Piin Fel’ Yangaren, Mpininged E Sorok Ngak Jehovah!

“Mu pininged e sorok ngak Somol u fayleng, . . . gimed e pagel nge rugod, nge piin pilibthir maku er rogon e piin bitir!”​—PSALM 148:7, 12.

1, 2. (a) Mang e dabiyog ni ngan rin’ ni boor e bitir ni manang? (b) Mang fan ni dabi puwan’ e piin bitir ni ke dugliy e gallabthir rorad e tin ni dabiyog ni ngar rin’ed?

PIIN bitir e ma buch ni yad baadag ni ngar rin’ed boch ban’en ni dawori taw nap’an ni ngar rin’ed. Boor i yad e ma yog ngom ko ba uw nap’an mfin rayog ni nge th’ab e kanawo’ nga barba’ ni goo ir ara nge od nge n’uw e nep’ ara rayog ni kol e yap’ ko karrow. Yu ngiyal’, ma ra lemnag reb e bitir ni ri boor ban’en ni ma yog ni nge rin’ e taareb rogon e fulweg riy ni ngan gaar ngak, “Mu son ngam ilal boch.”

² Gimed e piin bitir e gimed manang ni pi gallabthir romed e yad ba gonop ni ngar dugliyed e tin ni nguum rin’ed, ya ra yororiymed ko riya’. Ma ku reb, e ri gimed manang, ni Jehovah e ra felfelan’ ni gimed be fol rok e pi gallabthir romed. (Kolose 3:20) Machane, gimed ma lemnag, ni gowa ra sowath ni nguum sonnaged e ngiyal’ ni ngam tababgad? Gur, urngin ban’en ni baga’ fan e dabiyog ni ngan rin’ nge taw ko ngiyal’ ni kam ilalgad? Ri gathi ireray e tin riyul’! Bay reb e maruwel e chiney ni ri baga’ fan nde taareb rogon nga boch e taw’ath ni gimed be sonnag ni nge yog ngomed. Gimed e piin bitir e rayog nni pag ngam uned ko re maruwel ney fa? Arrogon, gathi kemus ni ngan pagmed ngam uned ngay ya ke piningmed fare Got ni Th’abi Tolang ni ngam rin’ed!

3. Be pining Jehovah e piin bitir ko mang taw’ath, ma mang e pi deer ni ngada fal’eged i lemnag e chiney?

³ Mang maruwel e gadad be weliy murung’agen? Mu lemnag fare kenggin e re article ney ni gaar: “Mu pininged e sorok ngak Somol u fayleng, . . . gimed e pagel nge rugod, nge piin ni pilibthir ma ku er rogon e piin ni bitir.” (Psalm 148:7, 12) Aram e taw’ath romed ni rib baga’: Rayog ni ngam pininged e sorok ngak Jehovah. Faanra kab bitir be’ ma be rus ni nge un ko maruwel fa? Arrogon boch e girdi’. Ngan guy ko mang fan ni aram rogon, ere ngada fal’eged i lemnag dalip e deer. Bin som’mon, mang fan ni ngam pininged e sorok ngak Jehovah? Bin l’agruw, uw rogon ni ngam pininged e sorok ngak nib fel’ rogon? Bin dalip, wuin e ba fel’ ni ngan tabab i pining e sorok ngak Jehovah?

Mang Fan ni Ngan Pining e Sorok Ngak Jehovah?

4, 5. (a) Rogon ko Psalm ni bin 148, mang e n’en ni gad bay riy nrib manigil? (b) Uw rogon ma fapi n’en ni kan sunmiy ni dabiyog ni non ara weliy fan ban’en e ku yad be pining e sorok ngak Jehovah?

⁴ Reb i fan ni baga’ fan ni ngan pining e sorok ngak Jehovah e ir e an Tasunmiy. Fare Psalm ni bin 148 e ra ayuwegdad ni ngad tedan’dad ko pi n’en riyul’ ney. Am susunnag: Faan goma nga ga be chuchugur i yan nga ba ulung e girdi’ ni yad be tang u taabang, ni ba tang nra pug lanin’uy ma rib felfelan’, ma uw rogon ni ga ra thamiy? Faanra thin ko fare tang e ga manang nib riyul’ ma be weliy bogi n’en ni ga manang ni baga’ fan, ma rib felfelan’, ma ra felfelan’nagem fa? Ga ra adag ni ngam fil e thin riy ngam un ngay fa? Boor i gadad e ra rin’ ni aram rogon. Fa bin 148 e Psalm ni be dag nib chuchugur ni nge aram rogom machane kab gel e fel’ riy. Ya re Psalm nem e be weliy murung’agen ba ulung i girdi’ ni boor ni yad urngin ni yad be pining e sorok ngak Jehovah u taabang. Machane ga ra bieg fare psalm, ma ga ra guy ban’en ni gathi ri ma buch. Mang e re n’em?

