Ra Thang Got e Fayleng?

ROGON ni yog John Paul II ni papa nu Roma, ma rayog ni nge l’agan’ e girdi’ ko ngiyal’ nga m’on. Ya ke yog ni n’umngin nap’an e chep ko girdi’ ma “be denen e girdi’, ma sana kab gel ko piin ni ur moyed ko ngiyal’ ni kan tharey e fayleng ko day.” Me yog fare papa ni “n’en ni yog Got ku Noah ko fare m’ag e ma tamilangnag ni dariy reb e denen e chiney ni rayog ni nge n’igin ni nge thang Got e fayleng ni fayleng ni ir e sunmiy.”

Rriyul’ ni dabi thang Got e fayleng? Be weliy e Bible ni tomren ni kan tharey e fayleng ko Day me yog Got ku Noah ni gaar: “Nggog ngomed ndab ki kirebnag e ran bayay urngin e pi n’en nib fos. Ma dab ki kirebnag e ran bayay e fayleng.” (Genesis 9:11) Be yog fare papa ni pi thin ney e be “micheg ni ra ayuweg [Got e fayleng] ndabkun thang.”

Be tamilangnag e Bible ni dabi pag e An Tasunmiy ni ngan thang e fayleng. Be gaar e Bible: “Ra par e fayleng ndabi math biid.” (Eklesiastes 1:4) Machane ka bay ban’en ni ran fil ko fare Day ni ke tharey e fayleng​—ni ban’en ni de weliy fare papa u morngaagen.

Yog Jesus ni rarogon e fayleng ko ngiyal’ nra moy e ra “bod e n’en nrin’ ko fa ngiyal’ i n’em nnap’an Noah” ma de tiyan’ e girdi’ ngay “nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin.” (Matthew 24:37-39) Ku arrogon apostal Peter ni ke yoloy ni bod rogon fare “ran ni yib nge tharey e nam e ir e kirebnag e bin kakrom e fayleng,” ma ku arrogon e ngiyal’ ney ni bay yib e “chirofen ni bay ni pufthinnag e girdi’ nib kireb nge mu’ min kirebnagrad.”​—2 Peter 3:5-7.

Ke pag Jesus nge Peter talin fare m’ag ni ngongliy Got u thilrow Noah? Ri danga’! Bod rogon ni ke yog ku Noah ma dabi fanay Got e ran ni nge chuweg e re m’ag nib kireb ney. Ya ra fanay gelngin fare “Pilung ko pi pilung nge Somol ko pi somol,” ni Jesus Kristus. (Revelation [Apocalypse] 19:11-21) Ere rogon ni yog e Bible ma dabni gathey e fayleng, machane yira thang mit fare “fayleng” ko piin nib kireb. (Proverbs 2:21, 22; Revelation 11:18) Nge mu’ ma “piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Psalm 37:29.