Mang E Machib Ko Pi Mich Rok Jehovah?

“Gamad ba adag ni nggu rung’aged rom e tin ni ir e ga be lemnag, ya gamad manang ni gubin yang ma be non e girdi’ riy nib togopuluw ko re raba’ i girdi’ nem.” (Acts 28:22) Rib fel’ e thin ko pi tayugang nem nu Roma u nap’an e bin somm’on e chibog. Ya yad ba adag ni ngar rung’aged e thin rok be’, ma gathi thin ni ra weliy e piin ni yad be gathibthibnag faanem.

Ere ku arrogon e Pi Mich Rok Jehovah e ngiyal’ ney ni boor ban’en ni yibe weliy nib togopuluw ngorad, ma ra oloboch be’ ni faanra be lemnag ni ra nang e tin riyul’ u morngaagen e machib ko Pi Mich Rok Jehovah ni faanra motoyil ko piin ni yad be togopuluw ngorad. Ere gamad ba falfalan’ ni rayog ni nggu weliyed ngom boch e machib romad.

Fare Bible, nge Jesus Kristus, nge Got

Mmich u wan’mad ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor, ma ba ga’ fan e thin riy.” (2 Timothy 3:16) Yugu aram rogon ni boor e girdi’ e ma yog ni gathi gamad e Kristiano, ma de puluw e re thin nem. Ya gamad ma machibnag e n’en i yog apostal Peter u morngaagen Jesus Kristus ni gaar: “Ke mus ni Jesus e rayog rok ni nge thapeg e girdi’ ngak Got; ya dakuriy yugu reb e ngachal nga bayang u roy u fayleng ni pi’ Got ngak e girdi’, ni ir e rayog rok ni nge thapegdad ngak Got.”—Acts 4:12.

Machane, bochan ni yog Jesus ni “Fak Got ir” ma “ani Chitamangiy e ke l’og,” mmich u wan’ e Pi Mich Rok Jehovah ni Got e baga’ ngak Jesus. (John 10:36; 6:57) I yog Jesus ni gaar: “Ani Chitamangiy e ir e ka ba ga’ ngog.” (John 14:28; 8:28) Ere de mich u wan’mad ni ba taareb tolangin Jesus nge ani Chitamangiy nrogon e machib ko Trinitas. Danga’, ya mmich u wan’mad ni Got e sunmiy Jesus ma Jesus e ba sobut’ ngak Got.—Kolose 1:15; 1 Korinth 11:3.

Rogon e thin nu Meriken, fithingan Got e Jehovah. I yog e Bible ni gaar: “Gur ni fithingam e JEHOVAH e goo gur e th’abi tolang u fayleng.” (Psalm 83:18, King James Version) Machib rok Jesus e bpuluw ko re thin nem ya i lingagilnag fithingan Got, me fil ngak pi gachalpen ni ngar meybilgad ni lungurad: “Chitamangimad ni ga bay u tharmiy, ngan mathangeluwolnag fithingam.” Ma nap’an ni i meybil ngak Got me gaar: “Kug weliy fithingam ngak e piin ni kam pi’rad ngog u fayleng.”—Matthew 6:9; John 17:6.

Mmich u wan’ e Pi Mich Rok Jehovah ni thingar ra folwokgad rok Jesus ni ngar weliyed morngaagen fithngan Got nge pi n’en nib m’agan’ Got ngay ngak yugu boch e girdi’. Ere kugu fanayed fare ngochol ni Jehovah’s Witnesses ara Pi Mich Rok Jehovah ni bochan e gamad ma folwok rok Jesus ni ir fare “Mich nib Yul’yul’.” (Revelation 1:5; 3:14) Be weliy Isaiah 43:10 u morngaagen e piin ni yad owchen Got ni gaar: “I gaar Jehovah, ‘Gimed e pi mich rog ma gimed e pi tapigpig rog ni kug mel’egmed.’ ”

Gil’ilungun Got

I fil Jesus ngak pi gachalpen ni ngar meybilgad ni nge lungurad, “Nge yib gil’ilungum ngomad,” ma re Gil’ilungun nem e ereram kenggin e machib rok Jesus. (Matthew 6:10; Luke 4:43) Mmich u wan’ e Pi Mich Rok Jehovah ni Gil’ilungun Got e reb e am nib riyul’ u tharmiy ni ra gagiyegnag e fayleng ma kan duguliy Jesus Kristus ni nge mang Pilung riy. Begaar e Bible: “Bayi mang pilung rodad. Gelngin nib pilung e bay i ga’ i yan; gin ni bay i gagiyeg riy e yugu bay i par u fithik’ e gapas.”—Isaiah 9:6, 7, KJ.

Machane gathi ke mus ni Jesus Kristus e bayi pilung ko am rok Got. Ya ku boor e girdi’ nra un ngak ko pilung u tharmiy. I yog apostal Paul ni gaar: “Faanra ud k’adan’dad i yan, ma ku er rogon ni gadad ra un ngak ko gagiyeg.” (2 Timothy 2:12) I tamilangnag e Bible ni pi girdi’ ni ra fas ko yam’ ngar uned ngak Kristus ko gagiyeg e yad “raay nge aningeg i ragag nge aningeg i biyu’ e girdi’ ni kan biyuliyrad u fayleng.”—Revelation 14:1, 3.

