bod ni, be yog e Bible ni t’ufeg e “ba gum’an’ ma ba gol.” Ku ma “felfelan’ ko tin nib riyul’,” ma ma “athamgiliy gubin ban’en, ma dabiyog ni nge pag ir ndab ki michan’, ma dabki l’agan’, ma dabki gum’an’.” T’ufeg e kub muun ngay ni ngaud lemnaged yugu boch e girdi’ nge rarogorad, ma gad yul’yul’ ngorad. Machane, faanra dariy e t’ufeg rok be’ ma aram e rayog ni nge m’ug boch e lem rok ni bod rogon e awan’, nge ufanthin, nge ngongol nib kireb, nge fare lem ni kemus ni yigoo gur e ga be lemnagem, nge fanenikan, ma dabun ni nge n’ag fan e kireb. Ere, dubdad ni nge m’ug e mit ney e lem rodad, ya gad baadag ni ngad daged e bin riyul’ e t’ufeg ngak yugu boch e girdi’ ni fa mit nem e t’ufeg ni faanra bay rok be’ ma aram e dabi par ni ‘ke mus ni goo ir e nga i lemnag ir.’​—1 Kor. 13:4-8, NW.

KE DAG JEHOVAH NGE JESUS E BIN TH’ABI FEL’ E KANAWO’ U ROGON NI NGAUN DAG E T’UFEG

“Got e t’ufeg.” Arrogon, gubin ban’en u rarogon Jehovah ni be tor nga daken e t’ufeg. (1 John 4:16) Gubin ban’en ni ke rin’ nge rogon e ngongol ni ma dag e gubin ni be m’ug riy ni ir reb e Got ko t’ufeg. Bin th’abi fel’ e kanawo’ ni ke m’ug e re t’ufeg nem riy e aram e ke l’og Jesus ni nge yib nga fayleng ni nge gafgow me yim’ ni fan ngodad. I yog apostal John ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’og Fak nge yib, nu daken Fak e nge n’ag Got fan e denen rodad riy.” (1 John 4:9, 10) Bochan e t’ufeg rok Got, ma aram fan nrayog ni ngan n’ag fan e denen rodad, me l’agan’dad ko pi n’en ni bay nga m’on, me yag e yafos ni manemus ngodad.

I micheg Jesus nib t’uf e girdi’ rok ni aram e m’agan’ ngay ni nge rin’ e n’en ni baadag Got ni nge rin’. I yoloy Paul ni gaar: “Ma aram me gaar [Jesus], ‘Got, gub aray ni nggu rin’ e tin ni gab adag ni nggu rin’.’ . . . Bochan e rin’ Kristus e tin ni ba adag Got ni nge rin’, ma aram fan ni gadad gubin ni kan chuweg e denen rodad kad beechgad ni bochan fare maligach ni pi’ ni aram downgin, nri taab yay ma aram e ke mus.” (Heb. 10:9, 10) Dariy be’ nrayog ni nge dag e t’ufeg ni aram gelngin. I gaar Jesus: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Ere gur, rayog rodad e girdi’ ndawor da flontgad ni ngad folwokgad ko t’ufeg ni dag Jehovah nge Jesus? Arrogon! Chiney e ngad weliyed rogon nrayog ni ngad rin’ed e re n’ey.

“T’UFEG E THINGARI MANG IR E I GAGIYEGNAG E NGONGOL ROMED”

I pi’ Paul e athamgil nga lanin’dad ni gaar: “Thingar um guyed rogon nguum pired ni gimed be folwok rok Got, ni bochan e gimed pi fak ni gimed ba t’uf rok. T’ufeg e thingari mang ir e i gagiyegnag e ngongol romed, ni bod rogon Kristus ni gadad ba t’uf rok me pi’ e pogofan rok ni bochdad.” (Efe. 5:1, 2) Rayog ni nge m’ug ni gad be pag e t’ufeg ni nge ‘gagiyegnag e ngongol rodad’ ni faanra i m’ug e re fel’ngin ney ko ngongol rodad ni gubin ngiyal’. Mit ney e t’ufeg e gathi kemus ni ma m’ug ko thin rodad, ya ku ma m’ug ko ngongol rodad. I yoloy John ni gaar: “Pi fakag! Rogon nib t’uf Got nge girdi’ rodad e dabi par ni ke mus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad ni ma m’ug ko ngongol.” (1 John 3:18) Bod ni, faanra ba t’uf Got nge girdi’ rodad, ma ra k’aringdad e re n’ey ni ngad weliyed fare thin ‘nib fel’ ni murung’agen e gagiyeg rok Got’ ko girdi’. (Matt. 24:14; Luke 10:27) Maku reb e, faanra be gagiyegnagdad e t’ufeg, ma aram e ra ud gum’an’gad, ma gad be sumunguy, ma gad be n’ag fan u wan’dad e kireb ni ke rin’ yugu boch e girdi’ ngodad. Be fonownagdad e Bible ni gaar: “Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.”​—Kol. 3:13.

