Mu Weliy fare Thin nib Fel’ ni Murung’agen e Runguy rok Got

1, 2. Uw rogon ni dag apostal Paul ni be pining e magar ku Got ko runguy ni ke dag ngak?

RAYOG rok apostal Paul ni nge yog u fithik’ e yul’yul’ ni gaar: “Got e runguyeg nge ayuwegeg me pingegeg nggu par ni bod rogog e chiney, ma ayuw ni tay ngog e de aw nib m’ay fan.” (Mu beeg e 1 Korinth 15:9, 10.) Bochan ni i togopuluw Paul ngak e pi Kristiano kakrom, ma aram fan ni manang ndariy rogon ni nge dag Got e runguy ngak.

² Nap’an ni ke chugur ni nge yim’ Paul me yol ngak Timothy ni gaar: “Gu ma pining e magar ngak Kristus Jesus ni ir e Somol rodad, ni ir e ma pi’ gelngig ko maruwel ni gu be tay. Gu ma pining e magar ngak ni bochan e be finey nrayog ni nge pagan’ ngog, nge bochan e turguyeg ni nggu pigpig ngak.” (1 Tim. 1:12-14) Ba miti mang pigpig e be weliy Paul murung’agen? I yog ngak e piin piilal ko ulung nu Efesus ni gaar: “Kug finey ni pogofan rog e dariy rogon ngog, ni fan e nge yog ni gu mu’nag e maruwel ni kan pag fan ngog mu gu mu’nag e maruwel ni Somol Jesus e ke pi’ ngog ni nggu rin’, ni aram e nggu weliy ngan nang e Thin Nib Fel’ ni yib rok Got ni murung’agen feni t’uf e girdi’ [“murung’agen e runguy,” NW] rok Got.”​—Acts 20:24

3. Mang maruwel ni yugu ba thil e ni pi’ ngak Paul ni nge rin’? (Mu guy e sasing ni bay u tabolngin e re article ney.)

³ Mang fare “thin nib fel’” ni i machibnag Paul, ma uw rogon ni m’ug e runguy rok Jehovah riy? I yog ngak e pi Kristiano nu Efesus ni gaar: “Kam rung’aged ni Got e runguyeg nge pi’ e re gaf i maruwel ney ngog ni nguug muruwliy ni fan ngomed ni nge fel’ rogomed riy.” (Efe. 3:1, 2) Ere, ni tay chilen ngak Paul ni nge machibnag fare thin nib fel’ ngak e girdi’ ni gathi yad boch e Jew ya nge yag ni ngar manged bang u Gil’ilungun fare Messiah. (Mu beeg e Efesus 3:5-8.) I machib Paul u fithik’ e pasig me dag e kanawo’ nrib fel’ ni nge fol e piin Kristiano riy e ngiyal’ ney. Ere, ke m’ug ko ngongol rok nde aw nib “m’ay fan” e runguy ni dag Got ngak.

BE K’ARINGEM E RUNGUY ROK GOT NI NGAM RIN’ BAN’EN, FA?

4, 5. Mang fan nrayog ni nga dogned ni fare ‘Thin Nib Fel’ ni murung’agen e gagiyeg rok Got’ e taareb rogon ko fare thin nib fel’ ni murung’agen e “runguy rok”?

⁴ Chiney ni gad bay ko tin tomuren e rran e ke tay Jehovah chilen ko girdi’ rok ni ngar machibnaged e re “Thin rok Got ney Nib Fel’ ni murung’agen e gagiyeg rok Got . . . u gubin yang u fayleng ni nge urngin e girdi’ me nang.” (Matt. 24:14) Ere, fare thin ni gad ma machibnag e ku aram fare “thin nib fel’ ni yib rok Got ni murung’agen e runguy rok” ni bochan e urngin e tow’ath nra yag ngodad u tan Gil’ilungun e gubin nra pi’ ngodad ni bochan e runguy rok ngodad. (Efe. 1:3) Ere gur, gad ma pining e magar ko runguy ni ke dag Jehovah ngodad ni aram e gad ma machib u fithik’ e pasig ni bod ni rin’ Paul, fa?​—Mu beeg e Roma 1:14-16.

