Mang Fan Ni Kari Kireb E Ngiyal’ Ney?

FAAN ga ra par nga but’ ni ngam bieg e simbung ara ngam guy e news ko tv ara ngam motoyil ko news ko radio, gathi ga manang ni ga ra rung’ag boch ban’en nib kireb ni be buch? Sana dabmu gin ni nge tamilang u wan’um ni ka bay e mahl u ba yang, ni cham ni be garer iyan, ara bay e uyungol u ba nam ndawori fel’ rogon.

Faanra ba orel e gin ni be buch e pi n’en nem riy nga tafenam, ma baga’ ni dabi magafan’um ko pi report nem. Mini’ e rayog ni nge taganan’ ko urngin e girdi’ ni pire’ ni yad be gafgow. Machane, rib mo’maw’ ni ngad pared ndabi taganan’dad ko ngiyal’ ni ra tamilang u wan’dad e girdi’ nib l’ag ko gafgow. Ya ba thil ni ngam bieg e thin u morngaagen e mahl nge report ko in e girdi’ ni ke yim’, ko ngiyal’ ni ngam bieg morngaagen Adnan, ni ir reb e pagal ni mereb e duw rok u Bosnia ni ke yim’ e chitiningin ko ngiyal’ ni ke chub reb e donmach me gothey e naun rorad. Ma in e pul nga tomren ma kan boyochnag e chitamangin Adnan ko ngiyal’ ni yow be yan u taabang u kanawo’. Ma in e wik nga tomren me yim’ walagen ya ke map rachaen nga but’ u tomren ni ke chub e gapung u lan e yoror u skul. Pi togta ni kar tafalaynaged laniyan’ Adnan e kar pirieged ni dariy e naab riy, ma de taganan’ ngay​—ni mus ndariy fan u wan’ ma dariy ban’en u wan’ ni baadag ni nge nang ko mang e ke buch. Baga’ ni ma od ko tamdag ya ra sul e tin kireb ni ke buch nga laniyan’; dabiyog ni nge mol ni bochan e lik’ay rok ni be tamdag ngay. Adnan e gathi ba namba. I ir reb e bitir ni be gafgow; dabiyog ni ngad paged ni dabi taganan’dad ngak.

Ere ku aram rogon e pi magawon ni bay u fayleng. Ba thil ni ngam bieg morngaagen e uyungol; ko ngiyal’ ni ngam guy e sasing ni bay reb e buliyel ni lal e duw rok ni ke sug e yal rok mab siliklik ay, ni ke chugur ni nge yim’ ko bilig. Ba thil ni ngam bieg ko in e wodmeng ni ke buch u bang; ko ngam rung’ag ni kan pirdiiy reb e ppin nib pillibthir ni ke yim’ e en ni figirngin, min iring e chugum rok, min towasariy ngan kol u fithik’ e yargel. Ba thil ni ngam bieg morngaagen e tabinaw ni be war iyan; ni nge tamilang u wan’um ni ke n’igin reb e matin ni nge yim’ e bitir rok ko bilig me li’rad u fithik’ e yargel.

Ba amith ni ngan bieg morngaagen e pi n’en nem. Machane kab gel e amith riy ni faanra gab l’ag nga reb e pi gafgow nem! Faanra kam gafgow ni aram rogon, ma rayog ni nge gafgownagem ko ngiyal’ ni ngam rung’ag e news ko pi n’en ni be buch u fayleng iyan. Ra yib e tamdag ngom ko ngiyal’ ni ra tamilang ni kari gel ni ke yoor iyan e gafgow ko bugel, mahl, uyungol, nge liliy ni ka nap’an kakrom. Ri rayog wenegan nib kireb ko ngiyal’ ni ngan k’adan’uy ko pi n’en ni be buch ko re 20 e chibog ney​—ya baga’ ni be par laniyan’ e girdi’ nib maathukthuk, ma be rus, ma ke mulan’.

Be gay e girdi’ ko teliw e fulweg ko pi deer ni be magawonnag lanin’rad ni bod ni, Mang fan ni kari kireb e ngiyal’ ney? Mang e ra buch ko girdi’ nu fayleng?

Baga’ ni der ma pi’ e teliw e fulweg nra ayuweg e girdi’. Nap’an e ngiyal’ ni som’on ni kam guy e deer ni bay u keru’ e re magazine ney, ma sana de mudugilan’um ngay​—ya aram rogon ni ma par e girdi’. Piin ni fundamentalist ko teliw e yad ma towasariy ban’en ndariy u Bible​—ni aram e rran nge awa nra m’ug e tomur ko re fayleng ney. (Mu guy e Matthew 24:36.) Baadag e piin ni kar yoloyed e thin ko re ke babyor ney ni nge tamilangnag e Bible e n’en ni bay riy. Sana kam gin ko ngiyal’ ni kam fil ni be weliy e Bible ni ba riyul’ e tin tomren e rran ma bpuluw nga laniyan’um. Gathi ke mus ni ma weliy e Bible fan ni kari kireb e ngiyal’ ney. Ya ku ma pi’ e athap ko tin ni bay yib nga m’on, ma aram ban’en ni ri rayog ni nge fl’eg lanin’uy. Yibe piningem ni ngam bieg e pi thin ni migid ni ngam guy ko uw rogon.

[Credit Line]

Jobard/Sipa Press