Fare Thin Riyul’ ni ma Piliyeg e Yafas ko Girdi’

REB e thin riyul’ mab gel e kireban’ riy e kari mo’maw e par ko girdi’ ko boor e girdi’ ko ngiyal’ ney, ma boor e girdi’ e ke math e liyab ngorad. Rayog ko piin ni aram rogon ni ngar pirieged e falfalan’? Boch e girdi’ e yad balyang mi yad rin’ boch ban’en nib kireb ko piin buguli yoror rorad. Rayog ni ngar manged e piin nib fel’ e gafarig rorad u lan e binaw fa? Fulweg ko gal deer ney e Arrogon. Rayog ni nge thiliyeg e girdi’ e yafas rorad. Rayog ni ngan piliyeg lanin’uy. Yog apostal Paul ko uw rogon nrayog e re n’ey faani yoloy ni gaar: “Mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay ni tin nib fel’ nib fel’ u wan’ Got ma rib yal’uw.”​—Roma 12:2.

Ngan lemnag fare “tin nib m’agan’ Got ngay ni tin nib fel’” ma ra pug ngan’uy ko n’en ni yog Jesus ngak pi gachalpen ni 20 e duw u m’on ni yoloy Paul e pi thin nem. Gaar Jesus: “Bay mu nanged e tin riyul’ ma tin riyul’ e ir e bayi ayuwegmed nge dab kum pired ni gimed e sib.” (John 8:32) Fare “tin riyul’,” ni be yog Jesus e ma sor fan ko thin ni yib rok Got​—ni baga’ e thin u morngaagen e tin nib m’agan’ Got ngay​—aram thin ni bay ko Bible. (John 17:17) Riyul’ ni thin riyul’ ko Bible e ma pithig e girdi’ ndabkura pared ni yad e sib? Ma rriyul’ ni faanra ran par nib puluw ko tin nib m’agan’ Got ngay e ra piliyeg e yafas ko girdi’ fa? Ri arrogon. Mu lemnag boch e thin ni aram rogon.

Bay Fan e Yafas

De n’uw nap’an faram ma Moisés ni be’ nu Gibraltare ir be’ ni ke kireban’. Ke gaar: “Gub be’ ni ta chinggaw ma ug mol ko kanawo’. Gu be par ni bod ni kug sor nga bayang. Gubin e nep’ ma ug meybil ku Got ni nge runguyeg ma dabi pag ni nggu par. Kug yor ma kug fith ku Got ko mang fan ni gu bay nfaanra dariy fag, ma dariy e maruwel rog, ma dariy e tabinaw rog, ma dariy be’ ni be ayuwegneg. Mang fan nsusun ni ka yug gu be par?” Ma aram ma bay ban’en ni ke buch.

I ul’ul’ Moisés ngay ni gaar: “Gu nang ni ke rung’ag Got e meybil ni kug tay ya kug mada’gow Roberto ni ir reb e Mich Rok Jehovah. Pi’ Roberto ba ken e Bible ngog nge reb e babyor ni Mang e Ba T’uf ku Got ni Ngada Rin’ed?a Gubin e rran ma kug filew e Bible u reb e benchiy ni gu ma mol riy nne’. Tomren reb e pul ma kug warow ko reb e muulung u lan e Kingdom Hall ko Pi Mich Rok Jehovah. De n’uw nap’an ma fare thin riyul’ ko Bible e ke piliyeg lanin’ug. Dakuugu mol u wen; ma dakuugu unum e alkul ara tamaggow. Ke thil e yafas rog, ma gub falfalan’. Gu be athapeg ni nggu un ko taufe ma nggu pigpig ku Jehovah ma nggu mang re be Mich Rok.”

Rib gel ni kan piliyeg lanin’uy! Baga’ ni faanra par e girdi’ ni ke math e liyab ngorad ma aram fan ya dariy e tamilangan’ rorad. Dar nanged u morngaagen Got ara tin nib m’agan’ ngay. Ere nap’en ni fil Moisés e tamilangan’ ma kan gelnag laniyan’ me yog ni nge piliyeg e yafas rok. Fare meybil ngak Got ni bay ko Psalm e kan fulweg u daken Moisés’ ni be gaar: “Mpi’ e tamilang rom nge thin rom nib riyul’ nge yib ngog, ngar pow’iyew gag mi yow fulwegneg nga Zion, ko burey rom nib thothup, nge nga lan e tempel rom, ko gin ni ga ma par riy.”​—Psalm 43:3.

Aram rogon ni buch ku Daniel u Belize. Da i mol Daniel u kanawo’​—ya bay e maruwel rok nib tolang. Machane u lan 20 e duw ma ke par ni be un ko drug nge alkul me un ko ngongol ndarngal. Kan chuguliy Daniel ko teliw ni Katolik, machane de nang ko mang fan e yafas, ma ke maruwaran’ ko riyul’ ni ba’ Got. Ke un ko yugu boch e teliw ni be gayiy e ayuw machane ke guy ni boor e pi fager rok ni ma un ko galesiya ma boch ni yad e tayugang ko teliw ni yad ma un ko drugs ma yad ma unum e alkul nib pag rogon. Ma munmun, ma ba adag an leengin ni ngar dargow.

