Acrobats ko Pi Burey

EN-GEDI fithingan reb e mach nkakrom nge fithigan ba ted ni be liyeg ma bay ko ba’ ni ngal u dape l’ay ko fare Day ni Yam’. Gin’ey e manigil ko kaming nu burey ni bay ko re sasing ney ya boor e malang nge war u sigreen e burey.

Ereray mit e gamanman ni yibe ngat ngay. Ngad pithiged e Bible ma ngad filed morngaagen e re gamanman ney.

“Pi Burey nib Tolang e Fan ko Kaming nu Burey”

Aram e n’en ni be yog ko Psalm. (Psalm 104:18) Fapi kaming nu burey e bay rorad e pi n’en nib t’uf ni nge yog ni ngar pared ko yu gin nib tolang! Ri yad ba passig ko mithmith, ere rayog ni ngar ranod u daken e malang nib machreg ma dariy e marus rorad. Ya arrogon ni kan fl’eg ayrad. Ya bay bang riy ni rayog nib m’ag nga tomalngin fare kaming, ma aram e rayog ni nge chichiy ay ko malang u nap’an ni be sak’iy ara be yan ko yu gin nib wen’in.

Pi kaming nu burey e ku rayog ni ngar pared nib thabthabel nib fel’ rogon. Rayog ni ngar oggad nga lang mi yad taw nga bang nib palog fa nga daken bangi war ni gangin e kari mus ni chi aningeg i ay fare kaming e ra taw ngay.Reb e biologist ni Douglas Chadwick fithingan e ke guy yugu mmit e kaming nu burey ni be thabthabelnag ir ni nge siyeg i par u daken e war ni kayigi achichig ndabiyog ni nge chelchel u daken. Be gaar: “Tomren ni ke guy e bin migid e war ni 400 e fit u p’eening, me tay fare kaming e gal ni m’on i ay nib mudugil me fek e gal tomur i ay nib sagaal nga daken lolugen u downgin e war ni gowa nge flip. Nap’an nug tel e pogofan rog me yan fare kaming nu burey nge mada’ ko ngiyal ni ke tay e gal ni tomur i ay nga but’ nib sap ko fa gin ni ka fin gi yib riy.” Dariy e maruwar riy fan ni kan pining e acrobats ko pi burey ko pi kaming nu burey ney.

Ga Manang ko Mingyal ni ma Gargel e Kaming nu Burey?’

Kaming nu burey e ba gamanman nib tamra’. Yad ma par nib dar ko girdi’. Ba mo’maw ko girdi’ ni ngar chuchugurgad ngorad ni ngar guyed rogon ni yad be yan u daken e burey. Fa en ni ga’ ko “pi gamanman u daken reb e biyu’ e burey” e bay mat’awen ni nge fith ku Job ni gaar: “Ga manang e ngiyal’ ni be gargel e kaming ni ma par u daken e burey?”​—Psalm 50:10; Job 39:1.

Ke tay Got nga lan e maney’ ko kaming nu burey ni ppin e ngiyal’ ni nge gargel. Ma gay bang ni rayog ni nge gargeleg ta’reb fa la’row i fak riy u tomren e May fa June. In e rran ni ka fin gargelnag e bitir ma ke cheg ni nge yan u but’.

“Ba Hind nib T’uf ma ba Kaming nu Burey nib Fel’ Yaan”

Solomon ni Pilung nib gonop e yog ko piin figringiy ni gaar: “Mu falfalan’ ko en ni kam leengiy nap’an ni gab fel’ yangaren, ya ir ba hind nib t’uf ma ba kaming nu burey nib gamog.” (Proverbs 5:18, 19) Gathi be moningnag e piin ppin ko pi thin ney. Ya be tamilangnag Solomon rogon fene fel’ yaan, mab gamog ni ma yan nge yugu boch ban’en nib fel’ e pi gamanman ney.

Fare kaming nu burey e bagayad u fithik’ fa bokum i bokum e “yaal nib fas” ni ma micheg e gonop rok e An Tasunumiy urngin ban’en. (Genesis 1:24, 25) Gathi gad ba falfalan’ ni ke taydad Got u fithik’ boor e gamanman ni ke sunumiy nib fel’ fa?

[Credit Line]

Courtesy of Athens University