Ra Fel’ Rogodad ko K’adan’ ko Gafgow

“Gadad be yog ni kar felan’gad ni bochan e ra k’adedan’rad.”​—JAMES 5:11.

1, 2. Mang e be dag ni de m’agan’ Got ngay ni nge gafgow e girdi’?

DARIY be’ ni baadag ni nge gafgow; maku dabun e En ni Sunmiydad, ni Jehovah Got, ni nge gafgow e girdi’. Rayog ni ngada guyed e re n’ey u nap’an ni gad ra fal’eg i guy e Thin rok ni ke yiiynag ma gad guy e n’en ni buch u tomuren ni sunmiy e pumoon nge ppin. Som’on, me ngongliy fare pumoon. “Me fek Somol ni Got boch e but’ nge ngongliy ba girdi’ riy; me pag athon l’ugun ni ma pi’ e yafos nga lan p’ethungun, me fos fare girdi’.” (Genesis 2:7) Adam e immoy ni ba flont downgin nge laniyan’, ma dabi m’ar ara yim’.

² Ma uw ra rogon e par rok Adam? “Yung Somol ni Got bangi woldug u lan yu Eden, ni ba’ ko ngek, me yan i ta’ faanem ni ke ngongliy ngaram. Me gagiyegnag urngin mit e gek’iy nge tugul nib fel’ yaan ma be k’uf nib fel’ wom’engin.” (Genesis 2:8, 9) Arrogon, Adam e immoy e tabinaw rok nib fel’. Dariy e gafgow u Eden.

3. Mange athap rok fa gal ni som’on e girdi’?

³ Genesis 2:18 e yog ngodad ni gaar: “Me gaar Somol ni Got, ‘De fel’ ni nge par fare moon ni goo ir. Bay gu ngongliy be’ ni nge chag ngak ngi i ayuweg.’” Me tabab Jehovah nge sunmiy leengin Adam nib flont, ma aram me yog e athap ko tabinaw ni felfelan’. (Genesis 2:21-23) Mi ki yog e Bible ngodad ni gaar: “Me tow’athnagrow ko re bugithin ni baaray ni yog ni gaar, ‘Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.’” (Genesis 1:28) Fa gal ni som’on e girdi’ e rayog ni ngeb mat’awrow ni ngar ga’nagew e Paradis nu Eden nge taw ko ngiyal’ ni ke gaman u fayleng ke mang ba fayleng nib paradis. Ma ra yib fakrow nib felfelan’, ni dab ur gafgowgad. I tabab ko som’on ni rib fel’!​—Genesis 1:31.

I Tabab e Gafgow

4. Rogon ni bay ko chep e, mange ba gagiyel u murung’agen e girdi’?

⁴ Machane, nap’an ni gad ra sap nga rarogon e tabinaw ko girdi’ ni ka nap’an e chep i yib, ma ba gagiyel ni ke buch ban’en ni rib kireb. Tin ni kireb ni ke buch, e kari gafgownag e tabinaw ko girdi’. U lan bokum miriay e duw, ma urngin pi fak Adam nge Efa e yad be m’ar, ma yad be pilibthir, me munmun mar m’ad. Fayleng e kari palog ko nge mang paradis nib sug ko girdi’ nib felfelan’. Rarogon e re n’em e rib puluw ni kan weliy ko Roma 8:22 ni gaar: “Urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.”

5. Uw rogon nib muun e gal ga’ rodad ni som’on i pi’ e gafgow nga lan e tabinaw ko girdi’?

⁵ Dab nog e kireb ngak Jehovah ko pi gafgow nib gel ni ke par nib n’uw nap’an. (2 Samuel 22:31) Bang e kireb riy e thingar ni tay nga daken e girdi’. “Kar ngongliyed bogi ban’en nrib gel e kireb riy.” (Psalm 14:1) Gal ga’ rodad e ni pi’ urngin ban’en nib fel’ ni ngar tababgow riy. Kemus ni n’en ni ba t’uf ko re n’em ni nge ul’ul i yan e ngan fol rok Got, machane Adam nge Efa e kar mel’egew ni ngar pirew ni yow ba dar rok Jehovah. Ka nap’an e gal ga’ rodad ni som’on nra chuwgow rok Jehovah, ma da kur pirew ni yow ba flont. U ra meewargow i yan nge taw ko ngiyal’ ni taw e yam’ ngorow. Ere ke af ngodad e yafas nde flont.​—Genesis 3:17-19; Roma 5:12.

