Mu Pining E Sorok Ngak Jehovah Ko Tin Ni Ke Rin’ Ni Yira Ngat Ngay!
“Kari gog e sorok ngak Somol u lanin’ug . . . bochan e pi n’en ni yira ngat ngay ni ke rin’ Got ngog.”—LUKE 1:46-49.
1. Mang e pi n’en ni ke rin’ Jehovah ni yira ngat ngay nib puluw ni ngada pininged e sorok ngak?
BAY rogon ni ngan pining e sorok ngak Jehovah ni bochan e pi n’en ni ke rin’ ni yira ngat ngay. Faani weliy Moses ni profet murung’agen rogon ni i chuw piyu Israel u Egypt, me yog ni gaar: “Lan owchemed e ke guy urngin e tin ni ke rin’ Jehovah ni yira ngat ngay.” (Deuteronomy 11:1-7, New World Translation) Taab rogon ngay, faani weliy Gabriel ni engel ngak Maria murung’agen Jesus ni ba yib, me yog ni gaar: “Kari gog e sorok ngak Somol u lanin’ug . . . bochan e pi n’en ni yira ngat ngay ni ke rin’ Got ngog.” (Luke 1:46-49) Gadad e Pi Mich rok Jehovah, e gad ma pining e sorok ngak ni bochan e pi n’en ni ke rin’ ni yira ngat ngay ni bod e tin ni baaray ni i ayuweg piyu Israel ni nge dabkuura pared ni yad e sib u Egypt nge fare maangang ya ni parnag fak ni pumoon.
2. (a) Mang e “n’en ni ke m’ay i lemnag rok” Got ngak e piin ni yad ma fol? (b) Mang e ke buch rok John u bochi donguch u Patmos?
2 Boor ban’en ni ke rin’ Jehovah ni yira ngat ngay nib l’ag ko “tin ni ke m’ay i lemnag rok ndariy n’umngin nap’an” ni ra flaabnag e girdi’ ni ma fol rok fare Messiah nge gagiyeg nra ta’ ko Gil’ilungun. (Efesus 3:8-13) Munmun ma n’en nib m’agan’ Got ngay e be lebug i yan u nap’an John ni apostal ni ke pilibthir min pag ni nge guy e tharmiy ni ke mab ko ngiyal’ ni kan piliyeg e changar rok. Me rung’ag fare lam ni gowa laman ba rappa ni be gaar: “Moy ngaray nga lang, mu gu dag ngom e n’en ni bay yib i m’ug.” (Revelation 4:1) Nap’an e am nu Roma me tay John nga daken bochi donguch ni Patmos fithingan “ni bochan ke weliy murung’agen Got miki weliy murung’agen Jesus,” me yib ngak John e “tin ni dag Jesus Kristus nga ni guy.” Tin ni ke guy John nge tin ke rung’ag e kari dag e tin nib m’agan’ Got ngay ndariy n’umngin nap’an, arfan ni re n’ey e be pi’ e tamilang ko tirok Got ma be pi’ e athamgil nga laniyan’ urngin e Kristiano nib riyul’.—Revelation 1:1, 9, 10.
3. Fa 24 i piilal ni ke guy John u nap’an ni kan piliyeg e changar rok e be yip fan e mang?
3 U daken e re mab nem ni ke mab u tharmiy, ma ke guy John 24 e piilal, ni yad be par nga chiya ko pilung ma kan teeliyawnagrad ni bod fapi pilung. Kar siro’gad u p’eowchen Got nra gaargad: “Somol romad ma Got romad! Ba rogom ni nga nog e sorok ngom, min ta’fam, ma ba’ rogom ni nge mil suwon urngin ban’en ngom. Yi gur e mu sunmiy urngin ban’en, yi gur e mu lemnag mi yad sum ni yad ba fas.” (Revelation 4:11) Pi piilal nem e be yip’ fan urngin e Kristiano ni kan dugliyrad min fasegrad ko yam’ min pi’ ngorad e liw nib tolang ni i micheg Got ngorad. Tin ni ke rin’ Jehovah ni yira ngat ngay e ba muun ngay e tin ni ke sunmiy ni ir e ke k’aring rad ni ngara pininged e sorok ngak Jehovah. Maku gadad ra ngat ko n’en ni be micheg ni Jehovah e bay “gelngin ndabi m’ay ma ir e Got nib riyul’.” (Roma 1:20) Ma faanra ke gel e tamilangan’ rodad u murung’agen Jehovah, ma ra k’aringdad e re n’ey ni ngada pininged e sorok ngak Got ni bochan e tin ke rin’ ni yira ngat ngay.
