Erera’ E Re Rran Ni Ngan Thap Ngak Got!

“Mmotoyil! Ereray e re awa ni nge ayuwegey Got, daba’ e erera’ e re rran ni ngan thap ngak Got.”​—2 KORINTH 6:2.

1. Mang e ba t’uf ni ngan par nib fel’ u wan’ Got nge Kristus?

I dugliy Jehovah reb e rran ni nge pufthinnag e girdi’. (Acts 17:31) Faanra nge aw ni aram e rran ni ran thapegdad ngak Got, ma ba t’uf ni ngad fel’gad u wan’ Got nge fa an ni dugliy ni Tapuf Oloboch ni Jesus Kristus. (John 5:22) Ra nge yog e re n’em ma ba t’uf ni ngan ngongol nib puluw ko Thin Rok Got ma ba t’uf e michan’ nra k’aring ni ngan ayuweg yugu boch e girdi’ ngar manged e tin riyul’ i gachalpen Jesus.

2. Mang fan ni be par e girdi’ nu fayleng nib dar ku Got?

² Bochan ni ke af e denen ngak gubin e girdi’ ma yad be par nib orel rok Got. (Roma 5:12; Efesus 4:17, 18) Ere piin ni gad ma machibnag e rayog ni ngar thapgad ngak Got nke mus ni faanra yad ra sul ngak. I tamilangnag apostal Paul e re n’ey u nap’an ni ke yol ngak e pi Kristiano u Korinth. Ngad lemnaged e thin ko 2 Korinth 5:10–6:10 ma ngad guyed ko mang e weliy Paul u morngaagen e pufthin, nge rogon ni ngan sul ngak Got, nge rogon ni ngan thap ngak.

“Gamad Be Taymad Ngak e Girdi’”

3. Uw rogon ni ke tay Paul “ir ngak e girdi’,” ma mang fan nsusun ni ngad yodoromgad ko ngiyal’ ney?

³ I puthuy Paul e pufthin ko machib faani yoloy ni gaar: “Ya gad gubin ma ri gadad ra yan nga p’eowchen Kristus nge mang ir e dugliy e n’en ni nge be’ min rin’ ngak, ni fan e nge be’ min pi’ ngak e n’en ni ba’ rogon ni ngan pi’ ngak, ni be yan u rogon e tin ni i rin’ nib fel’ ara kireb u nap’an ni immoy u lan e dowef rok ko biney e tamilang. Kad nanged fan ni nge yib madgun Somol u wun’dad, aram fan ni gamad be taymad ngak e girdi’.” (2 Korinth 5:10, 11) I par fare apostal ni be ‘tay ir ngak e girdi’’ ya ke machibnag fare thin nib fel’ ngorad. Ma gadad? Gad bay u thatharen e re m’ag nib kireb ney, ma susun ni ngad athamgilgad ni ngad ayuweged yugu boch e girdi’ ngar rin’ed e n’en nib t’uf ni nge turguy Jesus nib fel’ ngorad mar pared ni kar fel’gad u wan’ Jehovah Got ni ir Tapgin ni ngan thap ngak.

4, 5. (a) Mang fan nsusun ndabda ufgad ko tin ni kad rin’ed ko pigpig ku Jehovah? (b) Uw rogon ni ke uf Paul ni “fan ngak Got”?

⁴ Faanra ke flaabnag Got e machib ni gad be tay ma susun ndabda ufgad ngay. U Korinth ma boch e girdi’ e kar ufanthingad ko tin ni ur rin’ed ara kar ufgad ko yugu boch e girdi’, ma aram me yu raba’ fare ulung. (1 Korinth 1:10-13; 3:3, 4) I weliy Paul u morngaagen e re n’ey ni gaar: “Gathi gamad be guy rogon ni nggogned ngomed bayay ni gamad ba fel’; machane gamad be guy rogon ni nggu pied ngomed tapgin ni ngam fel’gad ngomad ni fan e nge yog ni ngam fulweged e n’en ni be fith e piin ni yad be uf nga murung’agen e be’ ni bochan rogon yaan faanem nge pangin. Gur kari gu aliliygad? Fan ngak Got. Gur ba tamilang lanin’mad? Fan ngomed.” (2 Korinth 5:12, 13) Fa piin nib tolangan’rad e dar lemnaged ni ngar ayuweged e ulung nge taab lanin’rad mar gelgad ko tirok Got ban’en. Ya kar adaged ni ngar ufgad nga yaan nge pangin e girdi’ ma gathi ngar ayuweged e pi walag ni nge fel’ gum’ercharad u p’eowchen Got. Ere ke fonownag Paul e re ulung nem me gaar: “En ni ba adag ni nge weliy ban’en ni ke uf ngay e thingari uf ko n’en ni Somol e ke muruwliy ke yog.”​—2 Korinth 10:17.

