Rogon ni Ngan Weliy Murung’agen Gil’ilungun Got

Guruy ni 1: Uw rogon nrayog ni ngad rin’ed fare maruwel ni kan tay chilen ngodad ni aram e ngad weliyed murung’agen Gil’ilungun Got? Rayog ni ngad weliyed murung’agen boch ban’en nib thilthil ya nge yag ni adag e girdi’ ni ngar motoyilgad ngodad. Machane, susun ni ngad guyed rogon ni nge tamilang u wan’rad ni Gil’ilungun Got e gad be weliy murung’agen.

Reb e ban’en nib ga’ fan ni gad ma rin’ ko re maruwel ney e aram e gad ma beeg ara gad ma weliy boch e thin nu Bible ni be weliy murung’agen Gil’ilungun Got. Nap’an ni ga be weliy murung’agen e re n’ey, mag guy rogon ni nge nang e girdi’ ko mang e re Gil’ilungun nem ni ga be weliy murung’agen. Ere, dabisiy ni gathi kemus ni nga mog ni Gil’ilungun Got e aram reb e am. Ya bay boch e girdi’ nib mo’maw’ ni ngar taareb rogonnaged e am nga ban’en ndab ni guy. Ere, boor e kanawo’ nrayog ni ngam ayuwegrad riy ya nge yag ni tamilang u wan’rad e re n’ey. Bod nrayog ni nga mog ni nifeng e dabiyog ni ngan guy, machane ma ayuwegdad. Ku dabiyog ni ngad guyed e En ni sunmiy e nifeng, machane ba tamilang ni ir be’ nib gel gelngin. Be yog e Bible ni ir “fare Pilung ni bay i par ndariy n’umngin nap’an.” (1 Tim. 1:17) Maku reb e, rayog ni ngam susunnag nga reb e nam nib ga’ ni boor e girdi’ riy ni dawor ra uned ko fare mach ni bay e tochuch ko am rorad riy ara ra guyed e pilung rorad. Machane, ba ga’ ni yad ma guy ara yad ma rung’ag murung’agen ko news. Ere, ku er rogon e Bible ni be weliy murung’agen Gil’ilungun Got, ma ke pag 2,200 mit e thin ni kan pilyeg ngay. Ku ma weliy ngodad murung’agen e en ni kan pi’ mat’awun ni nge gagiyegnag e re Am nem nge n’en ni be rin’ e re am nem. Fare Wulyang ko Damit ni kan pilyeg nga boor mit e thin e kan ngongliy ni nge “Weliy Morngaagen Gil’ilungun Jehovah.” Dariy ba ken e babyor ni kan ngongliy u roy u fayleng ni taareb rogon ko re ke babyor ney.

Ra ngam ayuweg e girdi’ ni nge tamilang u wan’rad ko mang e re Gil’ilungun nem, ma rayog ni ngam weliy murung’agen boch ban’en ni yad baadag ni ngar guyed ni ke rin’ e pi am, ni aram e: ngar pithiged e magawon ko salpiy, mar ayuweged e fayleng nge gapas, me tal e girdi’ i ngongliy e oloboch, me tal e gafgow ni yibe tay ko girdi’ u boch e nam ni bochan e ba thil raen dowrad ara thin rorad ara gin nra bad riy, nge magawon ko skul, nge tafalay. Mu tamilangnag ni kemus ni goo Gil’ilungun Got e rayog ni nge pithig e pi magawon ney me pi’ e tin nib t’uf ko girdi’.​—Ps. 145:16.

Mu guy rogon ni ngam ayuweg e girdi’ ni ngar adaged ni ngar uned ko par u tan Gil’ilungun Got ni Jesus Kristus e ir e Pilung riy. Mu weliy murung’agen e pi maang’ang ni i ngongliy Jesus kakrom ni be dag e n’en nra rin’ u nap’an nra tabab ko gagiyeg ni ir e Pilung. Mu weliy murung’agen pi fel’ngin Jesus. (Matt. 8:2, 3; 11:28-30) Mu weliy ngorad ni ke yim’ ni fan ngodad, ma ke faseg Got ke sul nga tharmiy ndab ki yim’ biid. Ma ra par u tharmiy nge gagiyeg nib Pilung.​—Acts 2:29-35.

Guruy ni 2: Mu tamilangnag ni ke tabab Gil’ilungun Got ko gagiyeg u tharmiy. Machane, dab mu pagtalin ni yooren e girdi’ e darur guyed e mich riy nriyul’ ni ke tabab e re am nem ko gagiyeg. Ere, rayog ni nga mog e re n’ey ngorad, mag fith ko yad manang e pow riy ni weliy Jesus Kristus murung’agen fa danga’. Mu tamilangnag yu yang ko fare pow ni bay murung’agen ko Matthew ko guruy ni 24, ara Mark ko guruy ni 13, ara Luke ko guruy ni 21. Ngemu’ mag fith ko mang fan ni ke buch e pi n’ey u tomuren ni tabab Kristus ko gagiyeg u tharmiy. Mag tamilangnag fare thin ni bay ko Revelation 12:7-10, 12.

Mu beeg e Matthew 24:14 ni be weliy murung’agen reb e ban’en ni be rin’ Gil’ilungun Got, mag weliy murung’agen e fol Bible ni yima tay ko girdi’ e ngiyal’ ney. (Isa. 54:13) Mu weliy ko girdi’ murung’agen e pi skul ni be un e Pi Mich Rok Jehovah ngay ndariy puluwon, ma yima weliy e thin nu Bible riy. Mu kum weliy ni gathi kemus ni gad ma machib u mit e tabinaw, ya ku gad ma fil e Bible ko girdi’ u tabinaw rorad ndariy puluwon, ma yibe rin’ e re maruwel ney u boor ko 230 e nam u fayleng. Kun am e rayog rok ni nge rin’ ban’en ni aray rogon ni fan ko girdi’ u ga’ngin yang e fayleng? Mu pining e girdi’ ni ngar bad nga Kingdom Hall, mar uned ko pi assembly nge convention ni ma tay e Pi Mich Rok Jehovah, ya nge yag nra guyed rogon ni be ayuweg e re skul ney e girdi’.​—Isa. 2:2-4; 32:1, 17; John 13:35.