Report Ko Piin Ni Ma Wereg E Thin U Morngaagen Gil’ilungun Got

Ke Yib Angin ni Bochan ni Kan Par nib Yul’Yul’ u Skul

BE gaar e Bible: “I gag e bay gu machibnag gubin e girdi’ rom, mu gu pi’ e fel’ rogon nge gapas ngorad.” (Isaiah 54:13) Fapi thin ni “gubin e girdi’ rom” e bpuluw ko urngin e pi tapigpig rok Got ni yad bay u fayleng, nib muun ngay e piin ni kab bitir. Piin ni gallabthir ko ngiyal’ ney e yad be dugliy ni nge machibnag Jehovah e pi bitir rorad u tabinaw ngu nap’an e muulung ko Kristiano.

Machane, nap’an ni nge un e pi Kristiano ni kab bitir ko skul ma yad ma mada’nag boch e skeng. Baga’ ni thingar ra pired nib mudugil ko pi n’en nu Bible ni kan fil ngorad. Faan yad ra rin’, ma ra fel’ rogorad nge pi sensey rorad, ni bod e pi thin ni baaray ni be weliy u morngaagen ban’en ni buch u Micronesia.

U daken e donguch ni ba achichig u ngal nu Pacific ni kan nog e Tol ngay u Chuuk, ma i yog e pi sensey ngak e pi bitir ni ngar fl’eged rogorad ni ngar uned ko fare madenom ni Halloween ni yira fl’eg u skul. Manang e pi bitir ko Pi Mich Rok Jehovah ni ba l’ag ngay e mad ni yima yon’ nga dakenrad ni bod yaan e thagith, goblin, nge witch​—ma ba m’ag e pi n’en ney ko pig. De pag e nangan’ rorad ni ngar uned ngay.a

Kan fil e Bible ngorad u tabinaw rorad nge nap’an e muulung ko Kristiano, ere kar nanged ni be togopuluw e re madenom ney ku Got, ni yugu aram rogon ni ke mus ni aram e fafel. Ra ngar tamilangnaged e n’en nib mudugil u wan’rad ngak e sensey rorad, mar pininged Barak, ni ir reb e missionary ko Pi Mich Rok Jehovah, ni nge non ngak e pi sensey u skul.

Tomren ni ke rung’ag e pi sensey e pi n’en ni ke weliy Barak, kar yarmiyed rogon ni nge weliy Barak e pi thin nem ngak urngin e sensey nge ga’ ko skul. Nap’an e re muulung ney, me tamilangnag Barak e tin ni riyul’ u morngaagen Halloween. Ke weliy boch e thin ni bay u lan e pi babyor ni ma ngongliy e Watch Tower Society nge yugu boch e babyor. Ke gin e pi tayugang ko skul nge pi sensey ko pi n’en ni kan fil ngorad u morngaagen tapgin e Halloween, nge rogon ni ba m’ag e liyor riy. Ke dugliy e pi tayugang ko skul ni ngar puruygad.

Boch e rran nga tomuren, kan weliy e n’en ni kar turguyed ngak e girdi’. Dabra fl’eged rogon e Halloween, ya kan taleg urngin e maruwel ni ba l’ag ngay. Dabi madenomnag e skul e Halloween ko binem e duw. Uw fene fel’ angin ni ke yib ko pi bitir ko Pi Mich Rok Jehovah ya kar pired nib mudugil ni ngar rin’ed e tin nib mat’aw u skul! Susun ni nge dabi rus ara tamra e bitir ni nge yul’yul’ ko tin nriyul’ u Bible.

Ma fil e Pi Mich Rok Jehovah ngak e bitir rorad ni ngar maruwelgad nib el mirin u skul u gubin yang u fayleng. Yibe fil ngak e pi bitir ko Pi Mich Rok Jehovah ni ngar folgad ko kenggin e motochiyel nu Bible mar wereged e athap rorad nge pi n’en ni ke mich u wan’rad ngak yugu boch e bitir u rogon ni rayog rorad. Ni mus ko ngiyal’ nra yib angin ara dabi yib angin ni bod ni buch ko biney, ma rayog ni nge par e pi bitir ni be mudugilan’rad ya yad be rin’ e tin nib mat’aw. Ma bin kab baga’ fan riy e rayog ni ngar nanged ni be felan’ e Chitamangirad nu tharmiy ngorad ma ra fl’aabnagrad ya kar yul’yul’gad ni ngar folgad rok.

[Boch e Thin nra Tamilangnag Murung’agen]