Ngani Machibnag e Pi N’en ni Ke Rin’ Jehovah nib Fel’!
4, 5. Ngam weliy boch ban’en ni be dag ko u rogon ni ke pining David e sorok ngak Jehovah.
4 David ni ta tang e ke pining e sorok ngak Got ni bochan e tin ni Ke rin’ ni yira ngat ngay. Ni bod ni, i yon’ David e tang ni gaar: “Nga mon’ed e tang ni fan ku Jehovah, ni ma par u Zion; ma ngam weliyed e tin ni ke rin’ ngak e girdi’. O Jehovah ngam mu runguyeg; ngam guy e gafgow ni ke yib ngog ni bochan e piin ni be fanenikayeg, ma gur e kam chibiyeg nga lang ko pi garog ko yam’, ma aram fan nrayog ni nggu weliy urngin e tin ni kam rin’ nib fel’ u langan e garog ko piin pifak Zion ni ppin.” (Psalm 9:11, 13, 14) Tomren ni ke pi’ David ngak Solomon ni fak yaan fare tempel, me pining e sorok ngak Got, ni gaar: “O Jehovah, gur e th’abi ga’ ma bay gelngim nib gel magab gamog ma bay rogom ni ngan tayfam . . . O Jehovah, gur fare gil’ilungun, me gur e En ni ku kam tolang nagem ya gur e lolugen urngin ban’en. . . . Ma chiney, O Got romad, gamad be pining e magar ngom ma gamad be pining e sorok nga fithingam nib gamog.”—1 Chronicles 29:10-13, NW.
5 Thin nu Bible e be sul u daken ni be piningdad—arrogon, be fonownagdad—ni ngada pininged e sorok ngak Got, ntaabrogon ko n’en ni i rin’ David. Fare babyor ni Psalms e bay e thin riy ni be pining e sorok ngak Got, ma sogonapan baley ko pi tang ney e yibe lemnag ni tirok David. Gubin ngiyal’ ma ma pining e sorok ngak Jehovah ma ma pining e magar ngak. (Psalm 69:30) Maku, ka nap’an kakrom, ma pi tang ni ke yoloy nge yugu boch e tang ni Got e ke thagthagnag e yima fanay ni ngan pining e sorok ngak Jehovah.
6. Uw rogon ni fapi Psalms ni kan thagthagnag e bay fan ngodad?
6 Ri bay fan fapi Psalms ko piin ni ma liyor ngak Jehovah! Ngiyal’ ni gad ra adag ni ngada pininged e magar ngak Got ko urngin ban’en ni ke rin’ ni fan ngodad ni yira ngat ngay, ma ffel’ ni ngada lemnaged e thin ni bay ko Psalms nib fel’. Ni bod ni, ngiyal’ ni ngan od ni kakadbul, ya aram reb e rran ni biech, ma sana ran k’aringdad ni nga dogned e thin ni bod fapi thin ni gaar: “Ffel’ ni ngan pining e magar ngak Jehovah ma nga nin’ e tang ni yibe pining e sorok nga fithingam, O En Th’abi Tolang; ni fan e ngan weliy murung’agen e runguy rom ni kakadbul min weliy murung’agen e yul’yul’ rom u nap’an fapi nep’, . . . ya bochan e kam falfalan’ageg, O Jehovah, ni bochan e pi n’en ni kam rin’; mu gu tolul u fithik’ e falfalan’ ni bochan e pi n’en ni kam rin’.” (Psalm 92:1-4, NW) Nap’an ni kada gelgad u reb e magawon ni ir e ke talegdad faram ni dabda mon’oggad ko tirok Got ban’en, ma sana gad baadag ni ngada daged e falfalan’ rodad u daken e meybil, ni bod rogon e n’en ni ke rin’ fare psalmist u nap’an ni ke yon’ e tang ni gaar: “Mired, ngada tolulgad u fithik’ e falfalan’ ni fan ku Jehovah! Ngada tolulniged e falfalan’ ko fare war ni ir e ma ayuwegdad. Ngada chuchugurgad ngak ni gad be pining e magar ngak; ma nga don’ed e tang ni baga’ lamdad ni fan ngak.”—Psalm 95:1, 2.
