Mang Fan ni Ngan Lek “Kristus”?

“Faanra ba adag be’ ni nge un ngog, ma thingari pagtalin ir, . . . ngi i lekeg ni gubin e rran.”​—LUKE 9:23.

1, 2. Mang nib ga’ fan ni ngad lemnaged fan ni ngaud leked “fare Messiah”?

AYGUM lemnaged, gimed e piin ni ka fin mu filed e tin riyul’ nge piin fel’ yangaren gelngin e felfelan’ ni ma tay Jehovah u nap’an ni be guymed u fithik’ e pi tapigpig rok e ngiyal’ ney! Nap’an ni ga be ulul ko fol Bible, nge wub ko muulung, ma be ga’ e tamilangan’ rom ko Thin riyul’ rok Got, ma ra t’uf ni ngam fol ko fapi thin ni yog Jesus ni gaar: “Faanra ba adag be’ ni nge un ngog, ma thingari pagtalin ir . . . ngi i lekeg ni gubin e rran.” (Luke 9:23) Be yog Jesus u roy nthingar mu pagtilnem nguum lek. Ere, rib ga’ fan ni ngad lemnaged fan ni ngaud leked “Kristus.”​—Matt. 11:2, 3.

² Ma uw rogon e pi arodad ni yad be lek luwan ay Jesus Kristus? Kan tay chilen ngodad ni ‘ngad athamgilgad boch.’ (1 Thess. 4:1, 2) Demtrug ko kafin da uned ko tin riyul’ fa ke n’uw nap’an, ma faan gad ra fal’eg i lemnag fan ni ngaud leked Jesus ma ra ayuwegdad ni ngad rin’ed e re n’ey ni ke tay Paul chilen ma ud Leked ni gubin ngiyal’. Ere, chiney e gad ra weliy lal i fan ni ngaud leked Kristus.

Ngari Fel’ e Tha’ u Thildad Jehovah

3. Mang l’agruw e kanawo’ nrayog ni ngad nanged murung’agen Jehovah riy?

³ Nap’an ni be non apostal Paul ngak piyu Athens u “p’eowchen fare ulung rok e Areopagus,” me gaar: “[Got] e turguy ko tabolngin e re ngiyal’ i n’en nge yungi n’en ni ngar pired riy! I rin’ e re n’ey ni fan e ngar gayed ir, ma sana mi yad pirieg ko ngiyal’ ni yad be gayiy. Machane bin riyul’ riy e dariy bagadad nib mal’af Got rok nga orel.” (Acts 17:22, 26, 27) Rayog ni ngad gayed Got me yoor ban’en nda nanged u murung’agen. Bod nnap’an ni gad ra fal’eg i yaliy e tin ke sunmiy Jehovah ma rayog ni ngad guyed pi fel’ngin riy maku boor ban’en ni gad ra fil riy. (Rom. 1:20) Ku boor ban’en ni gad ra fil u murung’agen Jehovah ni bay u Bible. (2 Tim. 3:16, 17) Ra ud ‘lemnaged e tin ni ke rin’ Jehovah nrib th’abi fel’’ ma rayog ni yoor ban’en nda nanged u murung’agen.​—Ps. 77:12.

