Piin Ni Ma N’uf Got Nib Falfalan’ U Gangin E Fayleng E Yad Ba Thil
“Gimed e girdi’, mu n’ufed Jah! Mu n’ufed Jehovah gimed e pi tapigpig rok, mu n’ufed fithingan Jehovah.”—PSALM 113:1, New World Translation.
1, 2. (a) Rogon ni be yog ko Psalm 113:1-3, ma mini’ e bay rogon ni ngad n’ufed? (b) Mang deer e ba puluw ni ngan fith?
JEHOVAH GOT e An Tasunumiy e tharmiy nge fayleng, me ir e Ani Ga’ u Palpal Th’ib ndariy n’umngin nap’an. Bay rogon ngak ni ngad n’ufed. Ar fan ni be tay chilen ngodad u Psalm 113:1-3 ni gaar: “Gimed e girdi’, mu n’ufed Jah! Mu n’ufed Jehovah gimed e pi tapigpig rok, mu n’ufed fithingan Jehovah. Ngari flaab fithingan Jehovah e chiney iyan ngaram ndariy n’umngin nap’an. Ngiyal’ ni kamadabiy nge mada’ ko ngiyal’ ni ke aw e yal’ e ran n’uf fithngan Jehovah.”
2 Gad ba falfalan’ ni ngad rin’ed e re n’ey ya gad e Pi Mich Rok Got. Ri gad ba falfalan’ ya dabki n’uw nap’an ma ra n’igin Jehovah Got ere fayleng ney ni polo’ ni nge rung’ag e re tang ney! (Psalm 22:27) Be ga’ lamam ko re ulung ney ni be yin’ fare tang fa? Faanra er rogon ma ga be par nib falfalan’ ya ga be par nib dar ko re fayleng ney ni dariy e falfalan’ riy!
3. (a) Mang fan nib lingagil e girdi’ rok Jehovah? (b) Uw rogon ni gad be par nib dar ko fayleng?
3 Gad ma n’uf Jehovah u taabang ma aram fan ni gad ba lingagil ara gad ba thil. Taareb e thin ni gad ma wereg ma taareb e machib ni gad ma fil ngak e girdi’ ma taareb rogon ni gad ma weliy ‘morngaagen felngin Jehovah nib fel’.’ (Psalm 145:7, NW) Arrogon, kad ognaged gadad ngak Jehovah ma gad e girdi’ rok, me ere gad be par nib dar ko yugu girdi’ ni fan ni ngad pigpiggad ku Jehovah ni Got rodad. Yog Got ngak e girdi’ rok nkakrom ni piyu Israel, ni ngar pared nib dar ko pi nam u charrad ma dabra uned ko ngongol rorad. (Exodus 34:12-16) Ke pi’ boch e motochiyel ngak e girdi’ rok ni nge ayuwegrad ko re n’ey. Ku arrogon e ngiyal’ ney ma ke pi’ Jehovah e Thin Rok nib Thothup ni aram e Bible. Bay e fonow riy ni ma ayuwegdad ngad pared nib thil ko re fayleng ney. (2 Korinth 6:17; 2 Timothy 3:16, 17) Gathi gad be par nib dar ni goo gadad u lan e monastery ara convent, ni bod rogon e pi monk nge sibester ko Babylon nib Gilbuguwan. Gad ma folwok rok Jesus Kristus, ma gad ma n’uf Jehovah u fithik’ e yoor.
Ngan Folwok Rok e An Th’abi Ga’ ni Ma N’uf Jehovah
4. Uw rogon ni ke dag Jesus rogon ni ngan n’uf Jehovah?
4 De pilo’ Jesus ko tin m’agan’ ngay ni nge n’uf Jehovah. Ma aram fan ni ke par nib dar ko fayleng. Ke n’uf fithingan Got nib thothup u lan e pi tafen e muulung ngu lan e tempel u Jerusalem. I machibnag Jesus e thin riyul’ rok Jehovah u fithik’ e yoor ndemtrug ko bay u daken e burey fa bay u dape l’ay fa urngin yang ni ma muulung e girdi’ ngay. I yog ni gaar: “Chitamag, ni gur e Somol nu tharmiy ngu fayleng e ri gu ma pining e sorok ngom u fithik’ e yoor.” (Matthew 11:25) Mus ko ngiyal’ ni kan courtnag ma bay u p’eowchen Pontius Pilate, ma ke gaar Jesus: “Ni gargelnageg ngaray nga fayleng ni bochan e nggu weliy morngaagen e tin riyul’.” (John 18:37) Kari tay Jesus fan fene ga’ fan e maruwel rok. Demtrug e gin ni bay riy ma ke weliy morngaagen Jehovah me n’uf u fithik’ e yoor.