7. (a) Mang e n’en ni bay fan ni ngan tiyan’uy ngay u murung’agen e pi tang ni ke yon’ e piin Kristiano? (b) Mang taareb i tapgin ni nga nib ko pi muulung nib papey ma ran par nge mada’ ko tomur?
7 Baga’ ni gad ma yon’ e tang ni ngan pining e sorok ngak Jehovah ko pi muulung rodad, nge pi assembly, nge pi convention. Bay fan ni ngan lemnag ni pi tang n’ey e kan fek ko fapi thin ko fare babyor ni Psalms ni kan thagthagnag. Feni gel e falfalan’ rodad ya kan kunuy ko ngiyal’ n’ey e pi tang ni be pining e sorok ngak Jehovah ma ma gelnagdad! Nga nin’ e tang ni ngan pining e sorok ngak Got e aram reb i fan nrib fel’ ni ngada bad ko pi muulung rodad nib papey ma gad ra par nge mada’ ko ngiyal’ ni kad mu’gad, ma aram e kada uned ko pi walagdad i pining e sorok ngak Got ko tang nge meybil.
“Mu Pininged e Sorok Ngak Jah!”
8. Mang fan fare bugithin ni “Hallelujah,” ma baga’ ni yima weliy fan e re n’ey ni u rogon?
8 Ngan pining e sorok ngak Jehovah ye ir kenggin fare bugithin ni “Hallelujah,” reb e transliteration ko reb e thin ni Hebrew ni baga’ ni kan weliy fan ni “Gimed e girdi’, mu pininged e sorok ngak Jah.” Ni bod u Psalm 135:1-3, ma gad ra pirieg reb e pong nib pasig, mab gel ni gaar: “Gimed e girdi’ mu pininged e sorok ngak Jah! Mu pininged e sorok nga fithingan Jehovah, O gimed e pi tapigpig rok Jehovah, mu pininged e sorok ngak, ma gimed e piin ni gimed be sak’iy u lan e tempel rok Jehovah, u lan e yoror ko fare naun rok God. Mu pininged e sorok ngak Jah, ya bochan Jehovah e ba fel’. Nga mon’ e tang u fithingan, ya bay e falfalan’ riy.”
9. Mang e ma k’aringdad ni nga dogned e sorok ngak Jehovah?
9 Nap’an ni ngada fal’eged i lemnag e pi n’en ni ke sunmiy Got ni yira ngat ngay nge urngin e n’en ni ke rin’ ni fan ngodad, ma falfalan’ rodad ni yib u gum’ercha’dad e ra k’aringdad ni ngada pininged e sorok ngak. Ra ngada fal’eged i lemnag e tin ni ke rin’ Jehovah u fithik’ e maangang kakrom ni fan ko girdi’ rok. Ma nap’an ni gad ra fal’eg i lemnag e tin ni ke micheg Jehovah nra rin’ boch nga m’on ni yira ngat ngay, ma gad ra gay e kanawo’ ni ngada pininged e sorok nge magar riy ngak.
10, 11. Uw rogon ni yafas rodad e be pi’ ngodad i tapgin ni ngada pininged e sorok ngak Got?