Ke math e liyab ngak Daniel me un ko reb e aspital ni rehabilitation center. Machane ke nang ni tomren ni ran pag ko re aspital nem ma dabki n’uw nap’an ma ra sul ko drug nfaanra dariy be’ ni ra ayuweg. Miti mang ayuw ni ba t’uf rok? Nap’an e May 1996, ni l’agruw e rran u tomren ni kan pag Danel ko fare aspital nem me yib ngak reb e Mich Rok Jehovah me wenig ngak ni gaar, “Aygum fil e Bible ngog.” Ur filew e Bible l’agruw e rran u gubin e wik, ma de n’uw nap’an me tabab Daniel ni nge puluwnag e yafas rok ko tin nib m’agan’ Got ngay ma ke chuw ko pi fager rok faram me m’ag fager e pi Kristiano ni der un ko drugs ara unum alkul nib pag rogon ma kar paloggad ko ngongol ndarngal. Ere ke pirieg Daniel nib riyul’ e n’en ni yog e Bible ni gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Proverbs 13:20) Ma de n’uw nap’an u tomren me gaar: “Ereray e yay nsom’on ko yafas rog ni gu nang ko uw rogon e lem ni dariy ban’en ni ke methan’ ngay.” Ere kun piliyeg e yafas rok Daniel.

U Puerto Rico, ma yugu reb e pumoon e kun piliyeg e yafas rok. Immoy u kalbus ma ir be’ ni rib kireb, ya ke li’ boch e girdi’ kar m’ad. Rayog ni nge piliyeg e thin riyul’ ko Bible laniyan’? Arrogon. Ke pi’ reb e Mich Rok Jehovah boch e babyor ni Watchtower nge Awake!, ma ki ning boch. Kan tabab i fil e Bible ngak, ma ke taw e thin riyul’ ko Bible nga gumerchaen, me gagiyel ko girdi’ ni ke thil. Reb i ban’en ni ke tamilangnag ni ke thil e ke th’ab piyan lolugen ni immoy faram nib n’uw me chuweg robon.

Be yog e Bible ni ma n’ag Got fan e denen ko girdi’ ni kar kalgadngan’rad ma kar thiliyeged e par rorad. I yoloy Paul ni gaar: “Ri gimed manang ni piin nib kireb e dabiyog ni ngar manged girdien e gin nsuwon Got . . . Ba’ boch i gimed ni immoy ni aram rogon. Machane ke n’ag Got fan e denen romed ke beechnagmed.” (1 Korinth 6:9, 11) Dabi siy ni pi thin ney ko Acts 24:15 e ke fl’eg laniyan’ e re moon ney ni be gaar: “Bayni faseg urngin e girdi’ ko yam’, ni tin nib fel’ nge tin nib kireb.” Ke gaar: “Gu ba adag ni ragu moy u nap’an ni ran faseg e girdi’ ko yam’ ya aram e rayog ni nguu wenig ko girdi’ ni kug thang e fan rorad ni ngar n’aged fan e kireb rog.”

Ba Tabinaw nib Biech

Bay reb e rran ma Luis ni ir reb e pioneer ko Pi Mich Rok Jehovah u Argentina, e ke mada’nag be’ ni pagal ni bay e kireban’ riy ko yafas rok. Gallabthir rok e kar digeyew u nap’an ni kan gargelnag, me ere kan chuguliy u yu yang ni fan ko piin ndariy e gallabthir rorad. Nap’an ni ke gaman 20 e duw rok me pirieg e gin ni be par e chitingin riy me yan i par u rom nib chugur ngak. Ke maruwel nib elmirin, ma boor e salpiy ni ke kunuy, ma aram me yan ko gin ni be par e chitingin riy. Me pag chitingin ni nge par rok nge yan i mada’ ko ngiyal’ ni ke m’ay e salpiy rok ma aram me yog ngak ni nge chuw rok. Ere ke lemnag ni nge li’ ir ngem’ ni bochan ni kan n’ag.

Machane ke fil Luis e thin riyul’ ko Bible ngak e re pagal nem. Ma re thin riyul’ nem e ba muun ngay e pi thin ney ni gaar: “Ra n’igeg e chitamag nge chitinag, machane Jehovah e ra ayuwegneg.” (Psalm 27:10) Ke pirieg fare pagal ni bay e Chitamangin u tharmiy ni dabi n’ag. Ere chiney ma ke falfalan’ ya ke un ko reb e tabinaw nib biech ni aram e tabinaw rok Jehovah.

