Thin Rom E Bod E Sayden Ni Yima Rogoy Fa Ma Golnagey?

NGIYAL’ NEY nib magawon e dabni gin ngay ni boor e girdi’ e “ke m’ing gum’er’cha’rad” ma ke “math e liyeb ngorad.” (Psalm 34:18) Ere rogon ni yog apostal Paul ma ba t’uf ni ngan “pi’ e athamgil ngak e piin ni ke m’ingan’rad” min “ayuweg e piin ni yad mmeewar.” (1 Thessalonika 5:14, NW.) Machane nge diin nfaanra rin’ be’ ban’en nib kireb ngodad fa ke rin’ ban’en ni rib kireb? Faanra er rogon ma sana gad ra lemnag nib puluw ni ngad fonownaged e cha’ nem ma ke mus. Machane, bay ban’en ni ngan ayuw riy. Ya rayog ni nge kirebnagan’uy e fonow nfaanra ran’ pi’ ni kayigi elmirin. Proverbs 12:18 e be gaar: “Bay be’ ni ma non ni der gonopiy ko be mang e be yog ma thin rok e bod e sayden ni be rogoy.”

Ere nap’an ni gad be n’en ni ngad pied e fonow ngak be’ ara ngad yaluweged e magawon, ma baga’ fan ni dabda paged talin e tin tomur e thin ko Proverbs 12:18 ni be gaar: “Blowthen e ani ba gonop e ma golnagey.” Ere gubin ngiyal’ ma ga fithem ni ‘Faan manga ba t’uf ni ngan fonownageg, ma uw rogon ni gu ba adag ni ngan rin’ ngog?’ Gad ba adag ni ngan pi’ e athamgil nga lanin’dad ko bin ni ngan tamilangnag thibngidad. Ere ngam pining e sorok ko girdi’. Aram e n’en nra ayuweg e en ni ke rin’ e kireb me pi’ e athamgil nga laniyan’ ni nge mon’og iyan, ma dabi siy ni ra pining e magar ngom ko ayuw ni kam pi’ ngak.

Rib ga’ fan ni ngan thebthebelnag e thin ni nga dogned u fithik’ e sumunguy! Thin ni ma golnagey e ra n’igin nge lemnag be’ ni bod rogon e en ni yoloy e thin ko psalm ni gaar: “Ra toyeg be’ nib mat’aw, ma aram e be gol ngog u fithik’ e t’ufeg; ma faanra ra fonownageg ma ra bod ni ke liyef e gapgep nga lolugeg, ma dab gu siyeg.”​—Psalm 141:5.