Gafgow Nge Kireban’ Ni Ke Pag Got Be Buch E Kari Chugur Nga Tomuren
URNGIN YANG ni ga ra changar ngay, ma bay e gafgow nge kireban’ riy. Fare Bible e micheg ngodad ni “Got e t’ufeg.” (1 John 4:8) Ere, mang fan, ni ba Got nib tarunguyey ma ke pag urngin e gafgow be yib ke yan bokum miriay e duw?
Nap’an ni sunmiy Got Adam nge Efa i ta’ nga lanin’row e lem ni puf mat’awun. Ma re n’en nem e ba tawaath ni nib fel’, ma aram “me guy Got urngin e n’en ni ke ngongliy, ma mu sap! rib manigil.” (Genesis 1:31) Gadad gubin ni gadad baadag e re taw’ath ney nib puf rogon.
Machane, fare tawaath ni lem ni puf mat’awun e gathi ngan fanay ni dariy e gini nge mus riy. I ngongliy Got e girdi’ ni m’agrad ko pi motochiyel rok, ni bod rogon e motochiyel ko gravity. Maku aram rogon, ni ngongliy e girdi’ ni m’ag ko pi motochiyel rok ko wok nib fel’ ni nge bung rogon ni nge fel’ e par ko girdi’ riy. Erfan nib fel’ fare thin ku Got ni be ta’ ir ngay ni be gaar: “Mu pagan’um ngak Jehovah u polo’ i lanin’um ma ri dab mu tor ko tin ni ga be finey ni ga manang.”—Proverbs 3:5, New World Translation.
Gal ga’ rodad ni som’mon, Adam nge Efa, e ra olobochgow i fanay fare lem rorow ni puf mat’awun. Ra olobochgow i lemnag ngar lemnagew ni rayog ni ngar pirew rorow ni dakuriy rogorow ku Got. Yow e lem rorow, mar th’abew nga wuru’ e fol ko motochiyel rok.—Genesis, chapter 3.
N’en Ni Yibe Weliy—Ani Ba’ Mat’awun Ni Nge Gagiyeg
Nap’an ni daki fol Adam nge Efa rok Got, ma aram e kar togopuluwgow nga mat’awun ni aram e mat’awun ni nge gagiyeg. Rayog ni thangrow Jehovah ngar chuwgow miki tabab nge ngongliy l’agruw ni’, machane ra aram rogon ma dabi tamilang ngan nang ko mini’ e ani ba fel’ e gagiyeg rok ma kub fel’ ngak e girdi’. Ma faani yira pi’ e tayim ko girdi’ ngar gagiyegnaged yad nge rogon e par rorad ni rogon ni yad manang, ma girdi’ e ra dag nge mudugil ni dabki maruwar ko gagiyeg ni demoy Got riy e ra fel’ fa dangay.
Mang e be dag bokum biyu’ e duw ngodad u rogon chepin e girdi’? Ya yu raay i duw ni ke yan e ka yugu be par e kireb nge gafgow ni der chuw.
Rogon ni ke pag Jehovah e re n’ey nge kireb nge gafgow e ke chugur ni nge mus. Got e dabki n’uw nap’an ma nga yib nga fithik’ e pi ngongol ko girdi’ ney nge yaluweg. (Daniel 2:44) Aram rogon ni ra museg Got e gafgow. Bayi gothey e re fayleng ni kireb ney me fek i yib reb e yalen nib biech ni aram e “tin nib mat’aw e ngongol e bay i par riy.”—2 Peter 3:13.
Uw faani fel’ e re thin ney! Kari t’uf rodad e re fayleng ni biech nem. Ma dabki n’uw nap’an ni ngad songad ma gad guy. Rogon e yiiy ko Bible ni ke lebug, ma kad nanged ni pi gafgow ni i pag Got nga i buch e kari chugur nga tomuren.