5. Psalm 22:22 e ma sor fan ku mini’, ma susun uw rogon u wan’dad?
5 U Psalm 22:22, ma bay e thin ko profet u morngaagen e An Th’abi Ga’ ni ma N’uf Jehovah ni begaar: “Bay gu weliy ngak e tirog e girdi’ fithingam; bay gu pining e sorok ngom u lan e muulung rorad.” Mu Hebrews 2:11, 12, ma be puluwnag apostal Paul e pi thin ney ngak Somol Jesus nge ngak e piin ni ke dugliy Jehovah Got ni ngar ranod nga tharmiy. Ma dar tamra’gad ni ngar n’ufed fithingan Jehovah u lan e muulung. Aram rogodad u nap’an ni gad ma un ko pi muulung ko ulung fa? Faanra gad ra un ko pi muulung ma gad tiyan’ ngay ma gad weliy boch e thin, ma aram e gad be n’uf Jehovah. Machane kari mus ni aram rogon ni ngan n’uf Got u fithik’ e falfalan’ fa?
6. Mang maruwel e ke pi’ Jesus ngak pi gachalpen, ma uw rogon ni piin ba t’uf e tamilang rorad e kar n’ufed Got?
6 Ma rogon ni yog u Matthew 5:14-16, ma ke tay Somol Jesus chilen ngak pi gachalpen ni nge gal raamerad ni aram e rayog ko yugu boch e girdi’ ni ngar n’ufed Jehovah. I gaar: “Gimed bod e tamilang ngak urngin e girdi’ nu fayleng. . . . Nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” Piin ni ba t’uf rorad e tamilang e yad ma n’uf Got. Yad ma yodor ko thin nge ngongol rorad nib fel’ mab gol fa? Danga’ ya yad ma yodor ni bochan ni yad ma n’uf Jehovah u taabang. Arrogon, piin ni ba t’uf e tamilang rorad e yad ma ognagrad ku Got mar manged e piin ni ma n’uf Got u fithik’ e falfalan’. Kam mon’og iyan kam un ko re n’ey fa?
Bay e Falfalan’ Riy ni Ngan N’uf Jehovah
7. Mang fan ni piin ni yad ma n’uf Jehovah e yad ba falfalan’, ma mang fan ni kar falfalan’gad u nap’an e Pentekost 33 C.E.?
7 Mang fan ni ba falfalan’ e piin ni ma n’uf Jehovah? Ya falfalan’ e aram ba waamangin e kan ni thothup rok Got. U Galatia 5:22, ma be weliy morngaagen e t’ufeg ni som’on ma falfalan’ e mmigid. Ke m’ug e re waamngin ney ko kan ni thothup rok Jehovah ngak pi gachalpen Jesus u nap’an e bin som’on e chibog. Nap’an e Pentekost ko 33 C.E., ma ke puog Got e kan ni thothup rok nga daken 120 i gachalpen Jesus mi yad gubin e kar n’ufed Jehovah ko numon nlungun boch e nam. Boch piyu Israel ni pumoon ni yad ma tiyan’rad ko Motochiyel ni kar bad u urngin e nam nu fayleng nga Jerusalem e ur ‘gingad.’ Ke lungurad: “Gadad be rung’ag ni yad be welthin nthin ko nam rodad ni yad be weliy morngaagen e pi n’en nib sorok Got ni ke ngongliy”! (Acts 2:1-11) Ma mang wenegan ni yib ni bochan ni kan n’uf Jehovah u gubin mit e thin? Sogonapan 3,000 piyu Israel nge piin ni girdi’ nu bang ni kar uned ko teliw nu Israel e ur uned ko fare thin nib fel’ u morngaagen fare Messiah. Kar uned ko taufe, me yib fare kan ni thothup ngorad, ma kar uneged lamrad ko sorok ni yibe pining ku Jehovah. (Acts 2:37-42) Rib flaab e re n’em!
