GURUY NI 21

Mang e Bethel?

L’agruw e Pi Mich Rok Jehovah ni yow be maruwel ko Art Department u Bethel — Art Department, U.S.A.

Reb e Pi Mich Rok Jehovah ni be maruwel ko gin ni yima printnag e babyor riy u Bethel u Germany — Germany

Reb e Pi Mich Rok Jehovah ni be maruwel ko gin ni yima maluknag e mad riy u Bethel u Kenya — Kenya

Boch e walag ni pumoon ni yad ma maruwel u taang ko Bethel u Colombia ni yad be fal’eg rogon e tebel — Colombia

Bethel ni thin nu Hebrew e be yip’ fan e “naun rok Got.” (Genesis 28:17, 19) Ireray e re ngachal nib puluw ni fan ko pi naun ni ma fanay e Pi Mich Rok Jehovah u ga’ngin yang e fayleng ni ngan yarmiy min ayuweg fare maruwel ko machib riy. Fare Ulung ni Ma Pow’iyey e yad ma pigpig ko tochuch u New York State u Meriken, ma aram e gin ni yad ma yaliy gubin e maruwel riy ni yima rin’ ko pi branch ofis u ga’ngin yang e fayleng. Piin ni yad ma maruwel ko yungi n’ey e yima yog ni yad girdien e tabinaw nu Bethel. Yad bod reb e tabinaw ni yad ma par u taabang, ma yad ma maruwel, ma yad ma abich, ma yad ma fil e Bible u taabang.—Psalm 133:1.

Bangi ban’en ni yugu ba thil ni girdi’ riy e yad ma rin’ boch e maruwel ni yad e kar ognaged yad ngay. Gubin e Bethel u ga’ngin yang e fayleng ni bay e pumoon nge ppin riy ni yad ba yul’yul’ ko n’en nib m’agan’ Got ngay, ma yad ma rin’ e pi n’en ni bay rogon nga Gil’ilungun u polo’ e tayim rorad. (Matthew 6:33) Dariy bagayad ni yima pi’ puluwon, machane bay e gin ni yad ma par riy. Bay buchuuw e salpiy ni yima pi’ ngorad ni ngar fanayed ko tin nib t’uf rorad. Gubin e girdi’ u Bethel ma bay e maruwel rorad. Boch i yad e ma maruwel u ofis, ma boch i yad e ma maruwel u taang. Maku boch i yad e ma maruwel ko gin ni yima fal’eg e babyor riy, ma boch i yad e ma klin, ma boch i yad e ma malukmad, ma boch i yad e ma fal’eg e yungi n’en ni ke kireb ko naun.

Bang ni boor e maruwel ni yibe rin’ riy ni bay rogon ko machib. N’en ni be nameg gubin e Bethel e nge taw e tin riyul’ u Bible ngak urngin mit e girdi’. Re ke babyor ney e bang ko re maruwel nem. Fare Ulung ni Ma Pow’iyey e ke yarmiy rogon ni ngan fal’eg e re ke babyor ney, min pi’ u computer nga boor ko raay e ulung ni yad ma piliyeg e babyor u ga’ngin yang e fayleng, min pi’ nga Bethel ni ngan printnag, me tomur riy min sulweg ko gubin e ulung u ga’ngin yang u fayleng ni ke pag 110,000 u gubin. Ere, girdi’ ni yad ma maruwel u Bethel e yad ma pi’ e ayuw ko re maruwel ney ni ngan machibnag fare thin nib fel’ nib t’uf ni nge nang gubin e girdi’.—Mark 13:10.

Chon mini’ e yad ma maruwel u Bethel, ma uw rogon ni yima ayuwegrad?
Mang fare maruwel nib ga’ fan ni yibe pi’ e ayuw riy u Bethel?