“Mpigpiggad Ngak Kristus ni ir fare Masta”

NUM’NGIN chepin e girdi’ ma bokum milyon e girdi’ e kar pared ni yad e sib. Bokum biyu’ e duw faram ma ke gafgow piyu Israel u pa’ yu Egypt. Be weliy e Bible ni ur ted “e girdi’ ni ngi i gelnag e thin ngorad ngar maruwelgad nib gel ya ngar magargad” ma ba gel e maruwel ni un pi’ ngorad ni ngar ngongliyed e rengnga.​—Exodus 1:11, The Jerusalem Bible.

U lan boor e nam ko ngiyal’ ney ma dariy be’ ni be par nib sib nriyul’, machane boor e girdi’ e thingara maruwelgad nib gel mab n’uw nap’an​—ma boch e ra maruwel u fithik’ e gafgow. Ba tomal gilbarad ya yad e sib ko salpiy.

Machane bay mmit e par ni bod e sib ni de tomal. I pining apostal Paul ko piin ni taareb e michan’ rorad ni gaar: “Mpigpiggad ngak Kristus, ni ir fare Masta. (Kolose 3:24) Piin ni ur turguyed ni ngar manged sib rok Kristus e kar toffangad i fek gilbarad nib tomal. Yog Jesus ni gaar: “Mired ngog ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.”​—Matthew 11:28-30.

Ra ngam fek e mat’ rok Kristus ma aram e gathi daki t’uf ni ngam ayuweg e tabinaw rom ko tin nib t’uf rorad. (1 Timothy 5:8) Machane ma pithig e girdi’ ndabkura leked e chugum. Ma par e pi Kristiano nib fel’ rogon ko tin nib t’uf rorad ma dar nameged ni nge yoor e chugum rorad.​—1 Timothy 6:6-10; mu taarebnag ko 1 Korinth 7:31.

Ku ma falfalan’ e pi Kristiano ni ngar lubeged e n’en nib mil fan ngorad ni ngar machibnaged fare “thin nib fel’” ko Gil’ilungun Got. (Matthew 24:14) Re n’ey e ma yibnag e bin riyul’ e falfalan’ nge gapas nga laniyan’uy!

Susun ni ngad pininged e magar riy ni rayog ni ngad “pigpiggad ngak Kristus, ni ir fare Masta”!

[Credit Line]

Pictorial Archive (Near Eastern History) Est.