⁵ Fa binem e article e kad filed riy rogon ni ke yib angin e runguy rok Jehovah ngodad u boor e kanawo’ ni yugu aram rogon ni ka gadad bogi tadenen. Ere bochan e re n’ey ma aram e ke milfan ngodad ni ngad filed ngak yugu boch e girdi’ rogon ni be dag Jehovah e t’ufeg ngodad nge rogon nrayog ni nge yib angin ngorad. Mang boch e kanawo’ ni ke dag Got e runguy rok riy ngodad nthingar da ayuweged e girdi’ ni nge ga’ fan u wan’rad?

MU WEREG FARE THIN NIB FEL’ NI MURUNG’AGEN FARE BIYUL

6, 7. Nap’an ni gad ra weliy murung’agen fare biyul ngak e girdi’, ma uw rogon ni gad be wereg fare thin nib fel’ ni murung’agen e runguy rok Got?

⁶ Ngiyal’ ney e boor e girdi’ ni yad ma rin’ boch e denen ndarur lemnaged nib kireb e n’en ni yad be rin’. Ere, aram fan ndar nanged ko mang fan nib t’uf ni ngan biyuliy e girdi’. Machane, ku boor e girdi’ ni kar guyed nder yag ni ngar pirieged e felfelan’ ni bochan rarogon e par rorad. Maku boor e girdi’ nu tomuren ni ke machibnagrad e Pi Mich Rok Jehovah mfin aram e ngiyal’ ni kar nanged ko mang e denen, nge rogon wenegan ni ke yib ngodad, nge n’en nib t’uf ni ngad rin’ed me yag ni nge dab kud manged sib ko denen. Ma pi arorad nriyul’ ni yad baadag ni ngar nanged e tin riyul’ e kar felfelan’gad ni kar nanged ni bochan e t’ufeg nge runguy rok Jehovah ma aram me l’og Fak ni nge yib nga fayleng ni nge biyuliydad me pithigdad ko denen nge yam’.​—1 John 4:9, 10.

⁷ Nap’an ni weliy Paul murung’agen Fak Jehovah nrib t’uf rok, me yog ni gaar: “Rachaen Jesus ni map’ . . . e ir e pithigdad ko denen, me ir e n’ag Got fan e denen rodad riy. Ri ba ga’ e runguy rok Got ngodad.” (Efe. 1:7) Fare biyul ni pi’ Kristus e aram e mich riy ni gadad ba t’uf rok Got ma ma runguydad. Ri gad ba felfelan’ ni kad nanged ni faanra mich u wan’dad fare biyul ni pi’ Jesus, ma aram e yira n’ag fan e denen rodad min beechnag lanin’dad ara nangan’ rodad! (Heb. 9:14) Rriyul’ ni ireray e thin nib fel’ ni ngad weliyed ngak yugu boch e girdi’!

MU AYUWEG E GIRDI’ NI NGE FEL’ THILRAD GOT

8. Mang fan nib t’uf ko girdi’ ni tadenen ni nge fel’ e tha’ u thilrad Got?

⁸ Ba milfan ngodad ni ngad ayuweged e girdi’ ni ngar nanged nrayog ni nge fel’ e tha’ u thilrad e En ni Ke Sunmiyrad. U m’on ndawori mich fare maligach ni pi’ Jesus u wan’ e girdi’, ma ma tay Got ni yad e toogor rok. I yoloy apostal John ni gaar: “En nra mich u wan’ e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” (John 3:36) Ere, gad ba felfelan’ ya bochan fare maligach ni ke pi’ Kristus ma aram e rayog ni nge fel’ thildad Got. I gaar Paul: “Ba’ ba ngiyal’ ni um moyed ni gimed mmal’af rok Got ma gimed be taymed ni gimed e pi toogor rok ni bochan e tin nib kireb ban’en ni um rin’ed ma gimed be lemnag. Ma chiney e ke taymed Got ni gimed e pi tafager rok u daken e yam’ ni tay Fak.”​—Kol. 1:21, 22.