⁵ Boor mit ban’en ni yad ma pining e sorok ni bay u lan fare Psalm 148 ni der non ma dariy e lem rorad. Ba aray rogon, gad ra bieg murung’agen e yal’, nge pul, nge pi t’uf, nge ayis, nge nifeng, nge burey, nge yungi ted ma yad be pining e sorok ngak Jehovah. Ma uw rogon e pi n’ey ndariy e yafas rorad ni ngar rin’ed ni aray rogon ? (Verses 3, 8, 9) Riyul’, ni taareb rogon ko gek’iy nge tin nu maday ban’en nge pi gamanman nu arow ni ma rin’ ni aray rogon. (Verses 7, 9, 10) Kaam yaliy raen e yal’ ko gonowrug ara kam yaliy e pul ni ke ngoon ni be yan u lan e lang u fithik’ e t’uf ara kam felan’ ga be minmin ko gamanman ni yad be fafel ara kam ngat nga yaan bangi binaw nib fel’ yaan? Aram e kam “rungaag” fare tang ni be pining e sorok ni be yib ko tin kan sunmiy. Urngin ban’en ni ke sunmiy Jehovah e be puguran ngodad ni ir e en Tasunmiy ma gubin ma rayog rok, ma dariy yugu be’ u palpalthib ni ba gel gelngin, ma ba gonop, ni ri ma t’ufegey ni bod ir.​—Roma 1:20; Revelation 4:11.

6, 7. (a) Mang e be weliy e Psalm 148 u murung’agen e tin bay e llowan’ rorad ni yad ma pining e sorok ngak Jehovah? (b) Mang e be k’aringdad ni ngada uned i pining e sorok ngak Jehovah? Mu weliy.

⁶ Fa bin 148 e Psalm e ku be weliy murung’agen e tin ni ke sunmiy Jehovah ni bay e llowan’ rorad ni yad ma pining e sorok ngak. Verse 2, e gad ra pirieg riy ni “salthaw” rok Jehovah, ni aram e pi engel, ni be pining e sorok ngak Got. Verse 11, be yog ni piin ba gel gelngirad , ni aram e pi pilung nge pi tapuf oloboch, e yibe piningrad ni nga ra uned i yog e sorok ngak. Faanra fapi engel ni ba gel e yad ma felfelan’ ni yad ma pining e sorok ngak Jehovah, ma uw rogon ma rayog ni nge yog e girdi’ ni kaygi ga’ fan de t’uf ni nge rin’ ni aram rogon? Ma, verse 12 nge 13, e be yog ni kan pining e piin bitir ni ngar uned i pining e sorok ngak Jehovah. Gur, kan pug lanin’um kam adag ni ngam rin’ ni aram rogon?

⁷ Ngan lemnag reb e fanathin. Faanra bay e fager rom ni rib salap ko gosgos, nge yoloy yaan ban’en, ara musik​—gathi ga ra adag ni ngam weliy murung’agen ngak e tabinaw rom nge pi fager rom? Dariy e maruwar riy. Riyul’, yira fil urngin murung’agen e tin ke rin’ Jehovah e ku ra yib angin ngodad ni aram rogon. Ba aray rogon, be yog e Psalm 19:1, nge 2 ni, lan e lang nib sug ko t’uf e ma k’aring ngan “weliy murung’agen.” Ma gadad, e nap’an ni gad ra lemnag feni maang’ang rogon ni ma rin’ Jehovah ban’en, ma dabiyog ni ngada talgad ni dab ku da weliyed murung’agen e Got rodad ko girdi’.

8, 9. Mang boch i fan ni baadag Jehovah ni ngada pininged e sorok ngak?

