“Thingari T’uf Rom Somol ni Ir e Got Rom”

1. Mang fan ni i gel e t’ufeg u thilin Got nge Fak?

JESUS KRISTUS ni Fak Jehovah e yog ni gaar: “[Ba] t’uf rog e en ni Chitamangiy.” (John 14:31) Ki yog ni gaar: “En ni Chitamangiy e ba t’uf e en ni fak rok.” (John 5:20) Susun ndab da gingad ko re n’ey. Ya bin riyul’ riy e ba n’uw nap’an u m’on ni nge yib Jesus nga fayleng nib girdi’, ma immoy u tooben Got ni “bod be’ nib salap i maruweliy ban’en.” (Prov. 8:30) Nap’an ni be maruwel Jehovah nge Jesus u taabang, ma boor ban’en ni i fil Jesus u murung’agen pi fel’ngin e Chitamangin ma ur parew nrib gel e t’ufeg u thilrow. Bin riyul’ riy e bochan ni ur rin’ew boor ban’en u taabang, ma aram fan ni i gel e t’ufeg u thilrow.

2. (a) Faanra gad baadag ni nga i t’ufegdad Got, ma mang e thingar da rin’ed? (b) Mang boch e deer ni gad ra weliy e fulweg riy?

² I tang David ni ir fare psalmist ni gaar: “Somol, ri gab t’uf rog! Gur e yoror rog!” (Ps. 18:1, BT) Aram rogon ni susun e ngaud lemnaged Got ya gad ba t’uf rok. Ma faanra ud folgad rok, ma ra i t’ufegdad. (Mu beeg e Deuteronomy 7:12, 13.) Machane, dabiyog ni ngad guyed Got, ere uw rogon ni nge t’uf rodad? Mang e be yip’ fan ni nge t’uf Jehovah rodad? Mang fan ni susun e nge t’uf Got rodad? Ma uw rogon ni ngad daged nib t’uf Got rodad?

FAN NRAYOG NI NGE T’UF GOT RODAD

3, 4. Mang fan nrayog ni nge t’uf Jehovah rodad?

³ “Got e Kan”; ere, dabiyog ni ngad guyed. (John 4:24) Machane, rayog ni nge t’uf Got rodad, ma aram e n’en ni kan tay chilen u Bible ni ngad rin’ed. Bod ni yog Moses ngak piyu Israel ni gaar: “Ngari t’uf romed Somol ni Got romed u polo’ i gum’irchamed ngu polo’ i lanin’med, ngu polo’ i gelngimed.”​—Deut. 6:5.

⁴ Mang fan nrayog ni ngari t’uf Got rodad? Ya ke sunmiydad nib t’uf rodad ni ngaud liyorgad ngak miki taydad nrayog ni ngad daged e t’ufeg. Gad ra nang Jehovah ma ra gel feni t’uf rodad, ma re n’ey e ra yibnag e felfelan’ ngodad. I yog Jesus ni gaar: “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad, ya gagiyeg nu tharmiy e ke thap ngorad!” (Matt. 5:3) Boor e girdi’ ni ke mich u wan’rad nib t’uf ko girdi’ ni ngar nanged Got. I yog be’ ni gaar: “Yira ngat nga rogon ni ma gay e girdi’ murung’agen Got nge rogon ni ma mich u wan’rad.”​—Man Does Not Stand Alone, ni ke yoloy A. C. Morrison.

5. Uw rogon ni kad nanged ni faan gad ra gay Got ma rayog ni ngad pirieged?

⁵ Faan gad ra gay Got, ma gur, rayog ni ngad pirieged? Arrogon, ya baadag ni nge fel’ e tha’ u thildad. I tamilangnag apostal Paul e re n’ey u nap’an ni machibnag ba ulung i girdi’ ni kar muulunggad ko Areopagus. I rin’ e re n’ey u bangi ban’en nib chugur nga reb e tempel ni ka nog e Parthenon ngay. Re tempel nem e kan ognag ngak Athena ni ir e got rok piyu Athens kakrom. Mu susunnag ni um moy u rom u nap’an ni be weliy Paul murung’agen “Got ni ir e sunumiy e fayleng nge urngin ban’en ni ba’ riy” miki weliy ni “der ma par u lan e tempel ni girdi’ e toy.” Miki yog nri “taareb e pumoon ni sunumiy, me sum rok e re moon nem girdien urngin e nam, me tayrad ni ngar pired u daken e re fayleng ney ni polo’. I ir e turguy ko tabolngin e re ngiyal’ i n’en nge yungi n’en ni ngar pired riy! I rin’ e re n’ey ni fan e ngar gayed ir, ma sana mi yad pirieg ko ngiyal’ ni yad be gayiy. Machane bin riyul’ riy e dariy bagadad nib mal’af Got rok nga orel.” (Acts 17:24-27) Arrogon, rayog ko girdi’ ni ngar pirieged Got. Boor ko medlip nge baley e milyon e Pi Mich Rok Jehovah e ‘kar pirieged Got’ ma rib t’uf rorad.

