Fan Ni Nge T’uf Rodad E En Nib Migid Ngodad

“Thingari t’uf rom e en ni ir e mmigid ngom ni gowe gur.”​—MATTHEW 22:39.

1. Uw rogon ni ngad daged nib t’uf Got rodad?

MANG e n’en ni baadag Jehovah ni nge rin’ e piin ni yad be liyor ngak? Bay e thin ni yog Jesus ni be dag e fulweg ko re deer ney. Bin nth’abi ga’ e motochiyel, nrogon ni yog e, nge t’uf Jehovah rodad u polo’ i gum’irchadad, ngu polo’ i lanin’dad, ngu polo’ i lem rodad, ngu polo’ i gelngidad. (Matthew 22:37; Mark 12:30) Rogon ni kad guyed ko fa bin ni ke yan e article e t’ufeg ngak Got e ba muun ngay ni ngan fol rok nge pi motochiyel rok ni bochan e t’ufeg ni ke dag ngodad. Piin nib t’uf Got rorad e yad ba felfelan’ ngay ni ngar rin’ed e tin nib m’agan’ Got ngay; der tomalnag lanin’rad.​—Psalm 40:8; 1 John 5:2, 3.

2, 3. Mang fan nsusun ni ngad tedan’dad ko fare motochiyel ni nge t’uf rodad e en nib migid ngodad, ma mang boch e deer ni ke sum?

² Bin migid e motochiyel ni kub ga’ fan ni yog Jesus e kub peth ko bin nsom’on ni aram e: “Thingari t’uf rom e en ni ir e mmigid ngom ni gowe gur.” (Matthew 22:39) Ireray e re motochiyel ni ngad weliyed murung’agen e chiney. Ngiyal’ ni gad be par riy e chiney e kan olobchiy rogon e t’ufeg ni yibe dag riy. Pi thin ni yog apostal Paul ni kan thagthagnag ngak u murung’agen e “tin tomuren e rran,” e yoloy ni girdi’ e gathi bay ki t’uf be’ rorad, ya bay ra pired ni kemus ni yad e yad be lemnaged yad, ma ke t’uf e salpiy nge fafel rorad. Boor e piin ni “bay dab kur golgad”, fa bod rogon ni piliyeg reb e Bible ni “bay dab kur golgad ngak e girdi’ u lan e tabinaw rorad.” (2 Timothy 3:1-4) I yog Jesus Kristus u m’on riy ni gaar: “Boor e girdi’ e . . . bayi bagayad me yognag bagayad, ma bayi bagayad me fanenikay bagayad. . . . Rogon nib t’uf be’ rok be’ e bayi meewar.”​—Matthew 24:10, 12.

³ Machane, mu tay fanam i yan riy, nde yog Jesus ni gubin e girdi’ ni bayi meewar e t’ufeg rorad. Ki immoy ma yugu ri i par ni bay e piin ni yad be dag e t’ufeg nib m’ag ni ngan dag ngak Jehovah. Piin nriyul’ nib t’uf Jehovah rorad e yad ra athamgil ngaur sapgad ngak boch e girdi’ nrogon ni ma sap Got ngorad. Ere mini’ e en ni ir e ba migid ngodad ni thingar da t’ufeged? Uw rogon ni ngad daged e t’ufeg ngak e en nib migid ngodad? Thin nu Bible e ra ayuwegdad ni ngad fulweged e pi deer ney nib ga’ fan.

Mini’ e En ni Ir e Ba Migid Ngog?

4. Rogon ni bay ko Levitikus guruy ni 19, e mini’ e susun e nge dag piyu Jew e t’ufeg ngorad?

⁴ I yip’ Jesus fan reb e motochiyel nni pi’ ngak piyu Israel u nap’an ni yog ngak e pi Farise ni bin migid e motochiyel ni kub ga’ fan e nge be’ me t’uf rok e en nib migid ngak ni bod ir. Bay e re thin n’ey u Levitikus 19:18. Ku lan e re guruy nem e nog riy ngak piyu Jew ni ngar sapgad ngak e piin ni gathi yad piyu Israel ni bod rogon e en nib migid ngorad. Verse 34 e be gaar: “Ngongol romed ngorad e nge bod rogon e ngongol romed ngak e girdi’ nu Israel, ngar t’ufgad romed ni bod fanmed t’uf romed. Dab mu paged talin ni um pired u Egypt ni gimed girdien yugu reb e nam.” Mus ko piin ni gathi yad piyu Jew ni ba ga’ ni piin ni proselytes ma ngan dag e t’ufeg ngorad.

