Uw Rogon ni Yira Gelnag e T’ufeg nib Riyul’

“T’ufeg e ir e falay ko yafas; t’ufeg e yafas.”​—Ngan fek e tin th’abi fel’ ko yafas, by Joseph Johnson, 1871.

UW ROGON ni nge fil be’ rogon e t’ufeg? Ngan skulnag rogon e lem ko girdi’ fa? Fa ngan bieg e babyor ni kan fal’eg-​ni nge pow’iyey nga ni mon’og? Fa ngan guy e kachido ni yaan e adag? Ri danga’. Girdi’ e som’mon ni yad ma fil rogon e t’ufeg nge rogon e n’en ni yima rin’ nge fonow ko gallabthir rorad. Bitir e ra fil rogon fan e t’ufeg, u bang ni faanra ba’ e t’ufeg riy, yad ma guy e gallabthir rorad ni ma duruwiyrad ma be ayuwegrad, ma be non ngorad, ma ri yad baadag dakenrad. Maku yad ma fil rogon e t’ufeg ko ngiyal’ ni gallabthir rorad e be fil ngorad ni nga ur folgad ko kenggin e motochiyel nib fel’ ko mang e tin nib mat’aw nge tin ni de mat’aw.

Bin riyul’ e t’ufeg e kab gel ko runguy ara rogon ni yibe lemnag be’. Ya yugu ma maruwel ni fan ko tin baadag boch e girdi’, ni yugu ra de ga’ fan u wan’rad ko ngiyal’ nem, ni baga’ ni aram rogon ko piin bitir ko ngiyal’ ni yibe puwan’ ngorad ni bochan e yad ba t’uf. Reb i rogon ni rib fel’ ni dag be’ e t’ufeg ni de siin e fa en Ta Sunmiy. Apostal Paul e yoloy ni gaar: “Fakag, dab mu dariy fannag e fonow nib rok Jehovah, maku dabi mulan’um ko ngiyal’ ni be yal’uweg nem; ya piin ni ma runguyrad Jehovah e ma gechignagrad.”​—Hebrews 12:5, 6, NW.

Gallabthir, uw rogon ni gimed ra folwok rok Jehovah u rogon ni ngam daged e t’ufeg ngak chon e tabinaw romed? Nge uw feni rib ga’ fan e ngongol ni kam tayed u rogon e tha’ rok bigimed ngak bigimed ni bod rogon figirngiy nge leengiy?

Mu Filed e T’ufeg ni Nge M’ug ko Ngongol

Faanra gur e en figirngiy, baga’ fan u wan’um, ara ga ma tay nib ga’ fan e ppin rom, ma ga ma rin’ ban’en ngak u fithik’ e ta’ fan nge liyor fa? Faanra gur e en leengiy, ga ma t’ufeg ma gab ta ayuweg figirngim? Be yog e Bible ni figirngiy nge leengiy e thingari bagayow me t’ufeg bagayow muur tayew farow. (Efesus 5:28; Titus 2:4) Nap’an ni yow ra rin’, ma pi fakrow e yad ra guy e t’ufeg ko Kristiano ni be maruwel ko gin ngar guyed riy nsom’mon. Uw feni rib gel gelngin ma rib ga’ fan e binem e fonow!

Gallabthir e ku yad ma mon’ognag e t’ufeg u lan e tabinaw ni faan yad ra par ko tin nib fel’ e motochiyel ko tabinaw nib l’ag rogon ko pi n’en ni yima falfalan’ ngay, nge gafarig nge pi n’en ni yibe nameg nge tin nib ga’ fan. Girdi’ u ga’ngin yang e fayleng, e kar pirieged ni Bible e baga’ e ayuw ni ma pi’ u rogon e motochiyel ko tabinaw, ma ma micheg ni Bible e rriyul’ “ni thagthagnag Got ma baga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Timothy 3:16) Rriyul’, ni motochiyel u rogon pangiy nge rogon ni pow’iy e yafas e ni weliy ko fare machib u Daken e Burey ni goo yi ma lemnag ni dakuriy ban’en nib fel’ nge migid.​—Matthew, guruy 5 to 7.

Nap’an ni ra urngin e girdi’ u tabinaw e yad ra sap ku Got ni nge pow’iyrad mar folgad ko motochiyel rok, ma ra be’ ma ra gel e pagan’ rok ma piin bitir e baga’ ni yad ra ilal ni yad ba t’uf ma yad ma ta’ fan e gallabthir rorad. Ba thil, nga lan reb e tabinaw ni der taareb e motochiyel riy, ma de puluw, ara ra be’ ma be rin’ e tin baadag, bitir riy e rayog ni ngar chachalbangad nib gel, ma yad ba damumuw, nge tatogopuluw.​—Roma 2:21; Kolose 3:21.