9, 10. (a) Mang maruwel e ke pi’ Kristus ngak pi walagen ni kan dugliyrad? (b) Uw rogon ni be ayuweg “yugu boch e saf” e piin ni kan dugliyrad?

⁹ Ke pi’ Kristus reb e maruwel ngak pi walagen ni kan dugliyrad ni ka yad bay u roy u fayleng. Re maruwel nem e aram e “ngar guyed rogon e tin ni ka ba’ e girdi’ ngkur manged pi tafager rok.” I yog Paul ko pi Kristiano ni kan dugliyrad ko bin som’on e chibog ni gaar: “Urngin e pi n’ey e Got e ke ngongliy, ni ir e ud moyed ni gadad e toogor rok me pingegdad ngad manged pi tafager rok, ni rin’ u daken Kristus, me pi’ ngodad e maruwel ni ngad guyed rogon e tin ni ka ba’ e girdi’ ngkur manged pi tafager rok. Gamad be machibnag ni Got e be m’ag e tafager ngak urngin e girdi’ u daken Kristus. I Got e daki ta’ u wan’ e denen rorad ni nge togopluw ngorad, ma ke pi’ e thin riy ngomad nga rogon nra ngongliyrad ngar manged pi tafager rok. Ere gamad be weliy e thin rok Kristus ngomed, ni aram e be wenig Got ngomed u l’ugunmad: ere gamad be wenig ngomed ni pa’ Kristus ni ngam paged Got nge pingegmed e toogor rok ngam manged pi tafager rok!”​—2 Kor. 5:18-20.

¹⁰ Ba tow’ath “yugu boch e saf” ni yad be ayuweg pi walagrad ni kan dugliyrad ko re maruwel ney. (John 10:16) Bochan ni yad e piin ni owchen Jesus ara pi tamol’og rok, ma aram fan nrib ga’ e ayuw ni yad ma pi’ ko fare maruwel ni machib. Yad ma fil e tin riyul’ ko girdi’ ma yad be ayuwegrad ni nge fel’ e tha’ u thilrad Jehovah. Ireray bang ko fare maruwel ni ngan machibnag fare thin nib fel’ ni murung’agen e runguy rok Got ni gad ma rin’ nrib ga’ fan.

MU WELIY KO GIRDI’ NI GOT E MA RUNG’AG E MEYBIL

11, 12. Mang fan nib fel’ ni nge nang e girdi’ nrayog ni ngar meybilgad ngak Jehovah?

¹¹ Boor e girdi’ ni yad ma meybil ni bochan e nge fel’ lanin’rad, machane bin riyul’ riy e de mich u wan’rad ni ma motoyil Got ko meybil rorad. Ere, ba t’uf ni ngar nanged ni “ma fulweg” Jehovah taban e meybil. I yoloy David ni fare psalmist ni gaar: “Bochan e ga be fulweg taban e meybil. Urngin e girdi’ e ngar bad ngom ni bochan e denen rorad. Kireb romad e ke gel ngomad, machane bay mu n’ag fan nge chuw.”​—Ps. 65:2, 3. 

¹² I yog Jesus ngak pi gachalpen ni gaar: “Faan gimed ra ning ban’en . . . u fithingag ma ri gu ra rin’.” (John 14:14) Ba tamilang ni fare bugithin ni “ban’en” e be yip’ fan urngin ban’en nib m’agan’ Jehovah ngay. Ke micheg John ngodad ni gaar: “Aram fan nib pagan’dad u p’eowchen Got; mmudugil u wun’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” (1 John 5:14) Rib manigil ni ngan ayuweg e girdi’ ngar nanged ni meybil ni yad ma tay e gathi kemus ni ban’en ni ma fal’eg lanin’rad, ya ireray kanawoen ni ngar chugurgad nga “tagil’ Got, ko gin ni bay e ayuw riy”! (Heb. 4:16) Faan gad ra fil ngorad rogon kanawoen nib puluw ni ngar meybilgad, nge En ni ngar meybilgad ngak, nge pi n’en nib puluw ni ngar yibilayed, ma aram e gad be ayuwegrad ni ngar chugurgad ngak Jehovah me fel’ lanin’rad u nap’an ni ke yib e gafgow ngorad.​—Ps. 4:1; 145:18.