Machane, faanra da fonownaged be’ ara da yal’uweged, ma aram e gathi be yip’ fan ndarud daged e t’ufeg. Bod ni, bay boch e gallabthir ni faanra yad be guy rogon ni ngar taleged fakrad ndab ki yor, ma n’en ni yad ma rin’ e aram e ngar rin’ed e n’en ni baadag fare tir. Machane, reb e gallabthir nrib t’uf fak rok e ma tay e thin rok u gil’ ko ngiyal’ nib t’uf ni nge rin’ riy. Ku arrogon Got ni yugu aram rogon ni ir reb e Got ko t’ufeg, machane “ma gechignag e en nib t’uf rok.” (Heb. 12:6) Ere, faanra ud paged e t’ufeg ni nge gagiyegnagdad, ma aram e ku gad ra yal’uweg e en nib t’uf rodad ko ngiyal’ ni ke t’uf ni ngad rin’ed riy. (Prov. 3:11, 12) Machane, ra ngiyal’ ni gad be rin’ e re n’ey, ma thingar dab da paged talin ni mus ngodad ni ka gad bogi tadenen ma bay yu ngiyal’ nder ma yag ni ngad daged e t’ufeg. Ere, gad gubin ni bay boch ban’en nib t’uf ni ngad mon’oggad riy ya nge yag ni ngad daged e t’ufeg nib fel’ rogon. Uw rogon nrayog ni ngad rin’ed e re n’ey? Ngad weliyed dalip e kanawo’.

UW ROGON NI NGAD DAGED E T’UFEG?

Bin som’on e, ngam ning gelngin Got nib thothup, ya aram e gin ni ma sum e t’ufeg riy. I yog Jesus nra pi’ Jehovah gelngin nib thothup “ngak e piin ni yad ra ning ngak!” (Luke 11:13) Faan gad ra yibilay gelngin Got nib thothup ma gad pag ni nge ‘mang ir e i gagiyegnag pangidad,’ ma aram e rayog ni nge mom ni nga i m’ug e t’ufeg ko ngongol rodad. (Gal. 5:16) Bod ni, faanra gur reb e piilal u lan e ulung ni Kristiano, ma rayog ni ngam ning gelngin Got nib thothup ni nge ayuwegem u rogon ni ngam pi’ boch e fonow nu Bible ngak e pi walag u fithik’ e t’ufeg. Ma reb e, faanra gur reb e gallabthir, ma rayog ni ngam ning gelngin Got nib thothup ni nge ayuwegem nge yag nim llowan’nag pi fakam u fithik’ e t’ufeg, ma gathi u fithik’ e damumuw.

Bin migid e, ngam lemnag rogon ni i dag Jesus e t’ufeg ni ki mada’ ko ngiyal’ ni un rin’ boch e ngongol nib kireb ngak. (1 Pet. 2:21, 23) Dabisiy nra t’uf ni ngad lemnaged rogon e ngongol ni dag Kristus u nap’an ni ke yog be’ ban’en ni ke kirebnag lanin’dad ara nap’an ni kan rin’ ban’en nde mat’aw ngodad. Nap’an nra buch boch ban’en ni aray rogon, mab fel’ ni ngad fithed gadad ni nge lungudad, ‘Faan gomanga Jesus eray, ma mang e ke rin’?’ Reb e walag nib pin ni ka nog Leigh ngak e nang nre deer ney e ir e ma ayuweg ni nge lem u m’on ni nge rin’ ban’en. I yog ni gaar: “Immoy bayay ni pi’ be’ nib pin ni gamow nga maruwel reb e e-mail nge yan ngak boch e girdi’ ni gamad ma maruwel u taabang ni bay boch ban’en riy u murung’ageg nde fel’ nge rogon e maruwel ni gu be tay. Rug dabuy e re n’em. Machane, gu fitheg ni lungug, ‘Uw rogon ni nggu ngongol ko cha’ney ni bod rogon Jesus?’ Tomuren nug fal’eg i lemnag e n’en nra rin’ Jesus ko re magawon nem, ma aram mug dugliy ni nge dab kug lemnag e n’en ni ke rin’, mug guy rogon ndab gu k’aring e re magawon nem ni nge ga’. Ere, faani boch nga tomuren ma aram mug wan gu nang nre ppin nem ni gamow ma maruwel u taabang e ke yib ba mit e m’ar nib ubchiya’ ngak ma yugu be par ni be mochuch. Ere, gu lemnag ni sana rayog ni ka yigi yoloy e pi thin nem nde lem u m’on riy. Bochan nug lemnag rogon ni i dag Jesus e t’ufeg ni ki mada’ ko ngiyal’ ni kan rin’ boch ban’en nib kireb ngak, ma aram e n’en ni ayuwegeg ni nggu dag e t’ufeg ko re ppin nem ni gamow ma maruwel ni bod ni i rin’ Jesus.” Arrogon, faan gad ra folwok rok Jesus, ma aram e gubin ngiyal’ nra ud ngongolgad u fithik’ e t’ufeg.