⁸ Maku reb i fan ni ngan pining e sorok ngak Jehovah e bochan ni baadag ni ngada rin’ed ni aram rogon. Mang fan? Ya bochan ni ba t’uf rok ni nge pining e girdi’ e sorok ngak fa? Danga’. Gadad e girdi’ e yu ngiyal’ e ba t’uf ni ngan pining e sorok ngodad, machane Jehovah e kab gel feni tolang ngodad. (Isaiah 55:8) Ir e der maruwaran’ ngak ara pi felngin. (Isaiah 45:5) Machane, baadag ni ngad pininged e sorok ngak ma ra felfelan’ ngay. Mang fan? Gad ra lemnag l’agruw i fan. Bin som’mon, e manang ni ba t’uf rodad ni ngada pininged e sorok ngak. Ke sunumiydad ni ba t’uf e thin rok rodad, nib t’uf ni ngada liyorgad ngak. (Matthew 5:3) Ra guydad ni ke fel’ rogodad ko tin nib t’uf rodad ma ra felfelan’nag Jehovah ni bod rogon ni ma guyem e gallabthir rom ni ga ma kay e ggan ni yow manang nib fel’ ngom.​—John 4:34.

⁹ Bin l’agruw i fan, e manang Jehovah ni ba t’uf rok boch e girdi’ ni ngar rungaaged ni gad be pining e sorok ngak. I yoloy apostal Paul e pi thin ney ngak fare pagel i Timothy ni gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Arrogon, nap’an ni ga ra fil murung’agen Jehovah Got ngak e girdi’, ma ga be pining e sorok ngak, ma ku rayog ni nga ra nanged Jehovah. Tamilangan’ ni aray rogon e ra pow’iyrad ko yafas ni manemus!​—John 17:3.

10. Mang fan ni ri gadad baadag ni nguuda pininged e sorok ngak e Got rodad?

¹⁰ Ka ba’ reb i fan ni ngan pining e sorok ngak Jehovah. Sana ka ga manang fare fanathin ni murung’agen e fager rom nib salap. Faan ga ra rungaag ni ke weliy boch e girdi’ e thin ni de riyul’ u murung’agen, ma yad be gathibthibnag e ngochol rok nib fel’, gathi ga ra turguy ni ngu um pining e sorok ngak? Jehovah e aram rogon ni yibe gathibthibnag ko re fayleng ney. (John 8:44; Revelation 12:9) Ere piin nib t’uf rorad e ri yad baadag ni ngar weliyed e tin riyul’ u murung’agen, ni yad be yal’uweg e tin ni ka nog nde riyul’. Ga ra adag ni nga mu dag ni ba t’uf Jehovah rom ma ga pining e magar ngak ma ga baadag ni nge mang Pilung rom, ma gathi Satan ni ir fare toogor rok fa? Rayog ni ngam rin’ urngin e pi n’en nem ni faan ga ra pining e sorok ngak Jehovah. Bin migid e deer, e uw rogon.

Uw Rogon ni Ke Pining Boch e Bitir e Sorok Ngak Jehovah

11. Mang e be dag e Bible ni pi bitir e rayog ni ngari manging’ i pining e sorok ngak Jehovah?

¹¹ Be yog e Bible ni piin bitir e baga’ ni rib manging’ ni ma pining e sorok ngak Jehovah. Baaray rogon, immoy reb e buliyel nu Israel ni kol piyu Syria ngar feked. Ma de rus ni nge machibnag reb e ppin u murung’agen Elisa ni profet rok Jehovah. Thin rok e ke k’aring ba maang’ang, ma re n’em e ke nang boor e girdi’. (2 Kings 5:1-17) Ku arrogon Jesus ni de rus ni i machib u nap’an ni kab bitir. U fithik’ urngin e n’en ni i buch rok ni kab bitir ma rayog ni ngan yoloy nga lan e Bible, me mel’eg Jehovah taareb, ni fa ngiyal’ ni ke gaman 12 e duw yangaren Jesus me yan nga tempel u Jerusalem ma de rus ni i fith boch e deer ngak e pi tamachib nu Israel ma kar gingad nga feni manang fan pi kanawoen Jehovah.​—Luke 2:46-49.

12, 13. (a) Mang e i rin’ Jesus u lan e tempel u nap’an ni ke chuchugur ni nge yim’, ma mang e ke rin’ ko girdi’ u rom? (b) Uw rogon u wan’ Jesus fapi bitir ni kar pininged e sorok?

