‘Moy Ngam Un Ngog’

“Faanra ba adag be’ ni nge un ngog, ma thingari pagtalin ir, . . . ngi i lekeg.”​—LUKE 9:23.

1, 2. (a) Mang e ke piningey Jesus ngay ni ngan rin’? (b) Mang e kam rin’ u nap’an ni ke piningem Jesus?

NGIYAL’ ni be machib Jesus u Perea ni bay nga barba’ yu Jordan ko lel’uch ni ngek u Judea, meb be’ nib moon ngak nge fith ko mang e ra rin’ me yog e yafos ndariy n’umngin nap’an ngak. Nap’an ni nang Jesus nri be fol fare moon ko fapi Motochiyel ni i pi’ Got u daken Moses, me pining ni nge un ngak. I gaar ngak: “Mman ngam pi’ ni chuway’ urngin ban’en ni ba’ rom ma ga fek e salpiy riy ngam pi’ ngak e piin ni yad ba gafgow, ma aram e ke yog e flaab ngom u tharmiy; ma ga yib ngam un ngog.” (Mark 10:21) Am lemnag ni nge piningem Fak Got Nth’abi Tolang ni kari maagirag rok!

² De m’agan’ fare moon ni nge un ngak Jesus, machane bay boch e girdi’ ni m’agan’rad ngay. U m’on ni non Jesus ngak fare moon, ma ke mu’ i yog rok ngak Filip ni gaar: “Mu un ngog nga darow!” (John 1:43) Ke m’agan’ Filip ngay ni nge un ngak me munmun me mang reb e apostal. Ku arrogon ni yog Jesus ngak Matthew miki m’agan’ ngay. (Matt. 9:9; 10:2-4) Taab n’en e ki yog Jesus ngak e piin ni yad baadag e tin nib mat’aw u nap’an ni gaar: “Faanra ba adag be’ ni nge un ngog, ma thingari pagtalin ir, . . . ngi i lekeg.” (Luke 9:23) Ere demtrug be’ nrayog ni nge un ngak Jesus nfaanra baadag. Me gur, ga baadag ni ngam un ngak Jesus, fa? Yooren i gadad e aray e n’en ni ke rin’. Ere gad baadag ni nge rin’ urngin e girdi’ ni aray rogon.

3. Uw rogon ni ngad uned ngak Jesus ndab da man’gad nga orel?

³ Machane, n’en nib kireb riy e boch e girdi’ e immoy ni yad baadag e fol Bible, me munmun mar talgad. Som’on e ra malmalgad me munmun ma dakur uned ngak Jesus ni bod be’ ni be ‘man’’ i yan nga orel. (Heb. 2:1) Ra diin ma dabda awgad ko re wup nem? Ba manigil ni ngad fithed gadad ni nge lungudad: ‘Mang fan ni gu mel’eg ko som’on ni nggu un ngak Jesus? Ma mang e be yip’ fan ni ngad uned ngak?’ Faanra ud lemnaged e fulweg ko gal deer ney ma ra ayuwegdad ni ngad pired ko kanawo’ nib mat’aw ni kad mel’eged. Ku ra ayuwegdad ni ngad pied e athamgil nga laniyan’ e girdi’ ni ngkur uned ngak Jesus.

Mang Fan ni Ngan Un Ngak Jesus?

4, 5. Mang fan nrayog rok Jesus ni nge pow’iydad?

⁴ I gaar Jeremiah ni profet: “Somol, gu manang ni dariy bagamad ni ir e ga’ ko gin nge sor e yafos rok ngay; dariy be ni bay gafan e yafos rok u pa’.” (Jer. 10:23, BT) Pi n’en ni i buch kakrom ke mada’ ko chiney e ke micheg nib riyul’ e n’en ni yog Jeremiah ndabiyog rok e girdi’ nde flont ni ngar gagiyegniged yad. Ke m’agan’dad ngay ni ngad uned ngak Jesus ni bochan e kad nanged ni ir e rayog ni nge Pow’iydad u reb e kanawo’ ndabiyog rok e girdi’. Mu lemnag boch i fan nrayog rok.