⁵ Ma gathi ke uf Paul biyay? Boch e girdi’ e be lemnag ni er rogon ya bochan e n’en ni yog u morngaagen ni ir reb e apostal. Machane ke uf ni “fan ku Got.” I uf u morngaagen e tin ni rin’ ni ir reb e apostal, ni aram e dabi chuw yu Korinth rok Jehovah. I rin’ Paul e re n’ey ya nge ayuwegrad ngar sulod ngak Got ya immoy bogi apostal ni googsur ni yad be chafegrad nga ranod ko kanawo’ ni be sor iyan nga bayang. (2 Korinth 11:16-21; 12:11, 12, 19-21; 13:10) Machane gathi be guy Paul rogon ni nge tamilangnag urngin ban’en ni rin’ me nang gubin e girdi’.​—Proverbs 21:4.

Gelngin Fanam T’uf rok Kristus e Ir e be Gagiyegnagem fa?

6. Susun mang e ngad rin’ed ni bochan gelngin fandad t’uf rok Kristus?

⁶ Paul e briyul’ ni ir reb e apostal ma aram me fil ngak e girdi’ morngaagen e maligach ni biyul ni pi’ Jesus. Aram ban’en ni ke gagiyegnag e yafas rok Paul ya ke yoloy ni gaar: “Gelngin fanmad t’uf rok Kristus e ir e be gagiyegnagmad, ya kug nanged ni taareb e girdi’ e yim’ ni fan ngak urngin e girdi’, ni fan e re n’em e urngin e girdi’ ma kar uned ngak ko yam’. I yim’ ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Korinth 5:14, 15) Ke dag Jesus fene gel fedad t’uf rok ya ke pi’ e yafas rok ni fan ngodad! Re n’em e susun ni nge gagiyegnag e yafos rodad. Susun ni ngad pininged e magar ku Jesus ya ke pi’ e yafas rok ni fan ngodad ma susun ni nge k’aringdad ngad pasiggad i wereg fare thin nib fel’ u morngaagen rogon ni be ayuweg Jehovah e girdi’ ngar thapgad ngak u daken Fak ni rib t’uf rok. (John 3:16; mu taarebnag ko Psalm 96:2.) “Gelngin fandad t’uf rok Kristus” e be k’aringem ngam pasig i wereg e machib ko Gil’ilungun Got ma ngam pingeg e girdi’ ngar manged pi gachalpen Jesus fa?​—Matthew 28:19, 20.

