Mini’ E Rayog Ni Ngam Taga’ Nga Daken Ko Tin Ni Ke Yog?

NAP’AN e duw ni 1893 ma ke muulung 74 e piin ni social commentator u Chicago World’s Fair ni ngar puruygad u morngaagen e gabul nge langleth. (Bay yaan e gin’em u lang.) Ur sapgad nga m’on raay e duw ko 1993, mar rogned ko ra uw rogon e par ko ngiyal’ nem ni gaar: “Boor e girdi’ e ra par nge gaman 150 e duw rorad.” “Ra buch uw e kalbus ma daki t’uf ni nge dar e mabgol.” “Ra mom boch e yaram ko am, ya nap’an ni be fel’ ban’en iyan ma be mom boch rogon ni ngan ayuweg.”

Ku arrogon reb e babyor ni kan fl’eg ko duw ni 1967 ni The Year 2000 e ke yiiynag ni gaar: “Nap’an nra taw ko duw ni 2000, ma computer e ra taareb rogon ko girdi’ fa ra fel’ boch ko pi n’en ni ra rin’ ni ‘bod e girdi’’ ko tafinay, maku sana ra fel’ boch ko pi n’en nrayog ni ngan lemnag ara ngan fl’eg nib fel’ yaan.” “Dabi siy ni ra moy e masin ni robot ni be rin’ e maruwel u tabinaw u nap’an e duw ni 2000.”

Dabiyog ko girdi’ ni ngar nanged e n’en nra buch gabul nge langleth ma re n’ey e ba math’ keru’ ku Got. Susun, mu taarebnag ko pi n’en ni kan yiiynag u morngaagen e ngiyal’ ney u lan e Bible ni 20 e chibog u m’on riy: “Bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri baga’ farad; ma bay urogned e thin nib kireb ngak e girdi’, ma bay dabkur folgad rok e gallabthir rorad, ma bay dab kur pininged e magar ngak be’ u lanin’rad, ma bay dabkur liyorgad ngak Got; ma bay dabkur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad; ma bay ur dake yad be liyor ngak Got, machane bay ra pied keru’rad nga gelngin.”​—2 Timothy 3:1-5.

Re thin ko profet ney ni bay ko Bible u morngaagen e “tin tomren e rran” e ke mus ni taareb ko boor e thin ni ke lebug ko ngiyal’ ney. Kan yiiynag ko Thin Rok Got ni “fare pow” ko ngiyal’ nra moy Jesus e ba muun ngay e mahl u gubin yang u fayleng, nge uyungol, nge m’ar ni ma af nib machreg, nge durru’, maku ran machibnag fare thin nib fel’ ko Gil’ilungun Got u gubin yang u fayleng.​—Matthew 24:3-14; Luke 21:11.

Bochan ni rib mutrug ni ra lebug urngin ban’en ni micheg Got ma aram me yog be’ ni ke yoloy e thin ko Bible bokum e chibog faram ni gaar: “Dariy taareb e thin nib fel’ ni yog Jehovah ni Got romed ngomed ni de lebug. Ya urngin ma ke riyul’ ni fan ngomed. Dariy taareb e thin ni yog ni de lebug.”​—Joshua 23:14, New World Translation.

Arrogon, rayog ni nge mich u wan’dad ni urngin e n’en ni yog Got e ra riyul’. Gil’ilungun Got e ra chuweg e m’ar, nge bugel, nge drug addiction, nge bilig, nge mahl​—fayleng ni polo’ e ra paradis. (Psalm 37:10, 11, 29; Revelation 21:3, 4) Rayog ni ngam taga’ nga daken e re thin ko profet ney ni ra lebug! Ya ma yib rok e An Tasunmiydad ma “der ma ban.”​—Titus 1:2; mu taarebnag ko Hebrews 6:13-19.

[Credit Line]

Cleveland State University Archive