5. Uw rogon ni nang piyu Jew fan fare thin ni nge be’ me t’uf rok e en nib migid ngak?

⁵ Machane, pi tayugang’ nu Jew u nap’an Jesus, e ba thil rogon ni ur lemnaged e re n’ey. Boch i yad e ur filed ni fa gal bugithin ni “fager” nge “en nib migid ngom” e kemus ni fan ngak piyu Jew. Ma piin ni gathi yad piyu Jew e ngan fanenikayrad. Pi tamachib ney e ra lemnaged ni piin ni yad ma liyor ku Got e ngar darifannaged e piin ni darur liyorgad ku Got. I yog reb e babyor ni: “Faanra aray rogon ma dabiyog ni nge war e fanenikan. Ya fin ra mun daken.”

6. Mang l’agruw i ban’en ni gagiyelnag Jesus u nap’an ni be weliy murung’agen e t’ufeg ngak e en nib migid ngodad?

⁶ U nap’an fare Welthin ni pi’ Jesus u daken e Burey, me yog e piin nsusun e ngan dag e t’ufeg ngorad. I gaar: “Kam rung’aged ni ka nog ni ke lunguy, Nge t’uf rom e pi tafager rom, ma ga fanenikay e pi toogor rom. Machane chiney e nggog ngomed ni nge lungug, Nge t’uf romed e pi toogor romed, mpied e meybil rok e piin ni yad be ngongliy e kireb ngomed, ya nge yog ni mmanged pi fak e Chitamangimed ni bay u tharmiy. Ya be mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matthew 5:43-45) U roy e ke gagiyelnag Jesus l’agruw ban’en riy. Bin som’on e, Jehovah e ba gol ngak e piin nib fel’ nge piin nib kireb. Ma bin migid e, susun ni ngad folwokgad rok.

7. Mang e be fil ngodad fare fanathin u murung’agen fare moon nu Samaria?

⁷ Immoy ba ngiyal’ ni be’ nu Jew ni boor ban’en ni manang ko fare Motochiyel e fith ngak Jesus ni gaar: “Mini’ e en ni ir e mmigid ngog?” I fulweg Jesus e deer rok u daken reb e fanathin u murung’agen be’ nu Samaria ni yib i suk ngak be’ nu Jew ni ke og e moro’ro’ ngak kar pirdiiyed mar lufed e mad rok. Yugu aram rogon ni boor piyu Jew ni yad ma darifannag piyu Samaria, machane fa en nu Samaria e tafalaynag e maad’ad ko fare moon me fek i yan nga ba naun ntafen e milekag, ni ireram e gin nrayog ni nge par riy me gol. Mang e be fil ngodad? T’ufeg rodad ngak e en nib migid ngodad e thingari un ngay e piin ni gathi gad nga taab nam, ara thin fa teliw.​—Luke 10:25, 29, 30, 33-37.