6. Mange rin’ Satan nga rogon i tababnag e gafgow?

⁶ Maku aram ko som’on ko urngin e gafgow nib muun fare kan ngay ni mang Satan ni fare Moonyan’. Ni pi’ mat’awun nrayog ni nge mel’eg ban’en. Machane, me kirebnag i fanay e re mat’awun nem ni i guy rogon ni nge yog ni ngaun liyor ngak. Machane, goo Jehovah e thingar un liyor ngak, ma gathi pi n’en ni ke sunmiy. I Satan e ir e waliy Adam nge Efa ni nga ra gayew rogon ni ngar chuwgow u tan pa’ Jehovah, ni faan gowa ra aram rogon ma rayog ni ngar “bodew Got ngar nangew e n’en nib fel’ nge n’en nib kireb.”​—Genesis 3:5.

Yigoo Jehovah e Bay Mat’awun ni Nge Gagiyeg

7. Mange be dag angin e togopluw ni yibe ta’ ngak Jehovah?

⁷ Angin e togopluw nib kireb e be dag ni kemus ni Jehovah faen ni th’abi Tolang u Palpalth’ib, e bay mat’awun ni nge gagiyeg ma kemus ni gagiyeg rok e ba mat’aw. Fa bokum biyu’ i duw ni ke yan e ke dag ni Satan, ni ke mang “ani be gagiyegnag e girdi’ nu fayleng,” e ke sunmiy ba gagiyeg nib kireb ma de mat’aw, ma ba gel e maangach riy ni ri dabi fel’ rogon. (John 12:31) Fare gagiyeg ni be tay e girdi’ ni ke n’uw nap’an u tan pa’ Satan ma boor e gafgow riy e ke dag ndariy gelngirad ni ngar gagiyeggad nib mat’aw. (Jeremiah 10:23) Ere urngin mit e gagiyeg nrayog ni nge lemnag e girdi’ ni dariy u tan pa’ Jehovah e ri dabi fel’. Ke micheg e chep e re n’ey.

8. Mange ba m’agan’ Jehovah ngay ni fan nga urngin mit e gagiyeg ko girdi’, ma uw rogon nra lebug e n’en nib m’agan’ ngay?

⁸ Chiney ni ke pag Jehovah bokum biyu’ e duw ni nge fanay e girdi’ urngin mit e gagiyeg ndariy e ayuw rok riy, e ke puluw ni nge chuweg urngin e pi gagiyeg ney u fayleng nge tay e birok e am nga luwan. Reb e yiiy u murung’agen e re n’ey e gaar: “Ngiyal’ ni bay i gagiyeg e pi pilung nem [gagiyeg ko girdi’], e aram e bayi sunumeg Got nu tharmiy reb e gagiyeg [am rok nu tharmiy u pa’ Kristus] ndariy e rofen nra mus. . . . bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.” (Daniel 2:44) Gagiyeg ku moonyan’ nge girdi’ e bayi m’ay, ma kemus ni Gagiyeg rok Got nu tharmiy e bayi par nge gagiyegnag e fayleng. Kristus e ra mang Pilung riy, ma piin ni yad ra un ngak e fare 144,000 e girdi’ ni kan fekrad u fayleng.​—Revelation 14:1.

Fel’ Rogon ni Yib ko Gafgow

9, 10. Uw rogon ni keb fel’ngin ngak Jesus e pi n’en ni i gafgow riy?

⁹ Ba ga’ fan ni ngan fal’eg i guy fel’ngin e piin ni yad ra gagiyeg ko fare Am nu tharmiy. Som’on, e Kristus Jesus e ke dag feni rayog rok ni nge mang Pilung. Ke n’uw nap’an ni ki i par u tooben Jehovah ni i rin’ e tin nib m’agan’ e Chitamangin ngay, ma tamaruwel Rok nib “salap i maruweliy ban’en.” (Proverbs 8:22-31) Ma nap’an ni maruweliy Jehovah ni nge yib nga fayleng, me m’agan’ Jesus ngay me fol riy. U fayleng e i tiyan’ nga i weliy ko girdi’ murung’agen feni tolang Jehovah nge gagiyeg rok. I dag Jesus reb e ngongol nib fel’ ni fan ngodad ni aram e i par nib sobut’an’ u tan e gagiyeg rok Got.​—Matthew 4:17; 6:9.

