Mini’ e Ba Kireb e Rok?

Boor e girdi’ e ma yog ni Got e ba kireb e rok ko pi magawon rorad. Reb e thin ko Bible ni bay ko Proverb e be gaar: “Ngongol nib balyang ni rin’ be’ e ma kirebnag e par rok, nge mu’ me yog ni Somol e ke n’igin.” (Proverbs 19:3, The New English Bible) Machane ran nog ni Got e ke n’igin e gafgow ko girdi’ e bod rogon ni ngan nog ni ba kireb e rok e en ni ke ngongliy e karro aram fan ni boor e maadad ko piin ni ma yan ko karro nib chingaw.

Boor e fonow ni baga’ fan ni ke pi’ Got ko girdi’ u lan e Bible ni Thin rok. Faanra gad ra fil e thin riy ma gad fol ko pi motochiyel riy ma aram e rayog ni ngad siyeged boor e magawon ko par. Machane faan ran ngongol nib togopuluw ko n’en ni yog Got ma wenegan ra yib riy e gafgow. Susun, piin ni ma abich nib pag rogon, nge piin ni ma tamagow, nge piin ni ma unum nib pag rogon, nge piin ni ma un ko ngongol ndarngal e ra yib wenegan ngorad ni ra yib e m’ar ngorad. (Luke 21:34; 1 Korinth 6:18; 2 Korinth 7:1) I yoloy apostal Paul ni ir e Kristiano ni gaar: “Ra be’ ma mit i n’en ni yung e ir e ra t’ar wom’engin. Faanra yung be’ ban’en nga daken e milay’ ni aram e tin nib kireb ni be ar’arnag, ma wom’engin nra yib riy ngak e yam’; ma faanra yung be’ ban’en ni fan ngak fare kan ni thothup e ke yib rok e yafos ndariy n’umngin nap’an.”​—Galatia 6:7, 8.

Ere kab fel’ ni ngad pared ni gad be fol ko pi motochiyel rok Got! Faanra gad ra yodor ma ra riyul’ e n’en ni micheg Got u daken Isaiah ni profet ni gaar: “I gag Jehovah ni Got romed, me gag e An be fil ngomed e n’en ni ngam rin’ed me yib angin ngomed, nge fa An be n’igin ngam marod ko kanawo’ ni ir e susun ni ngam marod riy. Faanra gimed ra motoyil ko pi motochiyel rog! Ma aram me yoor e gapas romed ni bod e lul, ma rogon ni gimed ra par u fithik’ e tin mat’aw e ra bod e n’ew u maday.”​—Isaiah 48:17, 18.