Dabki N’uw Nap’an Me M’ay Urngin e Amith Nge Gafgow!

Ba’ ba ngiyal’ u nap’an e yafas rom, ni dabisiy ni ke lungum, ‘Mang fan ni ke yoor e amith nge gafgow?’ Ya ke bokum biyu’ e duw, ni ke gafgow e girdi’ nib gel ni bochan e mahl, gafgow, pi n’en ni ma buch nib gel e gafgow riy, nge cham, ngongol ni de mat’aw, nge m’ar, nge yam’. Fa bin ke yan e raay e duw e ke guy e girdi’ e amith nge gafgow nib gel ko tin i buch kakrom. Gur ku ra m’ay e pi n’eney?

Fulweg riy nra fal’eg lanin’uy e arrogon, ni dabki n’uw nap’an! Thin rok Got, ni fare Bible, e gaar: “Piin nib kireb e bay ra chuwgad . . . Machane piin nib sumunguy e yad e bay ra tafanayed e fayleng, ma rriyul’ ni yad ra pirieg e falfalan’ nib gel u fithik’ e gapas.” Ni uw n’umngin nap’an? “Piin nib mat’aw e yad ra tafanay e fayleng, mar pired riy ni manemus.”​—Psalm 37:10, 11, 29, New World Translation.

Tomuren ni ra chuweg Got e kireb nge amith, ma fayleng e yira thiliyeg rogon nge mang ba paradis. Ma aram e girdi’ e rayog ni nge par ni manemus nib flont mab fel’ fithik’ i dow mab falfalan’. Thin rok Got e ke yog u m’on ni gaar: “[Got] e bayi chuweg urngin e lu’ u owcherad, ma dab ku unim’, ma dab ki i kireban’uy ma dab kuun i yor fa kuun i amith.”​—Revelation 21:4, NW.

Re fayleng ni biech nem, e ki mada’ ko piin kar mad e bay kun fasegrad nga kur uned ko pi taw’ath nem: “Ma yira faseg e yam’ ni piin nib mat’aw nge piin ni de mat’aw.” (Acts 24:15, NW) Aram fan ni rayog ni nge yog Jesus Kristus ngak be’ nib kireb ni ke kalngan’ ko kireb rok me dag e michan’ rok ngak ni gaar: “Ga ra moy rog u Paradis.”​—Luke 23:43, NW.

Mang Fan ni Ke Tabab e Amith nge Gafgow?

Bochan ni n’en nib m’agan Got ngay ni fan ko girdi’ e yafas nib pag feni fel’, me ere mang fan ni ke pag nge tabab e amith nge gafgow? Mang fan ni ke pag ni rib n’uw nap’an?

Nap’an ni sunmiy Got Adam nge Efa, Me sunmiyrow ni yow ba flont ni dowef nge lem rorow. Me tayrow ngalan ba milay’ ni aram e paradis me pi’ ngorow e maruwel nib falfalan’ ni ngar rin’ew. I gaar fare Bible: “Me guy Got urngin e tin ke ngongliy, ma mu sap! rib manigil.” (Genesis 1:31, NW) Faan manga ra folgow ku Got, ma yow ra diyennag e bitir nib flont, ma fayleng e ra mang ba fayleng nib paradis, ni gin nra par e girdi’ riy ni manemus u fithik’ e gapas nge falfalan’.

I ta’ Got nga laniyan’ Adam nge Efa fare taw’ath ni rib fel’ ni aram fare puf rogon nni ngongliy ni bang ko girdi’. Gathi yow e robot ni dariy e lem rok. Machane, rogon ni nge ulul e falfalan’ rorow e ba mil fan nga rogon ni yow be fanay e puf rogon nib mat’aw​—ni ngan fol ko motochiyel rok Got. I gaar Got: “I gag, Jehovah, ni gag e Got romed, ni An be fil ngomed rogon ni nge fel’ rogmed, fa Ani ir tapgin ma gimed be yan ko kanawo’ ni thingar mu marod riy.” (Isaiah 48:17, NW) Ngan kirebnag i fanay e puf rogon e rab angin ni buch waathan nib gel, ni bochan ni girdi’ e dani sunmiyrad ni ngar pired rorad ni dariy rogon Got ngorad. Fare Bible e gaar: “Girdi’ nu fayleng e de mil fan kanawoen ngak. De mil fan ngak e girdi’ ni be yan ni nge gagiyegnag i wuf ay.”​—Jeremiah 10:23, NW.

Ba kireban’, ya gal ni som’mon e gallabthir rodad e ra lemnigew ni rayog ni ngar pirew rorow ni dakuriy rogon Got ngorow ma ku ra fel’ rogorow. Machane nap’an ni ra chuw u tan e gagiyeg rok Got, ma daki ta’row ni yow ba flont me mul e ayuw rok u pa’row ma dakur flontgow. Ma aram mar tabab ni ngar pilibthir i yan nge taw ko ngiyal’ ni kar pilibthirgow ma ra m’ow. Bochan ni gadad pi fakrow ma ri bod e bitir ni ma fil e gallabthir rorad ni bochan e yow e ra gargelegew yad, ke af ngodad e dan flont nge yam’.​—Roma 5:12.