7. Mang fare thin ni “dabn dugliy rogon be’ u lanin’uy ni bod ni ma rin’ e girdi’”?

⁷ Pi girdi’ ni kan dugliyrad e yad ma fanay e yafos rorad u rogon ni be dag ni yad ma pining e magar ku Kristus ko n’en ni rin’ ni fan ngorad ma ‘dab ku ur ngongolgad ni yad be yan nga tabon lanin’rad ya yad be yan ngan’ faanem.’ Ere gaar Paul: “Ere dab kud dugliyed rogon be’ u lanin’dad nrogon ni ma rin’ e girdi’. Yugu ra kaad lemniged murung’agen Kristus u ba ngiyal’ ni bod rogon ni ma lemnag e girdi’ murung’agen ban’en, ma dab kud rin’ed e chiney ni aram rogon.” (2 Korinth 5:16) Piin Kristiano e susun ndabra dugliyed rogon’ be’ u lanin’rad nrogon ni ma rin’ e girdi’, ni yad ba adag piyu Jew ko piin gathi yad yu Jew ara yad ba adag e piin nib fel’ rogon ko piin gafgow. Piin ni kan dugliyrad e “dab kur dugliyed rogon be’ u lanin’rad nrogon ni ma rin’ e girdi’,” ya n’en ni baga’ fan e rogon thilrad e piin ni taareb e michan’ rorad. Piin ni ‘kar nanged Kristus u rogon ni ma lemnag e girdi’’ e gathi ke mus ni yad e piin ni kar guyed Jesus nga owcherad ko ngiyal’ ni immoy u fayleng. Ya mus ko piin ni ke l’agan’rad ko fare Messiah mar lemnaged ni Kristus e ba girdi’, ma susun dabkur lemgad ni aram rogon. Ya ke pi’ e dowef rok nib biyul’ min faseg ni ir ba kan ni ma yognag e yafos ko girdi’. Ma yugu boch e girdi’ ni ra un ko yafos u tharmiy e ra pi’ dowrad ma dar guyed Jesus Kristus u nap’an ni immoy nib girdi’.​—1 Korinth 15:45, 50; 2 Korinth 5:1-5.

8. Uw rogon ni ke “taareb laniyan Kristus” nge boch e girdi’”?

⁸ Ka be non Paul ko piin ni kan dugliyrad me gaar: “Ngiyal’ nra taab girdi’ be’ nge Kristus e aram e ngiyal’ ni ke mang faanem reb e girdi’ nib beech ni ka fin nsunumeg: bin kakrom i ir e ke chuw, ma bin nib beech i ir e ke yib i m’ug.” (2 Korinth 5:17) Rogon ni ngar pared ni “kar taarebgad Kristus” e ma sor fan ko par nib taareb lanin’rad. (John 17:21) Aram rogon ni buch u nap’an ni pining Jehovah be’ ni yib ngak Fak min fakay e cha’ nem ko kan ni thothup. Ere ke mang be’ ni fak Got ni kan dugliy ko kan ni thothup, ma ke mang faanem “reb e girdi’ nib beech ni ka fin nsunumeg” ma aram e be athapeg ni nge un ngak Kristus ko gagiyeg u tharmiy. (John 3:3-8; 6:44; Galatia 4:6, 7) Pi Kristiano ni kan dugliyrad e kar ni taw’athnagrad ko mmit e pigpig.

“Ngam Mang Tafager Rok Got”

9. Mang e rin’ Got ni nge ayuweg e girdi’ ngar manged pi tafager rok?

⁹ Kari taw’athnag Jehovah e girdi’ nib “beech ni ka fin nsunumeg”! Gaar Paul: “Urngin e pi n’ey e Got e ke ngongliy, ni ir e ud moyed ni gadad e toogor rok me pingegdad ngad manged pi tafager rok, ni rin’ u daken Kristus, me pi’ ngodad e maruwel ni ngad guyed rogon e tin ni ka ba’ e girdi’ ngkur manged pi tafager rok. Gamad be machibnag ni Got e be m’ag e tafager ngak urngin e girdi’ u daken Kristus. I Got e daki ta’ u wan’ e denen rorad ni nge togopluw ngorad, ma ke pi’ e thin riy ngomad nga rogon nra ngongliyrad ngar manged pi tafager rok.” (2 Korinth 5:18, 19) Ka nap’an e ngiyal’ ni denen Adam ma be par e girdi’ nib orel rok Got. Machane u fithik’ e t’ufeg me rin’ ban’en nge bing e kanawo’ nrayog ni nge sul e girdi’ ngak u daken e maligach ni pi’ Jesus.​—Roma 5:6-12.

10. Chon mini’ e ke tay Jehovah nib mil fan ngorad e maruwel ni ngan ayuweg e girdi’ ngar manged pi tafager rok Got, ma mang e kar rin’ed ni fan ngay?