Ma uw rogon reb e gallabthir ni goo ir? Kari mo’maw’ ni nga ur filed rogon e t’ufeg ngak pi fakrad ni kab bitir? Gathi ri aram rogon. Yugu aram rogon ma dabiyog i yin’ luwan reb e matin nge reb e matam ni yow ba manigil ni yow ma maruwel u taabang, ma boch ban’en ni kan rin’ e ke dag felngin boch e th’a u thilin e tabinaw ni rayog ni nge fulweg boch labgen fa binem e gallabthir ni demoy. Faanra gur reb e gallabthir ni yi goo gur, mu athamgiliy ngam fanay kenggin e motochiyel nu Bible u lan e tabinaw rom. Arrogon, reb e proverb e yog ngodad ni gaar: “Mu pagan’um ngak Jehovah u polo’ i gum’irchaem ma dab mu taga’ ko tin gamanang. Urngin ban’en ni ga be rin’ ma nga um lemnag me ir rok e ra yaluweg e pi kanawo’ rom”​—ba muun ngay rogon kanawoen e gallabthir.​—Proverbs 3:5, 6; James 1:5, NW.

Boor e pi fel’ yangaren ni yad ba fel’ ni kan chuguliyrad ntaareb e-​gallabthir rok ni kan piriegrad e chiney ni yad be pigpig ku Got u lan bokum biyu’ i ulung ni Kristiano ko Pi Mich rok Jehovah u fayleng i yan. Re n’eney e mich riy ni ku rayog rok taareb e gallabthir ni nge fil rogon e t’ufeg ngak pi fak nib fel’ rogon.

Uw Rogon Me Yog Rok Urngin e Girdi’ ni Ngar Ga’naged e T’ufeg Rorad

I yog e Bible u m’on “ni tin tomuren e rran” e bayi m’ug e pow riy ni aram e dakuriy e “runguy,” ni aram e, dakuriy e runguy u rogon e th’a u thiliy ni ma ta’ e tabinaw ngorad. (2 Timothy 3:1, 3) Machane, ki mada’ ngak e piin ni baaram ni ra ilalgad ko gin baaram ni dariy e runguy riy e kura yog ni ngar filed rogon ni ngar ga’naged e t’ufeg rorad. Uw rogon? Ngan fil ban’en rok Jehovah, ni ir e Sum e t’ufeg rok ma ir e be dag rogon e t’ufeg nge runguy ngak urngin e piin ni kar chelgad ngak u polo’ i gum’ircharad. (1 John 4:7, 8) “Rani chey ni digeyeg e chitamag nge chitinag, me Jehovah e ir e ra fekeg,” aray rogon ni yog reb e psalmist.​—Psalm 27:10, NW.

Boor e kanawo’ ni ma dag Jehovah e t’ufeg rok riy ngodad. Pi kanawo’ ney e ba muun ngay e fonow ni bod e fonow ko matam u daken e thin nu Bible, nge ayuw ko kan ni thothup, nge ayuw nib fel’ ko pi walag ni Kristiano. (Psalm 119:97-105; Luke 11:13; Hebrews 10:24, 25) Mu lemnag ko uw rogon ni ra ayuwegem e dalip i n’en ka nog ney nge gel e t’ufeg rom ku Got nge piin nib chugur ngom.

Fonow Nni Thagthagnag ni Bod e Fonow ko Matam

Ra ngari gel e fel’ ko m’ag u thilmew be’, ma thingarda nanged faanem nib fel’ rogon. Bochan ni dag Jehovah ir u lan e yungi babyor ko Bible, ma aram e be piningdad ni ngad chuchugurgad ngak. Machane, bieg Bible e de gaman. Thingarda rin’ed e pi n’en be fil ngodad ma gadad pirieg angin i felngin ngodad. (Psalm 19:7-10) “I gag, Jehovah, ni Got rom, ni fa En ni be skulnagem ni ngeb fan ngom, fa En ni be guy rogon ni nga um man ko kanawo’ ni thingari man riy,” aray rogon ni yog ko Isaiah 48:17, NW. Arrogon, Jehovah, e ir e ani th’abi fel’ rogon ni ma dag e T’ufeg, ma be fonownagdad ni fan ni nge fel’ rogodad​—gathi bochan ni baadag ni nge taleg e puf rogon rodad nga bogi motochiyel ni dariy fan.