FAN NI NGE T’UF GOT RODAD

6. Mang e “bin th’abi ga’ nge bin th’abi ga’ fan e motochiyel”?

⁶ T’ufeg rodad ngak Jehovah e susun ni nge yib u gum’ircha’dad. I tamilangnag Jesus e re n’ey u nap’an ni fith reb e Farise ngak ni gaar: “Tamachib, bin ngan e motochiyel e ir e th’abi ga’ u fithik’ e Motochiyel?” Me fulweg Jesus ni gaar: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um [“yafas rom,” NW], ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel.”​—Matt. 22:34-38.

7. Mang e be yip’ fan ni ngad t’ufeged Got u (a) ‘polo’ i gum’ircha’dad’? (b) ‘polo’ e yafas rodad’? (c) ‘polo’ e lem rodad’?

⁷ Mang e yip’ Jesus fan u nap’an ni yog nthingari t’uf Got rodad u ‘polo’ i gum’ircha’dad’? Be yip’ fan nthingari t’uf Jehovah rodad u polo’ i lanin’dad, ma re t’ufeg ney e ra rin’ ban’en nga rogon e pi n’en ni gad baadag, nge rogon ni gad ma lem. Ku thingari t’uf Got rodad u ‘polo’ e yafas rodad,’ ma re n’ey e ba muun ngay urngin ban’en ni gad ma rin’ ko yafas rodad. Ku thingari t’uf Got rodad u ‘polo’ i lem rodad,’ ma re n’ey e be yip’ fan rogon ni gad ma lem nge urngin ban’en ni gad ma lemnag. Ere, ke tamilangnag Jesus nthingari t’uf Jehovah rodad u polo’ i gelngidad ma gad pi’ urngin ban’en ni bay rodad ngak.

8. Faanra rib t’uf Got rodad, ma mang e ra k’aringdad ni ngad rin’ed?

⁸ Faanra ba t’uf Got rodad u polo’ i gum’ircha’dad, ngu polo’ e yafas rodad, ngu polo’ e lem rodad, ma ra ud filed e Thin rok u fithik’ e pasig, ma gad be rin’ urngin ban’en ni ke yog ni ngad rin’ed, ma gad be machibnag fare thin nib fel’ ni murung’agen Gil’ilungun Got u fithik’ e pasig. (Matt. 24:14; Rom. 12:1, 2) Faanra rriyul’ nib t’uf Jehovah rodad, ma ireray e n’en nra chugurnagdad ngak. (Jas. 4:8) Riyul’ ndabiyog ni ngad yoloyed nga but’ urngin i fan nthingari t’uf Got rodad. Machane, ngad weliyed buchuuw.

FAN NI NGE T’UF JEHOVAH RODAD

9. Mang fan nib t’uf Jehovah rom ni ir e ke Sunmiydad ma Ir e Ma Pi’ e tin nib t’uf rodad?

⁹ Jehovah e ir e ke Sunmiydad maku Ir e Ma Pi’ urngin ban’en nib t’uf rodad. I yog Paul nu “fithik’ Got e gadad be par riy ma gadad be mithmith riy ma gadad ba’ riy.” (Acts 17:28) Ke pi’ Jehovah e re fayleng ney nrib fel’ yaan ngodad ni ngad tafnayed. (Ps. 115:16) Ma kki pi’ e ggan nge ku boch ban’en ngodad ya nge yag nda pared ni gad ba fas. Aram fan nrayog ni nge yog Paul ngak piyu Lystra ni yad ma liyor ko liyos ni ‘fare Got ni be par nib fos . . . ni gubin ngiyal’ ni be micheg ir u daken urngin e tin nib fel’ ni be rin’, ya ma pi’ e n’uw ngorad u lang nge galwog u ngal’an; me ir e ma pi’ e ggan ngorad ma ma fal’eg lanin’rad.’ (Acts 14:15-17) Rib tamilang nri bay fan ni ngad t’ufeged Got ni ir e ke Sunmiydad maku Ir e Ma Pi’ urngin ban’en nib t’uf rodad.​—Ekl. 12:1.