Bin dalip e, ngam fil rogon ni ngaum pag fam u boch ban’en ya nge yag nim dag e t’ufeg. Mit ney e t’ufeg e aram e pow ko tin riyul’ e Kristiano. (John 13:34, 35) Aram fan ni be pi’ e Bible e athamgil nga lanin’dad ni ngad guyed rogon ni nge m’ug e bin baaram e “lem” rodad ni immoy rok Jesus. I “pag e flaab rok” u tharmiy miki m’agan’ ngay ni nge “yim’” ni fan ngodad. (Fil. 2:5-8) Ere, faan gad ra folwok rok u rogon ni pag fan ir ni bochan e nge dag e t’ufeg, ma aram e rayog ni ngad lemgad ni bod ir, mu kud adaged ni ngad m’oneged u wan’dad e tin nib t’uf rok yugu boch e girdi’ me tomur e tin ni gad baadag. Ku mang boch i angin nra yib ngodad ni faanra ud daged e t’ufeg?

ANGIN NRA YIB NI FAANRA UN DAG E T’UFEG

Boor angin nra yib ngodad ni faanra ud daged e t’ufeg. Am lemnag l’agruw i angin nra yib ngodad:

• BA ULUNG I WALAG NI YAD BAY U GA’NGIN E FAYLENG: Bochan ni gad ma t’ufeged gadad, ma aram fan ni gad manang ndemtrug e re ulung ni bay u roy u fayleng ni gad ra yan ngay, ma ra felfelan’ e pi walagdad ni kar guyed gadad. Riyul’ ni gad ba tow’ath ni ma t’ufegdad pi walagdad “ni yad be par u roy u fayleng ni polo’ ni Kristus e ke michan’rad ngak”! (1 Pet. 5:9) Kemus ni yigoo girdi’ rok Got e bay e mit ney e t’ufeg rorad.

• GAPAS: Faanra ‘bagadad mi i ayuweg bagadad ko meewar rok’ u fithik’ e t’ufeg, ma aram e rayog ni ngad pirieged e ‘gapas ni ma m’agey nga taabang.’ (Efe. 4:2, 3) Gad ma guy e re gapas ney ko pi muulung, nge assembly, nge convention ni gad ma un ngay. Uw rogon u wan’um, gathi riyul’ ndakuriy bang nrayog ni ngad pirieged e mit ney e gapas riy u lan e re fayleng ney ndakuriy e taareban’ riy? (Ps. 119:165; Isa. 54:13) Faan gad ra guy rogon ni nga i par ni bay e gapas u thildad yugu boch e girdi’, ma aram e gad be dag gelngin nri yad ba t’uf rodad, ma re n’ey e ra felfelan’nag e Chitamangidad ni bay u tharmiy.​—Ps. 133:1-3; Matt. 5:9.

“T’UFEG E MA PI’ E ATHAMGIL NGA LANIN’UY”

I yoloy Paul ni gaar: “T’ufeg e ma pi’ e athamgil nga lanin’uy.” (1 Kor. 8:1, NW) Mang e be yip’ fan e re n’ey? U lan e guruy ni 13 ko gin nsom’on e babyor ni yoloy Paul ngak piyu Korinth e weliy riy rogon ni ma pi’ e t’ufeg e athamgil nga lanin’uy. Re gi babyor nem e ku yima yog “Tangin e T’ufeg” ngay. Faanra bay e t’ufeg rok be’, ma aram e ma lemnag e tin nib fel’ ngak yugu boch e girdi’. (1 Kor. 10:24; 13:5) Maku reb e, bochan ni t’ufeg e ma k’aring be’ ni nge lemnag yugu boch e girdi’, mi i gum’an’nag ir, ma be gol ko girdi’, ma aram fan nre fel’ngin ney e ma gelnag e tha’ u thilin girdien e tabinaw, ma ma taarebnag e girdi’ u lan e ulung.​—Kol. 3:14.

T’ufeg rodad ngak Got e aram e bin th’abi ga’ fan e t’ufeg ni bay, maku aram e re miti t’ufeg nri ma pi’ e athamgil nga lanin’uy. Mit ney e t’ufeg e ma chagiy e girdi’ nga taabang nib thilthil e gin ni kar bad riy, nge nam rorad, nge thin rorad, mi yad pigpig ngak Jehovah u “taabang” ni yad ba felfelan’. (Zef. 3:9, NW) Ere, ngad dugliyed u wan’dad ni nga i m’ug e re wom’engin gelngin Got nib thothup ney ko ngongol rodad ni gubin e rran.