Mu Pag e Gol nge “Sumunguy” ni Nge Gagiyegnagem

I YOG Lisa ni gaar, “Rib ga’ angin e gol ni dag e pi walag u lan e ulung ngog.”a Be weliy e n’en ni k’aring ni nge adag ni nge nang e tin riyul’ aram ko som’on. Ku aray rogon Anne ni yog ni gaar, “I gag e gathi ri machib rorad e k’aringeg ni nggu adag e tin riyul’, ya rogon e gol ni ur daged ngog.” Gal walag nib pin ney e yow baadag ni yow ma beeg e Bible rorow e chiney ma yow be fal’eg i lemnag, machane rib ga’ angin e gol nge sumunguy ni un dag ngorow.

Uw rogon ni ngad daged e gol nge sumunguy nra pi’ e athamgil nga laniyan’ e girdi’ u toobdad? Ngad weliyed l’agruw e kanawo’, ni aram e: rogon ni gad ma fanay bolowthdad nge rogon e ngongol rodad. Ngemu’ ma gad weliy ko mini’ e piin nsusun e ngad daged e gol nge sumunguy ngorad.

NGAUM NON U FITHIK’ E “SUMUNGUY”

Fare pin nib yal’uw ma ke mabgol ni kan weliy murung’agen ko Proverbs ko guruy ni 31 e ma non u fithik’ e “sumunguy.” (Prov. 31:26) Ma pag e “sumunguy” ni nge gagiyegnag e n’en nge yog nge rogon ni nge yog. Ku arrogon e pi matam nsusun e ngkur nonad u fithik’ e “sumunguy.” Boor e gallabthir ni yad manang ni faan yad ra non ngak pi fakrad nib gel e thin ni nga rogned ma rayog ni nge magawonnagrad, maku rayog ndab ra folgad ara ra motoyilgad ko n’en ka rogned. Ere faanra non e piin gallabthir ngak pi fakrad u fithik’ e sumunguy, ma aram e ra mom ngorad ni ngar motoyilgad ko n’en ka nog ngorad mar folgad riy.

Demtrug ko gur reb e gallabthir fa danga’, ma uw rogon nrayog ni ngam nang rogon ni ngaum non u fithik’ e sumunguy? Bay ban’en ni ka nog ko Proverbs 31:26 nra ayuwegdad. Be gaar: “Ma welthin . . . u fithik’ e gonop.” Re n’ey e ba muun ngay ni ngaud gonopiyed e re miti thin ni nga u dogned nge rogon ni nga u dogned. Reb e ban’en nra ayuwegdad e aram e ngad fithed gadad ni nge lungudad, ‘Re n’ey ni nggog e ra k’aring e damumuw ngak be’ fa ra awnag e gapas?’ (Prov. 15:1) Arrogon, gad ba gonop ni faan gad ra lem u m’on ni ngad nonad.

Ku be gaar e Proverbs: “Marog thin e rayog ni nge maad’ad nga laniyan’ be’ nib toar ni bod bangi sayden.” (Prov. 12:18, BT) Nap’an ni gad ra lemnag rogon nrayog ni nge kireb laniyan’ yugu boch e girdi’ ni bochan e thin ni gad ma yog nge rogon ni gad ma yog, ma aram e rayog ni nge k’aringdad e re n’ey ni ngad gagiyegnaged e n’en gad ma yog. Arrogon, faanra ud nonad u fithik’ e “sumunguy,” ma aram e ra ayuwegdad ni nge dab u dogned e thin nib kireb ara ud nonad nib gel mrin. (Efe. 4:31, 32) Ku ra ayuwegdad ni nge dab ka yugu da pared ma gad be lemnag ara gad be weliy thibngin ban’en, mu ud weliyed fel’ngin ban’en u fithik’ e sumunguy. Ke dag Jehovah e kanawo’ u rogon ni ngan rin’ e re n’ey u nap’an ni pi’ e athamgil nga laniyan’ Elijah ni tapigpig rok u nap’an ke rus. Fare engel ni yib i non ngak ni owchen Jehovah e non u “ba lam ni be kathkath.” (1 Ki. 19:12) Machane, ra ngad daged e gol nge sumunguy ma gathi kemus ni nga i m’ug ko thin rodad ya thingar ki m’ug ko ngongol rodad. Ni uw rogon?

