Ngan Dag e T’ufeg ko Piin nib T’uf e Ayuw Rorad
KAN TAW’ATHNAG e pi Kristiano ya kan tay chilen ngorad ni ngar daged e t’ufeg ko pi walagrad ni pumoon nge ppin nib t’uf e ayuw rorad. (1 John 3:17, 18) Yoloy apostal Paul ni gaar: “Urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wan’uy ngak Kristus.” (Galatia 6:10) Reb e walag ni pumoon ni ke chugur ko aningeg i ragag e duw ni ke pigpig ku Jehovah e ke nang e t’ufeg ko pi walag ko Kristiano u nap’an ni ke m’ar leengin me yim’. Ke yoloy ni gaar:
“Kug ayuweg leengig u tabinaw u nap’an nib m’ar me ere de yog ni nggu un ko maruwel ni ke chugur l’agruw e pul. Kari baud lanin’ug ya pi fager ko ulung e kar ayuweged gamow! Boor e salpiy ni ayuw ni kan pi’ ngomow—‘ni ngan ayuweg i pi’ puluwon boch ban’en nib t’uf,’ aram rogon ni kan tay ko pi babyor ni bay e salpiy riy—ma aram e ke yog ni ngan pi’ puluwon e mortgage nge gamig, nge yugu boch ban’en.
“Ma l’agruw e wik u m’on ni yim’ leengig, me yib fare circuit overseer nga tabinaw romow. Miki pag boch e slide ni ran dag ko ulung u tungun e re wik nem. Ma kug motoyilgow ko pi muulung ko telefon—nib muun ngay e pi muulung ni fan ko machib ni ke pi’ fare circuit overseer. Ma nap’an reb e muulung me yog ngak urngin e girdi’ ni ngar pininged e magar ngak leengig. Ere, yugu aram rogon ni be par ndabiyog ni nge yan nga bang, machane de par nib tawreng.
“Ma dawori pag reb e awa u tomren ni yim’ ma urngin e piilal e kar bad nga tafenag. Ke pag raay e pi walag ni pumoon nge ppin ni kar bad ko rofen nem. Ma bod e ‘maang’ang’ ni ke m’ug e ggan ni fan ko urngin e girdi’. Dabiyog ni nggu weliy u morngaagen urngin e taw’ath nge thin nib manigil, nge ayuw, nge meybil ni kan pi’ ni fan ngog. Kan gelnag lanin’ug! Tomur riy ma thingar gog ko pi walag ni dabkura pied e ayuw ngog ko ggan nge ayuw ko klin u tabinaw rog!
“Ngiyal’ ney ma kari mus ni ulung rok Jehovah e rayog ni ngan pirieg e girdi’ ndar siingad ni yad ma runguy ma yad ma lemnag, ma yad ma t’ufeg e girdi’. Baga’ ni girdi’ ko ngiyal’ ney e rayog ni ngar theeged u taa baraba’ i pa’rad ko uw urngin e fager rorad ni tin riyul’ e fager. Ke taw’athnagdad Jehovah ko reb e tabinaw ni baga’ ni yad e pi walag nib spiritual ni pumoon nge ppin!”—Mark 10:29, 30.