10 Yafas rodad e ir reb i tapgin nib gel ni ngan pining e sorok ngak. I yon’ David e tang ni gaar: “Nggu pining e sorok ngom [Jehovah] mi gur e ngan mudugdag ngom ya bochan kam sunmiyeg nrogon ni yira ngat ngay. Rib fel’ e maruwel rom, ma ri gu ma nang u ngorongoreg ni polo’.” (Psalm 139:14) Arrogon, kan “sunmiydad nrib fel’ rogon” ma kan taw’athnagdad ko pi n’en nib tolang puluwon ni bod e tin ni baaray ni rayog ni ngada guyed ban’en, ma gad ma rung’ag ban’en, ma bay rogodad ni ngada lemnaged ban’en. Ere arfan, susun gathi rib puluw ni ngada fanayed e yafas rodad nrogon ni rayog ni ngada pininged e sorok ngak e en ni Tasunmiydad? I dag Paul e lem rok ni aram rogon ko ngiyal’ ni ke yoloy ban’en ni gaar: “Demtrug e n’en ni gimed ra rin’, ndemtrug ko ngam abichgad ara ngam garbodgad, ma urngin ni ngam rin’ed ni fan e nga nog e sorok riy ngak Got.”—1 Korinth 10:31.
11 Ngada rin’ed urngin ban’en ni fan e nga nog e sorok ngak Jehovah nfaanra riyul’ nib t’uf Got rodad. I yog Jesus ni fa bin som’mon e motochiyel e be gaar: “Thingari t’uf rom Somol, ni ir e Got rom, u polo’ i gum’ercha’em, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30; Deuteronomy 6:5) Thingarda daged e t’ufeg rodad ngak Jehovah ma ngada pininged e sorok ngak ya ir e Tasunmiydad ma ir e Ta ma pi’ “urngin e taw’ath nib flont.” (James 1:17; Isaiah 51:13; Acts 17:28) Ma bay fan ni ngan rin’ e re nem, ya bochan, gelngin e lem rodad, nge gelngidad ko tirok Got, nge gelngin e dowef rodad—nge urngin felngin nge salap rodad—ni yib rok Jehovah. Ani Tasunmiydad, e bay rogon ni ngada daged e t’ufeg rodad ngak min pining e sorok ngak.
12. Uw rogon ni ga be thamiy murung’agen Jehovah nge pi n’en ni i rin’ ni yira ngat ngay nge fapi thin ni bay ko Psalm 40:5?
12 Pi n’en ni ke rin’ Jehovah ni yira ngat ngay e ir e ma pi’ ngodad boor i tapgin ni nge t’uf Got rodad ma nguuda pininged e sorok ngak! I yon’ David e tang ni gaar: “Somol ni Got rog, pire ban’en ni yira ngat ngay ni kam ngongliy ni fan ngomad,” me ulul ngay ni gaar, Dariy ban’en ni taareb rogon ngom! Boor ban’en nib fel’ ni ke m’ay i lemnag rom ni fan ngomad. Ra nggu weliy ni gubin, ma ra yan i aw ndabiyog rog ya kaygi pire’.” (Psalm 40:5) De yog rok David ni nge weliy urngin ban’en ni ke rin’ Jehovah ni yira ngat ngay, maku arrogon gadad. Machane gubin ngiyal’ ma ngada pininged e sorok ngak Got ko ngiyal’ ni yira dag ngodad e pi n’en ni ke rin’ Got ni yira ngat ngay.
