Ngan Pining e Sorok ngak Jehovah ni Gubin e Rran
1. Mang e baadag e pi tapigpig rok Got ni ngar rin’ed ma mang fan?
1 I turguy David ni Pilung ni nge pining e sorok ngak Jehovah ni “gubin e rran,” ndariy n’umngin nap’an. (Ps. 145:2, 7, 21) Ku er rogodad ni bay rogon ni ngad pininged e sorok ngak Jehovah ni gubin e rran.—Ps. 37:10; 145:14, 18; 2 Pet. 3:13.
2. Uw rogon nrayog ni nge pining chon e tabinaw e sorok ngak Jehovah ni gubin e rran?
2 U Lan e Tabinaw Rodad: Pi babyor rodad e bay e thin riy ni ma gelnag e michan’ rodad ni yima fanay u nap’an ni yibe beeg e thin nu Bible ni fan ko gubin e rran, nge nap’an ni yibe fol Bible ni Tabinaw, ngu nap’an ni yibe fal’eg rogoy ni fan ko pi muulung rodad. Boor e tabinaw ni yad ma guy rogon ni ngar abichgad u taabang taab yay u gubin e rran. Ra aram rogon ma rayog ni ngan sabethin u taabang min pining e sorok ngak Jehovah. Ba ga’ fan ni nge tababnag e gallabthir e sabethin, ya aram rogon ni ngan chuguliy e bitir min “fonownagrad nrogon girdien Kristus.”—Efe. 6:4; Deut. 6:5-7.
3. Mang e rayog ni ngad rin’ed pi walagdad u nap’an ni gad bay u taabang?
3 Nap’an ni Gadad Pi Walagdad: Nap’an ni gad be un ko machib fa muulung, ma rayog ni ngad pininged pi walagdad e sorok ngak Jehovah u taabang. (Prov. 15:30; Fil. 4:8; Heb. 13:15) Goo ba t’uf Jehovah rodad, ere ba mom ni ngad ted fan pi fel’ngin u nap’an ni gad be sabethin.—Ps. 106:1.
4. Uw rogon nrayog ni ngam pining e sorok ngak Jehovah?
4 Nap’an ni Yibe Non ngak e Piin de Michan’rad: Sana dabiyog ni ngad uned ko machib ni gubin e rran, machane rayog ni ngad weliyed murung’agen Jehovah nge tin nib m’agan’ ngay ngak e piin ni gad ma maruwel u taabang, ara girdi’ u skul nge yugu boch e girdi’. Re n’ey e ra yognag e athap ngak e piin riyul’ ni yad baadag e machib. (Ps. 27:14; 1 Pet. 3:15) Immoy reb e walag nib pin ni yan ko chur me machibnag be’ u skoki. Kari fel’ laniyan’ facha’ ni ke machibnag ma aram me pi’ e address nge namba ko telefon rok ngak fare walag ni ngar mada’gow bayay. Be gel i yan e magawon u fayleng ma girdi’ rok Jehovah e yad be weliy fare “thin nib fel’” ngak e piin ni yad ra motoyil ngay. Re n’ey e ra yognag e athap ngorad ma ra k’aringrad ni ngar pininged e sorok ngak Jehovah.—Isa. 52:7; Rom. 15:11.
5. Mang fan ni gad ba adag ni ngad pininged e sorok ngak Jehovah, ma mang angin nra yib riy?
5 Ri be felfelan’ Jehovah ni be rung’ag lungun e pi tapigpig rok ni yad be pining e sorok ngak ni gubin e rran! Tin ni ke sunumiy Jehovah ni yibe guy e be pining e sorok ngak. Ku rayog ni ngad n’ufed Jehovah u lan e tabinaw rodad ngu lan e ulung nge nap’an ni gad be non ngak e piin ndawor ra manged girdi’ rok.—Ps. 19:1-4.