“Wuin e Ngkud Ted e Bin Migid e Assembly Bayay?”

KE TAW nga tungun e November ko duw ni 1932 u Mexico City. Re mach nem e ba pag reb e milyon e girdi’ ni ma par riy, maku boor ban’en ni yima rin’ riy. Reb e wik u m’on riy, ma aram min tay e tin th’abi som’on e traffic light ara ba mit e magal ni yima tay u kanawo’ ni nge pow’iy rogon e karrow ni be yan ko yu pa’ i kanawo’ ni bay ko re mach nem ni ma yan e karrow riy. Machane, ngiyal’ nem e bay yugu reb e ban’en ni ke felfelan’ e girdi’ ngay. I yan girdien e news ko yungi n’en ni ma yib i tal e train ngay ni kar feked e camera rorad ni ngar feked yaan be’ ni yibe sonnag ni bayi taw. Mini’ e cha’nem? Cha’nem e aram Joseph F. Rutherford ni ir e president ko fare Watch Tower Society. I yan e Pi Mich ni yad ma par ko re binaw nem e ngaram ni ngar guyed Brother Rutherford ni ke yib ni nge un nga reb e convention ni yira tay u rom ni dalip e rran n’umngin nap’an.

I yog fare ke babyor ni The Golden Age ni gaar: “Dariy e maruwar riy ni ireray e bin th’abi ga’ fan e convention ni yira tay u Mexico ni bochan e ra ayuweg e tin riyul’ ni nge garer ko re mach ney.” Machane, kemus ni 150 e girdi’ nra uned ko re convention nem. Ere, mang nrib ga’ fan e re muulung nem nni tay?

U m’on nni tay e re muulung nem, ma dawori ga’ yang e gin ni ke garer e tin riyul’ riy u Mexico. Ka nap’an e duw ni 1919 ma un tay boch e assembly ko re mach nem nde ga’, machane boch e duw nga tomuren ma aram me buchuuw e ulung u rom. Nap’an ni sum reb e branch ofis u Mexico City ko duw ni 1929, ma aram min lemnag nra mon’og rogon e machib ni yibe tay u rom, machane ku bay boch e magawon ni un mada’nag. I yog e ulung rodad ngak boch e pioneer e ngiyal’ nem ndab ur rin’ed boch ban’en ni bay rogon ko siyobay u nap’an ni yad be machib. Bochan e re n’ey, ma aram me damumuw reb e pi pioneer nem, ma aram me chuw ko tin riyul’ ngki sunmiy reb e ulung ngak ni yad ma fil e Bible. Ku nap’an e re ngiyal’ i n’em, ma aram min chuweg e en ni ir e branch overseer ko maruwel rok ngkun tay be’ nga lon ni bochan e i rin’ boch e ngongol nib kireb. Ere, ba t’uf ni ngan pi’ e athamgil nga laniyan’ e Pi Mich ni yad ma par u Mexico ni yad ba yul’yul’.

Nap’an ni yan Brother Rutherford e ngaram, ma aram me pi’ e athamgil nga laniyan’ e pi walag u rom ni yad ba yul’yul’. I pi’ l’agruw i welthin nra pi’ e athamgil nga lanin’rad u nap’an e re convention nem, ma lal riy e weliy u radio. Aram e yay nth’abi som’on ni fanay e pi walag u Mexico e radio ni ngar wereged fare thin nib fel’ riy. Tomuren e re convention nem, ma aram min dugliy e cha’ ni baaram ni ka fini mang branch overseer ni nge yarmiy rogon e maruwel ko machib ni yibe tay. Ere, tabab e Pi Mich u rom ni ngar machibgad bayay u fithik’ e pasig ma aram me tow’athnag Jehovah e maruwel ni ur ted.

Faani bin migid e duw nga tomuren, ma aram min tay l’agruw e convention ko re nam nem, nreb e nni tay u Veracruz ma reb e nni tay u Mexico City. Rib ga’ angin e maruwel nib gel ni i tay e pi walag nem ko machib ni ur ted. Nap’an e duw ni 1931 ma ke gaman 82 e tamachib u rom. Ragag e duw nga tomuren, ma ragag yay ni ke mun nga urngin e pi tamachib ko re nam nem! Sogonap’an 1,000 e girdi’ nra bad nga Mexico City ni ngar uned nga reb e assembly nni tay u rom ko duw ni 1941 ni ka nog e Theocratic Assembly ngay.