Boch e Maruwel nib M’ag ko Tin nib M’agan’ God Ngay ni Dariy N’umngin Nap’an
13. Uw rogon ni athap rodad e ri ba l’ag ko tin ni ke rin’ Got ni yira ngat ngay?
13 Athap rodad nga m’on e ri ba m’ag ko pi n’en ni ke rin’ Got ni yira ngat ngay nib l’ag ko tin ni m’agan’ ngay ndariy n’umngin nap’an. Tomren e togopuluw ni buch u Eden, i pi’ Jehovah fare yiiy ni bin som’mon ni ke sug ko athap. Nap’an ni be weliy Got e tin ra buch rok fare porchoyog, me yog ni gaar: “I gur nge fare pin e bay mpirew ni gimew ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif u ay.” (Genesis 3:15) Fare athap u daken Fak fare pin e ke par u gum’ercha’en e piin nib yul’yul’ u tomren ni ke rin’ Jehovah e pi n’en ni yira ngat ngay ko ngiyal’ ni ke ayuweg Noah nge tabinaw rok ma kara magaygad nib fas u nap’an ni keb e ran me mathrow e fayleng nib kireb. (2 Peter 2:5) Tin ni kan micheg u daken e yiiy ngak e piin ni ke michan’rad ni bod Abraham nge David e ra pi’ e tamilangan’ ko n’en ni ra rin’ Jehovah u daken Fak.—Genesis 22:15-18; 2 Samuel 7:12.
14. Mang e th’abi fel’ ni ke rin’ Jehovah ni yira ngat ngay ni fan ko girdi’?
14 Tin th’abi ga’ ni i rin’ Jehovah ni be dag ni ma rin’ e pi n’en ni yira ngat ngay ni fan ko girdi’ e i buch u nap’an ni ke pi’ Fak ni kari maagirag rok—fare Owchen ni kan micheg, ni ir Jesus Kristus—me mang maligach. (John 3:16; Acts 2:29-36) Fare biyul’ ni ir e ke pi’ e kanawo’ nra fel’ biyay thilin e girdi’ nge Got. (Matthew 20:28; Roma 5:11) I ulunguy Jehovah e piin ni yad e som’mon ni ke fel’ thilrad biyay ko ulung ko piin Kristiano, ni kan sunmiy ko Pentekost 33 C.E. U daken e ayuw ko fare kan ni thothup, ma kar wereged fare thin nib fel’ nga gubin yang, ni be dag rogon e yam’ ni tay Jesus nge fas ko yam’ ni ke mab e kanawo’ ni fan ko girdi’ ni ma fol ni nge yog ngorad e pi flaab ni manemus u tan e gagiyeg ni ta’ fare Gil’ilungun Got u tharmiy.
15. Mang e ke rin’ Jehovah ni yira ngat ngay ko ngiyal’ ney?
15 Ngiyal’ ney, me rin’ Jehovah ban’en ni yira ngat ngay me ulunguy urngin e girdi’ ni yad bang ko piin Kristiano ni kan dugliyrad. Fare nifeng nra kirebnag e tin kireb e kan taleg ni fan ni ngan mu’nag i tay e pow nga peri’ e tin ni ka ba’ ko fa 144,000 e girdi’, ni yad ra un ngak Kristus ko gagiyeg u tharmiy. (Revelation 7:1-4; 20:6) I maruweliy Got nra mudugil ni fapi Kristiano ni kan dugliyrad e dabkuura pared ni sib ko fare “Babylon nib Gilbuguwan,” ni aram e pi yuraba i teliw ni googsur u fayleng. (Revelation 17:1-5) Bochan ni kan pagrad ko duw 1919 ma kar guyed ni ke ayuwegrad Got ni ka nap’an e ngiyal’ nem me mab e kanawo’ ko piin ni kan dugliyrad ni ngara rin’ed e mang? Ra nge galgal ramerad ma nguura weliyed e thin riyul’ ngak e girdi’ u m’on ni ra kirebnag Jehovah e m’ag rok Satan nib kireb u nap’an e “gafgow ni baga’ ” ni be yib nib papey.”—Matthew 24:21; Daniel 12:3; Revelation 7:14.
16. Mang e be buch ko ngiyal’ ney ya aram angin e machib ko Gil’ilungun ni yibe wereg nga gubin yang u fayleng?
16 Pi Mich rok Jehovah ni kan dugliyrad e yad be ayuweg ni nge lebug fare maruwel ni ngan wereg e machib nga gubin yang u fayleng u fithik’ e pasig. Ma angin ni yib ngorad, e aram ke yoor e girdi’ ni kar manged e pi tapigpig ku Jehovah e chiney ni yad bang ko “yugu boch e saf”. (John 10:16) Gad be falfalan’ ni ka be par nib mab e kanawo’ ko piin nu fayleng nib sumunguy ni ngar uned ngodad i pining e sorok ngak Jehovah. Piin ni kar folgad ko fare pong ni ke gaar, “moy” e yad bang ko ulung ni yira ayuwegrad ngar magaygad nib fas ko fare gafgow ni baga’, ni bay e athap rorad ni ngara pininged e sorok ngak Jehovah ndariy n’umngin nap’an.—Revelation 22:17.
