Bin Dalip e Deer: Mang Fan ni Ke Pageg Got ni Nggu Gafgow?

CHITAMANGIN Ian e be’ nib ta chingaw. Yugu aram rogon nib gaman e tin nib t’uf ko par rok Ian, machane ba kireb e numon u thilrow e chitamangin. I yog ni gaar: “Gathi rib t’uf e chitamag rog ya ir be’ nib ta chingaw ma ma gafgownag e chitinag.” Ma nap’an ni ilal Ian, me tabab ni nge lemnag ko riyul’ ni bay Got fa danga’. Me lemnag u wan’ ni gaar, “‘Faanra riyul’ ni bay Got,’ ma ‘mang fan ni be pag e girdi’ ni ngar gafgowgad?’”

Mang fan ni ngan fith e re deer ney? Yugu aram rogon ni sana de yoor e magawon rom, ma dabisiy nra kireb lanin’um u nap’an ni ga ra guy e girdi’ ndariy ban’en ni kar bucheged ni yibe gafgownagrad. Ma re n’ey e ra gelnag e kireban’ rom, ni faanra ke buch boch ban’en rom ni bod rogon Ian ni kan weliy murung’agen ko som’on ara ke buch rok be’ nib t’uf rom.

Mang e ma yog boch e girdi’ u murung’agen e re n’ey? Boor e girdi’ ni yad ma lemnag ni ma pag Got e girdi’ ni ngar gafgowgad, ya nge fil ngorad rogon ni ngar sobut’niged lanin’rad, mar daged e runguy ngak boch e girdi’. Maku bay e piin ni yad ma lemnag ni gafgow ni ma yib ngodad e wenegan e kireb ni ud rin’ed kafram.

Mang e be tamilangnag e pi fulweg ney? Got e dariy fan e gafgow ko girdi’ u wan’, mab mo’maw’ rodad ni ngad t’ufeged, ya der ma runguydad.

Mang e be fil e Bible? Ke tamilangnag e Bible ni Got e gathi ir tapgin e gafgow ni ma yib ngodad. Be yog ni gaar: “Faanra yib e mit nem e skeng ngak be’ nrayog ni nge waliy faanem nge denen, ma thingari dabi gaar u laniyan’, “Re n’ey ni be n’en ni nge waliyeg nggu denen e yib rok Got.” (James 1:13) Ya n’en ni ma yog boch e girdi’ ni Got e ir tapgin e gafgow rodad e de puluw nga rogon ni be weliy e Bible pi fel’ngin Got. Ni uw rogon?

Fel’ngin Got nib lingagil e aram e t’ufeg. (1 John 4:8) Thin nu Bible e be taarebrogonnag Got ngak reb e matin ni bay e bitir rok ni kabran ya nge tamilangnag e re n’ey. Ere, ke fith Got ni gaar: “Gur rayog rok be’ ni ppin ni nge pag talin fak ni kabran ma dabi t’uf rok e re tir nem ni ir e gargeleg?” Miki yog ni gaar: “Gomanga ra pag be’ ni ppin talin fak, machane gag e dab gu pag talimed.” (Isaiah 49:15) Ere gur, rayog ni ngam susunnag reb a matin ni ma t’ufeg e bitir rok ni nge gafgownag e bitir rok ni lem rok? Susun ndabiyog, ya ra ayuweg fare tir ni be gafgow ya bochan ni be runguy. Ere, taareb rogon ngak Got ni dabi k’aring e gafgow ni nge yib ngak e piin ndariy ban’en ni kar bucheged.—Genesis 18:25.

Machane, ku be gafgow e piin ndariy ban’en ni kar bucheged. Ere, sana ga ra lemnag ni, ‘Faanra ma runguydad Got mab gel gelngin, ma mang fan ni dabi chuweg e pi n’en ni ma k’aring e gafgow ngodad?’

