Mang Fan ni Yad Be Chuw ko Teliw?

NAP’AN e ngiyal’ ni lukngun e bin 19 e chibog ma dariy be’ u Prussia (ni ka nog yu Chiyamen e chiney) ni ra yog ni dariy baraba’ e teliw ni be un ngay. Ma riyul’ ni faanra chuw be’ u baraba’ e teliw ni baga’ fan me un nga yugu reb ma ra n’igin e galesiya ni nge yib e polis ngar yaliyed e n’en ni be rin’ e cha’ nem. Ma gathi arrogon e ngiyal’ ney!

Ngiyal’ ney ma boor piyu Chiyamen e be chuw ko pi yuraba’ i teliw. Kan reportnag ni taab guruy u aningeg guruy ko urngin e girdi’ e ma yog ni dariy baraba’ e teliw ni be un ngay. Ku aram rogon u Austria nge Switzerland. Yima yog ni girdi’ ko galesiya e bod rachaen e teliw ya be pi’ e yafas ni nge par, me ere yog reb e tayol nu Chiyamen ni Reimer Gronemeyer ni, “Bod ni be map’ rachaen e pi galesiya nu Europe yad be yim’.”

Fan ni Kar Dabuyed e Pi Yuraba’ i Teliw

Mang fan ni ke dabuy boor e girdi’ e pi yuraba’ i teliw nib gilbuguwan? Baga’ ni bochan e salpiy, ya pi galesiya u boor e nam e ma taxnag e girdi’ rorad. Boor e girdi’ e ma fith ni gaar, ‘Mang fan ni thingar gu pi’ ko galesiya e salpiy rog ni kug maruwel nib elmirin ni nge yog ngog?’ Boch e girdi’ e dubrad ya boor e salpiy ko galesiya ma ba gel lungurad u lan e binaw. Taab lanin’rad ku Joachim Meisner ni ir e Cardinal nu Cologne, Germany, ni ke yog ni bochan ni ke yoor e salpiy ko galesiya ma aram e kayigi elmirin ni yad be lemnag e chugum ma “dar tedan’rad ko michan’ ngak Kristus.”

Boch e girdi’ e be chuw ko teliw rorad ya ke chalbarad ngay, ma dariy ban’en riy ni be pug e tafinay rorad, ma yad be yim’ ko bilig ko tirok Got ban’en. Yad be gafgow ko uyungol ni ke yiiynag Amos ni profet u morngaagen ni “bay yib e bilig ngak e girdi’, machane gathi fan ko ggan; ma bay yib e belel ngorad, machane gathi fan ko ran. Bay ra m’ad ni bochan bbugithin ni nge yib rok [Jehovah] ngorad ni bod be’ ni yib e bilig ngak nib gel nge yim’ ni bochan e ggan.” (Amos 8:11) Teliw rorad e der pi’ gelngirad ko tirok Got ban’en, ma ar fan ni yad be pag.

Pi magawon nem e briyul’, machane ba mat’aw ni ngan pag urngin raba’ e teliw fa? Mu lemnag be’ ni ke yib e bilig ngak ma ke guy ban’en ni bod yaan ba yal’ i flowa. Machane nap’an ni ra guy rogon ni nge kay, ma ke pirieg ni kan fl’eg ko chachabugen e goloyoch. Ere ra pag e abich ma dabki guy rogon ni nge fas ndabki yim’ ko bilig fa? Danga’ ya ra gay boch e ggan nriyul’ ni ggan. Taareb rogon ko teliw ni faanra dab ni ayuweg e girdi’ ko tirok Got ban’en ma susun ni ngar paged e teliw fa? Gathi bay e gonop riy ni ngar gayed rogon ni ngar fasgad ko tirok Got ban’en fa?