10. Susun ni nge uw rogon u wan’dad e n’en ni ke pi’ Jehovah nra chuwegdad ko denen nge yam’?

¹⁰ Ra chuweg Got e denen nge yam’ ni ke af rok Adam ngodad. (Rom. 5:12) Arrogon, “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Rom. 5:8) Dariy e maruwar riy nrib t’uf Jehovah rodad ni bochan e ke pi’ Fak ni nge yim’ ni fan ngodad. Ma faanra da kalgadngan’dad me mich fare biyul ni pi’ Jesus u wan’dad, ma ra n’ag Got fan e denen rodad.​—John 3:16.

11, 12. Mang boch e kanawo’ ni ke pi’ Jehovah boch ban’en riy nrayog ni nge l’agan’dad ngay?

¹¹ Ke pi’ Jehovah e ‘l’agan’ ni nge suguydad ko felfelan’ nge gapas.’ (Rom. 15:13) L’agan’ ara athap rodad ni ke pi’ Got e aram e n’en ni ma ayuwegdad ni ngad athamgilgad u fithik’ e pi skeng ni gad ma mada’nag. Piin ni kan dugliyrad ni kar pared ni yad ba ‘yul’yul’ ni mus ko ngiyal’ ni kan thang e fan rorad, e kan pi’ e teeliyaw ko yafos ngorad.’ (Rev. 2:10) Piin ni yad ba yul’yul’ ni yad be athapeg e par u fayleng e yad ra felfelan’ ko pi tow’ath nra yag ngorad u Paradis. (Luke 23:43) Uw rogon e athap rodad u wan’dad? Gathi be suguydad ko felfelan’ nge gapas laniyan’, ma be k’aringdad ni nge t’uf rodad e En ni Ma Pi’ “urngin e tow’ath nrib manigil” ngodad?​—Jas. 1:17.

¹² Ke pi’ Got e athap ko fas ko yam’ ngodad. (Acts 24:15) Riyul’ nnap’an nra yim’ be’ nib t’uf rodad ma ri ma kireban’dad nib gel. Machane, bochan fare athap ko fas ko yam’, ma der ma ‘kireban’dad ni bod e piin ndariy ban’en ni ke l’agan’rad ngay.’ (1 Thess. 4:13) Bochan ni gad ba t’uf rok Jehovah Got, ma aram fan ni be par ni be sonnag e ngiyal’ nra faseg e piin ni kar m’ad, nib ga’ ni piin ni yad ba yul’yul’ ni bod rogon Job. (Job 14:15) Am lemnag gelngin e felfelan’ ni yira tay u nap’an ni yira faseg e piin ni kar m’ad. Rib t’uf e Chitamangidad ni bay u tharmiy rodad ni bochan e ke pi’ e re athap ney ngodad!

13. Mang e mich riy nriyul’ ni ma lemnagdad Got?

¹³ Ri ma lemnagdad Jehovah. (Mu beeg e Psalm 34:6, 18, 19; 1 Peter 5:6, 7.) Bochan ni gad manang ni gubin ngiyal’ nrayog rok Got ni nge ayuweg e piin ni yad ba yul’yul’ ngak, ma aram fan ni gad ma par nib pagan’dad ni ‘gadad e saf rok.’ (Ps. 79:13) Maku reb e, ra gagiyel gelngin e t’ufeg rok Got ngodad ko n’en nra rin’ ni fan ngodad u tan Gil’ilungun fare Messiah. Tomuren nra chuweg Jesus Kristus ni ir faen ni kan dugliy ni nge mang Pilung e cham, nge gafgow ni yima tay ngak boch e girdi’, nge gubin mit e kireb u fayleng, ma aram e ngiyal’ nra par e piin ni yad ba yul’yul’ u fithik’ e gapas me fel’ e par rorad. (Ps. 72:7, 12-14, 16) Ere, pi flaab ney ni gad be athapeg e ir e ma k’aringdad ni ngad t’ufeged e Got rodad u polo’ i gum’ircha’dad, nge yafas rodad, nge gelngidad, nge lem rodad.​—Luke 10:27.