Bay fan ni be pag Got e gafgow ni nge ulul e ngiyal’ ney. Mu lemnag reb i fan. Ba ga’ ni girdi’ e yad ma k’aring e gafgow ngak boch e girdi’. Ma piin ni yad ma gafgownag e girdi’ e dubrad ni ngar thilyeged e ngongol rorad. Ere, faanra nge taleg Got tapgin e kireb ni be buch, ma thingari thang e pi girdi’ ney.

Rogon ni be tamilangnag apostal Peter fan ndawori thang Got e piin nib kireb e yoloy ni gaar: “Dawori sowath Somol ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Be gum’an’ Jehovah Got u puluwdad ni bochan ni gad ba t’uf rok ma be runguydad.

Ma dabki n’uw nap’an ma ra rin’ Jehovah Got e tin nib mat’aw. Ni aram e “bayi fek e gafgow nga daken e piin ni yad be gafgownagmed.” Piin ni yad be k’aring e gafgow e yad ra ‘gafgow ko gechig ni ngan pi’ ngorad ni aram e gafgow ni ngar tiyed ndariy n’umngin nap’an.’—2 Thessalonika 1:6-9.

Faanra ga baadag ni ngam nang boch murung’agen fan ni be pag Got e gafgow, nge n’en nra rin’, mag guy e guruy ni 11 ko fare ke babyor ni Mang e ri Be Fil e Bible? Maku rayog ni ngam downloadnag ko www.jw.org

[Kahol ko page 9]

Mang e Yog Jesus u Murung’agen e Gafgow?

De yog Jesus ni Got e ir tapgin e gafgow ni be buch e ngiyal’ nem ni immoy riy. Machane, baaray e n’en ni rin’.

Ke dag Jesus ni Got e der ma gechignag e piin ndariy ban’en ni kar bucheged u daken e gafgow ni ma yib ngorad. Ya i golnag e piin nib m’ar, nge piin nib mugutgut, nge piin nib malmit. (Matthew 15:30) Bay l’agruw i ban’en nrayog ni ngad filed u daken e pi maang’ang ni ngongliy Jesus. Bin som’on e, i fanay Jesus gelngin Got ni nge baudeg e gafgow ko girdi’. Ma bin migid e, i golnag e girdi’ ni bochan ni be runguyrad. Aram fan ni nap’an ni guy e girdi’ ni yad be gafgow me “kireban’” ngorad. (Matthew 20:29-34) U daken e pi n’en ni rin’, ma i tamilangnag rogon e lem ko Chitamangin u murung’agen e gafgow ni be tay e girdi’. Ere, u daken e ngongol nge thin rok, ma rayog ni ngad filed ni ma kireban’ Got ko pi gafgow ni ma guy, ma baadag ni nge chuweg.—John 14:7, 9.

Ke tamilangnag Jesus ni Satan ni Moonyan’ e riyul’ ni ir e en ni be k’aring e gafgow ko girdi’. I yog ni gaar: “Ka nap’an ko tabolngin ni i par ni ir be’ ni ma thang e fan rok e girdi’.” (John 8:44) I weliy Jesus murung’agen Satan ni Moonyan’ ni “ir e be gagiyegnag e girdi’ nu fayleng” maku ir “faanem ni bannag e girdi’ nu fayleng ni polo’.”—John 12:31; Revelation 12:9.

Ke pi’ Jesus e athap ngodad u murung’agen ba ngiyal’ nra m’ay gubin mit e gafgow. I fil ngak pi gachalpen rogon ni ngar meybilgad ni gaar: ‘Chitamangimad ni ga bay u tharmiy, . . . ngan rin’ e tin nib m’agan’um ngay u roy u but’ ni bod rogon ni yibe rin’ u tharmiy.’ (Matthew 6:9, 10) Nap’an nra yib Gil’ilungun Got, ma ra m’ay e gafgow u fayleng ni bod rogon u tharmiy.

U daken e thin ni yog Jesus ngak apostal John, me weliy rogon e yafas rok e piin ni yad ra par u tan e gagiyeg rok Got. Ngiyal’ nem ma “bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”—Revelation 1:1; 21:3, 4.