¹⁰ I mada’nag Jesus e gafgow, ngemu’ min li’ ngem’. Nap’an ni be machib, me yog ni guy e rarogon e girdi’ u tooben i yan nib gel e kireban’ riy. Bay fel’ngin ngak ni ke guy e re n’em nge gafgow ni ke tay fa? Bay. Hebrews 5:8 e gaar: “Yugu aram rogon ni ir Fak [Got], machane u daken e gafgow ni i tay e fil rogon riy ni ngi i fol rok Got.” Pi n’en ni buch rok Jesus u nap’an ni immoy u fayleng e gel boch i nang fan ban’en rok nge runguy rok. I nang fan nib fel’ rogon rarogon e tabinaw ko girdi’. I kireban’ ngak e piin ni yad be gafgow me fel’ rogon u wan’ e maruwel rok ni ke yib ni nge ayuwegrad. Mu guy rogon ni fal’eg apostal Paul i weliy e re n’ey ko fare babyor ni Hebrews ni gaar: “Fan e re bugithin ney e nge yib i ngal’ ni bod pi walagen u urngin rarogorad, ni fan e nge yog ni mang e prist rorad nib th’abi tolang ni ma runguyrad ma ba yul’yul’ ko pigpig rok ngak Got ni fan e nge yog ni n’ag Got fan e denen rok e girdi’. Ere chiney e rayog ni nge ayuweg e piin ni ke yib ngorad e n’en ni ma waliy e girdi’ nge denen, yi ir ma ki yib ngak e n’en ni ma waliy e girdi’ nge denen, ma ki un ko gafgow. Re prist rodad nem nib th’abi tolang e gathi reb e prist ndabi kireban’ ngodad nga fadad meewar.” “Ya re prist rodad nem nib th’abi tolang e yib ngak urngin kanawoen e pi n’en ni ma waliy e girdi’ nge denen ni bod gadad, machane de denen. Ere nge dab kud tamdaggad ngad bad nga tagil’ Got, ko gin ni bay e ayuw riy. Ya ereram e gin ni yira runguydad riy min ayuwegdad ko ngiyal’ ndabi siy ni ngar ni ayuwegdad.”​—Hebrews 2:17, 18; 4:14-16; Matthew 9:36; 11:28-30.

11. Uw rogon ni pi n’en ni buch u fayleng ngak e piin ni ngar manged pilung nge prist gabul nge langlath e ke fel’ rogorad riy ni ngar manged pilung?

¹¹ Ku ba ga’ ni rayog ni nga nog fare 144,000, ni aram rogon ni fa piin “kan biyuliyrad” u fayleng ni ngar uned ngak Jesus Kristus ko Gagiyeg u tharmiy. (Revelation 14:4) Yad gubin nni gargelegrad ni bod e girdi’ nu fayleng ngar ilalgad u ba fayleng nib liyeg e gafgow, ma ku ur gafgowgad. Boor i yad e ku uni gafgownag ma boch i yad e ni li’ ngem’ nbochan ni ur pired ni yad be yul’yul’ ngak Jehovah ma yad baadag ni ngar leked Jesus. Ma ‘dar tamra’gad ni ngar machibnaged murung’agen e Somol rorad, mar uned ko gafgow nib kireb nbochan fare thin nib fel’.’ (2 Timothy 1:8) N’en ni i buch rorad u fayleng e aram e n’en ni bung rogorad riy ni nge yog rorad ni ngar dugliyed u tharmiy rogon e tabinaw ko girdi’. Kar filed ni nge gel boch e runguy, nge gol rorad, ma kar adaged ni nga ra ayuweged e girdi’.​—Revelation 5:10; 14:2-5; 20:6.

Felfelan’ ko Piin Athap Rorad e Par u Fayleng

12, 13. Uw rogon ma piin ni athap rorad e par u fayleng e ra fel’ rogorad ko gafgow?

¹² Rayog ni sunumiy e pi gafgow ni bay e chiney ban’en nib fel’ u fithik’ i laniyan’ e piin ni athap rorad e par u paradis u fayleng ni manemus ndariy e m’ar, nge kireban’, nge yam’ riy fa? Amith nge kireban’ ni gafgow e ma fek i yib e gathi bogi n’en ni yira adag. Machane faan gad ra k’adan’dad ko pi gafgow nem, ma fel’ngin nib fel’ e rayog ni gel me sum e felfelan’.