¹⁰ I tay Jehovah nib mil fan ngak e piin ni kan dugliyrad ni ngar ayuweged e girdi’ ngar manged pi tafager rok Got, me ere yog Paul ni gaar: “Gamad owchen Kristus ngomed, ni aram e be wenig Got ngomed u l’ugunmad: ere gamad be wenig ngomed ni pa’ Kristus ni ngam paged Got nge pingegmed e toogor rok ngam manged pi tafager rok.” (2 Korinth 5:20) Kakrom ma kan l’og e piin ni owchen be’ ko ngiyal’ ni bay e magawon ni nge guy rogon nge siy e cham. (Luke 14:31, 32) Be par e girdi’ ni tadenen nib dar ku Got, ma aram me l’og e piin owchen ni ngar weliyed ko girdi’ ko uw rogon nrayog ni ngar manged pi tafager rok Got. Yad be wenig u pa’ Kristus ni lungurad: “Ngam manged pi tafager rok Got.” Yibe wenig ko girdi’ ni ngar gayed rogon nge gapas thilrad Got mar uned ko tin ni ngongliy Got ni nge thapeg e girdi’ ngak u daken Kristus.

11. Chon mini’ e ra par nib mat’aw u p’eowchen Got u daken e michan’ rorad ko fare biyul’?

¹¹ Urngin e piin ni ke michan’rad ko fare biyul’ e rayog ni ngar manged pi tafager rok Got. (John 3:36) Gaar Paul: “Kristus e dariy e denen ni ngongliy, machane me fek Got e denen rodad nge ta’ nga daken, ni fan e ngad taab girdi’gad ngak nge yog nda mat’awgad ni bod rogon Got.” (2 Korinth 5:21) Jesus e ir ba girdi’ nib flont me ere ke pi’ ir ni maligach ni fan ko denen rok pi fak Adam me chuwegrad u fithik’ e denen. U daken Jesus ma ke yog ni ngar “mat’awgad ni bod rogon Got.” Re rarogon nem nib mat’aw u p’eowchen Got e som’on me yib ko piin nra un ngak Kristus ni yad 144,000 u gubin. Ma nap’an fare Gagiyeg ko Biyu’ e Duw, ma ra flont e girdi’ u fayleng mi yad par nib mat’aw u p’eowchen Got ni yad pi fak Jesus Kristus ni ir e Chitamangirad ni Manemus. Ra tolangnagrad mar pared nib mat’aw mab flont ma aram e rayog ni ngar pared nib yul’yul’ ku Got min pi’ e taw’ath ngorad ni yafas ndariy n’umngin nap’an.​—Isaiah 9:6; Revelation 14:1; 20:4-6, 11-15.

“Ereray e Re Awa ni nge Ayuwegey Got”

12. Mang maruwel ni baga’ fan ni be rin’ e piin ni yad owchen Jehovah nge pi ta mol’og rok?

¹² Ra ngada thapgad ngak Got ma ba t’uf ni ngad ngongolgad nib puluw ko n’en ni yog Paul ni gaar: “Gamad be maruwel [Jehovah] u taabang ni gamad be wenig ngomed ni be lungumad: ke yog ngomed e tow’ath ni pi’ Got, ere thingar dab mpaged nge maadab. Mu telmed ko n’en ni be yog Got: ‘Kug motoyil ngom ko fare awa nib m’agan’ug ngay, kug ayuwegnem ko fare rran ni ngam thap ngak Got.’ Mmotoyil! Ereray e re awa ni nge ayuwegey Got, daba’ e erera’ e re rran ni ngan thap ngak Got.” (2 Korinth 6:1, 2) Piin ni kan dugliyrad mi yad owchen Jehovah nge pi ta mol’og rok ni yad girdien “yugu boch e saf” e dar uned ko tow’ath ni pi’ Got mar paged nge maadab. (John 10:16) Ya yad ma par nib mat’aw e ngongol rorad ma yad ba pasig i wereg e machib ko ngiyal’ ney ni “re awa ni nge ayuwegey Got,” ma yad ma athamgil ni nge felan’ Got ngorad ma yad be weliy ko girdi’ ni ereray e “rran ni ngan thap ngak Got.”

13. Mang e be yog ko Isaiah 49:8, ma uw rogon ni ke lebug ko yan som’on?

¹³ I weliy Paul e thin ko Isaiah 49:8, ni be gaar: “Jehovah e be gaar ngak e girdi’ rok: ‘Ra taw ko ngiyal’ ni nggu ayuwegmed ma bay gu runguymed, mu gu fulweg lammed ni gimed be wenig ngog ni nggu ayuwegmed. Bay gu matanagiymed mu gu yoror romed, mu gu ngongliy e m’ag ngak urngin e girdi’ u dakenmed. Bay gu fulwegmed bayay nga lan e nam romed ni ke par e chiney ni kan n’ag.’” Ke lebug e re thin ko profet ney ko yan som’on u nap’an ni kan pag yu Israel ngar chuwgad u Babylon mar sulod ko binaw rorad ni kan n’ag.​—Isaiah 49:3, 9.