⁵ Bin som’on e, Jehovah e mel’eg Jesus ni nge mang Messiah ni Pilung. Kemus ni goo En ni Sunmiydad e ir e manang e cha’ ni nge mel’eg ni nge mang Pilung rodad. Bin migid e, bay fel’ngin Jesus nrayog ni nge m’ug ko ngongol rodad. (Mu beeg e Isaiah 11:2, 3.) Ir e ke dag e bin th’abi fel’ e kanawo’ ni ngad folwokgad riy. (1 Pet. 2:21) Bin dalip e, ri ma lemnag Jesus e piin yad ma un ngak ya ke yim’ ni fan ngorad. (Mu beeg e John 10:14, 15.) Ma pow’iydad i yan ko yafos ni bay e felfelan’ riy e chiney i yan ngaram ni bod ba tachugol saf ni ma ayuweg e saf rok. (John 10:10, 11; Rev. 7:16, 17) Ba fel’ e n’en ni kad dugliyed ni ngad rin’ed u nap’an ni kad mel’eged ni ngad uned ngak Jesus ni bochan fa dalip i n’en ni kad weliyed, maku boor fan. Machane, ra ngan un ngak Jesus ma mang e mmuun ngay?

6. Ra ngan un ngak Jesus ma mang e mmuun ngay?

⁶ Faanra ngad uned ngak Kristus ma gathi kemus ni nga u dogned ni gadad e Kristiano. Sogonap’an l’agruw bilyon e girdi’ e ngiyal’ ney ni yad ma yog ni yad e Kristiano machane ngongol rorad e be dag ni yad ma “rin’ e kireb.” (Mu beeg e Matthew 7:21-23.) Gad ma fal’eg i yog ngak e piin ni yad baadag ni ngar uned ngak Jesus ni tin riyul’ e Kristiano e yad ma taarebnag e yafas rorad u gubin e rran ko machib nge ngongol rok Jesus. Ngad susunnaged fan e re n’ey u boch ban’en ni gad manang u murung’agen Jesus.

Ngan Folwok ku Jesus nib Gonop

7, 8. (a) Mang e gonop? (b) Ke diin nrib gonop Jesus? (c) Uw rogon ni dag Jesus nib gonop? (d) Uw rogon ni ngad folwokgad rok?

⁷ Boor fel’ngin Jesus ni ma m’ug ko ngongol rok machane kemus ni aningeg riy e gad ra weliy, ni aram e: gonop rok nge sobut’an’ nge pasig nge t’ufeg. Bin som’on e gonop rok. Re n’em e, aram e rogon ni ma maruwel ko tamilangan’ nge llowan’ rok nib fel’ rogon. I yoloy Paul ni apostal ni gaar: “[Jesus] fare kiy ni ma bing urngin e pi n’en nib fel’ ni ke tay Got nib mith, ni aram e gonop rok nge llowan’ rok.” (Kol. 2:3) Uw e fek Jesus e gonop rok riy? I gaar: “Gu be yog e tin ni ke yog e en ni Chitamangiy ngog ni nggog.” (John 8:28) Jehovah e pi’ e gonop ngak, ere aram fan nrib fel’ rogon ni ma dugliy ban’en.

⁸ Rib fel’ rogon ni dugliy Jesus e n’en ni nge rin’ ko yafas rok. Ke dugliy ni nge tiyan’ nga taab n’en ni aram e nge fanay gelngin nge tayim rok i rin’ e tin nib m’agan’ Got ngay. Ere ku arrogodad ni gad ma folwok rok Jesus ma gad ma gay rogon ni ngad siyeged e tin ndariy fan ni yima mit riy. (Matt. 6:22) Boor e Kristiano ni kar siyeged e tin ndariy fan ko yafas rorad ma kar yoornaged e tayim rorad ni fan ko machib. Boch i yad e ke yog ni ngar uned ko machib u polo’ e tayim rorad. Faanra gur bagayad ma rib fel’ e n’en ni kam rin’. Faanra ‘mmon’eg u wan’um e gagiyeg rok Got’ ma ri ga ra felfelan’.​—Matt. 6:33.