Bokum Biyu’ e Girdi’ e Yad Be Yan u Taabang ko Bin Riyul’ e Liyor
17. (a) Uw rogon ni be ngongliy Jehovah e pi n’en ni yira ngat ngay nib m’ag ko maruwel rodad i wereg e machib? (b) Uw rogon ni ke lebug e thin ni bay ko Zekariah 8:23?
17 Ngiyal’ ney ma be rin’ Jehovah e pi n’en ni yira ngat ngay nib m’ag ko maruwel rodad i wereg e machib. (Mark 13:10) Fapi duw ni dawori n’uw nap’an ni ke yan, me ‘bing e mab nib baga’ ni yan nga reb e maruwel.’ (1 Korinth 16:9) Bochan e re n’ey ma aram kan wereg fare thin nib fel’ nga boch e binaw nib gagang’ ni kafram e ma par riy e piin ni tatogopuluw. Boor e girdi’ ni kafram e yad ma par u fithik’ e lumor e kar folgad e chiney ko fare pong ni ngan liyor ngak Jehovah. Kar lebguyed e pi thin ni kan yiiynag ni gaar: “Ereray e thin ni ke yog Jehovah ni gaar, ‘Tin ni ra buch ko pi rran nem e ragag e girdi’ ni ra bad ko urngin e thin ko fapi nam e kara koled ban’en, arrogon, yad ra kol e sikato ko fare moon ni Jew, mi yad gaar: “Nggu uned ngomed, ya kug rung’aged ni gimed e girdi’ ni bay Got romed.” ’ ” (Zekariah 8:23) Pi “girdi’ ” ney e yad piyu Jew nib spiritual, tin ni ka ba’ ko fachi ulung ni Kristiano ni kan dugliyrad. Bochan ni namba ni ragag e rayog ni nge yip fan ban’en u fayleng ni polo’, ere fapi “girdi’ ni ragag” e be yip fan fare “ulung ni baga’,” ni kan tay ni ngar chaggad ngak “fare Israel rok Got,” ma kar manged “taareb e ulung.” (Revelation 7:9, 10; Galatia 6:16) Rib ga’ e falfalan’ ko ngiyal’ ni ngan guy boor e girdi’ ni yad be maruwel u taabang ni yad e pi tapigpig rok Jehovah Got!
18, 19. Mang e mich riy ni be flaabnag Jehovah fare maruwel ni ngan wereg e machib?
18 Gad be falfalan’ ni bokum biyu’ e girdi’—e yad ma un ko tin riyul’ e liyor ni ma par ko pi nam ni girdi’ kafram e baga’ ni ri yad ma fol ko pi yuraba i teliw ni googsur ni gowa dabra adaged e thin nib fel’. Mu guy fare babyor nib biech ni Yearbook of Jehovah’s Witnesses, ma ngam guy fapi nam ni chiney bay e pi tamachib rorad ko Gil’ilungun ni be pi’ e report rorad ni ke tabab ko 100,000 ma boch e ke chuchugur ko 1,000,000. Ereray e mich riy nib gel ni be flaabnag Jehovah fare maruwel ni ngan wereg e machib ko Gil’ilungun.—Proverbs 10:22.
