Report Ko Piin Ni Ma Wereg E Thin Ko Gil’ilungun Got

Got e Be Pi’ Gelngin Be Ga’ u Alaska

U TANGGIN e snow nge ayis ma bay e awoch ni ri ba achig ni be sonnag e ngiyal’ ni nge tugul me ga’. Dawori gaman dalip e pul ni aram n’umngin nap’an ngalan’ e gawel u Alaska ma awochngin e cabbage ni taab guruy ko meruk guruy u reb e inch ga’ngin e rayog ni nge ga’ me gaman 90 e pound! Arrogon, re binaw nem ni kan lemnag ni aram ba binaw ni der tugul ban’en riy ya yigoo ayis, e rayog ni nge tugul boor e woldug riy.

Ri aram rogon e milay’ nib spiritual u Alaska. U rom, ma ba n’uw nap’an ngalan’ e garbeb, ma Pi Mich Rok Jehovah e ma yung awochngin Gil’ilungun Got. Ya bod yu yang u fayleng ma ma n’igin Got ni nge tugul e awoch u gum’ercha’en e piin nib yul’yul’.​—1 Korinth 3:6, 7.

● Reb e Mich Rok Jehovah nib fel’ yangaren ni Vanessa fithingan e nap’an ni be un ko bus ko skul e ke sap ngak Ann ni yow nga class ma gubin ngiyal’ ma be par ni go’ ir. Be m’ug riy ni ke kireban’ Ann me ere ke pining Vanessa ni ngar parew u taabang. Aram me nang ko mang fan ni ke kireban’ Ann! Ya ke yim’ chitinngin ya mm’ar gum’erchaen ma de n’uw nap’an nga tomren miki yim’ e chitamangin ni bochan e cancer. Aram fan ni be par Ann ko boch e girdi’ rok u Alaska.

Ke yan Vanessa nga tafen e cha’ nem u nap’an ni kan yan ko machib ko Sabado me pi’ ngak fare booklet ni Does God Really Care About Us? Bin migid e Montag me yan Ann nga skul ma be gay fare rugod ni ir e Mich Rok Jehovah. Boor e deer rok Ann u morngaagen e Bible ma ke pi’ Vanessa e fulweg riy. Ma aram me fith Ann: “Ba uw e gin ni gimed ma muulung riy?” Rofen nem ko balayal’ me un Ann ko muulung u Kingdom Hall ko yay nsom’on.

Ma de n’uw nap’an nga tomren ma cha’ ney ni dariy e gallabthir rok e ke pirieg boor e ‘matam’ nge ‘matin’ ni bod ni yog Jesus. (Matthew 19:29) Ma rib fel’ e ngiyal’ ni kan guy Ann ni be falfalan’ ma be siminmin u nap’an ni ke ognag ir ku Jehovah me un ko taufe u fithik’ e ran u nap’an fare District Convention ni “Pi Tamol’og ni ma Mon’ognag e Gapas rok Got”!

● U lan e yu gin nib palog ko binaw nu Alaskan Arctic region​—ma bay bokum miriay e mayal u thilin reb e binaw nge reb​—ma bay e skokiy ko Watch Tower Society ni twin-engine ni yibe fanay ni ngan yung e awoch ko Gil’ilungun Got u lan 150 e binaw. Ma yima fil e Bible ngak e girdi’ ko babyor ni yima pi’ u post ni nge yog ni ngan mon’og ko tirok Got ban’en. Boor e girdi’ ni mo’maw ni ngar yoloyed e babyor, ma fa en ni be skulnag e Bible e thingari yoloy boch ban’en nra pug e tafinay ko girdi’ ni ngki adag e machib. Uw rogon nrayog e re n’ey?

Ke fil Kathy e Bible ngak Edna, ni yugu aram rogon ni bay 400 e mayal u thilin e binaw rorow! Ma gathi ke mus ni ke yoloy Kathy e pi deer ni bay ko fare babyor, ya ke fl’eg e babyor ni work sheet ni bay e deer riy ma bay e gin ni ngan tay e fulweg riy. Tomren ni ke yoloy Edna e fulweg nga but’, me yol Kathy biyay ni be weliy boch ban’en ni be tamilangnag e n’en ni yow be fil. Be gaar Kathy: “Gubin e Wednesday ko balayal’ e aram e ngiyal’ ni gamow ma ‘study’ ma gu ma athamgil ni nge mudugil e re tayim nem ni bod rogon ni yima rin’ ko Bible study. Ku gu ma pi’ ngak Edna e envelope ni nge tay e babyor ngay ni bay e stamp nge address rog riy. L’agruw e wik ni ra yan e babyor me sul, me ere rib sagaal e study ni aram rogon.”

Mu lemnag fene falfalan’ Kathy nge Edna u nap’an ni kar mada’gow u nap’an fare district convention u Anchorage u tomren ni ur filew e Bible u lan ragag e pul ni yow be pi’ e babyor u post! Kari falfalan’ e Pi Mich Rok Jehovah ya boor e Bible study nge piin ni ba adag e machib e ur bad u boch e binaw nib palog u Alaska ni ngar uned ngay.

Yugu aram rogon ni be m’ug riy ni kari sagaal ni be mon’og iyan, machane boch e “awoch ni fini tugul” e rayog ni nge tugul nib pay u nap’an ni kan pi’ e tamilang ko thin riyul’ ngorad. U Alaska mab boor ko raay e girdi’ ni be un ko taufe u gubin e duw ma yad be n’uf Jehovah! Gad ma gaar, “Kammagar Jehovah” ya ke n’igin nge tugul!