Fan ni Nge T’uf Rodad e En nib Migid Ngodad

8. Mang e n’en ni be yog e Levitikus guruy ni 19 u murung’agen rogon ni ngan dag e t’ufeg?

⁸ T’ufeg ngak e en nib migid ngodad, ntaareb rogon ko t’ufeg ngak Got e gathi kemus ni ban’en ni yibe lemnag; ya kub chag e ngongol ngay. Ku rayog ni nge ayuwegdad ni faan ku gad ra fal’eg i lemnag fare motochiyel ni bay u Levitikus 19 ni be ginang e girdi’ rok Got ni nge t’uf rorad e piin nib migid ngorad ni bod yad. Kad beeged u rom ni thingari pag piyu Israel e piin ni yad ba gafgow nge piin ni gathi yad piyu Israel ni ngar uned ko mokun woldug. Dabin digey be’ nge moro’ro’, ara sasalap. Piyu Israel e thingari taareb rogon gubin e girdi’ u wun’rad. Yugu aram rogon ni yad ma pi’ e fonow ko ngiyal’ nib t’uf, ma kan gaar ngorad: “Dabi par be’ ni be fanenikay be’.” Pi n’ey nge ku boch e motochiyel e kan weliy u lan fapi thin ni: ‘Ra be’ ma nge par nib t’uf yugu boch e girdi’ rok ni bod ir nib t’uf ir rok.’​—Leviticus 19:9-11, 15, 17, 18.

9. Mang fan ni motochiyelnag Jehovah ngak piyu Israel ni ngar pired ni yad ba dar rok boch e nam?

⁹ Yugu aram rogon ni thingari dag piyu Israel e t’ufeg ngak yugu boch e girdi’, machane ku thingara pired u orel rok e piin ni yad ma liyor ngak yugu boch e got. I ginangey Jehovah ko riya’ riy nge wenegan ni bay ni faan yira chag ngak e piin nib kireb. Ni bod rogon fapi nam ni ke fek piyu Israel, e i motochiyelnag Jehovah ni gaar: “Dab mu mabgolgad ngorad; dab mpied pi fakmed ngak pi fakrad ngar mabgolgad, ya yad ra pingeg pi fakmed nge dab kur folgad rok Somol mi yad ta’ fan yugu boch e kan mi yad meybil ngorad, ma aram e ra damumuw Somol ngomed.”​—Deuteronomy 7:3, 4.

10. Mang e ba t’uf ni ngad ayuwgad riy?

¹⁰ Taareb rogon ko piin Kristiano ni yad ma ayuw ni nge dab ra chaggad ngak e piin nrayog nge warnag e michan’ rorad. (1 Korinth 15:33) Kan ginangdad u daken e pi thin ni baaray ni be gaar: “Dab mu guyed rogon ni ngam pachgad ngak e piin nde mich Got u wan’rad,” piin ni gathi yad bang ko ulung ko Kristiano. (2 Korinth 6:14) Tin kub muun ngay e, piin Kristiano e kan fonownagrad ni ngar mabgolgad “nrogon e mabgol ni ma tay e piin ni girdien Kristus.” (1 Korinth 7:39) Machane, thingar dab da dabuyed daken e piin nde taareb e michan’ rodad ngak Jehovah ni bod gadad. I yim’ Kristus ni fan ngak e piin tadenen, ma boor e piin ni ur ngongliyed e tin nib kireb nra thilyeged e kanawo’ rorad ngar sulod ku Got.​—Roma 5:8; 1 Korinth 6:9-11.

11. Mang e bin nth’abi fel’ e kanawo’ nrayog ni ngad daged e t’ufeg riy ngak e piin ndarir pigpiggad ngak Jehovah, ma mang fan?

¹¹ Rayog ni ngad folwokgad ku Jehovah u nap’an ni gad be dag e t’ufeg ngak e piin darur liyorgad ngak Got. Yugu aram rogon ni ma fanenikay Got e kireb, ma ma dag nib gol ngak urngin e girdi’ ni aram e be pi’ e tayim ngorad ni ngar thilyeged kanawo’rad nge yog e yafas ni manemus ngorad. (Ezekiel 18:23) Jehovah e ba adag “ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Ireray e n’en nib m’agan’ ngay ni aram e nge urngin e girdi’ mar “thapgad ngak ma ngar nanged e tin nib riyul’.” (1 Timothy 2:4) Ireray fan ni motochiyelnag Jesus ngak pi gachalpen ni ngar machibgad ma ‘ranod ngak girdien e pi nam u gubin yang ngar pingeged yad ngar manged pi gachalpen.’ (Matthew 28:19, 20) Faan gad ra un ko re maruwel ney, ma aram e gad be dag e t’ufeg ngak Got nge piin ni yad ba migid ngodad, arrogon, ba muun e pi toogor rodad ngay!