Fare N’en nib Ga’ Fan​—Mini’ e Bay Mat’awun ni Nge Gagiyeg

Mang fan ni de li’ Got Adam nge Efa mi ki ngongliy yugu l’agruw e girdi’? Ya bochan ni gelngin Got nib th’abi gel u palpalthib, ni aram e, mat’awun ni nge gagiyeg, e kan togopuluw ngay. Fare deer e, Mini’ e bay mat’awun ni nge gagiyeg, ma gagiyeg ku mini’ e ba mat’aw? Rogon ni yibe guy e tin ke yan, Ma gur rayog ni rin’ e girdi’ ban’en nib fel’ boch rogon ni faanra der gagiyegnagrad Got? Bochan ni ke pi’ Got e tayim nib gaman ngak e girdi’ ni ngar gayed rogon nib puf rogorad ni yad rorad ma gathi tan e gagiyeg ku Got, bayi fal’eg Got reb e gagiyeg ni taab yay me par ni manemus ni demtrug ko ba fel’ rogorad u tan e gagiyeg rok ara birorad. Ya tayim ni kan pi’ e thingari gaman ni nge gay e girdi’ urngin mit e am, social, economic, nge rogon e teliw nib dar ko gagiyeg rok Got.

Mang angin ni keb? Bokum biyu’ e duw u chepin e girdi’ ni ke dag e mich riy ni be yoor e gafgow nge amith i yan. U lan fa bin baaray e raay e duw ni ke yan ma tabinaw ko girdi’ e ke pirieg e bin tha’bi gel e amith nge gafgow. Bokum milyon e kan li’rad kar m’ad u nap’an e bin l’agruw e mahl ko fayleng. Boor ko 100 e milyon e kan li’rad ko mahl kar m’ad. Ngongol ni kireb nge bugel e ke garer. Falay nib kireb ni yibe fanay e yibe rin’ u gaangin yang e fayleng. M’ar ni ma af ko par ko pumoon nge ppin e ka be garer i yan. Yu ragag e milyon e be yim’ ko uyungol nge m’ar u reb e duw. Yafas ko tabinaw nge felngin pumey nib fel’ e be lul’ i yan nga but’ u gubin yang. Dariy e am ko girdi’ ni ba’ e fulweg rok ko pi magawon ney. Ma dariy reb ni ke chuweg e pilibthir, nge liliy, nge yam’.

Ra rogon e girdi’ e ri bod ni ke ma’y i yog ko Bible ni fan ko re ngiyal’ rodad ney. Thin rok Got e ke dag ni napdad e ir e “tin tomuren e rran” ko re m’ag ney ni ngiyal’ “ni ke mo’maw’ e par riy e bayi taw ngaray.” Ma ri bod rogon ni yog e Bible, ni ‘girdi’ nib kireb nge piin yad be dake girdien Kristus e bayi gel farad kireb.’​—2 Timothy 3:1-5, 13.

Gafgow nge Amith e Ke Chugur ni Nge Mus

Urngin e mich ni ke m’ug ni kad chugurgad nga tungun e n’en ni rib kireban’ ni i gay e girdi’ rogon ni ngar pired rorad ni dakuriy rogorad ngak Got. Ka rin’ dag ni rib tamilang ni gagiyeg ko girdi’ nib dar rok Got e ri dabiyog ni nge fel’. Kemus ni gagiyeg rok Got e ra yibnag e gapas, nge falfalan’, nge fel’ fithik’ i dowey, nge yafas ni manemus. Ere kireb nge gafgow nge amith ni ke pag Jehovah e ke chugur nga tungun. Dabki n’uw nap’an meb Got nga fithik’ e pi n’en be rin’ e girdi’ nge gothey ni polo’ e re m’ag ney ni de fel’.

Yiiy nu Bible e gaar: “Ngiyal’ ko pi pilung nem [gagiyeg ko girdi’ ni bay e chiney] ma fare Got nu tharmiy e bayi fal’eg rogon reb e gagiyeg [u tharmiy] ni ri dabiyog ni ngan kirebnag. . . . Ra gel me taleg urngin e gagiyeg [pi gagiyeg ni ba’ e chiney], me ir rok e bayi par ni dariy n’umngin nap’an.” (Daniel 2:44, NW) Ngan tamilangnag gelngin Jehovah nib th’abi gel, nge mat’awun ni nge gagiyeg ko gagiyeg rok, nu tharmiy e ir kenggin e machib nu Bible. Nap’an ni yog Jesus, bang nib ga’ fan ko pow ko “tin tomuren e rran,” me yog ni gaar: “Re thin ney nib fel’ ni murung’agen gil’ilungun e ran machibnag u gaangin e fayleng ni nge urngin e nam me nang; mfini yib e tomur.”​—Matthew 24:14, NW.

Nap’an nra yib e tomur, mini’ e ra magey nib fas? I fulweg e Bible ni gaar: “Piin ni yad ba yal’uw e yad ra par u fayleng, ma piin ni dariy e kireb rorad e yad e piin ni yad ra magey riy. Ma piin nib kireb, e bay ni chuwegrad u fayleng.” (Proverbs 2:21, 22, NW) Piin ba yal’uw e piin ra nang e tin nib m’agan’ Jehovah ngay mar rin’ed. Jesus Kristus e gaar: “Baara’ ira’ e yafas ndariy n’umngin nap’an, ni aram e nge tamilangan’ e girdi’ riy ni karimus ni gur e bin riyul’ e Got, mi yad nang ko mini’ Jesus Kristus ni ir e kam l’og ke yib.” (John 17:3, NW) Arrogon, “fayleng e bayi chuw . . . , machane ani ra rin’ e tin nib m’agan’ Got ngay e ra par ni manemus.”​—1 John 2:17, NW.