Tamilangan’ ko Bible e ku ra ayuwegdad ni nge ga’ e t’ufeg rodad ngak e piin ni gadad ba taareb. Re n’eney e bochan ni tin riyul’ nu Bible e ma fil ngodad rogon ni ma sap Got ko girdi’ me dag ngodad kenggin e motochiyel ni rra gagiyegnag rogon ni ngaud ngongolgad ngaud ayuweged gadad. Rayog e pi n’eney ngodad, ma ke yog ngodad e def nib gel ni fan ko nge gel e t’ufeg rodad ngak e piin ba chugur ngodad. Apostal Paul e gaar: “Baaray e n’en ni yuggu be yibilay, ni aram e nge ga’ e t’ufeg romed mu umu nanged i yan e tin riyul’ e tamilangan’ ma ra tamilangan’med ko tin nib fel’.”​—Filippi 1:9, NW.

Ra ngan dag ko uw rogon ni ra pow’iy e tamilangan’ “nib puluw e t’ufeg,” ma ngam lemnag fare kenggin e tin riyul’ ni ka nog u Acts 10:34, 35, (NW) ni gaar: “Got e de laniyan’, ya gubin e nam ma ani bay madgun rok ma be maruweliy e tin nib mat’aw e ba m’agan’ ngak.” Faanra Got e ma guy rarogon e girdi’ ko pi n’en nib mat’aw ni yad ma rin’ nge madgun Got, ma gathi gini yad be’ riy ara raen dowrad, me ere gathi ngari ku da sapgad ngak e piin gadad ni ku taareb rogon ni dariy e laniyan’ riy?​—Acts 17:26, 27; 1 John 4:7-11, 20, 21.

T’ufeg​—Reb i Wo’m’engin e Kan ni Thothup Ku Got

Ri bod rogon e n’uw ni ma aw u ngalan’ nga daken bangi n’en kan yung e gek’iy ngay ni ma yib wo’m’engin ni ku ma ayuweg nga yib wo’m’engin nib yoor ngaun t’ar, kan ni thothup rok Got e ku rayog ni nge yibnag wo’m’engin ngak e piin ni kar adaged ni ngar motoyilgad ko pi felngin ni be yog e Bible ni “wo’m’engin e kan ni thothup.” (Galatia 5:22, 23) Bin th’abi ga’ fan ko pi wo’m’engin ney e t’ufeg. (1 Korinth 13:13) Machane uw rogon ni nge yog ngodad e kan ni thothup rok Got? Reb e n’en nib ga’ fan e meybil. Faan gad ra yibilay e kan ni thothup rok Got, ma ra pi’ ngodad. (Luke 11:9-13) Ga ma par “ma yi ga ma” yibilay e kan ni thothup? Faanra yi ga ma rin’, ma aram e ba wo’m’engin ni rib ga’ fan, nib muun e t’ufeg ngay, ni aram e ri bayi par ni be m’ug ko yafas rom.

Machane, bay ba mit e kan ni ma maruwel ni ba togopuluw ko kan ni thothup rok Got. Fare Bible e ma yog ere n’eney ni “fare nifengin e fayleng.” (1 Korinth 2:12; Efesus 2:2) Ban’en ni gelngin e kireb, ma gin i sum riy e ri dariy ya i sum rok Satan ni fare Moonyan’, fa cha’ “ni be gagiyegnag ere fayleng ney” ko girdi’ ni kar dabuyed Got. (John 12:31) Bod rogon e nifeng ni pug e thi’ab nga lang nge chabung, “fare nifengin e fayleng” e be pug nga lang e arar ni ra gafgownigey ni ma gothgothey e t’ufeg ma ma falfalan’nag e tin nib meewar e dowef riy.​—Galatia 5:19-21.

Girdi’ e ma yib ere gelngin nib kireb nem ngorad ko ngiyal’ ni yad ma pagrad ko chogowen e chugum, nge fel’ ngak-​nge yan ko ngongol ni maangach, nge yan ko kan thiliyeg e tin riyul’ ma ba ga’ ni bayi n’en ma dabki puluw rogon e t’ufeg ni ir e kari ga’ u fayleng. Faanra ga baadag ni nge gel e bin riyul’ e t’ufeg, ma thingar mu gelnigem ngam togopuluw ko fare nifengin e fayleng. (James 4:7) Machane, dab mu, pagan’um nga gelngim; mu pining Jehovah nge pi’ e ayuw. Kan ni thothup rok e​—aram e re gelngin nib th’abi gel u palpalthib—​rayog ni nge yoror rom me pi’ e tin nib fel’ ngom.​—Psalm 121:2.