T’ufeg ngak e Pi Walagdad ni Kristiano

12. Mang e yoloy John ni Apostal u murung’agen e t’ufeg rodad ngak e pi walagdad?

¹² I yoloy apostal Paul ni gaar: “Ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wan’uy ngak Kristus.” (Galatia 6:10) Gad e Kristiano e ba mil fan ngodad ni ngad daged e t’ufeg ngak e piin ntaareb rogon e michan’ rodad​—pi walagdad ni Kristiano ni pumoon nge ppin. Uw feni ga’ fan e re t’ufeg ney? I yoloy John ni apostal ni gaar: “En ni be fanenikay walagen ni girdien Kristus e be’ ni ma thang e fan ko girdi’. Faanra gaar be’, ‘Ba t’uf Got rog,’ machane be fanenikay walagen ni girdien Kristus, ma be lifith l’ugun. Ya dabiyog ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 3:15; 4:20) Rib gel e pi thin ney. I fanay Jesus fa gali bugithin ni “thang e fan rok e girdi’” nge “be’ ni ma lifith l’ugun” ni fan ngak Satan ni Moonyan’. (John 8:44) Dubdad ni nga nog e pi thin nem ni fan ngodad!

13. Mang kanawo’ e rayog ni ngad daged e t’ufeg riy ngak e piin ntaareb e michan’ rodad?

¹³ Tin nriyul’ e Kristiano e ‘ke fil Got rogon ngorad ni ngar pired nib t’uf bagayad rok bagayad.’ (1 Thessalonika 4:9) Rogon ni nge t’uf e girdi’ rodad e “dabi par ni ke mus ni thin nge welthin, ya thingari yan i aw ni bin riyul’ rogon nib t’uf Got nge girdi’ rodad ni ma m’ug ko ngongol.” (1 John 3:18) T’ufeg rodad e “thingari yan i aw nib riyul’.” (Roma 12:9) T’ufeg e ma k’aringdad ni ngad golgad, mad runguyed e girdi, me yog nda n’aged fan e kireb, mad k’adedan’dad ma darud awan’gad, ara da ufanthingad, ara da tolangan’gad, ara da siingad. (1 Korinth 13:4, 5; Efesus 4:32) Ma k’aringdad ni ‘nge bagadad me pigpig ngak bagadad.’ (Galatia 5:13) I yog Jesus ngak pi gachalpen ni ngar t’ufeged yad ni bod rogon ni ma t’ufegrad. (John 13:34) Ere ra reb e Kristiano ma thingari m’agan’ ngay ni nge pi’ e yafas rok ni fan ngak e piin ntaareb e michan’ rorad ko ngiyal’ nib t’uf.

14. Uw rogon nrayog ni ngan dag e t’ufeg u lan e tabinaw?

¹⁴ T’ufeg e thingari m’ug u lan e tabinaw ko Kristiano ni baga’ nu thilin e en figirngiy nge en leengiy. Rib chugur e tha’ ni bay u thilin e mabgol ere arfan ni yog Paul ni gaar: “Pumoon e thingari t’uf rorad e piin nleengirad ni bod rogon nib t’uf dowrad rorad.” Miki ul’ul ngay nge gaar: “Re moon nib t’uf leengin rok e aram e be t’ufeg ir.” (Efesus 5:28) Kad guyed ni ki sul Paul u daken e pi fonow ney u lal e verse nga tomuren e biney. Re moon nib t’uf leengin rok e dabi folwok ko n’en ni rin’ piyu Israel u nap’an Malaki ni da ur yul’yul’gad ngak e piin nleengirad. (Malaki 2:14) Ra ayuweg e ppin rok ya ba t’uf rok. Ra t’ufeg leengin ni bod rogon ni ma t’ufeg Kristus e girdi’ u lan e ulung. Maku t’ufeg e ra k’aring e en nleengiy ni nge tay fan e en figirngin.​—Efesus 5:25, 29-33.