Mbod Jesus nib Sobut’an’

9, 10. Uw rogon ni m’ug nrib sobut’an’ Jesus?

⁹ Bin migid i fel’ngin Jesus ni gad ra weliy e sobut’an’. Girdi’ e nap’an ni yad ra par nga reb e liw nib tolang ma kar lemnaged ni kari ga’ farad. Machane, Jesus e rib thil! Yugu aram rogon ni ir e kan pi’ e bin th’abi tolang e maruwel ngak ko n’en nib m’agan’ Jehovah ngay, ma de tolangan’. Ere yibe pi’ e athamgil nga lanin’dad ni ngad folwokgad rok ko re n’ey. I yoloy Paul ni apostal ni gaar: “Rogon e lem nge pangin ni nge yog ngomed e fare lem nge fare pangin ni immoy rok Kristus Jesus ni baaray: Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’.” (Fil. 2:5-7) Mang e ba muun ko re n’em?

¹⁰ Yugu aram rogon nri baadag Jesus ni be par ko Chitamangin u tharmiy me m’agan’ ngay ni nge “pag e flaab rok ni gubin.” Min ngal’uweg e yafas rok nga yin be’ nib pin nib Jew ndawori nang e pumoon. Me ni mereb e pul min gargeleg nib flont mu unog ni fak Josef nreb e daiksang. Min chuguliy nge ilal u tafen Josef. Yugu aram rogon nib flont ma ri ma fol ko gallabthir rok ndar flontgow. (Luke 2:51, 52) Ere, riyul’ nrib sobut’an’!

11. Mang boch e kanawo’ ni ngad folwokgad rok Jesus nib sobut’an’?

¹¹ Faanra m’agan’dad ngay ni ngad rin’ed e maruwel nde ga’ fan u wan’ e girdi’ ma aram e gad be folwok rok Jesus nib sobut’an’. Bod fare maruwel ni machib. Ba ga’ ni ma sap e girdi’ ngay nib maruwel nde ga’ fan u nap’an ni yibe moningnagdad. Machane, faan gad ra ulul ko re maruwel ney ma aram e gad be ayuweg e tin ni ka bay e girdi’ ni ngar uned ngak Jesus ma gad be ayuweg e yafas rorad. (Mu beeg e 2 Timothy 4:1-5.) Ku reb e, klin ni gad ma tay u Kingdom Hall rodad ni bod e, puog tafen e dow nge wolguw nge klin u kolosis nge ku boch e maruwel. Pi maruwel ney e dariy fan u wan’ e yug girdi’. Machane, gad manang ni bang ko pigpig ni gad be tay e nge par e Kingdom Hall nib beech me par ni tagil’ e bin riyul’ e liyor. Faanra ud rin’ed e pi maruwel ney nib m’agan’dad ngay nde ga’ fan u wan’ e girdi’ ma aram e gad ba sobut’an’ ma gad be folwok rok Kristus.

Mu Pasig ni Bod Jesus

12, 13. (a) Uw rogon nib pasig Jesus ko machib, ma mang fan? (b) Mang fan ni gad ba pasig ko machib?

¹² Mu lemnag fene pasig Jesus ko machib. Boor ban’en ni rin’ u nap’an ni immoy u fayleng. Nap’an ni kab bitir ma ur maruwelgow Josef ni chitamangin ni pof ni yow e daiksang. Ma boor e maang’ang ni i ngongliy u nap’an ni be machib. I golnag e m’ar ma be faseg e yam’. Machane, gathi ri ireram e maruwel rok, ya maruwel rok e nge machibnag fare thin nib fel’ ngak e piin ni yad baadag ni ngar motoyilgad. (Matt. 4:23) Ere ku aram rogon e maruwel rodad. Uw rogon ni ngad folwokgad rok? Reb e, fan ni gad ma machib e nge taareb rogon nga fan ni i machib Jesus.

