Bin L’agruw e Deer: Mang e Ra Buch u Nap’an Nra Gum’?

NAP’AN ni kab pagal Roman ma immoy reb e fager rok nib fel’ e tha’ u thilrow ni yim’ u nap’an ni chafin e karrow. I yog ni gaar: “Kari kireban’ug ko n’en ni buch ko fager rog. Ma boor e duw nga tomuren, ma gu ma lemnag ko mang e ma buch rodad u nap’an ni kad m’ad.”

Mang fan nib puluw ni ngan fith e re deer ney? Yam’ ni ma tay e girdi’ e gowa ban’en nsusun dabi buch. Ya demtrug yangaren be’ ma dabun ni nge yim’. Maku bay boch e girdi’ ni yad be tamdag ko n’en nra buch u nap’an ni ke yim’ be’.

Mang e ma yog boch e girdi’ u murung’agen e re n’ey? Boor e girdi’ nib mich u wan’rad ni nap’an nra yim’ be’, ma bay bang u downgin ndabi yim’. Mab mich u wan’rad ni piin nib fel’ e yira tow’athnagrad ko par u tharmiy, ma piin nib kireb e yira gechignagrad ni manemus ni bochan e denen rorad. Maku bay boch e girdi’ ni ma lemnag ni nap’an nra yim’ be’, ma aram e daki moy ma ra munmun min pagtalin.

Mang e be tamilangnag e pi fulweg ney? Bin som’on e fulweg e be tamilangnag ni nap’an nra yim’ be’, ma gathi riyul’ ni ke yim’. Bin l’agruw e fulweg e be tamilangnag ndariy fan e yafas rodad. Ma piin nib mich u wan’rad e re thin ney e bay fare lem rorad ni bay e riya’ riy ni aram e ngan ‘abich ma ngan garbod, ya bayi gabul ma kad m’ad.’—1 Korinth 15:32.

Mang e be fil e Bible? Dariy bang u Bible ni be yog ni nap’an nra yim’ be’ maku bay bang u downgin ni kab fas. I thagthagnag Got nga laniyan’ Solomon ni Pilung ni nge yoloy ni gaar: “Piin nib fos e yad manang ni bay ra m’ad, machane piin nib yam’ e dariy ban’en ni yad manang.” (Eklesiastes 9:5) Piin nib yam’ e “dariy ban’en ni yad manang,” ya dar nanged e n’en ni yibe rin’ u charrad. Ma dabiyog ni ngar thamiyed ban’en ara ra ngongliyed ban’en. Ere, dabiyog ni ngar ayuweged ara ngar magawonnaged e piin ni yad ba fas.

Ba thil e n’en ni ma lemnag e girdi’ ko n’en nib m’agan’ Got ngay, ya baadag ni ngad pared ni gad ba fas ndariy n’umngin nap’an. I sunmiy Adam ni aram e bin som’on e girdi’ nrayog rok ni nge par nib fas u fayleng ndariy n’umngin nap’an. Kemus e ngiyal’ ni weliy Got murung’agen e yam’ ngak Adam e nap’an ni be tamilangnag wenegan nra yib ngak ni faanra dabi fol ko motochiyel rok. I motochiyelnag ngak Adam ni dabi kay wom’ngin fare ke gek’iy ya faan ra kay ma ra “yim’.” (Genesis 2:17) Ere, faanra fol Adam nge Efa, ma rayog ngorow e yafas ni manemus u fayleng nge gubin pi fakrow ni yad ba yul’yul’ ngak Got.

I mel’eg Adam ndabi fol ko motochiyel rok Got, me yim’ ni bochan ni ke denen. (Roma 6:23) Nap’an ni yim’ ma dakuriy bang u dow nib fas. Ere, i yog Got ngak ni gaar: “Thingari yib e athuw u dakenam ma ga maruwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul riy ko but’ ni ir e ni ngongliyem ngay. Ni ngongliyem ko but’, ere bay kum ngal’ ni but’ bayay.” (Genesis 3:19) Ere, bochan ni kad bad rok Adam, ma aram fan ni ke af e denen nge yam’ ngodad.—Roma 5:12.

Yugu aram rogon ni mel’eg Adam ni nge th’ab e motochiyel rok Got, machane rayog rok Got ni nge lebguy e n’en nib m’agan’ ngay, ni aram e nge yoor pi fak Adam ngar suguyed e fayleng. (Genesis 1:28; Isaiah 55:11) Ma dabki n’uw nap’an ma ra faseg Jehovah e piin ni kar m’ad. I weliy apostal Paul e n’en nra buch u nap’an ni gaar: “Bayi faseg urngin e girdi’ ko yam’, ni tin nib fel’ [“mat’aw,” NW] nge tin nib kireb [“de mat’aw,” NW].”—Acts 24:15.

Faanra ga baadag ni ngam nang boch murung’agen e n’en ni ma buch u nap’an ni ke yim’ be’, ma rayog ni ngam guy e guruy ni 6 ko fare ke babyor ni Mang e Ri Be Fil e Bible? Maku rayog ni ngam downloadnag ko www.jw.org

[Kahol ko page 7]

Mang e Ke Yog Jesus u Murung’agen e Yam’?

De puluw u wan’ Jesus e n’en ni yog e pi tayugang’ ko teliw kakrom ni yad be machibnag ndariy e fas ko yam’. (Luke 20:27) Maku de fil ko girdi’ ni bay bang u dowey nra par nib fas u tomuren ni ke yim’ be’. Machane, baaray e pi n’en ni ir e ke fil.

Nap’an nra yim’ be’ ma bod ni be mol. I yog Jesus murung’agen e yam’ ni tay Lazarus ni fager rok ni gaar: “Fager rodad i Lazarus e ke mol, machane bay gu wan gu pug.” Ma de tamilang u wan’ pi gachalpen Jesus e n’en ni yog ngorad. Ere, kar rogned ngak nra gaargad: “Somol, faanra be mol ma bayi gol.” Me tamilangnag e Bible ni gaar: “Machane aram e be yip’ Jesus fan ni ke aw e fan rok Lazarus; ma yad be finey ni aram e be yog Jesus ni be mol Lazarus. Ma aram me ri yog Jesus ngorad nrib tamilang ni gaar, ‘Ke aw e fan rok Lazarus.’”—John 11:11-14.

Yira faseg e piin ni kar m’ad. Nap’an ni taw Jesus ko binaw rok Lazarus, me pi’ e athamgil nga laniyan’ Martha ni walagen ni gaar: “Bay ni faseg walagem ko yam’.” Ma aram me micheg e re bugithin ni baaray: “I gag owchen e fos ko yam’ nge yafos. Yigu ra ke yim’ be’ ni gub mich u wan’ ma ra fos.” N’en ni micheg Jesus e gathi yugu bugithin ndariy fan. Ya ke yag ni nge faseg Lazarus ko yam’ ni yugu aram rogon ni ke gaman aningeg e rran nga tomuren ni ke yim’, ma boor e girdi’ ni kar guyed e n’en ni ke buch.—John 11:23, 25, 38-45.

I tamilangnag Jesus ngak apostal John e n’en nra buch boch nga m’on u nap’an ni yira faseg e piin ni kar m’ad. Ke weliy murung’agen ba ngiyal’ nra taw ngay ni gubin e piin ni kar m’ad e yira fasegrad ko yam’.—Revelation 20:13.