15. Mang e ke yog ara rin’ boch e girdi’ ni bochan e t’ufeg ni bay u thilin e pi walag?

¹⁵ Rib tamilang ni mit ney e t’ufeg e reb e pow ko tin nriyul’ e Kristiano. I gaar Jesus: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) T’ufeg u thildad e ma k’aring e girdi’ ni ngar bad ngak fare Got nib t’uf rodad ma gad owchen. Ni bod u Mozambique e immoy reb e report riy u murung’agen reb e tabinaw ni yad e Pi Mich. “Dawor guyed ban’en ni bod e re n’em. Nap’an ni thig e yal’, me yib bangi nifeng nib gel nib chagil ngay e n’uw nib gel ni bay e malang u fithik’. Nifeng nib gel e kirebnag e naun romad, miki changeg e chigiy riy nge yan. Nap’an ni yib boch e walag u boch e ulung nib chugur ni ngar pied e ayuw ni ngan ngongliy bayay e naun romad, ma piin buguli yoror romad e ra gingad mar gaargad: ‘Manigil e teliw romed. Dariy ba ngiyal’ ni ke yib e ayuw ngomad ko galesiya romad ni aray rogon.’ Ma gamad pithig e Bible mu gu daged ngorad fare thin ni bay u John 13:34, 35. Boor e piin buguli yoror romad ni yad ma fol Bible e chiney.”

T’ufeg ni Fan ngak Be’ nge Be’

16. Mang e ba thil ko ngan t’ufeg yu ulung i girdi’ ko ngan t’ufeg e girdi’ ni be’ nge be’?

¹⁶ De mo’maw’ ni ngan t’ufeg e piin nib migid ngodad ni yad gubin. Machane t’ufeg ngak be’ nge be’ e ba thil. Ni bod ni, t’ufeg rok boch e girdi’ ngak e en nib migid ngorad e kemus nu daken e ayuw ko salpiy ni yad ma pi’ ni fan ngak e piin ni yad ba gafgow. Tin nriyul’ riy e, ri kab mom ni nga nog nib t’uf e en nib migid ngodad rodad ko bin ni ngan t’ufeg e piin ni gad nga maruwel ni yad ma dag ni dariy fadad u wan’rad, ara be’ ni buguli yoror rodad nib kireb, ara be’ ni fager rodad ni ke k’aring e damumuw ngodad.

17, 18. Uw rogon ni dag Jesus e t’ufeg ngak e girdi’ ni be’ nge be’, ma mang fan ni rin’?

¹⁷ Re n’ey ni nge t’uf e girdi’ rodad ni be’ nge be’ e kad filed rok Jesus ni i m’ug pi fel’ngin Got rok. Yugu aram rogon ni yib nga fayleng ni nge chuweg e denen ko girdi’, ma i dag e t’ufeg ngak e girdi’ ni be’ nge be’​—be’ nib ppin nib m’ar, be’ nib daraw, nge be’ nib bitir. (Matthew 9:20-22; Mark 1:40-42; 7:26, 29, 30; John 1:29) Taareb rogon, gad ma dag e t’ufeg ngak e piin nib migid ngodad u rogon e n’en ni gad ma rin’ ngak e piin ni gad ma mada’nagrad ni yu rran.

¹⁸ Machane, thingar dab da paged talin ni, t’ufeg ngak e piin nib migid ngodad e ba peth ko t’ufeg rodad ngak Got. Yugu aram rogon ni i ayuweg Jesus e piin nib gafgow, mi i golnag e piin nib m’ar, mi i duruw’iy e piin ni ke yib e bilig ngorad, machane fan ni i rin’ urngin e pi ney nib muun ngay e machib ni i tay ngak e girdi’ e bochan e nge ayuweg e girdi’ ni ngar sulod ku Got. (2 Korinth 5:19) I rin’ Jesus gubin ban’en ni fan e nga nog e sorok riy ngak Got, ma gubin ngiyal ni dag ni ke yib ni owchen Got me dag e pi fel’ngin fare Got nib t’uf rok. (1 Korinth 10:31) Faan gad ra folwok ko n’en ni i rin’ Jesus, ma aram e rayog ni ngad daged e t’ufeg ngak e piin nib migid ngodad ma ka gad par ni gathi gad bang ko re fayleng ney nib kireb.

