Mini’ e Be Gagiyeg?

“MINI’ e be gagiyegnag e fayleng?” Faanra fithem be’ ko re deer nem ma uw rogon ni ga ra fulweg? Boor e girdi’ ni ma un nga baraba’ i teliw e ra fulweg ni “Got” ara “Jesus.” Reb e thin u lan e shimbung nu Bahamian ni The Freeport News, e ke pi’ e fulweg ni ra gin e girdi’ ngay.

Facha’ ni yoloy e re thin nem e ke gaar: “Kug pirieg reb e tract u langan e mab rog. Baga’ ni da gur ma bieg e pi babyor ni aram rogon, machane yay nem ma kug turguy ni nggu bieg. Ma kenggin e thin ko re ke babyor nem e ‘Mini’ e Riyul’ ni be Gagiyeg u Fayleng?’” Ma ke poy e re ppin nem e re ke babyor nem ni bay e thin ko Bible riy, ma aram me fil ni en ni be gagiyegnag e fayleng e gathi Got ara Jesus ya Satan ni Moonyan’.​—John 12:31; 14:30; 16:11; 1 John 5:19.

Be weliy fare tract ni gaar: “Amu lemnag rogon e cham e chiney ni gowa be cham e gamanman ni maloboch. Ke fanay e girdi’ fapi talin e cham ni gas chambers, concentration camps, flamethrowers, napalm bombs, nge ku boch ni yima thang e fan ngay ni dakuriy buchuw e runguy riy ngak e girdi’. . . . Mang e be towasariy e girdi’ ko pi ngongol ney ni aray rogon feni kireb? Ka’ yib ngan’um bayay ni gowa bay ba gelngin u bang ni dab ni guy ni be suruy e girdi’ ni yad be ngongol ni aray rogon fa?” Yira gin ngay ni be yog e Bible ni Satan “e ir fare got ko re m’ag ney” fa?​—2 Korinth 4:4.

Bay e falfalan’ riy ya ke chugur ngalan’ ni nge chuw Satan nge pi chonggin. “Fayleng e goo ra chuw ma an ni ra rin’ e tin ba m’agan’ Got ngay e ra magay.” (1 John 2:17) Arrogon, be micheg e Bible ni piin ni ma rin’ e tin nib m’agan’ Got ngay e bay e athap rorad ko par ni dariy n’umngin nap’an u lan e fayleng nib biech mab mat’aw. (Psalm 37:9-11; 2 Peter 3:13; Revelation 21:3, 4) Ri ra puf laniyan’ e girdi’ ya Satan nge pi moonyan’ rok e dabkura suweyed laniyan’ e girdi’!

Tomren ni ke poy e pi thin ko re gi tract nem me weliy fa en ni ke yoloy e thin ko fare The Freeport News ni gaar: “Kari gu falfalan’ ni kug poy e re gi tract nem . . .  ya ku gag e ke maga’fan’ug ni bochan rarogon e fayleng nib kireb, nge bochan en ni be gagiyegnag.”