Mu Fil e T’ufeg Rok e Walag ni Kristiano

Ri bod rogon e bitir ni ma fil rogon ni nge dag e t’ufeg ko pi n’en ni ma buch rok u lan e tabinaw, gadad gubin​—ni bitir nge piilal—​ma rayog ni nge ga’ e t’ufeg rodad ni ra ud chaggad ngak boch e Kristiano. (John 13:34, 35) Rriyul’, reb e n’en nib ga’ fan ko maruwel ko ulung ko Kristiano e nge yognag e gin ni nge be’ me yog ni i “pi’ e athamgil ngak be’ ko t’ufeg nge maruwel nib fel’.”​—Hebrews 10:24, New International Version.

Re t’ufeg nem e rib ga’ fan ngak e piin ni ke “magafan’rad ni dar nanged e n’en ngar rin’ed” u lan e fayleng nib liyegdad ni dariy e t’ufeg riy. (Matthew 9:36) Tin ni buch e be gagiyelnag ni tha’ u thilin e girdi’ u nap’an ni kar ilalgad ni bay e t’ufeg riy e ra chuweg e angin nib kireb ni bochan ni nap’an ni ka yad ba bitir. Arfan nib ga’ fan ni urngin e piin ni Kristiano ni kar ognaged yad e ri yad ma pining e magar ni riyul’ ni keb u gum’ircharad ngak e piin nib biech ni keb nga fithik’rad!

“T’ufeg e Ri Dabi War”

Fare Bible e yog ni gaar, “t’ufeg e ri dabi war.” (1 Korinth 13:8, NW) Uw rogon ma aram rogon? Paul ni apostal e yog ngodad ni gaar: “T’ufeg e gum’an-​nge gol. T’ufeg e gathi awan’, ma der ma uf, ma de tolangan’, ma der ngongol nib kireb, ma de fel’ ngak, ma der damumuw ni papey. Ma der aw e kireb nga laniyan’.” (1 Korinth 13:4, 5, NW) Rib tamilang, ni re t’ufeg ney e gathi ban’en ni kemus ni yima lemnag ma gathi ban’en ni rib toar. Rib thil​—piin ni yad be dag e yad manang ma yad ma pirieg e pi n’en ni ma m’ingan’uy riy nge amith, machane da ra paged e pi n’ey ni nge kirebnag rogon e t’ufeg rorad ngak e piin nib chugur ngorad. T’ufeg ni aram rogon e rriyul’ “nib m’ag ni dariy thibngin ni ma chagiy e girdi’ nga taabang.”​—Kolose 3:12-14, NW.

Amu lemnag e n’en ni rin’ bochi ppin ni Kristiano ni 17-​e duw-​yangaren u Korea. Nap’an ni tabab ko pigpig ku Jehovah Got, ma dabun e girdi’ nu tabinaw rok ere thingari chuw u tabinaw. Machane, susuna nge damumuw ma de rin’, me yibilay fare n’enem, me pag e Thin rok Got nge kan ni thothup rok nge gagiyegnag rogon ni nge lem. Ngiyal’ nem i yan, ma yugu ma yol nga tabinaw rok, nib sug e babyor rok ko runguy nge t’ufeg ni riyul’ ni ma ta’ ngorad. Ma fulweg riy, e gal ni ilal i walagen ni pumoon e ra tababgow ko fol Bible ma chiney e yow l’agruw e Kristiano ni kar ognagew yow. Chitiningin nge bin bitir i walagen ni pumoon e kar adagew e tin riyul’ u Bible. Ma tomur riy, ma chitamangin, ni ir e rib gel ni i togopuluw, e ke thil laniyan’. Me yoloy fachi ppin ni ir reb e Mich ni gaar: “Goo kugu mabgolgad e piin ni Kristiano, ma tabinaw romad e chiney e kugu gamangad e 23 ni gamad be ta’ fan Got u taabang.” Uw feni kari gel e t’ufeg!

Ga baadag ni ngam gelnag e t’ufeg rom nib riyul’ nge ayuweg boch e girdi’ nga ku ra rin’ed ni aram rogon? Me ere mu chel ngak Jehovah, ni ir e Yib rok e binem e felngin ni rib gel. Arrogon, mu tay e Thin rok nga gum’irchaen, ma ga meybil ngam ning e kan ni thothup, mu um chag ko pi walag ni Kristiano. (Isaiah 11:9; Matthew 5:5) Uw feni falfalan’ ni yira nang ni dabki n’uw nap’an ma urngin e piin kireb e bay ra chuwgad, me par ni goo piin ni yad ma dag e t’ufeg ni riyul’ ko Kristiano! Riyul’, t’ufeg e ir e th’abi ga’ fan ko falfalan’ nge yafas.​—Psalm 37:10, 11; 1 John 3:14.

[Pictures on page 6]

Meybil nge ngan fil e Thin rok Got e ra ayuwegdad ngad gelnaged e bin riyul’ e t’ufeg