RUNGUY NRA DAG GOT U LAN E BIN BEECH E M’AG

13, 14. (a) Mang e tow’ath nrib fel’ ni yira pi’ ngak e piin ni kan dugliyrad boch nga m’on? (b) Mang reb e maruwel nrib manigil nra rin’ e piin ni kan dugliyrad ni fan ko girdi’?

¹³ Nap’an nra chuw e re m’ag nib kireb ney, maku ra ulul Jehovah ni nga i dag e runguy rok ngodad. Piin ni yad ra un ngak Kristus ko gagiyeg u tharmiy ni yad 144,000 u gubin e ra pi’ Got reb e tow’ath nrib fel’ ngorad. I weliy Paul murung’agen e re tow’ath nem u nap’an ni gaar: “Runguy rok Got ngodad e ri ba ga’, ma rogon ni gadad ba t’uf rok e ri ba ga’, ya nap’an ni ka gadad bay u tan e gechig rok Got ni aram e gadad ba yam’ ni bochan e denen rodad me chagiydad ngak Kristus nge thapegdad ko yafos; yu daken e runguy rok Got e ir e ke thapegmed riy ngak. Ke unegdad ngak Kristus Jesus ke chuwegdad u tan e gechig rok Got ni ngad uned ngak Kristus Jesus ko gagiyeg ko bin nu tharmiy e tamilang, ya nap’an e ngad thapgad nga lan e bin nib beech e m’ag ma rayog ni dag ga’ngin e runguy rok ngodad ndariy n’umngin nap’an nge rogon fadad t’uf rok ni ke dag ngodad rok Kristus Jesus.”​—Efe. 2:4-7, NW.

¹⁴ Ba mo’maw’ ni ngad susunnaged u lanin’dad e pi tow’ath nra pi’ Jehovah ngak e pi Kristiano ni kan dugliyrad u nap’an ni yad ra un ngak Kristus ko gagiyeg u tharmiy. (Luke 22:28-30; Fil. 3:20, 21; 1 John 3:2) Ra dag Jehovah e ‘runguy rok ndariy n’umngin nap’an’ ngak e pi Kristiano nem ni kan dugliyrad, ma yad ra mang bang ko “fa bin nib beech e Jerusalem,” ni aram fare pin ni ngar mabgolgow Kristus. (Rev. 3:12; 17:14; 21:2, 9, 10) Yad ra un ngak Jesus ngar ‘chuweged e liliy rok e pi nam’ ni aram e ngar ayuweged e girdi’ ndab kur manged sib ko denen nge yam’ me yag ni ngkur flontgad bayay.​—Mu beeg e Revelation 22:1, 2, 17.

15, 16. Uw rogon nra dag Jehovah e runguy rok ngak “yugu boch e saf” boch nga m’on?

¹⁵ Fare thin ni bay ko Efesus 2:7 e be yog nra dag Got e runguy rok u “lan e bin nib beech e m’ag.” Ere, dariy e maruwar riy nra taw ko ngiyal’ nem ma urngin e girdi’ u roy u fayleng ni yad ra guy “ga’ngin e runguy” rok Jehovah. (Luke 18:29, 30) Reb e kanawo’ nra m’ug gelngin e runguy rok Jehovah riy e aram e ra faseg e piin ni yad bay u lan e “fayleng [ara “low,” NW] ko yam.” (Job 14:13-15; John 5:28, 29) Urngin e piin ni ur moyed kakrom ni yad ba yul’yul’ nra m’ad u m’on ni nge yim’ Kristus, nge “yugu boch e saf” ni kar pared ni yad ba yul’yul’ ke mada’ ko yam’ u nap’an e tin tomuren e rran e yira fasegrad ko yam’ mi yad ulul ni ngar pigpiggad ku Jehovah.

