Fare Bible e Reb e Babyor nib Lingagil

Kan nog ni aram fare babyor ni th’abi yoor ken ni kan wereg u fayleng, ma ri arrogon. Ya dakuriy reb e babyor ni bod e Bible ni yibe poy ma yibe chaariy ni aram rogon. Sogonapan aningeg bilyon ken ni kan wereg (ni boch e ke mus ni yu yang riy ma boch e gangin) ni boor ko 2,000 e thin.

Machane ban’en ni kab fel’ riy ko uw urngin ken e Bible ni kan wereg e be yog u Bible ni thin rok Got e bay riy. “Ya urngin e thin ni bay u lan e babyor nib thothup e Got e thagthagnag nga laniyan’ e girdi’ ngar yoliyed nga babyor,” aram e n’en ni yoloy apostal Paul ni ir e Kristiano. (2 Timothy 3:16) Mang fan e re n’ey? Fapi thin ni “Got e thagthagnag” (Greece, the·oʹpneu·stos) e ma sor fan ko “ke pogofan Got.” Ma reb e thin nu Greece nib chuchugur fan ngay e pneuʹma, ni aram e “kan ni thothup.” Ya fare kan ni thothup rok Got e ke k’aring e girdi’ ni bod ni be pogofan nga dakenrad, ni aram e n’en ni yib riy e Thin rok Got ma gathi girdi’. Arrogon, boor e girdi’ ni ur filed e Bible e ur gingad ngay ya urngin e thin riy e ba puluw reb nga reb, ma ba puluw ko science, ma ba yul’yul’ e piin ni ur yoloyed e thin riy, ma n’en nth’abi ga’ fan e pi thin ko profet ni ke lebug​—urngin e pi n’ey e ke micheg ngak bokum milyon e girdi’ ni re ke babyor ney e yib e thin riy u bang ni kab tolang ngak e girdi’.a

Machane uw fene gel ni ke pow’iy Got rogon ni kan yoloy e Bible? Boch e girdi’ e ma yog ni ke yog urngin e thin riy ni reb nge reb. Ma yugu boch e ma yog ni ke mus ni ke thagthagnag nga laniyan e girdi’ ma de yog urngin e thin riy. Machane dabiyog ni ngan nog taareb riy ni ri aram rogon ya “boor kanawoen ni i non ngak pi chitamangidad u l’ugun e pi profet.” (Hebrews 1:1; mu taarebnag ko 1 Korinth 12:6.) U lan e bin migid e thin ma yira yaliy boch e kanawo’ ni i non Got ngak fa 40 e girdi’ nge boch ni ur yoloyed e thin ko Bible.

[Boch e Thin nra Tamilangnag Murung’agen]