¹² Nap’an ni ke ilal Jesus, ma ki i pi’ e athamgil nga laniyan’ boch e bitir ni ngar pininged e sorok ngak Jehovah. Ni bod ni, nap’an ni ka in e rran me yim’ Jesus ma baga’ ni ma yan nga tempel u Jerusalem. Be yog e Bible ni rin’ boch ban’en u rom nni “ngat ngay.” Ke tuluf fapi cha’ ni kar ted e gin ba thothup ni bod tafen e moro’ro’. Maku i golnag e piin malmit nge magutgut. Urngin e girdi’ ni yad bay u rom, ni ri baga’ ni pi tayugang’ ko teliw, e susun e ra k’aringrad ni ngar pininged e sorok ngak Jehovah nge Fak, ni fare Messiah. Machane bay e kireban riy, ya boor e girdi’ e ngiyal’ nem ni darur pininged e sorok ngak. Kar nanged ni Jesus e ke l’og Got, machane yad be rus ko pi tayugang’ ko teliw. Yugu aram rogon, ma ba’ ba ulung e girdi’ ni yad be non ni dar rusgad. Ga manang ko yad mini’? Be gaar e Bible: “Ma faani guy e pi tolang ko prist nge pi tamachib ko Motochiyel e pi n’em nrib fel’ ni be rin’ [Jesus ] nge bitir ni yad be tolul ma yad be yog ni ba ga’ lamrad u lan e tempel ni be lungurad, “Ke sorok Fak David!” mi yad damumuw. Ma aram me lungurad ngak [Jesus,] ‘Ga be rungaag e n’en ni yad be yog fa danga’?’”​—Matthew 21:15, 16; John 12:42.

¹³ Be athapeg fapi prist ni ra taleg Jesus fapi bitir ngar th’abed gulungrad nge dab ku ra pininged e sorok ngak. Ke rin ni aram rogon fa? Ri danga’! Ke fulweg Jesus lungun fapi prist ni gaar: “Kam fil ngak e bitir nge bitir ni kabran ni ngar pininged e sorok nib fel’ rogon?” Ba tamilang, ni Jesus nge Chitamangin e yow ba felfelan’ ngay ni be un e bitir i pining e sorok. Pi bitir nem e yad be rin’ urngin ban’en ni dabi siy ni nge rin’ e piin piilal. U lanin’rad ni ka yad ba bitir e be dake urngin ni ke tamilang u wan’rad. Ka ra guyed e re moon ney ni ke rin’ boch ban’en ni rib manigil, nge rogon ni ma non nge feni der rus nge michan’ rok, nge rogon ni ri ba t’uf Got nge girdi’ rok. I ir faanem ni be yog ni ir​—faen ni kan micheg ni “Fak David” ni fare Messiah. Kan taw’athnag fapi bitir ni bochan e michan’ rorad, ma ke lebug e thin ko profet.​—Psalm 8:2.

14. Uw rogon ni nge fanay e piin ni bitir fapi taw’ath ni bay rorad nguur pininged e sorok ngak Got?

¹⁴ Mang e rayog ni ngad filed ko pi n’en nem? Pi bitir nem e ri baga’ angin ni yad ma pining e sorok ngak Jehovah. Baga’ ni ma yog e taw’ath ngorad ni ngar guyed e tin riyul’ nib tamilang mab mom, yad ra weliy e michan’ rorad ni yad ba pasig. Ku aram rogon ni bay e taw’ath rorad ni kan weliy u Proverbs 20:29 ni gaar: “Gamogen e piin kab pagal e gelngirad.” Arrogon, gimed e piin kab pagal e bay e taw’ath romed ni aram gelngimed​—riyul’ ni boor rogon ni ngam pininged e sorok ngak Jehovah. Uw rogon ni ngam maruwelgad ko re taw’ath nem?

Uw Rogon ni Ngam Pining e Sorok Ngak Jehovah?

15. Mang e ra k’aringey, me yib angin ni ngan pining e sorok ngak Jehovah?

¹⁵ Ngan pining e sorok ngak Got nib manging’ e ma tabab u gum’irchaey. Dabiyog ni ngan pining e sorok ngak Jehovah nib manging’ ni faanra ga ma rin’ ni bochan e baadag boch e girdi’ ni ngam rin’. Dab mu pagtalin, fa bin th’abi ga’ e motochiyel ni aram e: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matthew 22:37) Kam nang Jehovah nib fel’ rogon ni bochan ni kam fil e Thin rok? Angin ni ke t’uf Jehovah rom e bochan ni ga ma fil e Thin rok. Rogon ni ngan weliy e re t’ufeg nem e ngan pining e sorok ngak. Nap’an ni n’en ni be k’aringem e ke tamilang ma ke gel ma rayog ni ngam pining e sorok ngak Jehovah u fithik’ e pasig.

16, 17. Mang e ma rin’ e ngongol ko ngan pining e sorok ngak Jehovah? Mu weliy.