¹³ T’ufeg rok Jesus ngak Got e ri aram fan ni i machib. Machane ri kub t’uf e thin riyul’ rok. Bod e machaf nib tolang puluwon u wan’ ma baadag ni nge pi’ boch ngak e girdi’. Ere ku aram rogon lanin’dad ni gad boch e ‘tamachib.’ Aygum lemnag boch e pi thin riyul’ nem ni kad filed ko Thin Rok Got! Bod ni kad nanged murung’agen fare magawon ko en ni bay mat’awun ni nge gagiyeg u palpalth’ib nge rogon ni yira pithig. Ma ke tamilang u wan’dad e n’en ni be yog e Bible u rarogon e piin ni kar m’ad nge pi flaab ni bay ko bin nib beech e fayleng rok Got. Yugu demtrug ko ke n’uw nap’dad ko tin riyul’ fa dawor ma pi n’ey e rib ga’ fan ni bod e machaf nib tolang puluwon. (Mu beeg e Matthew 13:52.) Faan gad ra pasig ko machib ma aram e gad be dag ko girdi’ nriyul’ nib t’uf Jehovah rodad nge tin ni kad filed rok.

14. Uw rogon ni ngad folwokgad u rogon e machib ni i tay Jesus?

¹⁴ Kum guy rogon e machib ni i tay Jesus. Gubin ngiyal’ ni ma fal owchen e piin ni ma motoyil ko thin nu Bible. U m’on ni nge yog ban’en nib ga’ fan ma ma gaar: “Fare babyor nib thothup e be gaar.” (Matt. 4:4; 21:13) Gubin e thin rok ni bay u Bible e ba pag e baley e fek ara ba puluw ko babyor ko Bible ni yoloy som’on ni thin ni Hebrew. Gad bod Jesus ni gubin ngiyal’ ni gad ma fanay e thin nu Bible u nap’an ni gad be machib. Faan gad ra rin’ ni aram rogon ma aram e gad be ayuweg e piin ni baadag e machib ngar nanged ni n’en ni gad be fil e gathi gad e yib rodad ya yib rok Got. Gad ma felfelan’ u nap’an nra m’agan’ be’ ngay ni nge beeg e Bible ma gad weliy ngak fel’ngin e Thin Rok Got. Maku ri gad ma felfelan’ u nap’an nra m’agan’ ngay ni ngki un ngak Jesus.

Ngad Uned Ngak Jesus e Be Yip’ Fan ni Ngad T’ufeged e Girdi’

15. (a) Mang reb i fel’ngin Jesus nri kub fel’? (b) Faanra ud fal’eged i lemnag gelngin fadad t’uf rok Jesus ma mang angin ngodad?

¹⁵ Bin tomur i fel’ngin Jesus ni gad ra weliy ni aram e t’ufeg rok ngak e girdi’ e ri kub fel’. I yoloy Paul ni apostal ni gaar: “Gelngin fanmad t’uf rok Kristus e ir e be gagiyegnagmad.” (2 Kor. 5:14) Nap’an ni gad ra fal’eg i lemnag gelngin fene t’uf e girdi’ rok Jesus ni gad ba muun ngay ma ri gad ma felfelan’ ma ra k’aringdad ni ngad folwokgad rok.

16, 17. Mang boch e kanawo’ ni ke dag Jesus riy nrib t’uf e girdi’ rok?