GOL NI YIMA DAG E RA K’ARING E GIRDI’ NI NGAR RIN’ED BAN’EN

Nap’an ni gad ra non ma gad be ngongol u fithik’ e gol nge sumunguy, ma aram e gad be folwok rok Jehovah. (Efe. 4:32; 5:1, 2) Lisa ni faan kan weliy murung’agen e weliy rogon ni gol e Pi Mich ngak. I gaar: “Nap’an nog ngomad chon e tabinaw rog ni nggu chuwgad ko gin gamad ma par riy nib tomgin, me fek l’agruw wu’ i mabgol u lan e ulung e matal rorad ni ngar ayuweged gamad ni nggu kunuyed e chugum romad. Ngiyal’ nem e ka dawor gu un ko fol Bible!” Rogon e gol nni dag ngak Lisa e k’aring ni nge fal’eg i gay murung’agen e tin riyul’.

Anne ni faan kan weliy murung’agen u tabolngin e re article ney e kub ga’ fan u wan’ e gol ni dag e Pi Mich ngak. I gaar, “Bochan rarogon e re fayleng ney, ma boor ban’en ni ma maruwar u wan’ug, ma kub mo’maw’ ni ma pagan’ug ko girdi’.” Ki ulul ngay ni gaar: “Nap’an nug mada’gad e Pi Mich, ma der pagan’ug ngorad. I lungug u wan’ug, ‘Mang fan ni yad baadag ni ngar nonad ngog?’ Machane rogon e gol ni dag e en ni fil e Bible ngog e k’aringeg ni nge pagan’ug ngak.” Ere mang angin ni yib riy? “Boch nga tomuren, ma aram mug tabab ni nggu tiyan’ug ko n’en nug be fil.”

Mu tay fanam i yan riy ni rogon e gol nge sumunguy ni dag e pi walag u lan e ulung ngak Lisa nge Anne e rib ga’ angin ni yib ngorow, me ayuwegrow ni ngar adagew ni ngar filew e tin riyul’. Ku aram e n’en ni ayuwegrow ni ngar tababgow ni nge pagan’row ngak Jehovah nge girdi’ rok.

MU FOLWOK ROK GOT NGAUM DAG E GOL NGE SUMUNGUY KO GIRDI’

Bay boch e girdi’ nib mom ni ngaur nonad u fithik’ e sumunguy ma yad be siminmin ni bochan rogon nni chuguliyrad ara gin ra ilalgad riy. De kireb ni bay boch e girdi’ ni yad ba gol ni bochan e yalen rorad ara rarogorad. Machane faanra kemus fan ni gad ma gol ko girdi’, ma sana gathi aram e gad be folwok rok Got.​—Mu taarebrogonnag ko Acts 28:2.

Gol e aram bang u wom’engin gelngin Got nib thothup. (Gal. 5:22, 23) Ere ra ngad daged e gol nge sumunguy, ma aram e ba t’uf ni ngad paged gelngin Got nib thothup ni nge gagiyegnag e lem nge ngongol rodad. Gad ra rin’ e re n’ey, ma aram e gad be folwok rok Jehovah nge Jesus. Maku reb e, gad bod Jesus nriyul’ ni gad ma lemnag yugu boch e girdi’. Ere t’ufeg rodad ngak Jehovah Got nge girdi’ e aram e n’en ma k’aringdad ni ngad daged e gol nge sumunguy ko girdi’. Faanra ireray fan ni gad ma rin’ e re n’ey, ma aram e ra ud daged e gol nge sumunguy ni ke yib u gum’ircha’dad mab fel’ u wan’ Got.

MINI’ E NGAUD DAGED E GOL NGE SUMUNGUY NGAK?