¹³ Mu lemnag e n’en ni yiiynag e Thin rok Got u murung’agen e re n’ey ni gaar: “Faanra ngam gafgowgad ni fan e gimed be rin’ e tin nib mat’aw, ma ri gimed ra felfelan’!” “Mu felfelan’gad ni faanra nog e thin nib kireb ngomed ni fan e gimed girdien Kristus.” (1 Peter 3:14; 4:14) “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni ba ga’ ni fan ngomed ni kan tay u tharmiy.” (Matthew 5:11, 12) “Ba felan’ e en nra par nib yul’yul’ ngak Got ko ngiyal’ ni be yib e tin nib mo’maw’ riy ngak, ni aram e yibe skengnag; ya ra athamgil ndabi mul ko re skeng nem ma yira pi’ e yafos ngak.”​—James 1:12.

14. Mange n’en u murung’agen e gafgow ni ma felfelan’nag e pi tapigpig rok Jehovah?

¹⁴ Ba mudugil ni gathi pi gafgow ni gad be yan u fithik’ e ir e be felfelan’nagdad. Ya fare felfelan’ nge fare fel’ laniyan’ ni ma yib ko gadad manang ni gadad be gafgow nbochan e gadad be rin’ e tin nib m’agan’ Jehovah ngay ma gad be lek e n’en ni i rin’ Jesus. Ni bod rogon u lan e bin som’on e chibog, ni u nin’ nga kalbus boch fapi apostal mu uni fekrad i yan ko bin ga’ e kourt rok piyu Jew nga u non nib togopluw ngorad nbochan e yad be machibnag murung’agen Jesus Kristus. Min toyrad nib gel min pagrad. Mange ra rin’ed? Thin nu Bible e be yog ni “yan fapi apostal ngar chuwgad ko fare ulung, ni kar felfelan’gad ni bochan e ke tafinaynag Got ni ba’ rogorad ni ngar gafgowgad ni fan nga fithingan.” (Acts 5:17-41) Kar felfelan’gad ni gathi bochan angin e dimow nge amith ni kar ted, ya bochan nib tamilang u wan’rad ni ke buch e re n’ey nbochan e kar pared ni yad be yul’yul’ ngak Jehovah ma yad be lek luwan ay Jesus.​—Acts 16:25; 2 Korinth 12:10; 1 Pet. 4:13.

15. Uw rogon ma k’adan’ ni gad be tay ko gafgow e chiney e ra yib angin ngodad nga m’on?

¹⁵ Faan gad ra k’adan’ ko togopluw nge gafgow u fithik’ e ngongol ni mat’aw, ma rayog ni nge sunmiy e gum’an’ u fithik’dad. Re n’ey e ra ayuwegdad ngad k’adan’gad ko tin ni bay fini yib e gafgow. Gad ra beeg ni gaar: “Pi walageg ni girdien Kristus! Mu lemniged gimed nib fel’ waathmed ko ngiyal’ nra yib urngin mit e skeng riy ngomed, ya gimed manang ni faanra gelnagmed e michan’ romed ko pi skeng nem ni aram rogon, ma wenegan nra yib ngomed e aram e ke yog romed ni nguum k’adedan’med.” (James 1:2, 3) Ku aram rogon ni be yog e Roma 5:3-5 ni gaar: “Gadad ma felfelan’ u fithik’ e tin ni ma yib ngodad ni gadad ma gafgow riy, ya gadad manang ni pi n’ey e ma yognag e k’adan’ ngodad, ma k’adan’ e ma fal’egdad u wan’ Got, ma fel’ u wan’ ni gadad ma tay e ma yognag e l’agan’ ngodad. Re l’agan’ ney e dabi m’ing lanin’dad riy.” Ere ra gel e gum’an’ rodad ko skeng nbochan e gad be lek kanawoen e Kristiano, ma aram e be fel’ rogodad ni nge yog ni ngad gum’an’gad ko tin ni bay ki yib e skeng ko re m’ag ni kireb ney.