19 Bochan gadad e girdi’ rok Jehovah, ni ngada pininged e sorok nge magar ngak e Chitamangidad nu tharmiy ya ir e ke pi’ e tamilangan’ ngodad u murung’agen e tin riyul’ i fan e yafas, me pi’ ngodad e maruwel nib fel’ ko pigpig ngak, me ayuwegdad nrayog ni ngada guyed e tin ni bay nga m’on nib tamilang. Gad be par ni ri gad be sonnag ba ngiyal’ nra lebug urngin ban’en ni ke micheg Got ngodad ma ngada athamgilgad ni ‘ngada pared ni gadad ba t’uf rok Got, ma ngada sapgad ko yafas ni manemus.’ (Jude 20, 21) Feni falan’dad ni kad guyed ni fare ulung ni baga’ ni be pining e sorok ngak Got e sogonap’an 6,000,000 oren! Jehovah e be flaabnagrad, ma aram tin ni ka ba’ ko piin ni kan dugliyrad nge fare ulung ni baga’ nib chag ngorad e kan yarmiy ni ngar uned ko pi ulung ni sogonapan 91,000 ko pi binaw ni 235 urngin. Kan duruwiydad ko ggan nib spiritual nib fel’ rogon u daken e ayuw nib gel ni ma ta’ “fare tapigpig nib yul’yul’ mab gonop.” (Matthew 24:45) Fare theocratic organization ni be mon’og iyan e be ayuweg u fithik’ e t’ufeg ni yira rin’ e maruwel ko Gil’ilungun Got u daken 110 e tochuch ko Pi Mich rok Jehovah. Gad be falfalan’ ni Jehovah e ke k’aring gum’ercha’en e girdi’ rok ni ngar ‘ted fan u daken e tin th’abi fel’ ni bay rorad.’ (Proverbs 3:9, 10) Arfan, fare maruwel rodad ni ngan wereg e machib u ga’ngin e fayleng ni be ulul iyan, ma bay e pi talin e maruwel ni fan ko mongongol babyor, nge Bethel nge fapi missionary home, nge fapi Kingdom Hall, nge fapi Assembly Hall ni be yan u rogon e n’en nib t’uf rorad.
20. Mang e ran fal’eg i lemnag ko tin ni ke rin’ Jehovah ni yira ngat ngay nra bit’ ngodad?
20 Dabiyog rodad ni nga dogned urngin ban’en ni ke rin’ e Chitamangidad u tharmiy ni yira ngat ngay. Machane bay be’ nib mat’aw gum’ercha’en ndabi un ko fare ulung ni be pining e sorok ngak Jehovah? Ri dariy’! Ere, urngin e girdi’ nib t’uf Got rorad e ra tolulgad u fithik’ e falfalan’ ni gaar: “Nguun pining e sorok ngak Somol! Nguum pininged u tharmiy e sorok ngak Somol, ni gimed e piin ni gimed be par u tharmiy nib tolang nga lang. Gimed urngin e pi engel rok, mpininged e sorok ngak . . . , nge gimed e pagel nge rugod, nge piin ni pilibthir ma ku arrogon e piin ni bitir. Yad urngin ni ngar pininged e sorok nga fithingan Jehovah. Fithingan e ir e th’abi ga’ u fithik’ urngin e ngachal; ma feni sorok e ba tolang ko fayleng nge tharmiy.” (Psalm 148:1, 2, 12, 13) Arrogon, chiney nge gabul nge langleth ndariy n’umngin nap’an, ma ngada pininged e sorok ngak Jehovah ko tin ni ke rin’ ni yira ngat ngay!
Uw Rogon ni Ngam Pi’ e Fulweg?
• Mang boch ban’en ni ke rin’ Jehovah ni yira ngat ngay?
• Uw rogon ni kan k’aringem ni ngam pining e sorok ngak Jehovah?
• Uw rogon ni athap rodad e ba l’ag ko tin ni ke rin’ Got ni yira ngat ngay?
• Uw rogon ni be rin’ Jehovah e tin ni yira ngat ngay nib l’ag ko maruwel ni ngan wereg e machib ko Gil’ilungun?
[Picture on page 6]
Ga ma un i yon’ e tang ni ma pining e sorok ngak Jehovah ni yib u gum’ercha’em?
[Pictures on page 9]
Gad ba falfalan’ ni ka be par nib mab e kanawo’ ni fan ko piin sobut’ lanin’rad ni nguura chaggad ngodad i pining e sorok ngak Jehovah