Deer
Rogon ni yog u Matthew 17:20, ma de yog ko pi apostal ni ngar ayuweged bochi pagal ni ke ying ba moonyan’ ngak ni ‘bochan e de gaman e michan’’ rorad. Machane Mark 9:29 e be yog ni de yog rorad ni bochan ni ba t’uf e meybil. Mang fan ni ba thil e n’en ni kan weliy ko fagal Gospel?
Bin riyul’ riy e gali thin nem e bagayow e be tamilangnag bagayow, ma gathi ba togopuluw bagayow ku bagayow. Som’on ma ga yaliy e thin ko Matthew 17:14-20. Be’ nib moon e ke yog ni ke m’ar fak ko epilepsy ma de yog ko pi gachalpen Jesus ni ngar golnaged. Ma aram me golnag Jesus fachi pagal ya ke chuweg fare moonyan’ ni ke ying ngak. Ma aram me fith pi gachalpen ko mang fan nde yog rorad ni ngar tulufed fare moonyan’ nge chuw u fithik’ facha’. Ma rogon ni yog e thin ko Matthew e fulweg Jesus ni gaar: “Bochan e de gaman e michan’ romed. Mu ted fanmed i yan ko re bugithin ni baaray! Faanra ba’ e michan’ romed ngak Got ni bod mam’ungun ba awochngin e mustard, ma rayog ni nge lungumed ko re burey ney, Mman u roy i iram! ma ra yan. Ma demtrug ban’en ma rayog romed!”
Ma chiney e ngam poy e Mark 9:14-29, ni be tamilangnag boch u morngaagen e re n’em. Mark 9:17 e be tamilangnag ni rogon e bin baaram e magawon ma reb e moonyan’ e be n’igin fare m’ar ni epilepsy. Mu tay fanam iyan riy ni bay yugu boch e thin ko Bible ni be weliy ni ke golnag Jesus e piin nib m’ar ko epilepsy nge piin ni ke ying e moonyan’ ngorad. (Matthew 4:24) Machane re magawon ney e ba lingagil ya fare m’ar e yib ni bochan “ba moonyan’ ndabiyog ni nge non mab biling,” aram ba kan nib kireb, ni ku be weliy Luke ni ir e togta u morngaagen. (Luke 9:39; Kolose 4:14) Mu tiyan’um ko pi thin ko Mark 9:18 ni be gaar, “Demtrug e gin nra yib [fare moonyan’] riy ngak me aw nga but’.” Ere gathi gubin ngiyal’ ni bay fare moonyan’ rok fare pagal, ke mus ni yu ngiyal’. Machane ku de yog ni nge chuweg pi gachalpen fare moonyan’ mar golnaged fare pagal. Ma nap’an ni ur fithed ko mang fan, me fulweg Jesus ni gaar: “Dakuriy ban’en nga bang nrayog ni nge tuluf e mit ney e moonyan’, ya ke mus ni meybil e rayog riy.”
Ngan fl’eg i yaliy e thin ko Mark ma be tamilangnag ni der togopuluw ko thin ni yoloy Matthew. U Mark 9:19, ma be yog ni ke kireban’ Jesus ni bochan der mich Got u wan’ e pi girdi’ ko re mfen nem. Ma verse 23 e be yog ni ke yog ku chitamangin fachi pagal ni gaar: “Urngin ban’en ma rayog rok e en ni ke michan’ ngak Got.” Ere ku arrogon Mark ni ke tamilangnag ni baga’ fan e michan’. Machane ku be tamilangnag Mark boch ban’en u verse 29. Ya ki weliy Mark e n’en ni yog Jesus u morngaagen e meybil, ni de weliy Matthew nge Luke morngaagen.
Ere mang e rayog ni nga dogned? Immoy yugu ba ngiyal’ ni fa 12 i apostal nge fa 70 i gachalpen e kar tulufed e moonyan’ ko girdi’. (Mark 3:15; 6:13; Luke 10:17) Machane yanem ma de yog ko pi gachalpen ni ngar tulufed fare moonyan’. Mang fan? Faanra gad ra tay nga taabang urngin e n’en ni kan weliy u morngaagen e re n’em ma be tamilangnag ni dawori bung rogorad ni ngar rin’ed ko bin baaram e magawon. Sana bochan miti moonyan’ ni ke ying ngak fare pagal, ya ra reb e moonyan’ mab thil pangin nge tin ni ba adag, nge tin rayog rok ni nge rin’. Ma bin baaram e ba t’uf e michan’ nib gel min yibilay e ayuw rok Got. Ma Jesus e ke michan’ ngak Got ni aram rogon. Miki ayuweg e Chitamangin ni ir e An ma Rung’ag e meybil. (Psalm 65:2) Gathi ke mus ni rayog rok Jesus ni nge chuweg fare moonyan’ me golnag fare pagal ya ke rin’.