8. Tomren Pentekost, mang e ke rin’ e pi Kristiano ni ngar falfalan’gad?
8 Ku be weliy fare report ni gaar: “Gubin e rran ni ur muulunggad nga lan e tempel, ma yad be abich u taabang u tabinaw rorad i yan, ni yad be kay e ggan ni bay rorad u fithik’ e falfalan’ ngu fithik’ e sobut’an’, ma yad be pining e magar ngak Got, ma yad be par ni yad ba fel’ u wan’ urngin e girdi’. Ma gubin e rran ni be puthuy Jehovah ko re ulung rorad nem e piin ni ka fin ra thapgad ngak.” (Acts 2:46, 47, NW) Kar falfalan’gad ni bochan ni ur pared u taabang ma ur abichgad u taabang fa? Danga’, ya kar falfalan’gad ni bochan ni ur n’ufed Jehovah Got u gubin e rran. Ma ke gel e falfalan’ rorad u nap’an ni ke motoyil bokum biyu’ e girdi’ ko thin rorad ni be thapeg e girdi’ ngak Got. Aram rogon gadad ko ngiyal’ ney.
Girdi’ nu Gubin e Nam ni Yad ma N’uf Got u Fithik’ e Falfalan’
9. (a) Wuin nge uw rogon ni ke tabab Got ni nge wereg fare thin nib fel’ ngak e girdi’ u gubin e nam? (b) Mang fan ni kan puog e kan ni thothup nga daken Kornelius nge girdi’ rok u mon ni kan taufe nagrad?
9 De m’agan’ Jehovah ngay ni ke mus ni taareb e nam e ra gal raamaen riy e tamilang ko pi tapigpig rok. Ere nap’an e 36 C.E., me bing e kanawo’ ko girdi’ u gubin e nam ni ngar rung’aged fare thin nib fel’. Ke pow’iy Got Peter nge yan nga tafen be’ ni gathi girdi’ nu Israel ni ir e ga’ ko salthaw u Caesarea. Mu rom e bay Kornelius nge girdien e tabinaw rok riy nge pi fager rok ni kar muulunggad. Ur motoyilgad ngak Peter ma ke mich Jesus u wan’rad’. Uw rogon ni gad manang e re n’em? Ya ke yib e kan ni thothup rok Got nga daken e pi girdi’ nem ni gathi yad piyu Israel. Baga’ ni yima pi’ e kan ni thothup ngak be’ u tomren ni ke un ko taufe, machane aram ba ngiyal’ ni ke dag Jehovah ni ke felan’ ko pi girdi’ nem ni gathi yad piyu Israel u m’on ni kar uned ko taufe. Faan manga de yodorom Jehovah ma ra maruwaran’ Peter ni ke felan’ Got ko piin ni gathi yad piyu Israel nrayog ni ngar manged e pi tapigpig Rok ma rayog ni ngar uned ko taufe.—Acts 10:34, 35, 47, 48.
10. Uw rogon ni kan yiiynag kakrom ni girdi’ u gubin e nam e yad ra nuf’ Jehovah?
10 Ka nap’an e ngiyal’ nkakrom, me yiiynag Jehovah ni girdi’ u gubin e nam e yad ra pining e sorok ngak. U gubin e nam ma ra moy e piin ni ra n’uf u fithik’ e falfalan’. I weliy apostal Paul boch e thin ko Bin ni Hebrew e M’ag ko Bible ni nge micheg e re n’ey. I yog ngak fare ulung ko pi Kristiano u Roma ni yad e girdi’ u gubin e nam ni gaar: “Um pired nra bigimed ma ba t’uf rok bigimed, ni bod ni be par Kristus ni gimed ba t’uf rok, ni fan e nga nog e sorok ngak Got. Ya nggog ngomed ni Kristus e yib i mang ba tapigpig ngak piyu Israel ni fan e nge dag ni Got e ba yul’yul’, ma nge yib i riyul’nag e tin ni yog Got ngak pi chitamangidad ni bayi rin’, ma ku bochan e ngki yog ni pining e pi nam e magar ngak Got ko runguy rok ngorad; ni bod ni be yog e babyor ni thothup [u Psalm 18:49] ni be gaar: ‘Aram fan ni bay gu pining e magar ngom u fithik’ e pi nam, bay gu tang ni gu be yog e sorok nga fithingam.’ Miki gaar [u Deuteronomy 32:43]: ‘Gimed e girdi’ ko pi nam, mu uned ko falfalan’ u taabang rok e girdi’ rok Got.’ Miki gaar [u Psalm 117:1]: ‘Mogned e sorok ngak Jehovah, ni gimed urngin e girdi’ ko pi nam, ma nge urngin e girdi’ ni ngar rogned e sorok ngak.’”—Roma 15:7-11, NW.