14. Uw rogon ni ke lebug e thin ko Isaiah 49:8 u daken Jesus?

¹⁴ Maku reb e thin ko Isaiah ni ke lebguy Jehovah e ke pi’ fare “tapigpig” rok ni Jesus ni ir ba “magal ngak e pi nam, ya ngan nang u fayleng ni ga’ngin kanawoen min thap ngak [Got].” (Isaiah 49:6, 8; mu taarebnag ko Isaiah 42:1-4, 6, 7; Matthew 12:18-21.) Fare “ngiyal’ nra ayuwegey,” ara “ngiyal’ nib m’agan’ Got ngay” e ba puluw ko ngiyal’ ni immoy Jesus u fayleng. I meybil, me “fulweg” Got tabon e meybil rok. Aram e “rran ni ran thapegey ngak Got” ni fan ngak Jesus ya ke par nib yul’yul’ ku Got ma aram me “par ni ir e be thapeg e girdi’ ngak Got ngar pired rok ndariy n’umngin nap’an, ni urngin e piin ni yad be fol rok.”​—Hebrews 5:7, 9; John 12:27, 28.

15. Ka nap’an e mang ngiyal’ ni ke athamgil yu Israel nib spiritual ni nge felan’ Got ngorad, ma mang e yad be nameg?

¹⁵ I puluwnag Paul e thin ko Isaiah 49:8 ngak e pi Kristiano ni kan dugliyrad, me wenig ngorad ni ‘dabra paged e tow’ath ni pi’ Got nge maadab’ ya dabra gayed rogon ni nge felan’ Got ngorad ko “ngiyal’ nib m’agan’ Got ngay” nge fare “rran ni ngan thap ngak Got.” Miki yog Paul ni gaar: “Mmotoyil! Ereray e re awa ni nge ayuwegey Got, daba’ e erera’ e re rran ni ngan thap ngak Got.” (2 Korinth 6:2) Ka nap’an Pentekost 33 C.E., ma ke athamgil yu Israel ni ngar micheged ni bay rogorad ni nge tow’athnagrad Got ni fan e nge yani aw ni “ngiyal’ nib m’agan’ Got ngay” ma aram e “rran ni ngan thapegrad ngak Got.”

‘Gad be Dag ni Gadad Bogi Tapigpig Rok Got’

16. Mang boch e magawon ni un Paul ngay me micheg ni ir e tapigpig rok Got?

¹⁶ Boch e girdi’ ni kar uned ko ulung nu Korinth e dar micheged ni bay rogorad ni nge tow’athnagrad Got. Ur t’ared e thin nga daken Paul ni nge dabi ga’ lungun ni ir e apostal, ni yugu aram rogon ni ke siy i pi’ tapgin “nge pirieg be’ ban’en nib kireb ko maruwel” rok. I micheg ni ir e tapigpig rok Got ya ke “k’adan’ ko gafgow ni yibe tay ngak, nge gafgow u ban’en, nge mo’maw ni be pirieg, urngin ni be athamgiliy u fithik’ e gum’an’ ni ba ga’. Kan toy ko dumow, ma ka nin’ nga kalbus, ma ke yib e girdi’ ni pire’ ni ngar lied; ma ke maruwel ke aw parowan, ma ke par yu ngiyal’ ndariy e mol ma dariy e abich.” (2 Korinth 6:3-5) Boch nga tomren me weliy Paul ni faanra pi tatogpuluw rok e yad e tapigpig rok Got ma ir “reb e tapigpig ni kab fel’ e pigpig ni be tay ko pigpig ni yad be tay” ya kab boor yay ni ka nin’ nga kalbus, ma kab yoor yay ni kan toy, ma kab yoor yay ni ke chugur ni ngem’.​—2 Korinth 11:23-27.

