Ngan Fil Ban’en Ko Pi N’en Ni Kan Oloboch Riy Kafram

PI MOTOCHIYEL ko ani sunmiydad e dabi m’ay biid ma dabi thil. Ar fan nib puluw ko ngiyal’ ney e pi thin ni bay ko Galatia 6:7 ni be gaar: “Ra be’ ma mit i n’en ni yung e ir e ra t’ar wom’engin.” Rriyul’ ni ra yog boch e girdi’ ni de t’uf ni ngar dum’gad ku Got, machane ba mudugil e re motochiyel rok Got nem. Dariy be’ nrayog ni nge siyeg ni nge dabi yib wenegan e ngongol rok ngak.

Ma uw rogon be’ ni ke un ko boch ban’en nib kireb faram machane ke thil, me mang reb e tapigpig rok Got? Sana thingari par u fithik’ e pi n’en ni aram wenegan e par rok faram. Machane gathi aram e de n’ag Got fan e kireb rok. I un David ni Pilung ko ngongol ndarngal ni yow Bath-sheba ma wenegan riy e boor e magawon ni ke yib ngak. Ma de yog ni nge siyeg. Machane ke kalngan’ ngay ma ke n’ag Got fan.​—2 Samuel 12:13-19; 13:1-31.

Bay biyay ni ke kireban’um u nap’an ni kam gafgow ni bochan wenegan ban’en ni kam rin’ faram nib oloboch fa? Faanra ran lemnag e re n’em nrogon, ma nap’an ni ke kireban’um ma rayog ni nge puguran ngodad ni ‘ngad ayuwgad riy ni dabda chelgad ngad rin’ed ban’en ni gad ra maadad riy.’ (Job 36:21) Arrogon, ran kolngan’uy ma rayog ni nge ayuwegdad ngad siyeged i rin’ ban’en nib kireb biyay. Ma n’en ni rin’ David ni kab fel’ e ke yib angin ngak ni bochan ni ke fil ban’en ko oloboch rok miki ayuweg yugu boch e girdi’. I gaar: “Ma aram e bay gu fil ngak e pi tadenen e tin ni mog ni ngan rin’, mi yad sul ngom.”​—Psalm 51:13.

[Sasing ko page 31]

I fil David ban’en ko denen ni rin’ ni yow Bath-sheba