11. Uw rogon ni ke ayweg Got e girdi’ u gubin e nam ni ngar filed e tin riyul, ma mang wengan ni ke yib riy?
11 Dabiyog ko girdi’ ni ngar n’ufed Jehovah u taabang nfaanra de l’agan’rad ngak Jesus Kristus, ni ir fa en ni ke dugliy Got ni nge gagyiegnag e girdi’ u gubin e nam. Ke tay Got e yaram ko machib u gubin e nam ni nge ayuwegrad ngar ted fan e tin riyul’ Rok ni ma pow’iy iyan ko yafas ni manemus. Be yog e thin u daken fare tapigpig nib yul’yul’ mab gonop. (Matthew 24:45-47) Ma mang wenegan? Ke pag lal milyon e girdi’ ni be un ko tang ni be pining e sorok ngak Jehovah u boor ko 230 e nam. Ma ka bay bokum milyon ni be dag ni yad ba adag ni ngar uned ngorad. Mu sap ko uw urngin e girdi’ ni kar uned ko fare Puguran ko duw ni 1996: 12,921,933. Rib fel’!
Kan Yiiynag Ba Ulung ni Baga’ ni be N’uf Got u Fithik’ e Falfalan’
12. Mang e ke guy John napan ni kan piliyeg e changar rok, ma uw rogon ke riyul’?
12 I pig e changar rok apostal John me guy ba “ulung ni baga’” ni yib u gubin e nam. (Revelation 7:9, NW) Mang kenggin e tang ni yad be yin’ u taabang e tin ni ka bay giriden fachi ulung? Be yog John ngodad ni gaar: “Kanawoen ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf. (Revelation 7:10) Yibe wereg e re thin ney nga gubin yang u fayleng. Bod rogon ni ba’ yuwan e fal’tir u pa’dad ya gad ma n’uf Got u taabang ni ir e Ani Ga’ u Palpal Th’ib ma gad ma pining e magar ngak u fithik’ e falfalan’ ni kanawoen ni gad ma thap ngak e “yib rok” ma ki yib rok Fak ni ir fare Fak e Saf ni Jesus Kristus. Rib flaab apostal John ya ke pig e changar rok me guy fare ulung ni baga’! Ma ri gad ba falfalan’ ko ngiyal’ ney ya gad be guy ma gad be un ko n’en ni guy John faani pig i changar rok!
13. Mang e ma tay e girdi’ rok Jehovah ni yad ba dar ko fayleng?
13 Gadad e pi tapigpig rok Jehovah ma ri ba felan’dad ngay ni bay e ngochol rok rodad. (Isaiah 43:10, 12) Gad e Pi Mich Rok Jehovah me ere gad ba thil ko girdien e re fayleng ney. Bay e falfalan’ riy ni ngan fanay e ngochol rok Got min rin’ e tin’ nib m’agan’ ngay ni aram e n’en ni ke m’agan’dad ngay! Bay fan e yafas rodad ya ke m’agan’ Jehovah ngay ni nge biechnag e ngochol rok nib thothup me yog e sorok ngak ni bay mat’awun ni nge gagiyeg u daken Gil’ilungun. Ma ke ayuwegdad ngad uned ko tin ni ke m’agan’ ngay ni fan ko ngochol rok nge Gil’ilungun. Ke rin’ e re n’ey u dalip e kanawo’.