Sana ba mom ni ngad golgad ngak e piin kar golgad ngodad ara piin gad manangrad. (2 Sam. 2:6) Reb e kanawo’ nrayog ni ngad rin’ed e re n’ey riy e aram e ngaud pininged e magar ngorad. (Kol. 3:15) Machane uw rogon ni faanra gad be lemnag ni bay be’ ndariy rogon ni ngad golgad ngak?

Am lemnag e re n’ey: Jehovah e ir e ke dag e bin th’abi fel’ e kanawo’ nrayog ni ngan folwok riy ya ke runguydad ke dag e gol ngodad ni yugu aram rogon ndariy rogon ni nge rin’, maku bay ban’en nib ga’ fan ni be fil e Thin rok ngodad u murung’agen rogon ni ngan dag e re fel’ngin ney. Fare bugithin ni “runguy” e boor yay ni ka nog u lan e Pi Babyor ko Bible nni Yoloy Nsom’on ni Thin ni Greek. Ere uw rogon ni ma runguydad Got nge gol ngodad?

Am lemnag urngin e milyon e girdi’ ni be runguyrad Jehovah be gol ngorad ni aram e be pi’ e tin nib t’uf rorad ya nge yag nra pared ni yad ba fos. (Matt. 5:45) Bin riyul’ riy e, ke runguydad Jehovah ke gol ngodad u m’on ni ngad nanged ko ir mini’. (Efe. 2:4, 5, 8) Bod ni ke pi’ Fak ni kari maagirag rok ni nge yim’ ni fan ngak urngin e girdi’. I yoloy apostal Paul ni ke pi’ Jehovah fare biyul ni bochan e ‘ri ba ga’ e runguy rok ngodad.’ (Efe. 1:7) Maku reb e, yugu aram rogon ni ka gad ma denen ma gad ma kirebnag laniyan’ Jehovah, machane ka ma ulul ni nge pow’iydad ma be skulnagdad. Thin rok nge fonow rok e bod e “n’uw ni be saaw’aw.” (Deut. 32:2) Ere dabiyog ni ngad sulweged puluwon urngin ban’en ni ke rin’ ni fan ngodad ni bochan e runguy rok ngodad. Maku reb e, gad manang ni faan gomanga de runguydad nge gol ngodad ma aram e dariy e athap rodad boch nga m’on.​—Mu taarebrogonnag ko 1 Peter 1:13.

Dariy e maruwar riy ni gol nge sumunguy ni ma dag Jehovah e ma k’aringdad ni ngad t’ufeged mu kud daged e gol nge sumunguy ngak yugu boch e girdi’. Ere susun e ngad guyed rogon ni ngad folwokgad rok ni aram e ngaud daged e gol nge sumunguy ngak e girdi’ ni gubin e rran ko bin kemus nri in e girdi’ e ngaud daged e biney e fel’ngin ngorad. (1 Thess. 5:15) Gad ra rin’ e re n’ey ni gubin ngiyal’, ma aram e gad bod ba nifiy ni kan k’eg u borran nib gel e garbeb. Gad ra fal’eg laniyan’ chon e tabinaw rodad, nge piin gad ma liyor u taabang, nge piin gad nga maruwel, ara skul, nge piin buguli yoror rodad.

Am lemnag boch e girdi’ u lan e tabinaw ara ulung rom nra yib angin ngorad e gol nge sumunguy ni ga ma dag u daken e thin nge ngongol rom. Sana rayog ni bay be’ u lan e ulung rom nib t’uf ni ngan ayuweg u boch e maruwel u tabinaw rok nge milay’ rok, ara boch e maruwel ni ma rin’ ni gubin ngiyal’ ni bod e yan nga kantin. Maku reb e gur, rayog ni ngam ayuweg be’ ni kam mada’nag u nap’an e machib nib t’uf ni ngan ayuweg u ban’en, fa?

Ere manga yugu da folwokgad rok Jehovah ngad paged e gol nge “sumunguy” ni nge gagiyegnag e thin nge ngongol rodad ni gubin ngiyal’.