17. (a) Uw rogon ni gad ra ngongol ma aram e gad be micheg ni gad e pi tapigpig rok Got? (b) Mang boch e “talin e cham nib mat’aw”?

¹⁷ Bod Paul nge piin ni ma chag ngak, ma rayog ni nga daged ni gad e pi tapigpig rok Got. Uw rogon? “U daken lanin’dad nib machalbog,” ma ngad ngongolgad nib puluw ko thin ko Bible. Rayog ni ngad micheged e re n’em u daken lanin’dad nib “gum’an,” ngad k’adedan’dad ko tin nib kireb ni kan ngongliy ngodad, nge rogon ni gad ba “gol” ngak e girdi’ ni ngad ayuweged yad. Maku, rayog ni ngad micheged ni gad e pi tapigpig rok Got nfaanra gad ra fol ko kan ni thothup rok, ni ir e be pi’ ni nge pow’iydad, ma ngad daged nib “riyul’ nib t’uf e girdi’ rodad,” ma ngad dogned e tin riyul’ e thin, ma gad taga nga daken Got ni nge pi’ gelngidad ngad uned ko machib. Miki micheg Paul ni ir e tapigpig rok Got u daken e “talin e cham nib mat’aw ni ke cham ngay u ba’ ni mat’aw rok nge ba’ ni gilay’.” Rogon e cham kakrom, ma ba’ ni mat’aw i paay e be fek e sayden ma ba’ ni gilay’ e be kol e n’en ni yima mith nga fon. Nap’an ni cham Paul u rogon nib spiritual ngak e pi tamachib ni googsur ma de fanay e talin e cham ni ma fanay e girdi’ ntadenen​—ni ngongol nib sasalap, nge ban, nge lifith l’iginey. (2 Korinth 6:6, 7; 11:12-14; Proverbs 3:32) Ya ke fanay e “talin e cham” nib mat’aw ara kanawo’ ni ma mon’ognag e bin riyul’ e liyor. Susun ni ku er rogodad.

18. Faanra gad e pi tapigpig rok Got, ma susun uw rogon e ngongol rodad?

¹⁸ Faanra gad e tapigpig rok Got, ma gad ra ngongol ni bod Paul nge piin ni yad ma maruwel u taabang. Gad ra ngongol nib puluw ko Kristiano ndemtrug ko yibe tay fadad ara yibe dariy fannagdad. Dabda talgad ko machib ni bochan e thin nib kireb ni yibe wereg u morngaagdad, ma dabda ufgad ni faanra yira pining e sorok ngodad. Gad ra weliy e thin riyul’ ma gad ra lingagil ya gad ma ngongliy e tirok Got ban’en. Nap’an ni gad bay ko riya’ ya be togopluw e pi toogor rodad ngodad, ma gad ra pagan’ ngak Jehovah. Ma gad ra pining e magar u nap’an ni ran pi’ e fonow ngodad.​—2 Korinth 6:8, 9.

19. Uw rogon nrayog ni ngan ayuweg e girdi’ nge ‘fel’ rogorad’ ko tirok Got ban’en?

¹⁹ Tin tomur e thin ni weliy Paul u morngaagen e maruwel ni ngan ayuweg e girdi’ ngar manged pi tafager rok Got, me weliy morngaagen ir nge piin ni yad ma maruwel u taabang ni “kan kirebnagan’rad, ma gubin ngiyal’ nib felan’rad; gowa ri yad ba gafgow, machane boor e girdi’ ni kar fal’eged rogorad, gowa dariy ban’en rorad, machane riyul’ ni urngin ban’en ni ba’ rorad.” (2 Korinth 6:10) Bay tapgin e pi tapigpig nem ni nge kireban’rad ko gafgow ni ur ted, machane kar pared nib falfalan’. Dariy ban’en rorad, machane ‘boor e girdi’ ni kar fal’eged rogorad’ ko tirok Got ban’en. Ma riyul’, ni ‘urngin ban’en ni ba’ rorad’ ya ke fel’ rogorad ko tirok Got ban’en ni bochan e michan’ rorad​—ni mus ni fare tow’ath ni ngar manged pi fak Got u tharmiy. Maku kar pared nib fel’ rogorad ni yad ba falfalan’ ni yad e pi tapigpig ni Kristiano. (Acts 20:35) Rayog ni ngad ayuweged e girdi’ ni ‘nge fel’ rogorad’ nfaanra ngad ayuweged yad ngar manged pi tafager rok Got e chiney​—ni ereray e rran ni ran thapeg e girdi’ ngak Got!