Kan Tay Morngaagen fare Thin Riyul’
14, 15. (a) Mang reb e kanawo’ ni ke ayuwegdad Got riy ni ngad uned ko n’en nib magan’ ngay ni fan ko ngochol rok nge Gil’ilungun? (b) Uw rogon ni kan yarmiy fare Gil’ilungun ko duw ni 1914 C.E. nib thil ko fa bin ni kan chuweg ko 607 B.C.E.?
14 Bin som’on ma ke tay Jehovah nib mil fan fare thin riyul’ ngak e girdi’ rok. N’en nth’abi ga’ fan ni kan tamilangnag e ke tabab Gil’ilungun ko gagiyeg ko duw ni 1914. (Revelation 12:10) Re am ney nu tharmiy e ba thil ko fa tinef e am nu Jerusalem ni pi pilung riy e yib ko ganong rok David. Kan taleg e re gagiyeg nem ma nap’an e 607 B.C.E., e ke par yu Jerusalem u tan pa’ e gagiyeg ko pi nam ni gathi yad piyu Israel. Fare am nib biech ni ke dugliy Jehovah ko 1914 e aram ba gagiyeg nu tharmiy ma dabi par u tan pa’ be’ ya goo Jehovah, ma dabi mus biid. (Daniel 2:44) Maku ba thil rogon e gagiyeg ni be tay. Uw rogon? Be weliy ko Revelation 11:15 ni gaar: “Me yan lamay ni baga’ u lan e tharmiy ni be lunguy: ‘Ke yib gelngin Somol rodad nge Kristus rok ni ngar gagiyegnigew e girdi’ nu fayleng, ma bayi gagiyegnag ndariy n’umngin nap’an.’”
15 “Gelngin Somol rodad nge Kristus” e be gagiyegnag e fayleng ni polo’. Ereray e bin nib biech rogon ni be dag Jehovah gelngin, ma ba muun ngay fare Messiah ni Fak nge pi walagen Jesus ni yad 144,000 u gubin, ni baga’ ni ke m’ay i fasegrad nga tharmiy, ma re n’ey e gathi ke mus ni yugu ban’en ni ngan fil morngaagen—ni ban’en ni ba adag e girdi’ ni ngar maluag thinnaged. Danga’ ya re Gil’ilungun ney nu tharmiy e aram ba am nriyul’. Ma bochan e re am nem ma ke l’agan’dad ngay ni ngad pared ni gad ba flont ndariy n’umngin nap’an ma aram tapgin ni nguuda falfalan’gad. Kan pi ngodad morngaagen e pi thin riyul’ ney ni bay ko Thin Rok Jehovah me ere ma k’aringdad ngad weliyed e thin nib fel’ u morngaagen. (Psalm 56:10) Ga be rin e re n’ey u gubin ngiyal’ ma ga be weliy ngak urngin e girdi’ ni be gagiyeg Gil’ilungun Got nge fare Messiah e chiney u tharmiy fa?
Yibe Ayuwegey ko Kan ni Thothup nge Pi Walag u Gangin e Fayleng
16, 17. Mang e bin l’agruw nge bin dalip a kanawo’ ni ke aywegdad Got riy ni rayog ni ngad uned ko tin nib m’agan’ ngay?
16 Bin l’agruw e kanawo’ ni be ayuwegdad Got ni ngad uned ko tin nib m’agan’ ngay e be pi’ ngodad e kan ni thothup rok, ni ma pi’ gelngidad ni nge m’ug waamngin ko ngongol rodad ma aram me felan’ Got ngodad. (Galatia 5:22, 23) Miki yol Paul ngak e pi Kristiano ni kan dugliyrad ni gaar: “Ma gadad e . . . fare kan ni thothup ni Got e l’og e ir e ke yog ngodad, ni fan e nge yog nda nanged urngin e tin ni ke pi’ Got ngodad.” (1 Korinth 2:12) Faanra gad ra fol ko kan ni thothup rok Jehovah ma gadad gubin e rayog ni ngad nanged ma gad nang fan urngin e tin ni ke pi’ ngodad—ni tin ni ke micheg, nge pi motochiyel rok, nge gafarig nge boch ban’en.—Mu taarebnag ko Matthew 13:11.
