Miti Mang e Ngochol ni Bay Rom?

U LAN e Bible, fre bugithin ni “ngochol” e ma sor fan ko thin ni yima yog u murung’agen be’. Ya amu lemnag Solomon ni Pilung ni i yoloy: “Kab fel’ e ngochol ko mmit e gapgep nib fel’, ma rofen ni yim’ be’ e kab fel’ ko rofen ni kan gargeleg.” (Ecclesiastes 7:1; mu taarebnag ko Proverbs 22:1.) Fan e thin rok Solomon e dawori fel’ e ngochol rok be’ ni ka fin ni gargeleg. Ya nap’an e yafos rok ma ra ngongliy e ngongol rok nra n’igin ni ngan nog e thin nib fel’ u murung’agen. Ngochol rok be’ e ba m’ag ko ngongol rok, ndemtrug ko ir be’ nib gol ara be’ nib siin, ba rung’uy ara ba gel, sobut’an’ ara tolangan’, nge be’ nib mat’aw ara kireb.

Amu lemnag David. Nap’an ni ke pilung, ma i micheg ni ir be’ nib gel mab mudugil. Maku i par nib sobut’an ni nge tamilangnag e oloboch rok ma aram me k’alngan’ ko denen rok. Arfan ni weliy reb e profet rok Jehovah ni David e ir “be’ ni baadag [Got].” (1 Samuel 13:14) Ke ngongliy David reb e ngochol nib fel’ u wan’ Got.

Machane Jehoram ni Pilung nu Judea e ke ngongliy e ngochol nib kireb. Ya i chefeg e girdi’ rok Got ni dabra liyorgad ku Jehovah ma mus ni ke thang e fan rok nel’ walagen nge boch i fak e pilung nu Judah. Munmun, ke pi’ Jehovah mmit e m’ar ni nge af ngak Jehoram ma aram me yim’. Be weliy e thin ko Bible ni “ke yan [Jehoram] nga ba yang ma dariy be’ ni baadag daken,” ara kan yoloy u lan e Today’s English Version ni aray rogon, “dariy be’ ni ke kireban’rad ko ngiyal’ ni ke yim’.”​—2 Kronicles 21:20.

Pi n’en ni buch ku David nge Jehoram e be tamilangnag nib riyul’ e pi thin nu Bible: “Bay yib e flaab ngak e piin nib mat’aw ni dawor ni pag tilrad, machane bayi mel fithingan e piin nib kireb.” (Proverbs 10:7) Ere gad gubin e susun ni ngad lemnaged e deer ni baaray, ‘Miti mang e ngochol ni gu be ngongliy u wan’ Got nge yugu girdi’?’