Ma yugu reb e moon ko re binaw nem e ke yog ngak reb e Mich Rok Jehovah ni ba adag fare babyor ni Wulyang Ntagil’ e Damit. Mang fan? Ya ke ayuweg e mabgol rok. Ya reb e rran ma ke chuw e re moon ney u tabon e maruwel ma ke guy fare babyor ni Wulyang Ntagil’ e Damit u lan e tafen e dow ma kenggin riy e morngaagen e “Mabgol ni ke Dar.” Ma ke magawon e mabgol rok ma yow leengin e yow be n’en ni ngar fl’egew e babyor ni ngar dargow, me ere ke fek e re ke babyor nem me bieg. Ke fek nga tabinaw mar biegew e ppin rok u taabang. Kar athamgilgow ni ngar folgow ko thin ko Bible ni bay ko re ke babyor nem. (Efesus 5:21–​6:4) De n’uw nap’an nga tomren me fel’ iyan u thilrow. Ere dakur lemnagew ni ngar dargow ma chiney ma yow be fil e Bible u taabang.

U Uruguay, ma yugu reb e pumoon ni ku Luis fithingan e ke par ni ke kireban’. Ke wagey e yafas rok ni bochan ni ke un ko drug nge pig, nge liyor ko liyos, nge muun rum. Tomur riy me chalban Luis ngay ma ke mang reb e atheist ni aram be’ ni de mich Got u wan’. Reb e fager rok e ke pi’ ngak fare babyor ni Yafas​—Uw Rogon ni Sum? Sum ko Evolution ara Sum rok Got?b Ma aram me mada’nag e Pi Mich Rok Jehovah, machane de n’uw nap’an me sul Luis ko muun rum nge drug. Bay biyay ni kari chalban, ma ke par nga but’ u lan e low nib sug ko dow, me meybil ngak “fare chitamangin Jesus Kristus,” ya de nang ko mini’ fithingan Got.

Ke fith ku Got ni nge dag ko bay fan ni bay u fayleng. Me gaar Luis “Bin migid e rran ma reb e fager rog e ke pi’ ngog ba ke babyor ni ke lemnag ni nge n’ag. Mang kenggin e re babyor nem? Revelation​—Its Grand Climax At Hand!”c Re ke babyor nem e ke kpi’ e fulweg ko deer rok. Ki meybil Luis biyay ni be ning e ayuwe ni nge pirieg e teliw ni ra dag ngak ko uw rogon ni nge pigpig ku Got. Ma kari ngat ngay! Ke chub fare n’en ko mab rok ma bay e l’agruw e Pi Mich Rok Jehovah u wen. Ke un Luis i fil e Bible u taabang e gali cha’nem. Papey ni ke mon’og iyan ma chiney ma be lemnag ni kari taw’ath ya ir e Mich rok Jehovah ni ke un ko taufe. Ma par nib biech e ngongol rok ma ma ayuweg e yug girdi’ ni ngar nanged ni bay fan e yafas rorad. Ke riyul’ e thin ko Psalm 65:2 u daken ni be gaar: “Ni bochan e ga be fulweg taban e meybil. Urngin e girdi’ e ngar bad ngom.”

U Manila ma bay be’ ni Allan fithingan ni immoy faram ni ir e student activist. Ke un ko reb e ulung ni fan e re ulung nem e “nge chuweg e am ni rayog ko pi mfen ni bay yib ni ngar pared ni taareb rogorad.” Machane reb e rran me ke non e Pi Mich Rok Jehovah ngak ma ke fil u lan e Bible u morngaagen e tin nib m’agan Got ngay ni fan ko girdi’. Ma re n’em e ba muun ngay e re thin ney ni gaar: “Dab ki n’uw nap’an me yan e piin nib kireb nga bayang . . . Machane piin ni yad mmunguy e bay ra pired u daken e fayleng u fithik’ e gapas, mu ur pired u fithik’ e gapas ni yad ba falfalan’.” (Psalm 37:10, 11) Gaar Allan: “Ke tamilang u wan’ug ni n’en ni be athamgiliy e ulung romad e taareb rogon ko n’en ni kan micheg u lan e Bible. Urngin ban’en ni kug adaged e ra riyul’ u tan Gil’ilungun Got.” Ere chiney ma be par Allan ni be tay tanggin Gil’ilungun Got ma ma ayuweg e girdi’ ni nge mich u wan’rad ko thin riyul’ ko Bible.

Arrogom, yibe piliyeg e yafas ko girdi’ u nap’an ni yad ma fol ko thin riyul’ ni bay ko Thin Rok Got ni fare Bible. Be chugur iyib ko ngiyal’ ni urngin e girdi’ ni ra magay nib fas e yad ra puluwnag e yafas rorad ko tin nib m’agan’ Got ngay. Rib fel’ e re n’em ni ra thil! Ma aram ma ra lebug fare thin ko profet ni be gaar: “Zion nib thothup ni aram fare burey rok Got e ra par ndariy e kireb riy ara ban’en nra maad’ad ngak be’. Ma girdi’ ko nam e ri bayi tamilangan’rad u murung’agen Jehovah ni bod rogon lan e yungi day nib sug ko day.”​—Isaiah 11:9.

[Boch e Thin nra Tamilangnag Murung’agen]