17 Ma bin dalip e kanawo’ ni be ayuwegdad Got riy e u daken e pi walagdad u gangin e fayleng ngu daken e pi ulung ni ke yarmiy Jehovah ni fan ni ngan liyor ngak. Weliy apostal Peter morngaagen e re n’ey u nap’an ni ke piningdad ni “nge t’uf rodad e pi cha’ ni gadad ni ke mich Got u wan’rad.” (1 Peter 2:17) Tabinaw rodad ni bay e t’ufeg riy e aram e pi walagdad ni pumoon nge ppin nu gubin e nam ma yad ma ayuwegdad ngad pigpiggad ku Jehovah u fithik’ e falfalan’ ni bod rogon ni be tay chilen ko Psalm 100:2 [NW] ni gaar: “Mu liyorgad ngak Jehovah u fithik’ e falfalan’. Mi gimed yib nga p’eowchen ni gimed be tang u fithik’ e falfalan’.” Miki gaar ko verse 4: “Marod nga lan e tempel rok ni gimed be pining e magar ngak, marod nga lan e naun rok nib thothup ni gimed be pining e sorok ngak! Mu pininged e magar ngak mi gimed pining e sorok ngak.” Ere demtrug ko gad be machib u fithik’ e yoor fa gad be un ko muulung, ma rayog ni ngad falfalan’gad. Kad pirieged e gapas laniyan’ nge pagan’ u lan e garog ko tempel rok Jehovah nib spiritual!
Ngan N’uf Jehovah u Fithik’ e Falfalan’!
18. Mang fan ni rayog ni ngad falfalan’gad ni ngada nu’fed Jehovah ni yugu aram rogon ni boor e togopuluw nge magawon ni ma yib ngodad?
18 Demtrug ko kad magawongad ara ke yib e togopuluw ngodad ara yugu boch ban’en ma ngad pared ni gad ba falfalan’ ya gad bay u naun rok Jehovah ni fan ni ngad liyorgad ngak. (Isaiah 2:2, 3) Dab mu pag talin ni falfalan’ e sum u gumerchaey. Pi walagdad ni Kristiano nkakrom e ur n’ufed Jehovah u fithik’ e falfalan’ ni yugu aram rogon ni boor e magawon ni ke yib ngorad ma boor ban’en ni ke mul u pa’rad. (Hebrews 10:34) Pi walagdad ko ngiyal’ ney e bod yad.—Matthew 5:10-12.
19. (a) Mang e pi thin ni ma k’aringdad ni ngada nuf’ed Jehovah? (b) Yafas rodad ni dariy n’umngin napan e ma tor ko mang, ma mang e ke mudugilan’dad ngay?
19 Gad gubin ni gad ma pigpig ku Jehovah e ke felan’dad ngay ni ngad folgad ko thin ko Bible ni be yog ni ngan n’uf Got. Boor yay ni be yog ko Revelation e tang ni bay e thin riy ni “Ngan n’uf Jah!” (Revelation 19:1-6) U lan nel’ e verse ko Psalm 150, ma 13 yay e yibe piningdad ni ngad n’ufed Jehovah. Aram ban’en ni yibe pining ko urngin e tin ni kan sunumiy ni ngar uned ko fare tang ni be n’uf Jehovah. Ra nge yog e yafas ni manemus ngodad ma thingarda uned ko re tang ney ni be n’uf Jehovah! Arrogon, kari mus ni piin ni ma n’uf Jehovah ni dab ra talgad e yad ra par ni manemus. Ere ngada dugliyed ni nguuda pared nib chugur ko ulung rok ni bay u gangin e fayleng ya be chugur iyan ko tomur. Ma aram ma rayog ni ngad athapeged ni ngad guyed ni nge lebug e thin ko Psalm 150 ni be gaar: “Gimed urngin e pi n’en nib fos e ngam pininged e sorok ngak Jah. Nguun pining e sorok ngak Jah!”
Uw Rogon ni Ga Ra Fulweg?
◻ Mang fan nib lingagil e girdi’ rok Jehovah?
◻ Mang fan ni pi tapigpig rok Jehovah e ri yad ba falfalan’?
◻ Mang e ma taydad ni gad ba dar ko fayleng?
◻ Mang fa dalip i kanawo’ ni ke aywegdad Got riy ni rayog ni ngad uned ko tin nib m’agan’ ngay?