4. Faanra ud leked Kristus, ma uw rogon nra ayuwegdad ni ngari fel’ e tha’ u thildad Jehovah?

⁴ Reb e kanawo’ nrayog ni ngari fel’ e tha’ u thildad Jehovah riy e ngaud leked Kristus. Mu lemnag fene gilbuguwan Jesus u nap’an ni immoy u tooben e Chitamangin ko “ngiyal’ ndawor ni sunumeg e fayleng riy”! (John 17:5) Ir “tabolngin urngin ban’en ni sunumeg Got.” (Rev. 3:14) Bochan ni ir “e bin ni m’on” i Fak Got ma arfan nrib n’uw nap’an ni ur pirew e Chitamangin u taabang. Boor ban’en ni i rin’ Jesus nge Chitamangin u taabang u nap’an ndawori yib nga fayleng. Yow ma par Got u taabang maku yow ma maruwel u taabang, ma rib gel e t’ufeg u thilrow. Gathi kemus ni ma lemnag Jesus rogon ni ma rin’ e Chitamangin ban’en nge rarogon laniyan’ nge pi fel’ngin, ya ku ma fol ko tin ni ma fil u murung’agen e Chitamangin. Angin ni keb riy, e ke m’ug rarogon e Chitamangin rok, ma arfan ni ke yog e Bible ni “taareb rogon yaan ngak Got.” (Kol. 1:15) Rriyul’ nra ud leked Kristus, ma rayog ni ngari fel’ e tha’ u thildad Jehovah.

Rogon ni Ngaud Folwokgad rok Jehovah ni Gubin Ngiyal’

5. Mang e ra ayuwegdad ni ngaud folwokgad rok Jehovah ni gubin ngiyal’, ma mang fan?

⁵ Kan sunmiydad ni gad bod ‘yaan’ Got, ere rayog ni nge m’ug fel’ngin rodad. (Gen. 1:26) I tay apostal Paul chilen ngak e pi Kristiano kakrom ni ngaur ‘folwokgad rok Got, ni bochan e yad pi fak.’ (Efe. 5:1) Faanra ud leked Kristus ma ra ayuwegdad ni ngad folwokgad rok e Chitamangidad nu tharmiy ni bochan e dariy be’ ni ke lem ma ke ngongol ma ke machib ni bod rogon ir ni ma folwok rok Jehovah ni gubin ngiyal’. Gathi kemus ni i machibnag fithingan Jehovah ngan nang u nap’an ni immoy u fayleng ya ku i machibnag boor ban’en u murung’agen nge rarogon Jehovah. (Mu beeg e Matthew 11:27.) Ma i rin’ e re n’ey u daken e thin nge ngongol rok.

6. Mang e be dag e tin ni fil Jesus u murung’agen Jehovah?

⁶ Ke fil Jesus ngodad e n’en ni baadag Got ni ngad rin’ed nge rogon ni ma lemnag Got e pi tapigpig rok u daken e machib ni i tay. (Matt. 22:36-40; Luke 12:6, 7; 15:4-7) Bod nnap’an ni sul nga daken reb fa Ragag i Motochiyel ni be gaar, “dab mu pirew be’ ni gathi mabgol rom,” me weliy rogon laniyan’ Got ko ar’ar ni ma sum u laniyan’ be’ u m’on ni nge rin’ e binem e ngongol. I gaar: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Ex. 20:14; Matt. 5:27, 28) I thilyeg e pi Farise fan fare Motochiyel ni, “nge t’uf rom e pi tafager rom, ma ga fanenikay e pi toogor rom.” Machane me yog Jesus rogon e lem rok Jehovah ngan nang ni gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.” (Matt. 5:43, 44; Ex. 23:4; Lev. 19:18) Gad ra nang rogon laniyan’ Got ma ra ayuwegdad ni ngaud folwokgad rok ni gubin ngiyal’.

7, 8. Mang e gad ra fil u murung’agen Jehovah ko ngongol ni dag Jesus?