¹⁶ Uw rogon ni dag Jesus nrib t’uf e girdi’ rok? I m’agan’ ngay ni nge pi’ e pogofan rok ni fan ko girdi’. (John 15:13) Machane, nap’an ni be machib maku boor e kanawo’ ni dag riy nrib t’uf e girdi’ rok. Reb e ri ma runguy e piin ni ke kireban’rad. Bod nnap’an ni guy Maria nge boch e girdi’ ni yad be yornag Lazarus ni kem’, mi ri thamiy gelngin e kireban’ rorad. Yugu aram rogon ni be n’en ni nge faseg Lazarus ko yam’, machane ri ki kireban’ “me yor.”​—John 11:32-35.

¹⁷ Ki immoy ba ngiyal’ u tabolngin e machib ni i tay ni yib be’ nib daraw ngak me gaar: “Faanra mm’agan’um ngay ni ngam chuweg e daraw rog ma ga chuweg, ya rayog rom.” Mang e rin’ Jesus? Be gaar e Bible: “Me taganan’ Jesus ngak.” Me rin’ ban’en ndanir rin’ ni aram e “k’iyag pa’ nge math ngak me fulweg ngak ni gaar, ‘Mm’agan’ug ngay, ere nge chuw e daraw rom!’ Ma ka chingiyal’ nem me chuw e daraw rok faanem nge gol.” Rogon ni bay ko motochiyel nni pi’ u daken Moses e piin nib daraw e yad ba alit. Ere rayog ni nge golnag Jesus fare moon ndabi math ngak. Machane math Jesus ngak fare moon u nap’an ni golnag ni bochan e ke yan bokum e duw ndawori math fare moon ngak be’. Kari m’ug ni ir be’ nib ta runguyey.​—Mark 1:40-42.

18. Uw rogon ni ngad daged nriyul’ ni gad ma ‘runguy’ e girdi’?

¹⁸ Gad e piin ni gad be un ngak Jesus e gad be dag nrib t’uf e girdi’ rodad nfaanra ud “runguyed” yad. (1 Pet. 3:8) Ba mo’maw’ ni ngad nanged fan laniyan’ be’ ni keb ba mit e m’ar ngak ni ke n’uw nap’an ma der gol ara be’ ni be mochuch nfaanra dawori buch ban’en rodad ni aram rogon. Machane, ki mus ngak Jesus ndawori m’ar biid ma manang e gafgow ko piin kar m’argad. Ere uw rogon ni ngad boded Jesus ni manang laniyan’ e girdi’? Nap’an ni be weliy be’ salpen ngodad ma ngar da fal’eged i motoyil ngak. Rayog ni ngad fithed gadad ni nge lungudad, ‘Uw rogon e lem rog nfaanra gag e cha’ nem?’ Faanra da athamgilgad ni ngad nanged rogon laniyan’ be’, ma rayog ni ngad ‘pied e athamgil nga laniyan’ e piin ni yad mmeewar.’ (1 Thess. 5:14) Faanra ud rin’ed ni aram rogon ma gad be un ngak Jesus.

19. Mang angin e n’en ni i rin’ Jesus ngodad?

¹⁹ Rib fel’ e n’en ni kad filed ko n’en ni i yog Jesus Kristus nge n’en ni i rin’. Faanra yoor ban’en nda filed u murung’agen Jesus, ma gad ra adag ni ngad boded maku gad ra adag ni ngad ayuweged e tin ni ka bay e girdi’ ni ngar rin’ed e re n’ey. Ere, manga yugu da pired ni gad ba felfelan’ ni gad be un ko fare Messiah ni Pilung e chiney i yan ngaram!

Rayog ni Ngam Weliy?

• Uw rogon ni ngad gonopgad ni bod Jesus?

• Uw rogon ni ngad sobut’an’gad?

• Uw rogon ni ngad pasiggad ko machib?

• Uw rogon ni ngad daged nib t’uf e girdi’ rodad ni bod Jesus?

[Picture on page 8]

I m’agan’ Jesus ngay ni ngan gargeleg nga fayleng ni bochi tir. Ere mang e re fel’ngin nib t’uf ni nge yog ngak?

[Picture on page 10]

Mang e ra k’aringdad ni ngad pasiggad ko machib?