Uw Rogon ni Ngad T’ufeged e Piin nib Migid Ngodad ni Bod Gadad?

19, 20. Mang e be yip’ fan ni ngad t’ufeged e en nib migid ngodad ni bod gadad?

¹⁹ I gaar Jesus: “Thingari t’uf rom e en ni ir e mmigid ngom ni gowe gur.” Ka ban’en ni aram rogon ni ngad t’ufeged gadad mad ted fadad. Faanra gathi aram rogon, ma dabi yib fan fare motochiyel. Re t’ufeg ney e dabi maathuk ko fare t’ufeg nib siin ni weliy Paul ni Apostal murung’agen u 2 Timothy 3:2. Ya ba lem ni be dag nib ga’ fadad. Reb e Bible scholar e weliy ni ireram e “t’ufeg nib thabthabel ni de ufanthin ni gathi ‘Gub tolang’ fa ‘Gub sobut.’”

²⁰ Ngad t’ufeged boch e girdi’ ni bod ni gad be t’ufegdad e be yip’ fan ni ngad sapgad ngak boch e girdi’ nrogon ni gad baadag ni ngan sap ngodad mad rin’ed ngak e girdi’ e tin ni gad baadag ni ngar rin’ed ngodad. I gaar Jesus: “Ere mu rin’ed ngak e girdi’ e tin ni gimed ba adag ni ngar rin’ed ngomed.” (Matthew 7:12) Mu tay fanam i yan riy ni de yog Jesus ni ngad fal’eged i lemnag e pi n’en ni ke rin’ e girdi’ ni fan ngodad ni ke n’uw nap’an ngemu’ ma gad fulweg taban. Ya, thingar da lemnaged rogon ni gad baadag ni nge ngongol e girdi’ ngodad ma gad fol riy. Maku, mu tay fanam i yan riy, de yog Jesus e pi thin ney ni kemus ni fan ngak e pi tafager rok nge pi walagen. I fanay fare thin ni “ngar” ni sana bochan e nge dag ni thingar da ngongolgad ni aray rogon ngak urngin e girdi’, ni gad ra mada’nag.

21. Mang e gad be dag ni faanra da daged e t’ufeg ngak boch e girdi’?

²¹ T’ufeg rodad ko en nib migid ngodad e ra ayuwegdad ni dab da rin’ed e tin nib kireb. I yoloy Paul ni apostal ni gaar: Fapi motochiyel e ke gaar, “Dab mu pirew be’ ni gathi mabgol rom; dab mu li’ be’ ngem’; dab mmoro’ro’; dab mu chogow” urngin e tiney nge tin ni ka bay e kan ulunguy nga fithik’ taareb e motochiyel ni be gaar, ‘Demtrug e gin’en ni ga bay riy ma nge t’uf rom e en nib migid ngom ni gowe gur.’ En nib t’uf rok e en nib migid ngak e ri dabiyog ni nge rin’ ban’en nib kireb ngak.” (Roma 13:9, 10) T’ufeg e ra k’aringdad ni ngad gayed e kanawo’ ni ngad rin’ed e tin nib fel’ ngak boch e girdi’. Faan gad ra t’ufeg e girdi’, ma aram e gad be dag nib t’uf rodad e en ni sunumiy e girdi’ ni bod Yaan, ni aram Jehovah Got.​—Genesis 1:26.

Uw Rogon ni Ga Ra Fulweg?

• Mini’ e susun e ngad daged e t’ufeg ngak, ma mang fan?

• Uw rogon nrayog ni ngad daged e t’ufeg ngak e piin darur pigpiggad ngak Jehovah?

• U rogon ni be weliy e Bible murung’agen e t’ufeg nsusun ni ngad daged ngak pi walagdad?

• Mang e be yip’ fan ni nge t’uf e en nib migid ngodad ni bod gadad?

[Picture on page 24]

“Mini’ e riyul’ ni ir e en nib migid ngodad?”

[Picture on page 27]

T’ufeg rok Jesus e ba muun ngay gubin e girdi’