Mu Pagan’ Ngak Jehovah nra Thapegem Ngak

20. (a) Mang e ri ba adag Paul, ma mang fan ni dariy e tayim ni ngan adbey? (b) Mang e pow ni ereray e rran ni ran thapeg e girdi’ ngak Got ko ngiyal’ ney?

²⁰ Nap’an ni yoloy Paul e bin l’agruw e babyor rok ngak piyu Korinth ko duw ni 55 C.E., ma ke mus ni 15 e duw ni ka bay ni nge par fare m’ag ko yu Jew. Ri ba adag e re apostal nem ni nge ayuweg piyu Jew nge piin ni gathi yad piyu Israel ni ngar manged pi tafager rok Got u daken Kristus. Aram e ngiyal’ ni ran thapegrad ngak Got ma dariy e tayim ni ngan adbey. Ma ka nap’an e 1914 ma gad bay ko ba ngiyal’ nib taareb rogon ko re ngiyal’ i n’em. Fare maruwel ko machib u ga’ngin e fayleng e be tamilangnag ni ereray e rran ni nran thapeg e girdi’ ngak Got.

21. (a) Mang thin ni aram kenggin e duw ni 1999? (b) Susun mang e ngada rin’ed ko rorran ney ni erera’ e rran ni ran thapgeg e girdi’ ngak Got?

²¹ Ba t’uf ko girdi’ u gubin e nam ni ngar rung’aged u morngaagen e n’en ni pi’ Got ni nge thap e girdi’ ngak u daken Jesus Kristus. Dariy e tayim ni ngan sagaal. I yoloy Paul ni gaar: “Mmotoyil! Daba’ e erera’ e rran ni ngan thap ngak Got.” Pi thin nem ko 2 Korinth 6:2 e aram kenggin e thin ko duw ni 1999 ko Pi Mich Rok Jehovah. Rib puluw, ya gad be par u m’on ko ban’en ni kab gel e kireb riy ko ngiyal’ ni kan thang yu Jerusalem nge fare tempel riy! Boch nga m’on rodad e ra thumur e re m’ag ney ni polo’, ma urngin e girdi’ u fayleng e ba l’ag ngay. Chiney​—gathi gabul​—e ereram e ngiyal’ ni ngan rin’ ban’en. Faanra mmich u wan’dad ni yigoo Jehovah e rayog ni nge thapgegdad, ma faanra ba t’uf rodad, ma faanra baga’ fan u wan’dad e yafas ni manemus, ma aram e dabda paged nge maadab fare tow’ath ni pi’ Got ngodad u fithik’ e runguy. Susun ni ri gad ba adag ni ngad ted fan Jehovah, ma gad ra micheg ko thin rodad nge ngongol rodad nib riyul’ u lanin’dad e pi thin ney u nap’an ni gad ma gaar: “Mmotoyil! Daba’ e erera’ e re rran ni ngan thap ngak Got.”

Mang e Fulweg Rom?

◻ Mang fan ni baga’ fan ni ngan mang tafager rok Got?

◻ Chon mini’ ni yad e piin owchen Got me mini’ e piin ni yad e ta mol’og rok Got ni yad be ayuweg e girdi’ ngar manged pi tafager rok Got?

◻ Uw rogon nrayog ni ngad micheged ni gad e pi tapigpig rok Got?

◻ Mang fan ngom fare thin ni kenggin e duw ni 1999 ko Pi Mich Rok Jehovah?

[Sasing ko page 28]

Bod Paul, ma gab pasig i machibnag e girdi’, ma ga be ayuwegrad ngar manged pi tafager rok Got fa?

Meriken

France

Côte d’Ivoire

[Sasing ko page 30]

Ngiyal’ ney ni roran ni ran thapeg e girdi’ ngak Got, ma gur reb ko fa bokum milyon e girdi’ ni kar manged pi tafager rok Jehovah Got fa?