¹⁶ Ku bay bokum milyon e girdi’ ni kar m’ad ndar nanged Got ni ku yira fasegrad ko yam’ min ayuwegrad ni ngar folgad ko gagiyeg rok Jehovah. I yoloy John ni gaar: “Mu gguy e piin ni kar m’ad ni piin nib tolang nge piin nib sobut’ ni kar sak’iygad u m’on u tagil’ Got. Min pithig e babyor, mu kun pithig ba ken, ni fare ke babyor ni babyoren e piin ni kar fosgad. Ma piin ni kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor. Ma aram me pi’ e day e pi yam’ ni ba’ riy. Ma yam’ nge gin ni ma par e piin ni kar m’ad riy e kur piew e yam’ ni ba’ rorow. Ma yad urngin nni pufthinnagrad ni be yan u rogon e n’en ni ur ngongliyed.” (Rev. 20:12, 13) Riyul’ ni piin ni yira fasegrad ko yam’ e ra t’uf ni ngar filed rogon ni ngar folgad ko pi kenggin e motochiyel rok Got ni bay u Bible. Maku reb e, yad ra fil murung’agen boch e motochiyel nib beech ni yira tay nga lan “fa yu ke babyor” ni be weliy e n’en nib m’agan’ Jehovah ngay ni nge rin’ e piin ni yad ra par u lan e bin nib beech e m’ag. Pi motochiyel nem nib beech ni fin yira pi’ e ku aram yugu reb e kanawo’ nra dag Jehovah e runguy rok riy ngodad.

NGAUM MACHIBNAG FARE THIN NIB FEL’

17. Mang e susun ndab da paged talin u nap’an ni gad be machib?

¹⁷ Chiney ni ke chugur ko tomur e rib ga’ fan ni ngad machibnaged fare thin nib fel’ ni murung’agen Gil’ilungun Got. (Mark 13:10) Dariy e maruwar riy ni fare thin nib fel’ e be tamilangnag murung’agen e runguy rok Jehovah. Ere, susun ndab da paged talin e re n’ey u nap’an ni gad be machib. Ma ngkud nameged ni ngad pininged e sorok ngak Jehovah u nap’an ni gad be rin’ e re maruwel ney. Rayog ni ngad rin’ed e re n’ey ni faan gad ra dag ngak e girdi’ ni kemus nu daken e runguy rok Jehovah e rayog ni nge yag ngodad riy e pi tow’ath ni ke micheg nra pi’ ngodad u lan e bin nib beech e fayleng.

18, 19. Uw rogon ni ngad gagiyelnaged e runguy rok Jehovah?

¹⁸ Nap’an ni gad be machib, ma rayog ni ngad weliyed ko girdi’ nnap’an nra tabab Kristus ko gagiyeg u fayleng, ma aram e ngiyal’ nra yib angin fare biyul ko girdi’ me yag ni ngar flontgad i yan ni buchuuw ma buchuuw. Be gaar e Bible: “Bay ra pired ni gathi yad e sib rok e wod, mi yad un ko flaab rok pi fak Got.” (Rom. 8:21) Kemus nu daken e runguy rok Jehovah e rayog ni nge lebug e re n’ey riy.

¹⁹ Gad ba tow’ath nrayog ni ngad weliyed ngak urngin e girdi’ murung’agen e pi tow’ath ni ke micheg Got ni bay ko Revelation 21:4, 5 ni be gaar: “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” Me gaar Jehovah ni ir faanem ni ke par nga tagil’: “Chiney e nggu thiliyeg urngin ban’en nge beech!” Miki ulul ngay ni gaar: “Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.” Ere nap’an ni gad ra machibnag e re thin nib fel’ ney ko girdi’, ma aram e riyul’ ni gad be gagiyelnag e runguy rok Jehovah.