14. Mang boch e tow’ath nrib manigil ni ke pi’ Got ngodad?

¹⁴ Ke pi’ Jehovah fare tow’ath ngodad ni ngad manged boch e Mich rok. (Isa. 43:10-12) Ba t’uf Got rodad ni bochan e ke bing e kanawo’ ngodad nrayog ni ngad gagiyelnaged feni tolang e gagiyeg rok, ma gad ayuweg e girdi’ ko re fayleng ney ni nge l’agan’rad nga ban’en. Maku reb, e rayog ni ngad machibgad u fithik’ e michan’ nge pagan’ ni bochan e gad be wereg fare thin nib fel’ nib puluw ko Thin rok fare Got nib riyul’ ndariy ban’en ni ma micheg ni ma yan i aw nib m’ay fan. (Mu beeg e Joshua 21:45; 23:14.) Riyul’ ni boor e tow’ath ni ma pi’ Jehovah ngodad maku boor fan ni nge t’uf rodad. Machane, uw rogon ni nge m’ug nib t’uf Jehovah rodad?

ROGON NI NGE M’UG NIB T’UF GOT RODAD

15. Faanra ud filed e Thin rok Got ma gad be fol riy, ma uw rogon nra ayuwegdad?

¹⁵ Ngaum fil e Thin rok Got ni gubin ngiyal’ ma ga be fol riy. Faan gad ra rin’ e re n’ey, ma aram e gad be dag nib t’uf Jehovah rodad ma gad baadag ni nge par e thin rok ni ir e ‘tamilang ko kanawo’ ni gad be yan riy.’ (Ps. 119:105) Faanra gad be mada’nag boch e magawon, ma rayog ni nge fal’eg e re thin ni baaray lanin’dad ni faan be gaar: “Be’ ni ke kolngan’ nge fol rom e dab mu n’ag.” “Somol fare t’ufeg rom ni dabi mus e ke dugliyeg. Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’.” (Ps. 51:17; 94:18, 19, BT) Ma runguy Jehovah e piin ni kar gafgowgad, maku er rogon Jesus. (Isa. 49:13; Matt. 15:32) Faanra ud filed e Bible, ma rayog ni ngad filed murung’agen e t’ufeg rok Jehovah ngodad ma re n’ey e ra ayuwegdad ni ngari t’uf Jehovah rodad.

16. Uw rogon nrayog ni nge gel e t’ufeg rodad ngak Got u daken e meybil ni gad ma tay ni gubin ngiyal’?

¹⁶ Um meybil ngak Got ni gubin ngiyal’. Meybil ni gad ma tay e ma chugurnagdad ngak faen ni ma “fulweg taban e meybil.” (Ps. 65:2) Nap’an ni gad ra guy ni be fulweg Got taban e meybil rodad, ma aram e ra gel e t’ufeg rodad ngak. Bod ni sana kad nanged nder ma pagdad ni nge yib ngodad e pi n’en ni ma waliy e girdi’ nge denen nge pag rogon ndabkiyog ni ngad taleged gadad riy. (1 Kor. 10:13) Ga ra meybil ngak Jehovah u nap’an ni ke magafan’um, ma rayog ni ngam thamiy e “gapas rok.” (Fil. 4:6, 7) Yu ngiyal’ e rayog ni ngad meybilgad u lanin’dad ni bod rogon ni rin’ Nehemiah, ma gad guy ni ke fulweg taban. (Neh. 2:1-6) Faanra ‘ud meybilgad ni gubin ngiyal’’ ma gad guy ni be fulweg Jehovah taban, ma aram e rayog ni nge gel e t’ufeg rodad ngak, miki pagan’dad nra ayuwegdad ni ngad athamgilgad u fithik’ e pi skeng ni gad ma mada’nag.​—Rom. 12:12.

17. Faanra ba t’uf Got rodad, ma ra uw rogon e muulung u wan’dad?

¹⁷ Ngaum un ko pi muulung, nge assembly, nge convention ni gad ma tay ni gubin ngiyal’. (Heb. 10:24, 25) I muulung piyu Israel kakrom ni ngar motoyilgad mi yad fil murung’agen Jehovah ya nge yag ni ngaur ted fan ma yad be fol ko pi Motochiyel rok. (Deut. 31:12) Faanra riyul’ nib t’uf Got rodad ma de mo’maw’ ni ngad rin’ed e tin nib m’agan’ ngay. (Mu beeg e 1 John 5:3.) Ere, dab da paged ban’en ni nge talegdad ndab kub uned ko muulung. Ma thingar dab da paged ban’en ni nge warnag e t’ufeg rodad ngak Jehovah.​—Rev. 2:4.

