Fare Thin Riyul’ u Morngaagen e Infierno
REB e report ko fare Church of England doctrine commission e be weliy riy ni infierno e gathi gin ni bay e nifiy riy; ya aram ban’en ni be yip’ fan ni dakuriy ban’en. Be weliy fare report ni gaar: “Bay boor fan ni kan thiliyeg e re n’ey. Ma bin th’abi ga’ fan riy e bochan ni boor e girdi’ ko Kristiano nge girdi’ ni gathi yad e Kristiano e yad be togopuluw ko machib ni ma k’aring e marus ko girdi’, maku yibe tamilangnag iyan u wan’uy ni ba mit e Got ni ma gechignag e girdi’ ndariy n’umngin nap’an e ba palog nga orel ko t’ufeg rok Got ni dag Kristus.”
Ma gathi ke mus ni fare Galesiya nu England e daki fel’ u wan’rad e n’en ni un lemnag u morngaagen e infierno faram. Ya girdi’ ko pi yuraba’ i teliw e ke mo’maw rorad ni ngar liyorgad ngak ba mit e Got ni ma urfeg e girdi’. Jackson Carroll ni ir e professor ko teliw nge society u University nu Duke ko skul ko Divinity e begaar: “Ba adag e girdi’ ba Got ni ba gol ma ra k’aringem ni ga ra adag ni ngam gumuchmuchnag. Ba math keru’ ko lem ko ngiyal’ ney ni ngan weliy u morngaagen e denen nge guilt.”
Ke n’uw nap’an faram ni weliy e Pi Mich Rok Jehovah e n’en ni yog e Bible ni infierno e low ko yam’ ko girdi’—ma gathi bang ni yira gafgownagey riy u fithik’ e nifiy. Ma arrogon ni yad ma yog ni gathi bochan ni aram rogon ni ba adag e girdi’ ko ngiyal’ ney ya bochan ni be yog e Bible ni gaar: “Ma piin ni kar m’ad e dariy e chi n’en ni yad manang . . . Dariy e maruwel ma dariy e tafinay ma dariy e llowan’ ma dariy e gonop u Sheol [“infierno,” Catholic Douay Version].”—Eklesiastes 9:5, 10.
Kari tamilang ko uw rarogon e yam’, ma nap’an e 1896 me yoloy Charles Taze Russell ni ir e bin som’on e president ko fare Watch Tower Society ni gaar: “Dariy bang [u lan e Bible] ni be weliy u morngaagen e gechig ni un tay ni manemus ni bod ni yibe machibnag ko creeds nge babyoren e tang, nge welthin ko teliw. Machane be weliy u morngaagen e ‘infierno,’ sheol, hades, ni aram e n’en ni kan turguy ko girdi’ ni bochan e denen rok Adam, ma yam’ ni tay Somol rodad e ke biyuliydad riy; ma ‘infierno’ e low ko yam’—ni aram rarogon e yam’.”
Ere pag reb e chibog ni be weliy e Pi Mich Rok Jehovah e thin riyul’ u morngaagen e infierno.
[Sasing ko page 31]
Charles T. Russell