⁷ Ki dag Jesus rarogon e Chitamangin u daken e ngongol ni i rin’. Faan gad ra beeg u Bible murung’agen gelngin e runguy ni i tay Jesus ngak e piin ni ke t’uf e ayuw rorad, nge rogon ni i thamiy e gafgow ko piin ni kar gafgowgad, nge damumuw ni tay ngak pi gachalpen nra puwan’gad ngak fapi bitir ni faan ra bad ngak ma gad ra nang riy rogon laniyan’ Jehovah. (Mark 1:40-42; 10:13, 14; John 11:32-35) Mu lemnag rogon ni gad ra nang e pi fel’ngin Got nrib ga’ fan u daken e ngongol rok Jesus. Ma pi maang’ang ni i ngongliy Jesus e be dag nrib gel gelngin ni demtrug e ngiyal’ nrayog ni nge maruwel ngay. Machane, dariy ba ngiyal’ ni maruwel nga gelngin ni fan ngak fa nge gafgownag be’ ngay. (Luke 4:1-4) N’en ni rin’ ni tuluf fapi ta fol chuway’ ni yad ba chogow u tempel e be dag rogon feni ba mat’aw e ngongol rok! (Mark 11:15-17; John 2:13-16) Machib ni i tay nge thin nib fel’ ni i yog nra taw nga fithik’ i laniyan’ e girdi’ e be dag ni “ka ba ga’” e gonop rok ngak Solomon. (Matt. 12:42) Mang e gad ra yog u murung’agen e t’ufeg ni dag Jesus ni “pi’ e pogofan rok” ni fan ngak e girdi’?​—John 15:13.

⁸ Kari m’ug rarogon Jehovah rok Jesus nrib fel’ rogon nrayog ni nge gaar: “Cha’ ni ke guyeg e ke guy e en ni Chitamangiy.” (Mu beeg e John 14:9-11.) Gad ra folwok rok Jesus ma aram e ku gad be folwok rok Jehovah.

Jesus e Ir e En ni Ke Dugliy Jehovah

9. Wuin nge uw rogon ni mang Jesus e En Ke Dugliy Got?

⁹ Mu lemnag e n’en ni buch u bang ko pul ni October ko duw ni 29 u nap’an ni yan Jesus i guy John ni Tataufe. Faani yib u fithik’ e ran nga talang ni kan taufenag me mab e tharmiy. Me guy John gelngin Got ni ke yib u lang i yib nga but’ ni bod ba bulogol me yib i par nga daken Jesus. Ma aram e ngiyal’ ni mang Kristus ara Messiah. Maku aram e ngiyal’ ni gaar Jehovah: “Ereray Fakag nib t’uf rog ni kari felan’ug ngak.” (Matt. 3:13-17) Aram reb i fan nrib fel’ ni ngad leked Kristus!

10, 11. (a) Mang boch i rogon ni yima yog fare liw ni “Kristus” u nap’an ni yibe weliy murung’agen Jesus? (b) Mang fan nthingar uda athamgilgad ni ngad leked Jesus Kristus?

¹⁰ U Bible, e boor rogon ni ka nog fare liw ni “Kristus” riy u nap’an ni yibe weliy murung’agen Jesus, ni bod e, Jesus Kristus, Kristus Jesus, nge Kristus. Jesus Kristus e ir e som’on ni yog fare ngachal ni “Jesus Kristus,” ni aram e ra yog ngachalen mfini yog e liw rok. Nap’an ni be meybil ngak e Chitamangin me yog ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Re thin ney e be weliy murung’agen e en ni ke l’og Got ma ke Dugliy. Faanra nga nog e liw rok ni som’on mfin nog fithingan nga tomren, ni bod e “Kristus Jesus,” ma aram e yibe gagiyelnag e liw rok ma gathi en bay ko fare liw. (2 Kor. 4:5) Ma faanra nog e “Kristus” ma ku aram reb e kanawo’ ni ngan gagiyelnag e liw rok ni ir fare Messiah.​—Acts 5:42.

¹¹ Demtrug rogon ni yima fanay fare liw ni “Kristus” ni ngan weliy murung’agen Jesus, machane be tamilangnag e re n’en ni baaray nib riyul’ mab ga’ fan ni aram e: Yugu aram rogon ni yib Fak Got nga fayleng nib girdi’ me machibnag e n’en nib m’agan’ e Chitamangin ngay ngan nang, machane gathi kemus ni yugu ba girdi’ fa yugu ba profet; ya yib ni nge mang e En ni Ke Dugliy Jehovah. Ere, thingar da athamgilgad ni ngad leked, ni ir e En ni Kan Dugliy.