18. Mang e be k’aringdad e t’ufeg rodad ngak Got ni ngad rin’ed?

¹⁸ Mu wereg e “tin nib riyul’ ni ir fare Thin Nib Fel’” ko girdi’ u fithik’ e pasig. (Gal. 2:5) T’ufeg rodad ngak Got e aram e n’en ni ma k’aringdad ni ngad weliyed murung’agen Gil’ilungun fare Messiah ara Fak, ni ir faen nra ‘yan u feni falu’ ni nge gel ni fan ko tin riyul’’ u nap’an e Armageddon. (Ps. 45:4; Rev. 16:14, 16) Rib gel e felfelan’ ni gad be tay ni gad be un i ayuweg e girdi’ ni ngar filed murung’agen e t’ufeg rok Got nge fare fayleng nib beech ni ke micheg!​—Matt. 28:19, 20.

19. Mang fan nsusun e nge ga’ fan u wan’dad rogon ni ke yarmiy Jehovah ni ngaun ayuweg e pi saf rok?

¹⁹ Nge ga’ fan u wan’um rogon ni ke yarmiy Got ni ngaun ayuweg e pi saf rok. (Acts 20:28) Ke tay Jehovah e piin piilal ni Kristiano ni ngar ayuweged gadad. Piin piilal e yad bod “ba manaf ni ngan naf ngay ko nifeng nge yoko’. Yad ra bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni ba ga’ ni ba ga’ ni bay u daken bangi ted nder tugul ban’en riy.” (Isa. 32:1, 2) Am lemnag rogon nrayog ni nge ayuwegdad e naun u nap’an ni ke yib bangi lang ni bay e nifeng riy nib gel ara nap’an ni be mat e yal’ nib gel! Ere, ku er rogon e piin piilal ni yad ma ayuwegdad ko tin nib t’uf rodad ni fan ko tirok Got ban’en. Faanra ud folgad rorad, ma aram e be m’ug riy feni ga’ fan u wan’dad e pi “pumoon ni tow’ath” ney. Ma re n’ey e ku be micheg nib t’uf Got nge Kristus rodad, ni ir Lolugen e ulung.​—Efe. 4:8, NW; 5:23; Heb. 13:17.

NGA I GEL E T’UFEG ROM NGAK GOT

20. Faanra ba t’uf Got rom, ma uw rogon ni ga ra fol ko fare thin ni bay ko James 1:22-25?

²⁰ Faanra rib fel’ e tha’ u thilmew Jehovah, ma aram e gathi ‘ke mus ni ga be motoyil ko thin rok; ya ka ga be maruwel ngay.’ (Mu beeg e James 1:22-25.) Be’ ni ma ‘maruwel’ ko thin rok Got e ba gel e michan’ rok, ma bochan e re n’ey ma rib pasig ko machib, maku ma un ko pi n’en ni yima rin’ u nap’an e muulung. Bochan nrib t’uf Got rom, ma ga ma fol ko pi “motochiyel” rok nrib yal’uw ni bay riy urngin ban’en ni baadag ni ngam rin’.​—Ps. 19:7-11.

21. Mang e rayog ni ngan taareb rogonnag e meybil rom ngay?

²¹ T’ufeg rom ngak Jehovah Got e ir e ku ra k’aringem ni ngaum meybil ngak ni gubin ngiyal’. I taareb rogonnag David ni fare psalmist e meybil rok ko pi n’en nib fel’ bon ni yima urfiy kakrom ni ngan pi’ ngak Got nrogon ni bay ko Motochiyel. I yog ni gaar: “Nge fel’ u wun’um e meybil rog ni bod e incense, nge paag ni kug tining nga lang ni bod ba maligach ni blayal’.” (Ps. 141:2, BT; Ex. 30:7, 8) Faanra ud meybilgad ngak Jehovah u fithik’ e sobut’an’, nge yul’yul’, ma gad be pining e magar ngak, ma rayog ni nge taareb rogon e meybil rodad ko pi n’en nib fel’ bon ni yima urfiy ma ra fel’ u wan’ Got.​—Rev. 5:8.

22. Ba miti mang t’ufeg e gad ra weliy murung’agen ko migid?

²² I yog Jesus nthingari t’uf Got rodad, maku thingari t’uf rodad e en nib migid ngodad. (Matt. 22:37-39) T’ufeg rodad ngak Jehovah nge pi kenggin e motochiyel rok e ra ayuweg e tha’ u thildad boch e girdi’ maku ra ayuwegdad ni ngaud t’ufeged e en nib migid ngodad. Ma ireray e n’en ni gad ra weliy ni migid.