Ra Fulweg Jehovah Taban

16. Mange ra rin’ Jehovah ni fan ngak e piin ni yad ra mang pilung nge prist nra fulweg labgen e gafgow ni ur ted?

¹⁶ Yugu ra ke mul e fel’ rogon nu fayleng u pa’dad nbochan e togopuluw ara gafgow ni gad be gafgow riy nbochan ni gad be yul’yul’ ko kanawo’ ko Kristiano, ma rayog ni nge pagan’dad ya gadad manang nra pi’ Jehovah puluwon ngodad ni polo’. Bod rogon, ni boch e piin ni athap rorad e nga ranod nga tharmiy, e yoloy apostal Paul ni gaar: “Mi gimed k’adan’med ko chugum romed ni kan fek, ma gimed ba felfelan’ ngay, ya gimed manang ni ka ba’ ban’en romed ni kab fel’ ngay” ni pilung ko Gagiyeg rok Got. (Hebrews 10:34) Am lemnag fare felfelan’ nra yib ngorad u nap’an ni yad bay u tan gagiyeg rok Jehovah nge Kristus ni yad be un i pi’ e tow’ath nib pag feni fel’ ko piin ni yad be par ko fare fayleng nib beech. Rib riyul’ e thin rok apostal Paul ngak e piin Kristiano nib yul’yul’ ni gaar: “Gu be tafinaynag ni gafgow ni gadad be tay e chiney e dabi chuchugur ni nge taareb rogon ko flaab ni dawor da guyed ma be sonnagdad.”​—Roma 8:18.

17. Mange ra rin’ Jehovah ni fan ngak e piin ni athap rorad e par u fayleng ni yad be yul’yul’ ko pigpig ngak e chiney?

¹⁷ Ku taareb rogon ko tin athap rodad e par u fayleng demtrug ko mang e tin ra mul u pa’rad ara kar paged ni lanin’rad nbochan e pigpig ngak Jehovah, e ku ra tow’athnagrad nib pag urngin ko n’en ra rin’ gabul nge langlath. Ra pi’ ngorad e yafos nib flont ni manemus, u ba paradis u fayleng. U lan e re fayleng nib beech nem, e Jehovah “bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” (Revelation 21:4) Rib fel’ e n’en ni kan micheg! Dariy ban’en nib m’ag u wan’dad ni ngad paged ara dubdad ni ngad paged ko re fayleng ney ni bay e chiney nbochan Jehovah nrayog ni nge taareb rogon ko fare yafas nib pag feni fel’ ni bay yib, ni ir e bayi pi’ ngak e pi tapigpig rok nib yul’yul’ nra k’adan’gad ko gafgow.

18. Mange micheg Jehovah ngodad ko Thin rok nra fal’eg lanin’dad?

¹⁸ Demtrug e gafgow ni ka gad ra gum’an’ riy ma dabiyog ni nge magawonnag e felfelan’ rodad ko yafas ni manemus u lan e fayleng nib beech rok Got. Ya urngin e pi n’em ni bay ni fulweg labgen ni polo’ u feni fel’ rarogon lan e bin ni beech e fayleng. Isaiah 65:17, 18 e be yog ngodad ni gaar: “Ma tin kakrom e ri bay ni pag talin. Ngari mfelfelan’gad ndariy n’umngin nap’an ko pi n’en ni gag e bay gu sunmiy.” Arfan nib puluw ni weliy James ni walagen Jesus ni gaar: “Gadad be yog ni kar felan’gad ni bochan e ra k’adedan’rad.” (James 5:11) Arrogon, faan gad ra yul’yul’ ko k’adan’ ko gafgow e chiney, ma rayog ni yib angin ngodad e chiney nge gabul nge langlath.

Uw Rogon ni Ga Ra Fulweg?

• Uw rogon ni pirieg e girdi’ e gafgow?

• Gafgow e mange pi fel’ngin nra yibnag ngak e piin ngar gagiyeggad nge girdi’ u fayleng?

• Mang fan nrayog ni ngad felfelan’gad e chiney ni yugu aram rogon ni gad be gafgow?

[Picture on page 23]

Gal ni som’on e gal ga’ rodad e immoy e gabul nge langlath u puluwrow ni rib fel’

[Picture on page 25]

Gafgow ni guy Jesus e ayuweg nge fal’eg rogon ni nge mang ba Pilung nge ba Prist nib Tolang ni fel’

[Picture on page 27]

Fapi apostal e ra ‘felan’gad ni kan lemnagrad ni ba ga’ fan ni ngan darifannagrad’ nbochan e michan’ rorad