Jesus e Ir Kanawoen e Yafas

12. Mang e yog Jesus ngak Thomas ni apostal nib ga’ fan?

¹² Ku reb i fan nrib ga’ fan ni ngaud leked fare Messiah e ba tamilang ko thin ni yog Jesus ngak e pi apostal rok in e awa nga m’on ni nge yim’. Nap’an ni be fulweg Jesus e deer rok Thomas ko n’en ni yog ni nge yan nge ngongliy tagil’rad, me gaar: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:1-6) Ngiyal’ nem e be non Jesus ngak fa 11 i apostal rok ni yad ba yul’yul’. Ke micheg ngorad nra ngongliy tagil’rad u tharmiy, machane pi thin nem e ku bay rogon ngak e piin ni yad be athapeg e yafas ni manemus u fayleng. (Rev. 7:9, 10; 21:1-4) Ni uw rogon?

13. Uw rogon ni Jesus e ir e “kanawo’”?

¹³ Jesus Kristus e ir e “kanawo’” ni be yip’ fan ni kemus ni goo ir e rayog ni nga darod u daken ngak Got. Riyul’ e re n’ey u nap’an ni yira meybil. Kemus ni faan gad ra meybil ngak Got u daken fithingan Jesus e rayog ni nge fulweg Got taban e meybil rodad. (John 15:16) Ku bay reb i rogon ni Jesus e ir e “kanawo’.” Denen e ke palognag e girdi’ rok Got. (Isa. 59:2) Ere, ke pi’ Jesus e “pogofan rok nge biyuliy boor e girdi’ ngay.” (Matt. 20:28) Rogon angin ni ke yog e Bible e: “Rachaen Jesus ni Fak e ir e be beechnagdad u urngin e denen rodad.” (1 John 1:7) Ere Jesus e ke bing e kanawo’ ngodad ni ngad manged tafager rok Got. (Rom. 5:8-10) Rogon me fel’ e tha’ u thildad Got e faanra mich Jesus u wan’dad ma gad fol rok.​—John 3:36.

14. Uw rogon ni Jesus e ir e “tin riyul’”?

¹⁴ Jesus e ir e “tin riyul’” ni gathi kemus ni bochan e i machib ma be ngongol nrogon nib puluw ko tin riyul’ ya ku bochan e gubin ban’en nni yiiynag ni murung’agen fare Messiah me ir e lebug u daken. I yoloy apostal Paul ni gaar: “Ir e aram e ‘Ke fel’’ rok Got ngak urngin ban’en ni yog Got ni bay rin’ ngak e girdi’.” (2 Kor. 1:20) Ki mada’ ko “tin nri ir ban’en” nnog u lan fare Motochiyel nni pi’ ngak Moses ni ki riyul’ u daken Kristus Jesus. (Heb. 10:1; Kol. 2:17) Gubin e thin ni kan yiiynag ma bay rogon ngak Jesus ma gubin nra ayuwegdad ni ngad nanged fan e n’en ra rin’ ni fan e nge lebug e tin nib m’agan’ Jehovah ngay. (Rev. 19:10) Ra nge fel’ rogodad ko n’en nib m’agan’ Got ngay nra lebug ni fan ngodad, mab t’uf ni ngad leked fare Messiah.

15. Uw rogon ni Jesus e ir e “yafos”?

¹⁵ Jesus e ir e “yafas” ni bochan e ke chuw’iy e girdi’ nga rachaen, ma yafas ni manemus e ba tow’ath ni ke pi’ Got u daken “e Somol rodad i Jesus Kristus.” (Rom. 6:23) Ku ir e “yafas” ni fan ngak e piin ni kar m’ad. (John 5:28, 29) Am lemnag e n’en nra rin’ u nap’an ni ke mang Prist nib Tolang ko ngiyal’ nra gagiyeg u lan fare Biyu’ e Duw. Ra chuweg e piin ni yad ra par u tan e gagiyeg rok u pa’ e denen nge yam’!​—Heb. 9:11, 12, 28.