Ma faanra bay reb e am, ma dabi siy ni bay e girdi’ ni ra par u tan pa’ e re am nem, ere mmich u wan’ e Pi Mich Rok Jehovah ni bay bokum billion e girdi’ ni gathi yad e pilung nu tharmiy ni ku rayog e yafas ni manemus ngorad. Ra thil rarogon e fayleng nge pardis ma ra sug ko girdi’ ni ma par u tan Gil’ilungun Got ni yad ma fol ko gagiyeg rok Kristus nge piin ni yad ra un ngak ko gagiyeg. Ere rib mich u wan’ e Pi Mich Rok Jehovah ni dabi pil e fayleng ma ra riyul’ e n’en ni ke micheg e Bible ni gaar: “Piin ni yad mmat’aw e bay ra pired u daken e fayleng u fithik’ e gapas, me par ni taferad ni dariy n’umngin nap’an.”—Psalm 37:29; 104:5.

Machane uw rogon nra yib Gil’ilungun Got? Ra yib u nap’an ni ra ognag urngin e girdi’ yad nga tan pa’ e am rok Got, fa? Danga’, ya i yog e Bible ni nap’an ni ra yib Gil’ilungun Got ma thingari rin’ Got ban’en u fayleng: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”—Daniel 2:44.

Wuin e ra yib Gil’ilungun Got? Bochan fapi thin ko profet ni ke riyul’ e ngiyal’ ney, mmich u wan’ e Pi Mich Rok Jehovah ni ra yib ni dabi n’uw nap’an. Gamad be piningem ni ngam lemnag boch e thin ko profet u morngagen e “tin tomren e rran” ko re m’ag nib kireb ney. Bay boch e pi thin ney u Matthew 24:3-14; Luke 21:7-13, 25-31; nge 2 Timothy 3:1-5.

Bochan e ‘ba t’uf Jehovah ni Got romad u polo’ i gumercha’mad nge yafas romad, nge lanin’mad nge gelngimad, ma ku bochan nib t’uf e girdi’ romad,’ dagur yoor raba’gad ni bochan e ba thil e pi nam romad, ara raen dowmad, ara yalen romad. (Mark 12:30, 31) Gamad ba lingagil ni bochan e t’ufeg ni bay u fithik’ e pi walagmad ni girdien Kristus ni yad bay u gubin e nam. (John 13:35; 1 John 3:10-12) Ere gamad ma par u mathilin e pi am nu fayleng. Gamad ma athamgil ni nggu woded e tin somm’on i gachalpen Jesus, ni i weliy Jesus u morngaagrad ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:16) Mmich u wan’mad ni gamad ra dar ko fayleng ni faan gamad ra palog ko ngongol nde yalen ni yibe rin’ e ngiyal’ ney, ni aram e malulfith, nge moro’ro’, nge ngongol ko darngal, nge homosexuality, nge racha’ ni yima fanay, nge meybil ko liyos nge yugu boch ban’en nib togopuluw ko machib ko Bible.—1 Korinth 6:9-11; Efesus 5:3-5; Acts 15:28, 29.

Pi N’en Ni Bay Nga M’on Nib L’agan’mad Ngay

Mmich u wan’ e Pi Mich Rok Jehovah ni gathi ke mus ni yafas rodad e chiney e bay. Ya mich u wan’mad ni ke l’og Jehovah Kristus nga fayleng ni nge puog rachaen nga but’ ni nge biyuliy e girdi’ ni fan ni ngar mat’awgad u p’eowchen Got ma nge yog e yafas ni manemus ngorad u lan reb e m’ag nib biech. I yog reb e apostal rok Jesus ni gaar: “Rachaen e ke mat’awnagdad ngak Got.” (Roma 5:9; Matthew 20:28) Ri ma pining e Pi Mich Rok Jehovah e magar ngak Got nge Fak ni bochan e fare biyul ni ra yognag e yafas ni manemus.

Rib pagan’ e Pi Mich Rok Jehovah ngay ni rayog e yafas u nap’an ni ra fas e piin ni kar m’ad u tan e gagiyeg nra tay Gil’ilungun Got. Mmich u wan’mad ni nap’an nra yim’ be’ ma daki fas u bang ma “re rran nem e ke m’ay e tafinay rok” ya aram e n’en ni yog e Bible. (Psalm 146:3, 4; Ezekiel 18:4; Ecclesiastes 9:5) Machane rayog ni ngki fas e piin ni kar m’ad u nap’an ni ra faseg Got e yam’.—John 5:28, 29.

Ma kub mich u wan’ e Pi Mich Rok Jehovah ni boor e girdi’ ni ka yad ba fas ni yad ra magay nib fas u nap’an ni ra thang Gil’ilungun Got e pi am nu fayleng, ma yad ra wod rogon Noah nge chon e tabinaw rok ni yad ra falfalan’ ko yafas ni manemus u fayleng ni ke biech. (Matthew 24:36-39; 2 Peter 3:5-7, 13) Machane thingar ni fol ko pi motochiyel rok Jehovah ni fan ni ngan magay ni yi ba fas, ni bod rogon ni yog e Bible ni gaar: “Re fayleng ney e bayi m’ay . . . machane en nra rin’ e tin nib m’agan’ Got ngay e ra par nib fos ndariy n’umngin nap’an.”—1 John 2:17; Psalm 37:11; Revelation 7:9, 13-15; 21:1-5.

Dabiyog ni ngada weliyed urngin e machib ko Pi Mich Rok Jehovah u lan e gi babyor ney, machane gamad be pi’ e athamgil nga lanin’um ni ngam nang boch morngaagmad.

Fapi thin ko Bible ni kan bieg u lan e gi babyor ney e yib ko New World Translation of the Holy Scriptures.

[Blurb on page 4]

Kug fanayed fare ngochol ni Pi Mich Rok Jehovah ni bochan e gamad ma folwok rok Jesus