Mu Guy Ko Ba Puluw E Michan’ Rom Ko Bible Fa Danga’

GA MA yog ni gur reb e Kristiano, fa? Faanra arrogon, ma gab muun nga sogonap’an l’agruw e bilyon e girdi’ u roy u fayleng ni yad ma yog ni yad boch i gachalpen Kristus. Ngiyal’ ney e bokum biyu’ e teliw ni yad ma yog ni yad e Kristiano, machane de taareb e machib rorad, ma kub thil rogon lanin’rad u boch ban’en. Ere, rayog nib thil e michan’ romed yugu boch e girdi’ ni ku yad ma yog ni yad boch e Kristiano. Machane gur, rib ga’ fan e pi n’en ni ke michan’um ngay, fa? Arrogon, rib ga’ fan ni faanra ga baadag ni ngam fol ko pi n’en nthingari rin’ e piin Kristiano nrogon ni bay u Bible.

Tin som’on i gachalpen Jesus Kristus e un “pining girdien Kristus” ara piin Kristiano ngorad. (Acts 11:26) De t’uf ni ngkun pining yugu boch e ngachal ngorad ni bochan e kemus ni taab n’en e ba michan’rad ngay. Piin Kristiano e ba taareban’rad ma yad ma fol ko pi n’en ni i machibnag Jesus Kristus ni ir e En ni Tababnag e ulung ni Kristiano. Ma uw rogon e ba’ rom e teliw? Ba mich u wan’um ni ma fil ko girdi’ e pi n’en ni i machibnag Kristus nge pi n’en nib mich u wan’ e tin som’on i gachalpen Kristus, fa? Uw rogon me yag nim nang e fulweg ko re deer ney? Kemus ni taab n’en e bay nrayog ni ngam rin’, ni aram e ngam fanay e Bible ni ngam nang ko ba puluw e pi n’en ni ke mich u wan’um fa danga’.

Am lemnag e re n’ey: Jesus Kristus e ri ma tayfan e thin ni bay u lan e Babyor nib Thothup ni bochan e aram e Thin rok Got. Dabun daken e piin ni ur ga’naged fan boch e yalen nge machib ni ke sum ko girdi’ ma yad be achignag fan e machib u lan e Bible. (Mark 7:9-13) Ba tamilang ko re n’ey ni tin riyul’ i gachalpen Jesus e yad ma guy rogon ni nge puluw e machib rorad ko n’en ni be yog e Bible. Ere, ba fel’ ni nge reb e Kristiano me fith ir ni nge gaar, ‘Ba puluw e n’en ni ma machibnag e ba’ rog e teliw ko n’en ni be yog e Bible, fa?’ Faanra ga baadag ni ngam nang e fulweg ko re deer ney, ma rayog ni ngam taarebrogonnag e pi n’en ni ma machibnag e ba’ rom e teliw ko n’en nri be yog e Bible.

I yog Jesus nthingari puluw e liyor ni gad be tay ngak Got ko tin riyul’ ni bay u lan e Bible. (John 4:24; 17:17) Miki yog apostal Paul ni faan gad ra ‘nang e tin riyul’,’ ma aram e rayog ni nge yag e yafos ngodad. (1 Timothy 2:4) Ere, aram fan nrib t’uf ni nge puluw e pi n’en ni ke mich u wan’dad ko tin riyul’ u lan e Bible, ya ireray e n’en nra dugliy ko ra yag e yafos ngodad fa danga’.

ROGON NI NGAD TAAREBROGONNAGED E PI N’EN KE MICHAN’DAD NGAY KO N’EN BE YOG E BIBLE

Gamad be pi’ e athamgil nga lanin’um ni ngam beeg e re nel’ i deer ni baaray nge fulweg riy ni be pi’ e Bible. Mu yaliy e pi thin nu Bible ni bay u tan e pi deer ney, mag fal’eg i lemnag fapi fulweg riy, mag fithem ni nge lungum, ‘Ba puluw e n’en ni be machibnag e ba’ rog e teliw ko n’en ni be yog e Bible, fa?’

Ga ra fal’eg i yaliy e fulweg ko re deer ney ma rayog ni nge ayuwegem ni ngam nang ko ba puluw e michan’ rom ko thin nu Bible fa danga’. Ere, ba m’agan’um ngay ni ngam taarebrogonnag e pi n’en ni ma machibnag e teliw rom ko n’en ni be yog e Bible, fa? Ba felfelan’ e Pi Mich Rok Jehovah ngay ni ngar ayuweged gur ni ngam nang e tin riyul’ ni be fil e Bible. Maku reb e, rayog ni nga mog ngak bagayad ni nge fil e Bible ngom ndariy puluwon, ara mman ko fare website romad ni jw.org.