Report Ko Piin Ni Ma Wereg E Thin U Morngaagen Gil’ilungen Got

Ke Chuw Rok e Moonyan’ ni Dabkiyog ni Nge Suruy Laniyan’

NGONGOLEN e pig e ke suruy laniyan’ bokum milyon e girdi’ u lan in e duw. Machane rayog ni ngan pithigey riy! Aram e n’en ni buch ngak boor e girdi’ nu Efesus ni mach nkakrom. Rogon ni yog e Bible e “boor e piin ni yad ma pig nra kunuyed e babyor rorad nga taabang ngar urfiyed . . . Ereray kanawoen mi i wer e thin rok Jehovah ni be gel i yan.”​—Acts 19:19, 20, New World Translation.

Ku arrogon e ulung ko Kristiano ko ngiyal’ ney ni be yoor iyan e girdi’ riy. Ya bod rogon piyu Efesus ma boor e girdi’ ni be un ngodad e chiney e ur uned ko ngongolen e moonyan’ faram. Aram e n’en ni be weliy boch e thin u morngaagen yu Zimbabwe.

Gogo (Titaw) Mthupha e ke gilbuguwan ni bochan ni ma pig. Girdi’ nu boch e binaw nib palog ni piyu Zambia, nge Botswana, nge yu South Africa e ra yib ko tafalay rok. Miki fil Gogo Mthupha ngak e girdi’ ni ngar manged e n’anga ni aram e togta ni ma pig. Ma yu ngiyal’ ma ra pig me buch ni bod rogon ni ke lemnag!

Reb e Madenom nkakadabul me yib boch e Pi Mich Rok Jehovah nga tafen Gogo Mthupha ya yad be yan u mit e tabinaw iyan. Ke falfalan’ ko pi thin ni ur weliyed u morngaagen e n’en ni micheg e Bible ni ran fl’eg e fayleng nib biech ma mmat’aw, ni dariy e kireb riy. Ke fek fare babyor ni Rayog ni Ngam Par ni Gab Fas u Paradis u Fayleng ma ke adag ni ngar filed e Bible u taabang.a Tomren e bin dalip yay ni kar filed e Bible ma ke tabab ni nge un ko pi muulung.

Ke fil Gogo Mthupha e Bible me tamilang u wan’ ni gelngin e yib rok e pi kan nib kireb ni kar togopuluwgad ko gagiyeg rok Jehovah. (2 Peter 2:4; Jude 6) Ku ke fil ni pi kan nib kireb ney e yad be guy rogon ni ngar pingeged e girdi’ ngar togopuluwgad ku Jehovah nge liyor nib machalbog. N’en ni ma rin’ ni nge yog e salpiy ngak e ma pining e pi kan nib kireb ney, ere mang e ra rin’?

Ke n’ag Gogo Mthupha e pi banod rok nge pi n’en nib l’ag ko ngongol ko moonyan’. Ba muun ngay banen ni ma tay nga lolugen nge “gagey ko garbaw ni ma non,” ni ma fanay ko n’anga ara nge golnag be’. Ba adag Gogo Mthupha ni nge n’ag urngin banen rok nib l’ag ko ngongol ko moonyan’ bochan ni nge yog rok ni nge pigpig ko bin riyul’ mab fos e Got ni aram Jehovah.

Boch e girdi’ u tabinaw rok e kar togopuluwgad ngak ni bochan ni ma aywegrad ko salpiy ni ma yog ngak. Kar weniggad ngak ni nge pi’ fapi chugum ko pig ngorad nib muun ngay gelngin e moonyan’ rok ya nge yog ni ngki fel rogorad. Ke siyeg Gogo Mthupha.

Ke pi’ e ulung rok e ayuw ngak me kunuy dalip tutuw e chugum nge pa’ e pig rok nib ga’ me urfeg ni gubin. Nap’an ni ke yik’ fapi pa’ e pig, me gaar Gogo Mthupha: “Msap! Fare gagey ko garbaw ni ma non e dabi yog ni nge ayuweg ir.”

Munmun me ognag Gogo Mthupha ir ku Jehovah me un ko taufe. Mang e ma rin’ e chiney ni nge yog e salpiy ngak? Ma pi’ e yasay ni chuway. Arrogon, u daken gelngin e thin rok Got ma rayog ni ngam pithigem ko ngongol ko moonyan’. Ke gaar Gogo Mthupha: “Dawori puf rogog ni arrogon biid.”

[Boch e Thin nra Tamilangnag Murung’agen]