16. Mang fan ni ngaud leked Jesus?

¹⁶ Fulweg ni pi’ Jesus ko deer rok Thomas e ri bay rogon ngodad. Jesus e kanawo’, ma ir e tin riyul’ ma ir e yafas. Ir e en ni l’og Got nga fayleng ni nge thapeg e girdi’ ngak Got. (John 3:17) Dariy be’ nrayog ni nge yan ngak e en Chitamangiy ya kemus ni Jesus e ra yan u daken ngak. Ba tamilang e n’en ni ke yog e Bible ni gaar: “Dakuriy yugu reb e ngachal nga bayang u roy u fayleng ni pi’ Got ngak e girdi’, ni ir e rayog rok ni nge thapegdad ngak Got.” (Acts 4:12) Ere, demtrug e n’en ni immoy nib mich u wan’dad kafram, ma gad ba gonop ni faanra mich Jesus u wan’dad, ma gad lek nge pow’iydad i yan ko yafas.​—John 20:31.

Kan Tay Chilen Ngodad ni Ngaud Motoyilgad Ngak Kristus

17. Mang nrib ga’ fan ni ngaud motoyilgad ngak Jesus?

¹⁷ Peter nge James nge John e aram e piin ra guyed Jesus ni ke thil yaan. Mar rung’aged ba lam u tharmiy ni gaar: “Ereray Fakag, ni ir e kug turguy ere mu telmed ngak!” (Luke 9:28, 29, 35) Rib ga’ fan ni ngad folgad ko fare motochiyel ni ngaud motoyilgad ko fare Messiah.​—Mu beeg e Acts 3:22, 23.

18. Uw rogon ni ngaud motoyilgad ngak Jesus Kristus?

¹⁸ Ra ngaud motoyilgad ngak Jesus mab muun ngay ni ‘ngad l’eged owchedad ngak, mu ud tafinayniged e ngongol nib fel’ ni i rin’ ni ngad folwokgad riy.’ (Heb. 12:2, 3) Arfan nrib ga’ fan ni ngad “chichiiyed pa’dad” ko tin ni gad ma fil u murung’agen Jesus u lan e Bible ngu lan e pi babyor ni be fal’eg “fare tapigpig nib yul’yul’ ma ba gonop,” ngu nap’an e muulung. (Heb. 2:1; Matt. 24:45) Bochan ni gad e pi saf rok, ma rib ga’ fan ni ngaud motoyilgad ngak ma gad be lek.​—John 10:27.

19. Mang e ra ayuwegdad ni ngad ululgad i lek Kristus?

¹⁹ Gur, rayog ni ngad ululgad i lek Kristus ndemtrug e n’en nra buch rodad? Rayog, ni faanra ‘dab da paged fapi thin nib riyul’’ ni aram e ngaud folgad ko tin gad be fil “u fithik’ e michan’ nge t’ufeg ni ma yog ngodad ko taab girdi’ ni gadad ma tay Kristus Jesus.”​—2 Tim. 1:13.

Mang e Kam Fil?

• Mang ni rra fel’ e tha’ u thildad Jehovah nfaanra ud leked “Kristus”?

• Mang ni faan gad ra fol rok Jesus ma aram e ku gad be fol rok Jehovah?

• Uw rogon ni Jesus e ‘kanawo’, nge tin riyul’, nge yafas’?

• Mang fan ni ngaud motoyilgad ngak e En ni Ke Dugliy Jehovah?

[Picture on page 29]

I m’ug rarogon e lem rok Jehovah ko thin ni i machibnag Jesus ngak e girdi’

[Picture on page 30]

Thingar da leked e En ni Ke Dugliy Jehovah u fithik’ e yul’yul’

[Picture on page 32]

Ke gaar Jehovah: “Ereray Fakag . . . ere mu telmed ngak!”