Ga Ma Motoyil ni Yira Ginangey?

NAP’AN e May 19, 1997, me yib reb e yoko’ u lan e binaw nu Chittagong, Bangladesh. Kan weliy ni ke taw gelngin e nifeng riy 150 e mayal u reb e awa u Cox Bazaar. Ke yan nochi naun nga bang u lan e arow, ke yan i par ni ke mus ni goo’ bar e ka ba’ u luwan. Gek’iy nge pole ko telefon e ke puw nga lang ma boch e ke m’ing u lukngun ni bod e masis. Kan weliy u lan fare shimbung ni Bhorar Kagoj ni ke yim’ 105 e girdi’ u nap’an e re yoko’ nem.

36 e awa u mon ni taw fare yoko’ me weliy e piin ni yad ma yog morngaagen e yoko’ e kanawo’ ni be yib riy. Dariy e marwar riy ni boor e girdi’ e kar pared nib fas ya ka ranod ko naun nib simen.

Ke pag raay e duw e chiney, ni be weliy e Pi Mich rok Jehovah morngaagen reb e gafgow ni kab gel e magothgoth riy ko urngin e yoko’ ni kaa yib. Be yog e Bible ni “aram e rran rok Jehovah nib gel e marus riy.” (Joel 2:31) Gad ra motoyil ko thin ko profet ni bay u Bible ni be ginangdad ma rayog ni ngad siyeged e re gafgow nem. ​—Zefaniah 2:2, 3.

Danga’ Pi Mich rok Jehovah e gathi yad ma yiiynag morngaagen e tin kireb ni ra buch. Yad ma yiiynag morngaagen e thin ni bay e athap riy. Yad baadag ni ngar ayweged e girdi’ ngar filed morngaagen Gil’ilungun Got, ni dabki n’uw nap’an ma ra chuweg e tin nde mat’aw ban’en u daken e fayleng. Thin rok Got u Bible e be yog ngodad ni: “Dab ki n’uw nap’an, me yan e piin kireb nga bayang; ra mu gayiyrad ma dab mu piriegrad; machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—Psalm 37:10, 11.

[Credit Line]

WHO/League of Red Cross