¹⁶ U m’on ni ngam mu lemnag ko mang e ga ra yog, ma ga lemnag rogon e ngongol rom. Faan goma nga ba kireb e ngongol rok fare buliyel nu Israel u nap’an Elisa ma dariy e tay fan rok, ara de yul’yul’, ga be lemnag ma rayog ni motoyil fa piin nu Syria ni kar koled ko thin rok u murung’agen e profet rok Jehovah? Sana danga’. Taareb rogon, girdi’ e yad ra adag ni ngar motoyilgad ngom ni faanra yad be guy ni ga be tay farad ma ga be yul’yul’, mab fel’ e ngongol rom. (Roma 2:21) Ngada guyed e n’en ni ke buch.

¹⁷ Reb e buliyel nu Portugal ni 11 e duw rok e ke mada’nag reb e magawon u skul ni ngan madenomnag e pi rran nib togopuluw ko nangan’ rok nib puluw ko Bible. Ke weliy ngak e sensey rok u fithik’ e tay fan ko mang fan ni ke siyeg ni nge un ngay, machane fare sensey e ke moningnag. Ke yan boch e rran, ma fare sensey e ma guy rogon ni nge tamra’nag ni boor yay, ni be gosgosnag e teliw rok. Yugu aram rogon, ma fare buliyel e ka be par ni yugu be tay fan fare sensey. Boch e duw nga tomren, ma ke un ko regular pioneer, ma machib ni gubin ngiyal’. Nap’an reb e muulung nib baga’, me par ni be yaliy e girdi’ ni yibe taufenagrad ma ke poy bagayad. Ireram fare sensey rok kafram! Tomren ni kar gamuchmuchgow, me yog fare pin ngak fare walag ni ppin ni ri dabi pagtalin e ngongol rok fare buliyel ni i skulnag nge rogon ni ma tay fan. I yib reb e Pi Mich nga tabinaw rok, ma fare sensey e ke weliy murung’agen fare buliyel ni i skulnag ni rib fel’ e ngongol rok. Angin ni ke yib, e ke tabab i fil e Bible, ma ke t’ufeg e tin riyul’. Arrogon, ngongol rom e bay gelngin ni rayog ni pining e sorok ngak Jehovah!

18. Mang e rayog ni nge rin’ reb e bitir ni faanra mo’maw’ rok ni ngar tababnaged be’ e sabethin u murung’agen e Bible nge Jehovah Got?

¹⁸ Yu ngiyal’ e ga ma pirieg nib mo’maw’ ni ngam tababnag e sabethin u skul ni murung’agen e michan’ rom fa? Gathi goo gur e aram rogon. Machane, rayog ni ngam guy rogon ni ngam rin’ ban’en nge fith be’ rogon e michan’ rom. Ni bod rogon ni, faanra rayog ni ngan rin’ ni aram rogon, ma mang fan ni dab mu fek boch e babyor nga skul mu um bieg ko nap’an e abich ko misiw ara ngiyal’ ni rayog? Sana ra fith e piin gimed ma skul ko mang e ga be bieg murung’agen. Ma ga weliy ngorad e tin kam pirieg ni ke pug e tafinay rom ko fare ke babyor ni bay u paam, ma sana rayog ni nga mu tababgow ko sabethin. Dab mu pagtalin ni ngam fith boch e deer ngak, ma rayog ni ngam pirieg ko mang e ke michan’ ngay. Mu motoyil ni ga be tay fan, mu dag ngak ko mang e kam fil u Bible. Fapi n’en ni ke buch ko fapi bitir u skul ni ba’ ko page 31 e be dag, ni boor i yad e ma pining e sorok ngak Got u skul. Re n’ey e ma fek i yib e felfelan’ ni ba gel ma ma ayuweg boor e girdi’ ngar nanged Jehovah.

19. Uw rogon me manging’ e machib u mit e tabinaw ni ma ta’ e piin bitir?

¹⁹ Machib u mit e tabinaw e th’abi manging’ ni ngan pining e sorok ngak Jehovah riy. Faanra dawori yog ni muun ngay, ma mang fan ni dab mu nameg nga mu un ngay? Faanra ga be un ngay, maku bay reb e ban’en ni ga be nameg ni fan ngom fa? Bod ni, susun taa bugithin e yibe yog u reb e tabinaw nge reb me ere mu gay boch e kanawo’ ni ga ra mon’og riy, mu fith e gallabthir nge boch e girdi’ ni ke yoor ban’en ni manang. Mu fil rogon ni ngan fanay e Bible ni nge manging’ rogon ni ngam sul ku be’ ni kam machibnag, ngam tababgow ko fol Bible. (1 Timothy 4:15) Ra yoor yay ni um pining e sorok ngak Jehovah ni aram rogon, ma ra yib angin ngom nib gel, ma ra gel e felfelan’ rom ko machib ni ga ma tay.