“KAN SUWEY E KANAWO’”

Nap’an e duw ni 1943, ma aram me tabab e Pi Mich ni ngar pininged e girdi’ ni ngar uned nga reb e pi assembly nem ni kenggin e “Ba Nam ni Ke Puf Rogon.” Re assembly nem e nni tay u 12 e mach u Mexico.a Rogon ni ur rin’ed e re n’ey e aram e ra theed l’agruw yang i sign nga belel’ugunrad ni bay e thin u m’on ngu tomur riy. Ireray e n’en ni i rin’ e Pi Mich ni ka nap’an e duw ni 1936.

Baaray e n’en ni yog reb e magazine ni ka nog e La Nación ngay u murung’agen angin e yungi sign nem ni i fanay e pi walag u Mexico City ni ngar pininged e girdi’ ko re muulung nem. I gaar: “Nap’an e bin som’on e rran nni tay e re [assembly] nem, ma aram mi nog ngak e [Pi Mich] ni ngkur pininged yugu boch e girdi’. Faani bin migid e rran, ma kari yoor e girdi’ ndab kur tawgad nga lan e gin ni yibe muulung riy.” I damumuw e Galesiya ko Katolik ko re n’ey, ere ra tababgad ni ngar togopuluwgad ko Pi Mich u rom. Machane, de rus e pi walag nem, ya ra ululgad i wereg murung’agen e re convention ney. Ki yog e re magazine nem ni gaar: “Gubin e girdi’ u lan e mach nra guyed e pi girdi’ ney.” Ki yog ni gubin e pi walag nem e yad be “fek e ‘yungi sign nem’ ni be weliy murung’agen e re muulung nem.” Ku bay yaan boch e walag ko re article nem ni kan fek yaarad u daken e kanawo’ u Mexico City. Tanggin e re sasing nem e bay fapi thin riy ni be gaar: “Kan suwey e kanawo’.”

“KAB MUNGUY MA KAB MOGOWEL KO BIN NI NGAR MOLOD U DAKEN E SIMEN”

Nap’an e pi duw nem, ma yooren e Pi Mich e thingar ra paged farad u boch ban’en ya nge yag nra uned ko re in i convention nem ni un tay u Mexico. Boor e girdi’ ni ur bad ni ngar uned ko pi convention nem e yad ma par u boch e binaw nib palog ndabiyog ni nge yan e train ngay maku dariy e kanawo’ ni yan ngay. I yoloy e pi walag u reb e ulung nra gaargad, “Kemus ni yigoo line ko telegraph e ir e ba chugur e ngaray.” Ere, piin ni ur uned ko pi convention nem e thingar ranod u mule ara ra milekaggad u but’ u lan in e rran ko gin ni bay e train riy, mar afgad ngay nga ranod ko gin ni ngan tay e convention riy.

Yooren e Pi Mich nem e yad ba gafgow. Ere, rib mo’maw’ ni ngar pied puluwrad ni nga ranod ko gin ni ngan tay e convention riy. Maku reb e, nap’an ni yad ra taw e ngaram, ma boor i yad e ma par u tafen boch e Pi Mich ni ur daged e t’ufeg ngorad mu ur feked yad ngar pared u taferad. Ku bay boch i yad ni ma mol ko pi Tagil’ e Liyor rodad. Immoy bayay ni par sogonap’an 90 e walag ni pumoon ko branch ofis u rom, ma aram mar molod u daken yu kahol i babyor. Be yog e Yearbook rodad nib felfelan’ e pi walag nem ngay ni kar molod u daken e pi kahol nem ni bochan e “kab munguy ma kab mogowel ko bin ni ngar molod u daken e simen.”

Ri felfelan’ e Pi Mich nem ngay ni kar muulunggad pi walagrad nga taabang, ma dar lemnaged ni ke yan i aw nib m’ay fan e pi n’en ni kar paged farad riy. Chiney e ka be ulul ni be yoor e pi tamachib u Mexico, ya ke chugur ni nge gaman reb e milyon urngirad. Machane, yad gubin ni ka taareb rogon e lem rorad ko pi walag nem.b Baaray e n’en ni yog reb e report ni yib ko branch ofis u Mexico ko duw ni 1949. I gaar: “Yugu aram rogon ni boor e magawon ni kar mada’naged, machane darur malmalgad ko pigpig ni yad be tay ngak Got ni bochan e gubin yay ni gamad ra tay reb e assembly nge m’ay, mab n’uw nap’an ni yad ma weliy murung’agen, ma re deer ni yugu yad ma fith e, Wuin e ngkud ted e bin migid e assembly bayay?”​—Kan fek ko gin ni kan chaariy murung’agdad ngay kakrom u Central America.