T’ufeg e Ri Ba T’uf

DEMTRUG yangarey, nge yalen, nge thin, nge raen dowey, ma gubin e girdi’ ma ba t’uf rok e t’ufeg. Faanra yad be yim’ ni bochan ma de fel’ rogorad riy, ma dab ra falfalan’gad. Be’ ni ma gaweg murung’agen e m’ar nge falay e yoloy ni gaar: “T’ufeg nge fel’ u thilin e girdi’ e baga’ fan ma yira nang ko mang fan ni ma yib e m’ar ngodad nge n’en ni ra ayuwegdad me fel’ fithik’ i dowdad, nge mang e n’en ni ma k’aring e kireban’ nge falfalan’, nge mang fan ni ma yib e gafgow ngodad ma mang e n’en nra ayuwegdad riy. Faanra ma nga bay reb e falay nib biech ni aram rogon gelngin, ma ra chugur i urngin e togta u lan e nam e ir e ra ur pi’ed ko m’ar rorad. Ra ni aw nib kireb rogon e maruwrel ko togta ni ra dabi yoloy ni ngan pi’.”

Machane, rogon e par e chiney ni rib ga’ ni pi n’en ni bod e simbung, radio, television, nge pi n’en nib ga’ ni yima rin’, e baga’ ni ma weliy murung’agen e fel’ rogon, gelngiy, gilbuguwey, nge ngongol ni darngal ko bin baaray ni ngan weliy nib t’uf ko girdi’ ni ngeb e tha’ u thilrad u fithik’ e t’ufeg. Boor e piin ni ma fil ban’en ko girdi’ ni yad ma ta’ gelngin e pi n’en ni yima nameg ko fayleng nge maruwel riy, be weliy ni rogon me fel’ rogon be’ e be yan u rogon e pi n’enem. Riyul’, ya skul nge rogon ni nge salap be’ e baga’ fan, machane thingara maruweliyed ni karimus ni aram fan ni ra be’ ma dakuriy ba ngiyal’ ni fan ko tabinaw rok nge fager rok? Immoy be’ kakrom nib skul ni ma yoloy e babyor ni rib llowan’ i guy rarogon e girdi’ me taareb rogonnag be’ nib cheg ma ba salap machane dariy e t’ufeg rok nga “bangi wasey ni yibe pirdiiy ara fare talin e musik ni ruyang i wasey ni yima chafinnag.” (1 Korinth 13:1, New World Translation) Pi girdi’ nem e rayog ni nge yoor ban’en rorad, ma ku ra gilbuguwrad, machane der yog ngorad e bin riyul’ e falfalan’.

Jesus Kristus, ni rib pag rogon feni manang fan ma rib t’uf e girdi’ rok, e ta’ e t’ufeg ngak Got nge ani migid ngom ni ir e th’abi ga’ fan ko pi n’en i fil. I gaar: “Thingari t’uf Jehovah ni Got rom u polo’ i gum’irchaem nge polo’ i lanin’um nge polo’ i yaal rom. . . . Thingar ki t’uf rom e ani buguli yoror rom ni bod gur.” (Matthew 22:37-39, NW) Kemus ni piin ni yad be fol ko pi thin ney e yad ra mang e tin riyul’ e gachalpen Jesus. Arfan, ni gaar: “Bochan e re n’eney ma urngin e girdi’ ni yad ra nang ni gimed pi gachalpeg, ni faanra bay e t’ufeg u fithik’med.”​—John 13:35, NW.

Machane, uw rogon, ni ra yibe t’ufeg be’ ko re fayleng ney e chiney? Ma uw rogon ni ra fil e pi gallabthir e t’ufeg ngak pi fakrad? Bin migid e article e ra weliy murung’agen e pi deer ney.

[Pictures on page 3]

Ba mo’maw’ ni nge yog e t’ufeg u lan ba fayleng ni be gagiyegnag e chogow