Wuin e Ngam Tabab i Pining e Sorok Ngak Jehovah?

20. Mang fan nde t’uf ko piin bitir ni ngar lemnaged ni kaygi gel ferad bitir ni ngar pininged e sorok ngak Jehovah?

²⁰ Fa dalip i deer ni kada weliyed ko biney, ma fulweg ko bin tomur e th’abi mom. Mu guy ko mang e be yog e Bible ni rib puluw ni gaar: “Ere mu lemnag e en ni Sunmiyem ko ngiyal’ ni ka gab pagel.” (Eklesiastes 12:1) Arrogon, ngiyal’ ni ngan tabab i pining e sorok ngak Jehovah e chiney. Mom ni ngan gaar: “Kayigi gel fanag bitir ni nggu pining e sorok ngak Jehovah. Dariy ban’en ni gu manang. Nggu son nggu ilal.” Gathi gur e som’mon ni kam lem ni aram rogon. Aram rogon ni yog Jeremiah ngak Jehovah ni gaar: “Somol ni Got, da gu nang rogon e welthin; ya kayigi gel fanag bitir.” I micheg Jehovah ngak ni dariy rogon ni nge rus. (Jeremiah 1:6, 7) Maku arrogon, ndariy ban’en ni ngad rusgad ngay ko ngiyal’ ni gadad be pining e sorok ngak Jehovah. Dariy ban’en nib kireb ni ra yib ngodad ndabiyog rok Jehovah ni nge chuweg.​—Psalm 118:6.

21, 22. Mang fan ni pi bitir ni ma pining e sorok ngak Jehovah e kan taareb rogonnagrad ko waangachal, ma mang fan ni re n’em e be pi’ e athamgil nga lanin’uy?

²¹ Gamad be ta’ mad ngomed e piin bitir, ni dab mu siyeged ni ngu um pininged e sorok ngak Jehovah! Chiney ni ki gimed bbitir e ereray e ngiyal’ ni rib fel’ ni ngam uned ko fare maruwel ni th’abi ga’ fan ni yibe rin’ u fayleng e ngiyal’ ney. Nap’an ni gimed ra rin’ ni aram rogon, ma kam manged bayang ko fare tabinaw ni rib fel’ ni ma pining e sorok ngak Jehovah u palpalthib. Jehovah e rib felfelan’ ko biney e tabinaw ni kam uned ngay. Ngada guyed fare thin ni yog fare psalmist ngak Jehovah ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir. Rogon e waangachal ni bay nri kakadbul, e aram rogon e piin ni pagel ni girdi’ rom.”​—Psalm 110:3.

²² Waangachal ni ma gal ramaen ni ri kakadbul e rib fel’ yaan, arrogon fa? Ma biechnag lanin’uy, ma ma tamilangnag ni dabiyog ni ngan theeg. Aram rogon ni ma guymed Jehovah gimed e piin bitir ni gimed ba yul’yul’ ni ma pining e sorok ngak ko ngiyal’ ney ni ke mo’maw’ e par riy. Ri ba tamilang, rogon ni kam mel’eged ni ngam pininged e sorok ngak Jehovah e ka ri felfelan’nag gum’irchaen. (Proverbs 27:11) Ere, gimed e piin bitir um pininged e sorok ngak Jehovah u rogon nrayog romed!

Uw Rogon ni Ngam Pi’ e Fulweg?

• Mang boch ban’en ni baga’ fan ni arfan ni ngan pining sorok ngak Jehovah?

• Mang e be dag e Bible ni piin bitir e rayog ni ngar manging’gad i pining e sorok ngak Jehovah?

• Uw rogon ni nge pining e piin bitir e sorok ngak Jehovah e ngiyal’ ney?

• Wuin e ra tabab e piin bitir i pining e sorok ngak Jehovah, ma mang fan?

[Pictures on page 25]

Faanra fager rom e ba cheg u boch ban’en, gathi ga ra weliy murung’agen ngak boch e girdi’?

[Picture on page 27]

Piin gimed ma skul e sana yad ra adag e tin ke mich u wan’um

[Picture on page 28]

Faanra ga baadag ni ngam mon’og ko machib, mu fith reb e walag ni ke yoor ban’en ni manang nge ayuwegem